1326-نجي ايلين باھاري ايدي. داريخما منه ال وئرديييندن قصبه‌نين اطرافينا گزمه‌يه چيخميشديم. قات- قات اوجالان سيار داغلارين قوينوندا يئرلشن »مظفّر قالاسي«نين طبيعت گؤزللييي اينسانين روحونو اوخشاييردي. داغلارين اته‌ييندن شاريلتي ايله آخيب، اينسان عؤمرو کيمي گئدن چايلارين ھمھمه‌سي، ھر طرفده قايناييب قالخان دورو بولاقلارين زمزمه‌سي، حزين- حزين اسن يئلدن، رقصه گلن يارپاقلارين پيچيلتيسي، آزاد قوشلارين بوداقدان- بوداغا سيچراياراق، سئوينجله دولو، شيرين نغمه‌لري، مني اوز غم- خيال دونيامدان آييرميش، گول