ديل ايچينده‌کي ديب‌سيز دونيا

بولگه لر سرويسي: بو گؤرَولرين تکرارلايان دوغاسي، ايشينيزي اوتوماتيک اولاراق يئرينه يئتيريب، بئينينيزي بو ايش‌لر اوچون داها آرتيق يورماز. بو دورومدا بئيين تئتا دوروموندا دير و فيکير ياراتماغا باشلايار.

آيهان ميانالي.

سون بولوم

فيکير و ايده يارانارکن فرئکانس‌لارين رقمي ايکيلي باغلي‌ليق‌لاري دؤردلو، آلتيلي، سککيزلي و حتتا اونلو رقمه يوکسه‌له بيلر. بو يوکسه‌ليش رقم‌لردن يوخاري مضرب‌لر ياراداراق، سؤزجوک‌لرين چَرچيوه‌لَنمه‌سينه نه‌دن اولور و آلفا دورومونا يؤنلَنمک اوچون بو کئچيد داها ايچ-ايچه‌ليک بير آلاني اولوشدورماغا چاليشير. بئله‌سه تئتا دورومو تَمل جوتلوک‌لرين يارانيش کئچيدي دير و آلفا دورومونون اولوشماسينا أن گره‌کن کئچيد ساييلير.
بئشينجي دالغا گوجو دئلتا دالغاسي دير.
بئيين‌ده‌کي دالغالارين سون چئشيدي دئلتا آدلانير. بو دالغالار أن چوخ گئنيش‌ليگه و أن دوشوک فرئکانسا صاحاب دير. دئلتا دالغالاري‌نين فرئکانسي 1.5 ايله 4 هئرتز آراسيندا دير. بو دالغالارين فرئکانسي هئچ بير زامان صيفيرا چاتمير، نه‌دن کي صيفيرا چاتيرسا، بئيينين دايانيب، اؤلدوغو آنلامينا گلير. آنجاق درين يوخوسوز (رؤيا) بير يوخودا اولدوغونوزدا، بو دالغالارين فرئکانسي أن دوشوک دورومونا چاتير.
بو قونويا بير داها بئله باخمالي‌ييق:
4 هئرتز فرئکانس‌دان نه‌قدر آشاغي يئنيرسک او قَدر سس‌سيزليک و اينجارسيزليغا چاتيريق. بورادا نورون‌لاري دامغالاماق اوچون گوجلو بير فرئکانس يوخوموز و اينسان بو حاليندا أن دوشونجه‌سيز، أن فيکيرسيز و أن دينج آني‌لاريني ياشايا بيلَر. بئله دئمه‌لي‌ييک کي اؤلومدن بير آدديم ديري‌ليگه دوغرو آتيلان آدديم إله هَمَن دئلتا دالغاسي دير. 1.5هئرتزده اينسان جانلي ساييلير، آنجاق اوندا تپکي و إتکي آدلي بير اولاي اوز وئرمير، او اؤلولوکدن ديري‌ليگه سوروکله‌نيب و هله يوخودا دير. فرئکانس هر آرتديغيندا، نورون‌لار اولاشيم بيچيمينه قوشولوب، اينسان اويانيش و آنلاماق دورومونا گلير. و بورادا تک رقم‌لر يارانماغا باشلاييب، اينجه بير يووارلاق‌ليغي جانلانديرير. بو تک رقم‌لي بيچيم‌لردن يارانان سس‌لر يالنيز بير سيرا حئيوان‌لارين قولاغيندا إشيديله بيلر. بو ايلک تونلو سس‌لر ايچ-ايچه‌ليک سس‌لرين آناسي کيمي گؤرونور و هر هئرتز فرئکانسينا آرتديقدا، نئچه بيچيملي‌ليگه دوغرو آدديم آتيب، اينسانين قولاغي ايله إشيديلَن دوروما چاتير. ياتاغا گئتديگينيزده و ياتمازدان اؤنجه بير نئچه دقيقه کيتاب اوخودوغونوزدا، بئينينيز دوشوک بير بئتا دوروموندا دايانير. کيتابي يئره قويوب، ايشيغي سؤندوروب، سونراسي گؤزلرينيزي يومدوقدا، دالغالارداکي فرئکانس‌لار گئت-گئده آزالير و بئتادان آلفايا و آلفادان تئتايا دَگيشير و سونوندا يوخويا دالديغينيزدا، بئينينيز دئلتا دورومونا گليب چاتير.
اوست-اوسته دئلتا دالغاسي يوخو دوروموندا، دينج‌ليک و سس‌سيزليک و بير چوخ واخت‌لار بيلينجي ألدن وئرديگيميز دورومدا ايزله‌نيله بيلير. دئلتا دالغاسي ? آيدان کيچيک کؤرپه‌لرده أن اوستون دالغا دير. اونلار او ايلک آني‌لاردا ترپه‌نيش و سس ياراتماقدا دئلتا دالغاسي‌نين ايلک گوجونده ديرلر و بعضن اونلاردا بو دالغا ايکي اوچ هئرتزه چاتديقدا ترپه‌نيش و آنلاشيلماز مونوتون‌لار، آغلاييش فورموندا ايزلَنيب-إشيديلير. اونلاردا هر آي کئچديکجه بو دالغانين گئنيش‌ليگي آزالير و بئيينده‌کي نورون‌لار ايله باغلانتي‌لار گوج‌لَنير. آنا بطنينده بير سيرا دئيتالار ايکيلي قورولوش’لا يادداشدا ساخلانيليب و بو اولاي ايله او دئيتالار بئييندن بوغاز تئل‌لرينه و بدن حرکت‌لرينه کؤچورولوب، کؤرپه‌ني او سس‌سيزليک و حرکت‌سيزليکدن قورتارير. فرئکانس‌لار دؤردو آشديقجا هر نه يئني بير يولا آياق باسير و دانيشيق، ترپه‌نيش و دويقولار اؤز بيچيميني اولوشدورماغا باشلايير.
5دالغا گوجو و ساي‌سيزجا يارانان سس و سؤزجوک رقم‌لري
سس حرکتده اولان اوزونجا بير دالغا (longitudinal wave) دير. اينسان‌لار سس دالغالاري‌نين فرئکانسيني اينجه-قالين اولاراق آلقيلايارلار. بو آرا بوتون سس‌لري موسيقي کيمي نظرده آلساق، هر موسيقي نوتو هئرتز جينسيندن اؤلچوله بيلن بَليرلي بير فرئکانسا قارشي‌ليق گلير. بو بَليرلي‌ليک اولا بيلَر کي بير چوخ بيچيم‌لر ايله بيرلَشديکده، ساي‌سيز سس ايلکه‌لريني يارادا و بو يارانيشدان چئشيدلي سس تئم‌لري، دانيشيق هَنگي و أن باشدا دَگيشيک ديل‌لر يارانا. بئيينده ميلياردلار’لا نورون و سينير ايلگيجي وار کي، بونلارين هاميسي بير-بيرينه دريندن و ايچ-ايچه باغلي دير. بو باغلي‌ليق کيچيک بير إلئکتريک آخيمي ايله باشلايير و آرديندان چئشيدلي حيس إديله‌جک و ترپه‌نه‌جک نورون‌لارين بؤيوک و حئيرت إديجي آلانيندا يولا دوشوب، سورَکلي دئيتالاري گؤندَريب، آلماغا باشلايير.
1.5 هئرتزدن باشلاييب، 140 هئرتزه قَدَر بو بئش دالغانين ايشله‌گي ايله تانيش اولدوق، آنجاق بو 138.5 هئرتز فرئکانس آلاني اؤزلوگونده 1000 بؤلومدن اولوشور و بئله‌ليک’له 138500 آلت سايي‌لار ايله قارشي قارشي اولوروق. بونلارين هره‌سي 138499 رقم ايله بيرلَشه بيلير و هر 138499 سس قورولوشو اؤزلوگونده يئنه 138498 رقم ايله يئني سس تون‌لاري‌نين يارانيشينا نه‌دن اولور.
بيز بو سونسوز و ديب‌سيز بير سس بيچيم‌لر ايله اوز-اوزه‌ييک و اونلارين آراسينداکي تابئع‌لره بَليرلي بير قورولوش بيچيمله‌مه‌سي يازا بيلسَک، دونيادا ياشايان بوتون سس‌لرين “ايستر اينسان سسي، ايستر حئيوان‌لارين سسي و حتتا أسَن يئلين سسي‌نين” آنلاميني هئچ بير دئيتاميز اولمازدان باشا دوشوب، اونلاري بير-بيرينه چئويره بيله‌ريک. ديل بير جانلي وارليق اولاراق اونو تاريخين بعضن ساختا يارپاق‌لاري ايله و حتتا اوخشاريق‌لار’لا آنلاييب، اونا دَگر وئرمک اولماز. بو ديلين ايچينده ديب‌سيز بير دونيا ياشايير و او دونياني ديلچي‌ليک و إتيمولوژي بيليم‌لري ايله دَگيل، رياضيات’لا کشف إده بيله‌ريک.بو قونو حاقدا داها أطرافلي اوخوماق اوچون يئني کيتابيميزين يولونو گؤزله‌يين.

منبع :