قوراق‌ليق ايل

بولگه لرسرويسي: هاوا چوخ ايستي‌دير، يايين اورتانجي آيي‌نين آخير گونلري‌دير. هر يئره باخيرسان قوپ- قورو، ائله بيل برهوت‌دور.

داود_پيرعليلو

بولگه لرسرويسي: هاوا چوخ ايستي‌دير، يايين اورتانجي آيي‌نين آخير گونلري‌دير. هر يئره باخيرسان قوپ- قورو، ائله بيل برهوت‌دور.
هر ايل ياشيل گئييم اَينينه گئيينن داغ‌لار دوزن‌لر، ياماج‌لارين گئييم‌لريني گون پؤرتوب ياشيل گئييمين رنگي يانيق رنگينه چئوريليب‌دير. داها آل لالا-لاردان خبر يوخ‌دور.
 نانه پنيري‌نين آغ گول‌لري آراسيندا ساري ياناغي اؤزونو گؤسترمير.
اکينچي‌لر اکن آراپا- بوغدانين سونبول‌لري دَن‌سيزليکدن يئل قووان کيمي اَپري‌ييب، آغ يئل ده‌يمک همن يئلين قوجاغيندا يوز ماللاق ووروب، هره‌سي بير يانا داغيلير.
باغ‌لاردا آغاج‌لارين بوداق‌لاري‌نين چوخو قورويوب.
گؤي- گؤيه‌رنتي‌دن خبر يوخ‌دور. نه بولبول سسي وار باغ‌لاردا، نه ده قئيلان قوش سسي داغ‌لاردا.
کهليک‌لرين ده اوخوماغا حالي قالماييب. سوسوزلوق‌دان يئر- گؤي مه‌له‌يير، يامان قوراق‌ليق‌دير.
گؤي‌ده بولودلاردان دا خبر يوخ‌دور. ساناسان هر يئر، هرنه وار سوسوزلوق‌دان ايلان کيمي ديل چالير. هاوا دا کي، ائله ايستي‌دير تويوق‌لار قوش‌لار جان لاريني الدن وئريرلر، ايستي‌نين تابيني گتيره بيلميرلر. قويون- قوزو آجيندان قورو تيکانا قانع اولوب، تيکان يئييرلر. تيکان يئمک‌دن آغيزلاري‌نين چئوره‌سي، ديل‌لري داماق‌لاري يارادير .
بير اوشاغين قاباغيندا نئچه قويون- قوزوسو وار. بو دره- او دره، بو ياماج-او ياماجي گزديرير، بلکه بير آغيز اوت تاپيب، قويون- قوزونو اوتارا. اونون داوارلاري‌نين آج قالماق‌دان قابيرقالاري ساييلير. يول گئدنده او يان- بو يانا بوللانيرلار. داوارلار بير يئرده دورمورلار، يازيق اوشاغين دده‌سيني يانديريرلار. اوشاق دا يورولوب، داوارلاردا.
گون اورتانين لاپ جيزلاماسي‌نين پيس واختي‌دير . داغين دؤشونده بير سرين بولاق واردير کي، آخاندا سسي‌نين شاققيلتي‌سي داغا دوشردي. داها او سس‌دن ده خبر يوخ‌دور. بولاغين سويو گؤز ياشي تک نارين- نارين آخيب، بير بالاجا گؤلَک‌ده ييغيشير. اوشاق داوارلاري او بولاغا ساري هاي‌لاييب، آپارير سووارا .
ياشيل گوه‌ن‌لر ده قوپ- قورو قورويوب. او قوروموش گَوه‌ن‌لرين ايچيندن کئچيرلر تيکان‌لاري ايينه تکين جيريق باشماق‌لاردان کئچيب، آياق‌لارينا باتا- باتا قويون- قوزونو بولاغا ساري هاي‌لايير. داوارلار کئچه-کئچه آغيزلاريني آج‌ليقدان هرنه‌يه آتيرلار، بلکه بير زاد تاپيب، ييئه‌لر.آمما قورو گَوه‌ن‌لرين تيکان‌لاريندان سورا بير زاد يوخ‌دور .
او قويون‌لارين ايچينده بير قويون واردير کي دوغومو اَرَزنه* قاليب. قوزوسو اييرمي گونلوک‌دور. آناسي‌نين سوتو چوخ آزدير  قوزونو دويورمور. اوحئيوان دا آجيندان مه‌له‌يير. سورودن دالي‌يا قاليب يئريمه‌يه دا حالي قالماييب. اوشاق قوزونو قوجاغينا گؤتوروب بولاغا ساري آپارير. داوارلار نئچه مئتير بولاغا قالاندان گؤله‌يين سويونو گؤروب، قاچا- قاچا سويا تؤکولورلر.
 اوشاق دا، قوزو قوجاغيندا، سويون باشينا يئتيريب، قان تَرين ايچينده قوزونو يئره قويوب بولاغين گؤزه‌سيندن نئچه اُووج سو ايچندن سونرا، ال- آياغيني يويوب، داوارلاري سويون باشيندا ياتيردير.
بير نئچه دقيقه دينجين آلاندان سونرا، کول- کوس ييغيب، نه بول‌دور قورو اودون، هارا باخيرسان اولمَز تيکاني‌دير. بولاغين باشينا گئتيريب، جان تاييسيني (بيرطرفلي خورجون) آچيب، قارا قومقوماسيني چيخاردير، سو ايله دولدوروب، کول‌لاري قومقومانين دؤشونه قالايير. سونرا کيربيت چکيب، اودو يانديرير. قومقوماسيني قايناديب، بير چاي دمله‌يير . آناسي چؤلونه يئددي لاواش چؤره‌يي، بيرآزدا پنير ياوان‌ليق قويوب.
اوشاق يازيق، قويون‌لاري‌نين اوتسوزلوق‌دان بير يئرده دايانيب اوتلايانماديق‌لارينا، هله ده ناشتاودير . شاليني آچيب، قومقومادان جينقو دوروشقا*سينا بير چاي تؤکور، ايسته‌يير بير تيکه پنير- چؤرک يئسين. او اَره‌زَن قوزو بيردن مه‌له‌ييب، آناسي‌نين آلتينا گيريب، دؤشونو آغزينا آلير. ها سورور کي، بلکه بير دامجي سوت گله سوت هاردادير! گؤرور سوت گلمير، آناسي‌نين دؤشونو دومسوک‌له‌يير.آناسي اينجييب، قوزونو سوت اممه‌يه قويمور.
اوشاق، ماييل- ماييل او نيسگيل‌لي صحنه‌يه باخيب، برک ناراحات اولور، گؤزلري دولور. گؤيون هاواسي بولودسوزدور، آمما اوشاغين اوره‌يي دولوب، گؤزلري بولودلانيب، باشلايير آغلاماغا. قوزو او ياندا مه‌له‌يير، اوشاق دا باخارکن، بو ياندا.يئمئک ياديندان چيخير، جينقو دوروشقاسيندا سوزدويو چاي دا بوز اولوب، ايچيني وورور. اوشاق‌ليغيندا ال‌لريني گؤيه گؤتوروب، آللاها يالوارير، آللاه‌دان ياغيش ايسته‌يير.
 آغلاديق‌جا دئيير، “اي گؤزل آللاه! نه اولار بير ياغيش ياغديراسان گؤي- گؤيه‌رنتي يئنه ده گؤوَره! هر يئر اوتلانا، منيم بو داوارلاريم بير دويونجا اوتلاييب دويالار. اي گؤزل آللاه! سنه قوربان اولوم، آخي آنام ديير کي، ياغيش ياغاندا آللاه آغلايير، سنه قوربان اولوم آللاه، او قوزو مني آغلادير، بس سن نيه آغلاميرسان؟! نه اولار، سن ده بير آغلا!
داغ‌لارا اوت گله، قويون‌لاريم يئيه، قوزونون آناسي سوتله‌نه. قوزو داها آج‌ليقدان مه‌له‌ييب  مني ده مه‌له‌تمه‌سين. سنه قوربان اولوم آللاه!”- دئيه- دئيه گؤزلريندن ياش آخير، ايچين چکير .
 گؤزلري‌نين ياشيني سيلرکن آچديغي شال‌دان بير لاواش چؤره‌يي گؤتوروب، قوزونون آناسينا ساري گئديب، اوچؤره‌يي اونا يئديردير. گؤرور قويون دويمادي.
قاييدير، يئددي چؤرک‌دن بير پارچا اؤزونه ساخلاييب، قالانيني قوزونون آناسينا يئديرديرکي، سوت‌لنسين قوزوسونو اميشديريب، دويورسون. قويون چؤرک‌لري يئييب، دويونجا دا گؤلک‌دن سو ايچير، بير نئچه دَيقه ياتير. اوشاق دا کي، باخير قوزونون مه‌له‌مه‌يينه، گؤزلري‌نين ياشي دورمور.
بيردن قويون آياغا قالخير. مه‌له‌ييب، بالاسيني آلتينا آليب، سوت وئرير. اوشاق گؤرور قوزو سوتون امير،گؤزلري ياشلي اليني جينقو دوروشقاسينا آتير چاي ايچه. گؤرور چاي بوز اولوب‌دور. باشيني گؤيه قاوزاياندا گؤرور گون باتان طرف‌دن بير بؤيوک بولود بونلارا ساري گلير. قوزو دا سوتون اميب، داها مه‌له‌مير. اوشاق قومقومانين چاييني يئره تؤکور، دوروشقاسيني يئيخالاييب، چايين يئرينه بولاغين سويوندان دولدوروب، شالين برينه قويور. او قالان پارچا چؤريه پنيري ياوان‌ليق ائله‌ييب يئيرکن، هردن بير قورتوم سو ايچير. پارچا چؤره‌ييني قورتارماميش، بولودون کؤلگه‌سي اوشاغين باشينا دوشور. بيردن گؤيو بولود آلير.
نئچه آي‌دير ياغيش‌دان خبر يوخ ايدي. بيردن هاوا خاريلداييب، ايلديريم چاخير. اوشاق ايلديريمين سسينه هم قورخور، هم سئوينير. گؤي‌دن بير دامجي ياغيش دوشنده اوشاغين چيچه‌يي چاتلايير. اليني گؤيه ساري توتوب، آللاها دئيير، “اي گؤزل آللاه! آغلا قوربان اولوم! آغلا!” ايندي اوشاق بو يول سئوينجيندن آغلايير.
هاوا باشلايير نم- نم ياغماغا. اوشاق قويون‌لاري، قوزولاري دَبرديب، شاليني- قومقوماسيني جان تايي‌سينا ييغيب، داوارلاري کنده ساري هايلايير. ياغيش داها ماجال وئرمه‌يير، اوشاغي قوش کيمي ايسلادير. ائله بيل سيچه‌ني ساليبسان سويا! قويون‌- قوزولارين يون‌لاريندان سو آخير، آمما اوشاق قول‌لاريني آچير گاه اؤز چئوره‌سينه،گاهدان قويون‌لارين چئوره‌سينه دولانير. گاه قيشقيرير، “آللاه قوربانين اولوم! آغلا! قوي يئر جان آلسين، قويونوم سوت‌لنسين! آغلا، بولاق‌لار سس‌لنسين! قوزوم سوت‌دن دويسون. آللاه آغلا! قوربانين اولوم! هئي ، هئي،آي آللاه!…” دئيه- دئيه، قويون‌لارين داليسيجا گلدييي يئرلري، تيکان‌لارين ايچينده قاييدير .
کنده يئتيشجک، آناسي اوشاغين اوزوندن اؤپوب، قويون‌لاري طؤوله‌يه سالير. آنا، اوشاغي جوم- جولاق سو، ائوه گئتيريب پار- پالتاريني ده‌ييشير. سونرا چاي- چؤره‌ييني وئريب، سوروشور:
– اوغول بالام! گؤزلرين نه‌دن قيزاريب؟ نيه آغلاميسان؟ ائله قادالارين آنان آلايدي! قورخموسان؟ دئنه گؤروم نه اولوب دور؟
اوشاق آناسينا دئيير:
– آي آنا! قوزو مه‌له‌دي، هم آللاهي آغلاتدي، هم ده مني آغلاتدي.
اوشاق ماجراني آناسينا دئييب، باشي آناسي‌نين ديزي اوسته يوخوسو آپاردي.
او گون‌دن آلتي گئجه- گوندوز، ياغيش کسمه‌دن ياغير، هر يئري سئل- سو گؤتورور. داغ‌لار ياشيل گئييب، باغ‌لار گول چيچک‌لنيب، ياماج‌لاردا نانه پنيري‌نين ايي‌سي گؤيلره ياييلير. دوزن‌لر آل لالا آچيب، جننته دؤنوشور.
گؤزل آللاه اوشاغين گؤردويو ايشه، ائدييي دوعاسينا گؤره ياغيش نعمتيني هر يئره باغيشلايير. اونون آلديغي مکافات‌‌دان يئر- گوي يارارلانير .
بير زامان گؤررسن کي، بير اينسان‌ين دوعاسي يا گؤردويو ايشي آللاه‌ين خوشونا گلر، نئچه مين‌لر نفس چکه‌ني ده يارارلانديرار، قورتارار .

منبع :