بولگه لر سرويسي:آستا- آستا قار ياغيب دام- باجاني بورويوردو . دئييرديلر بو ايلين قيشي چتين بير قيش اولاجاقدير. قوجالار دوغروداندا قالميشديلار کي بو دهشتلي اييامي نه جوره باشا ويريب يازي گوره جکلر .عئيني زاماندا هامينين باشي محرم آيينين عزادارليغينا قال ايدي. مسجدلر دايير اولوب قارا کوينکلر اَيينه چکيليب باش قارالار سرينيب و زنجيرلر ميخدان آسيلميشدير . بو حئس- بئيس ده سکگيز ياشيندا بير اوغلان اوشاغي آرتيق سويونوردو . قانادي اولسايدي قانادلانيب اوچاردي . آغام مسجيد اهلي دئييردي. او سحردن آخشاما قدر جان ويريشديريب يوخودان ماجالي اولمازدي عزادارليق ائتسين . بونودا دئييم کي مني "هفته خوانليغا" گئتمه يه قويمازديلار. چونکي بو آبيده اونون- بونون ائوينده اولوردو و آغام بئله بير روسومو خوشلامازدي. نه ايسه من يالنيز محرمون ايلک گونوندن مسجيده گئديب يئرده قالميش قواره سيز قارا کوينک و زنجير منه قيسمت اولوردو. معلوم اولان اولار هفته خوانليغدا سئچيليرديلر . محلله صدريميز ميرايسماعيل تزه شئي مسجيده آلميردي . نذيرصانديقيندان چيخان پوللاريدا جيبينه تؤکوب خشله ييردي. بونا خاطير او مکه دن گلن زامان دئييرديلر : بيز بئله آنلاييرديق مکه يه گئدن نورلاشار آمما بو کيشي حاجي اولاندان بري مسخ اولاراق اوزونون دريسي گاميش دريسي کيمي قاراليب دير . قاپي چاليندي . دئديم : " احد " اولاجاق. يازيق اوشاق حتمن سئوينديگيندن شام دا يئمه ييب. چونکي او ايکي ساعت تزدن گلميشدي. قرارلاشميشديق بو گئجه محله ميزين عزادارليق دسته سيله زنجير ووراق. احدين آغاسي دا مسجيد اهلي دئييردي. ماشيننان " نير" ه موسافير داشييب گئجه يورغون دوشوب ياتيردي. بئله ليکله او قاديراولمازدي اوياق قاليب عزادارليق ائتسين.دوشدوم حيطه . يئرده ديزه جاق قار وارايدي .كوره يي آلديم اَليمه يول آشماغا باشلاديم. اؤزو اؤزومه دئديم: بويوک چيلله نين ايلک گونلرينده بئله بير آغير قار هارادان اره ييب گئده جک؟ . اون- اون بئش مئتير قاري آتيب بير شيريم يول آچديم. کوچه قاپيسينين قاباغيندا بويوک داش پيلله کان وارايدي . اونوندا قارين سييريب قاپيني آچديم . گومانيم دوزچيخدي .احدين ياناقلاري قيزيل گول تک قيزارميشدير. آمما اينانميرام کي او دهشتلي سويوق هاواني حيس ائتسين . گوزلري برق آتيب پاريلداييردي . باشقارا باغلاييب اوزون زنجير کوينه يين گئييب زنجيري کوينگينين دويمه سيننن آسلاييب تله سيک گئتمکده يدي .پالتاريمي گئييب ائودن چيخديم .احدين اَليندن ياپيشيب قارا باتا- باتا مسجيده طرف گئتديک . قونوم- قونشودان هر دم بير نفر قيز ياخود آرواد قاپيدان چيخيب شبيستانا طرف قاچيرديلار تا کي يئرتوتسونلار. اولار ايسته ييرديلر پنجره نين دوز قاباغيندا اَيلشيب و بو واسيطه ايله مسجيدون ايچين گوروب عزادارليغا باخسينلار. مسجيدده هارادا اَيلشمکده يازيلماميش بير قرار وارايدي . محله نين بويوکلري و آهيل آداملاري منبرين دوورون توتارديلار. منبرين سول تايي شبستانين اوز به اوزي گنجلر يئريدي. قاپي آغزينا ياخين طئشت قاباغي دا اوشاقلار اوچونودو . طشت قورولان مکاندا تاخچانين دووارينا بير نئچه شاماييل آسلاييب اوستونو قارا پارچاايله اورتموشدولر. چوخ چاليشيرديم او شاماييللاري گورم . آمما راست گلميردي. يالنيز شامي غريباندا چيراقلاري سوندوروب آزليجا اوني آچيب فورَن اوستون باسديرارديلار. بير وضعييتده کي هئچ زاد گورونمزدي . بئله ليکله من هميشه حيس ائدرديم نسه و عظمتلي بير قووه او شکيللرده واردير.ميرايسماعيل شاه نيشينه ياپيشقان قاپي آغزيندا اَيلشوب قورد کيمي باخاردي . هئچ نه اونون باخيشلارينين آلتيندان اؤزون قورتارا بيلمزدي . کولگه سي آغيريدي اوجوره کي محلله نون پيلوخورلاريدا ميرايسماعيلدان قورخوردولار. پيلوخورلار شاه نيشينده جومالاشيب اؤزلريني اوبيريسيلردن آيريرديلار. همده قارا کوينک لرين تزه سي، زنجيرلرين ساري سي و چايون ايلک ايچيمي اولارينکيدي. کيمسه ده دينلنمزيدي. اونا گوره کي هفته خوانليق اولارين ائوين ده اولوردو. او بيريسي طرفدن مسجيدخرجينده اولارتامين ائدرديلر.نتيجه ده ميرايسماعيلدا شاه نيشينده اَيلشنلره آرتيق پاپئي اولمازدي. حتتا ضارافات ائتمه لريندن و محرم آييندا گولوشمه سس لريندنده گوز اورتَردي . او گئجه ده عادت اوزه رينده مسجيد خرجي وئرنلرون امواتينا و محلله ده مرحوم اولانلارا صالاوات چئويرمکدن سونرا "شعبان"حزين سسله " حوسئينيم واي " دئمه گه باشلادي . دئمه لييم حوسئينيم واي سسي بئله معنالانيردي "حوسئينچيلر هر ياندا اولسالار مسجيدون اورتاسينا ييغيشيب عزادار دسته سين فورمالاشديرسينلار". بئله ليکله احدلن منده دسته يه قوشولوب بوگونکي شاه بئيتي ازبرله ديک. بو آبيده نين آرديندا نوحه خوان بيرآغيز اوخويوب سسين امتحان ائتدي. يئنه ده صالاوات سسي اوجاليب دالينجا دسته باشي گئديلن مسجدلرين آدين سايدي . يا آللاه دئييب اياغا قالخديق . قاباقدا بايراقچيلار بايراقلاري گوتوروب مسجيددن چيخديلار. سونرا بيزده زنجيروورانلارين ايچينده تئله سيکلي باشماقلاري گئييب توزقون سسله "حوسئينيم واي" دييه- دييه يولا دوشدوک . هاوا گئده گئده خارابلاشيردي . قار يئل نن ياغيب کوله يه دؤندرميشدي . خياباندا هئچ بير ماشين گوزه دئيميردي . اونا گوره عزادار دسته لري راحاتليقجا خيابانين اورتاسيله گئديرديلر . اوبيريسي طرفدن وضعييت آغيرلاشديقجا بايراقچيلارين سورعتي چوخاليردي . بير زامان گورديم احد منيم يانيمدا قاچير. اَل َاياقي و اوزي لبي کيمي پورتميشدي . اوته ري باخيشلا معلوم اولاردي برک اوشويور. آمما ايچره سينده بير آلوو اوني توختاخ ساخلاميشدي . جومعا مسجيد قوجامان بير عبادتگاه ايدي . او تپه باشيندا عظمتلي تيکينتي ايدي. قديم کيلر دئيرديلر قيرغين زامانلارين بيريسينده اهالي او مسجيدين آلتينداکي خرپيش زئرزميده گيزلنميشديلر. آمما بير اوشاقين آغلاما سسي هاميني گودازا وئريب قيرغينا سالدي . تپه ني چتينليکله ديرماشيب اؤزوموزي مسجيدين دهليزينه يئتيرديک . اَياخ قابلاري چيخارداراق اولاري گيزله ديب ايچه ري گئچديک . نوحه خوان منبرين ايلک پيلله سينده دايانيب دسته نين آغير گليب دوشه مه سيندن ذوق آلاراق شَدده گئديب زنجير وورانلاري لاپدا هاوالانديريردي. زنجير کوره ک لري يارالاييب اونلاردان قان آخيردي . هر دم ده کيمسه دوروب ثاوابينا گوره يارا لارين اوزونه سيگار پاکاتينين کاغيذين ياپيشديريردي. تَر مني سوپورتلاييب باسميشدي. کوره ييم کئي اولميشدي . آغريسيني بيلميرديم . بو وضعييتده بيردن گوردوم احدي قوجاق اوسته گوتوروب يا آللاه دييه- دييه دسته نين ايچيندن آپارديلار . ائله بيل کي خنجريله بئينيمي دئشديلر. اؤزو- اؤزومه دئديم: گوره سن احدون باشينا نه گلدي؟ مين دنه فيکير اوره ييمه هوجوم ائتدي . داي حاواسيم اؤزومده دئييردي. بيلمه ديم نه زامان " الله اجير وئرسين" دئييب دوشه مه ني ساخلاشديرديلار. يالنيز اوني بيليرم کي هوله جک بئورومده کيندن سوروشدوم : احده نه گلدي ؟ نييه اوني مسجيدده ن ائشيگه چيخارتديلار؟. معلوم اولدي يازيق اوشاق عذاب دئيميش . آخيريسي دا اؤزون ساخلييا بيلمه ييب آلتين ايسلاديب . واختي الدن وئرمه ييب چايي ايچيب پئنجکيمي اَينيمه آليب تله سيکلي مسجيد دن چوله قاچديم. اوني گورمک همين اوره ييم اسدي. احد قار ايچينده اياق يالين دوروب سويوخدان تيتره ييردي. مني گوره رک باشين آشاغي سالدي. حيس ائتديم توتقون بير دونيادا شمع کيمي ارئيير. قاييتديم مسجيدون دهليزينه احدون باشماغين تاپيب اونا وئرم .غضبدن آز قاليردي روحوم بدنيمدن آيريلا . بيردن گوزوم دوشدي ميرايسماعيلين او چاخير ايچن اوغلونا . مني گوروب دئدي: اوشاق- موشاقي نه ايچون بورايا گتيريبسن . سونرا گولوب سويله دي : خالقين مسجيدين طهارتدن سالدي . آشاغيدان يوخاري اونا نيفرتله باخيب گئچديم . جوما مسجيددن سونرا اوچ مسجيديده گزديک . احدي مسجيد لرون ايچينه قويماديلار. يالنيز دهليزه جاق حاققي وار ايدي ايچه ري گئدسين . او بالاجا عزادار ايکي ساعاتدان آرتيق سويوخدا اسدي . گئجه ياريني آشميشدي کي دسته قاييتدي. بيزده ائوه سوره يوللاندوق. احد سون واختاجاق بير کلمه ده دانيشمادي. سس سيز مندن آيريلاراق اؤز آغيرلاشميش جيسميني داليجاق چکوب قاپلارينا طرف گئتدي. بير لحظه اوني بوکولموش يوماخ تک تصوور اديب قارا کوينگيمين قولي لا گوزدن آخار ياشي سيلديم . عزادارليق گونلري توز کيمي گئچدي . کوچه ده قارلا زوو دوزلدوب اويناييرديق . احدين باجيسي روباب خانيم مدرسه دن گليردي . بيردن ياديما دوشدي" نئچه گوندي احدي گورمورم" تئز قاچيب اونا ياخينلاشيب احد دن سوراغ آلديم. دئدي : احد اون گوندي خسته له نوب يورغان- دوشکده دير . سانکي ايستي سويي باشيما تؤکدولر اياقيماجاق چيخدي .هيکل کيمي بير يئرده دؤنوب قالديم . ايللر دال با دال گليب آشيردي . من عادت اوزره هر ايل اون گون محرمي مسجيده گئديب زنجير ووروردوم . هاميدا منيم تکين اؤز نقشيني لاپدا اعلا شکيلده اويناييرديلار . بئله ليکله ميرايسماعيل نذير دخلين چاپيب اوغلي دويونجاق چاخير ايچيردي . نوحه خوان ده يَرلي سسله شاه بيت توتوب شعباندا" حوسئين" چکيردي . آمما من داها هئچ واخت گوره بيلمه ديم احد او اوزون زنجير کوينگين اَينينه تاخسين .
بولگه لر سرويسي:آستا- آستا قار ياغيب دام- باجاني بورويوردو .