بولگه لر سرويسي:هانسي تاييندا گيزلتدي..؟ ساغ، يوخسا سوْل جوراب تاييندا؟ يئييب قورتارماميش قاپيلارينا يئتيشميشدي. کيمسه ألينده گؤرمه‌ميش گيزلتمه‌لي‌يدي. هؤوشنه‌دن بيلمه‌دي ساغدا گيزلتدي، يوخسا سولدا. آغزينداکيني چئينه‌مه‌ميش ائله اوُددوکي، بوغازينين يولونو سؤکه- سؤکه آشاغي گئتدي. باجيسي دونن اونون پؤرتوشمه‌ييندن شَکله‌نيب، آغزيني ايله‌ميشدي. نه ياخچي کي باجيسي آغزيني ايله‌مه‌ميش دوْيون قارين سو ايچميشدي. آخي شيرين يئمه‌ليدن سورا سو، بال دادي وئرر.قادين پؤرتوب. ذهني يوخويلا اوياقليق آراسيندا سرگردان قاليب. يوخو آييلماقدان داها آرتيق شيرين گلير اونا. عئينالي‌دان أسن سرين يئل تئللرينه، بدنينه توخونور.پؤرتوشمک هميشه اونو گودازا وئريب. اوشاقليق چاغيندا ياساق بير ايش گؤرنده، جاوانليقدا سئودييي اوغلانين آديني بيريندن ائشيدنده، يالان دانيشاندا و يا هيجانلي فيلم گؤرنده پؤرتردي. اينديسه يائسه‌ليک پراسسي کئچيرمک سببيندن، يوخودا بئله پؤرتور.«ساغدا گيزلتدي، يوخسا سولدا؟ بير دنه‌يدي؛ يوخسا ايکي؟ دييه‌سن ايکي‌يدي. حيط قاپيسيندان ايچري گيرمه‌ميش چؤرک بوخچاسي باشيندا أييليب، هر بيريني بير جورابينين ايچينه سوخدو. آياقلاري دا بدني کيمي تر- تميز ايدي. آناسي گون‌اوْرتا چاغي هاميسيني چالاسرده يويوندورموشدو. اوچ ياش اؤزوندن بؤيوک باجيسي دئيير: «چالاسر دئمه، اوراسي حامام داميدي. گؤرموسن اوْدون قالاييب، اوجاقلاردا قازان- قازان سو قايناديب، بيزلري يويوندورورلار؟! ائو حامامي ائشيکده‌کي حاماملارين خير‌داسيدي. ائشيکده‌کي حاماملاردا دئو يئکه‌ليخده قازانلاردا سو قايناديب، اونو لوله‌لره اؤتورورلر. اونا گؤره ائشيک حاماملاريندا سو شيرلردن گلير. چالاسر ديينده ائو حاماميني گؤزدن ساليسان. باخ گؤر محله‌ده نئچه نفرين ائوينده حامام وار؟!» باجيسينين دئمه‌يينه دئييل، حامامين نه اولدوغونو اؤزو ياخچي بيلير. اونا گؤره ائولرينده‌کي قارانليق حامام داميندا، قارامتيل داياز حوْووضون آدي ائله چالاسردي. حامام، ياني شيرين بيريندن سويوق سو گلسين، او بيريسيندن ده ايستي سو. ياني يويوناندان سورا سرين کانادا ايچمک شيرين و سولو آلماني شاقيلدادا- شاقيلدادا يئمک… آمما چالاسرده يويونماق ياني داغ سويون آلتيندا پؤشلنمک… تاختا داراغينان کؤتک يئمک… کيلکه دوشموش ساچلارينين دانلاغيني ائشيتمک.»نه اولار بو ميراثا قالميش کيلکه‌لريوي گونده بير دفه داريياسان..؟« چيمچاوات ايدي. آناسي گون‌اوْرتا چاغي اونلاري يويوندورماسايدي، نه سول جورابينين ايچينه سوخاردي نه ده ساغ جورابينين. هر گونکي کيمي گرک چؤرک‌خاناينان ائوين آراسينداکي يولو قاريشقا کيمي آستا- آستا يئريييب، شيرني‌باليقلاريني تل- تله‌سيک هؤپوردوب، قاپيلارينا يئتيشنده آغزيني سيليب، ايچري کئچردي.تميز اولماسايدي شيرني‌باليقلاري دا روُيه باجينين مانپاسلاري تک چيرکه‌سوْو اولاردي. درد بوردايدي کي شيرني‌باليقلارينين رنگي مانپاس کيمي آغ دئييل، قهوه‌اي ايدي. چيرکه‌سوْو اولسايدي مانپاسدان داها آرتيق چيمچشمه‌لي اولاردي.قادين گؤزلريني آچدي. پؤرتوشمه‌سي شدّتله‌نيب، بدني ايسه ايستي‌دن هَنيرتي چکير. ملفه‌ني آياغي‌لا قيراغا ايته‌له‌دي يوخولو- يوخولو اطرافا گؤز گزديردي. هاردا اولدوغونو سئچه بيلمه‌دي. عئينالي‌دان أسن يئل کيپريکلرينه آغيرليق ائله‌ييب، گئنه گؤزلري يومولدو.»قاپيدان ايچري گيريب، حيطه گؤز دولانديردي. پنجره‌لرين حصيرلريني هله يوخاري قوْوزاماميشديلار. شيرني‌باليغين کاکولو داديني تامسينا- تامسينا چؤرک بوخچاسيني باشيندان گؤتوروب،حوْووض قيراغينداکي تختين اوستونه قويدو. چؤرکلرين ايستيسي بئينيني قيزديرميشدي. ايکيندي‌نين سرين هاواسي ساچلارينا توخوندوقجا سرينله‌ييب، ذهني دورورلدو. نظرينه گلدي بوخچانين قيراغيندا قيرميزي ايپک‌له تيکيلميش بير جوت باليق، جان آتيرلار بوخچادان قوپوب، حوْووضون سرين سويونا آتيلسينلار.ايش‌لري بؤلموشدولر. هر گون چؤرک آلماق، بير ده ايکيندي چاغي حوْووض قيراغينداکي تختي دؤشه‌مک اونا دوشموشدو. پالازلار تختين قيراغيندا بير- بيري اوسته قالانميش، اونو گؤزله‌ين کيمي‌يديلر.باشماقلاريني چيخارديب، تخت اوسته کئچدي. پالازلاري آچيب، تختي دؤشه‌دي. روُيه باجينين دؤشکچه‌سيني، بير جوت قيرخيم ياسديغيني تختين يوخاري باشينا قويدو. قجمه‌داشلاري پنجره‌نين هئره‌سيندن گؤتوروب، تختين بير بوجاغيندا تک‌باشينا اويناماغا باشلادي.روُيه باجي هين‌ناهين ائلييه ائلييه اوتاقدان چيخيب، گليب دؤشکچه‌سي اوسته اوتوروب- اوتورماميش چؤرک بوخچاسيني آچيب، چؤرکلري بوکوب، اوست- اوسته قالاييب، بوخچاني بوکدو. هر گونکي کيمي بوخچانين بوجاغينداکي قيرميزي باليقلار آلت قاتدا قاليب، قيزين گؤزوندن ايتدي. قيز ايسه هر گونه تاي گؤز- گؤز ائله‌ييب، رويه باجينين گؤزوندن گيزلي، بوخچاني آچيببوجاقلاريني آلت- اوست ائله‌ييب، باليق تيکيلميش بوجاغي اوست قاتا قويدو. قيزا ائله گليردي کي رويه باجي ايپک باليقلارينان دوشمانچيليغي وار. بيردن- بيره قاپي دؤيولدو. قيز ايسه شيرني‌باليقلاري أزيلمه‌سين دئيه، قيچ‌لاريني اوزالتميش قجمه‌داش اويناييردي، قاپينين دؤيولمه‌سيني سايمادي. آناسي ايسه اوتاقدان باغيردي: »دور قاپيني آچ!« رويه باجينين دمپاي‌لاريني گئييب، سوروتله‌يه- سوروتله‌يه گئديب قاپيني آچدي. چؤرکچي‌ني قاپي داليندا گؤرونجه رنگي بوْزاردي. بوتون گوجويله قاپيني کيپله‌ييب، قاچيب رويه باجينين ياسديقلارينين داليسيندا گيزلندي. رويه باجي چرقدينين اوجونداکي دويونو آچيب »کيم سني قورخوتدو بالام، گل سنه بير مانپاس وئريم«، دئدي.يائسه‌لييين پؤرتوشمه‌سي يوخو ايچينده بئله، قاديني راحات بوراخمير. نؤوبه قيزديرماسي کيمي گاه آزاليب، گاه شدّتله‌نير. بدنينين باشا باشي قوْرلانميش کيميدي.آناسي اونو گيزله‌نرکن گؤروب، چاديراسيني باشينا ساليب، قاپييا چيخدي. قيز ايسه ياسديقلارين بوجاغيندان قاپيني گودوردو. آناسي قاپيني کيپله‌مکده باغيردي: »قودوغون بيري قودوخ، سنه وئرديييميز چؤرک پوللارينين باشينا نه داش ساليبسان؟ چؤرهچي ديير بير آيليق چؤره پولو بورجوز وار.«قادين پؤرتوشمه‌دن جاني ترله‌ييب، آلنينا مينجيق مينجيق تر اورتوموشدو.قيز آناسينين غصبلي سسيني ائشيتجک، تختدن يئره آتيلدي؛ بلکه قاچيب آناسينين ألي چاتمايان بير يئرده گيزلنسين. يئره آتيلاندا آياغي بورخولوب، حوْووضون ايچينه دوشدو.قادين گؤزونو آچدي. ملفه‌ني گؤتوروب، آلنينين، بدنينين تريني سيلدي. عئينالي‌دان أسن سرين يئل پنجره‌دن اوتاغا دولوردو. قادين گئرنه‌شيب، گولومسه‌دي. قيرميزي باليقلارين آراسيندا بير جوت قهوه‌اي باليق حوْووضون سويو اوزرينده اوزه‌ين قالميشدي.
بولگه لر سرويسي:هانسي تاييندا گيزلتدي..؟ ساغ، يوخسا سوْل جوراب تاييندا؟ يئييب قورتارماميش قاپيلارينا يئتيشميشدي.