غضبي بروزه وئرمک بلي حرصلنمک يوخ

غضب، مغلوبيّته اولان ذاتي عکس‌العمل‌دير.

بولگه لر سرويسي:غضب، مغلوبيّته اولان ذاتي عکس‌العمل‌دير.
هاميميز ايسترايسته‌مز بيزي حرصلنديرن وضعيّتلرله اوز به اوز اولوروق. حرص ياشاييشين بير جزئي اولسا دا، خاصيّتي بيزي هدفه چاتماقدان ساخلاماقدير.بئله‌ليکله بيز غضبيميزي کنترول ائله‌مگي باشارماساق، او بيزي کنترول ائليه‌جک. غضبلي اولماق قبول اولونان بير شئيدير آما اونا گؤره اؤزوموزه و اطرافداکيلارا صدمه وورماق قبول اولاسي دئييل.غضبين بئش عاملي اولا بيلر:
1. محيطده‌کي عامل‌لر: خوشا گلمز و غضبلنديرن اتّفاقلارين باش وئرديگي محيطده اولماق، حرصلنمکده چوخ نقشي وار. حقيقتده انسانين تحمّلي آرامشلي محيطلرده خوشا گلمز محيطلره نسبت داها چوخ اولار.
2. هيجان وئرن عامل‌لر: بيزده اولان حسّلرين مثبت و يا منفي اولماسي، عکس العمليميزي غضبلنديرن وضعيّتلره گؤره دَييشر. مثلاً سوروجولوک وثيقه‌سي امتحانيندا موفّق اولاندان سونرا اتوبوسون ياريم ساعت يوبانماسي سيزي او قدر ده ناراحت ائله‌مز. آما امتحاندا ردّ اولساز، هر مسأله او جمله‌دن اتوبوسون يوبانماسي سيزي حرصلنديرر.
3. جسمي عامل‌لر: تحقيقلر، مزمن آغريلاري اولانلارين داها تئز ناراحت اولدوقلاريني گؤسترير.
4. انسانلارين باخيشي و دوشونجه‌سي: دوشونجه و فکرلريميزين، بيزده يارانان حسّلرين نئجه‌ليگينده چوخ نقشي وار. مثلاً اطرافيميزداکي انسانلاردان انصافلي، ادبلي، منطقلي و . . . اولماغي گؤزله‌سک، اونون ترسيني گؤردوگوموزده چوخ احتمالا حاليميز چوخ پيس اولا.
5. فرهنگي عامل‌لر: هر کس، اولدوغو و ياشاديغي فرهنگين تأثيرينده مختلف حرصلنديرن موقعيّتلرده فرقلي عکس العمل گؤسترر.
*غضبي نئجه بروزه وئرک؟انسانلار حرصلننده اؤز حسّلريني فرقلي شکل‌لرده گؤستررلر:
1. غضب علامتلريني گيزلتمک: بعضيلري حرصلننده غضب علامتلريني گيزلدرلر و بروزه وئرمزلر.
2. قيشقير-باغير سالماق: بعضيلري حرصلننده رفتارلاري خشن اولار. مثلاً اوجادان قيشقيرارلار، وورارلار، يامان دئيرلر و بير شئيلر آتيب سينديرارلار. آيري سؤزله آيريلارينا و يا وساييله صدمه وورارلار.
بعضي خشن رفتارلار دا مستقيم اولماز؛ يعني ظاهرده خشن حرکتين شاهدي اولموروق آما غير مستقيم اولاراق آيرلارينا صدمه وورور. مثلاً رئيسين اليندن حرصلنيب و ظاهرده چوخ آرام گؤروشور آما ايشيندن کسير و يا وسايلدن ميغايات اولماغا لازم اولان دقّتي ائله‌مير.
3. قاطعيّتله: بعضيلري حرصلنمکلرينه رغماً مقابل طرفه صدمه ووران بير ايش گؤرمزلر آما حسّلريني ابراز ائديب ايستکلريني ديله گتيررلر. بو يول غضبي بيلينديرمگه اَن ياخشي يول ساييلير.
دقّت ائله‌سز حرصلنن آداملار ايکي ايشي گؤره بيلمزلر: بيري مسأله‌نين حلّي و بيري‌ده غضبي دوزگون شکلده ابراز ائله‌مک. انسان، لحني دَييشمه‌دن، تهديد ائله‌مه‌دن غضبلي اولدوغونو ديله گتيره بيلمه‌ليدير. مثلاً »سن مني حرصلنديريرسن« يئرينه ياخشي اولار دئسين:»من بو حرکتي گؤرنده حرصلنيرم«.

منبع :