آذربايجان ناغيللاري بولگه لر سرويسي:اسکيده بير قوجا، قاري وار ايميش. اونلارين اوچ بالاسي، بئش کئچيسي وار ايميش. بير گون بؤيوک بالاسي باشقا يئرده فايدالي ايش اؤيرنمک ايسته‌ييب، اؤز پايينا دوشن کئچيني کسيب، اتيندن قاري ايله قوجايا بير پارچا بئله وئرمه‌دن چؤنوب گئتميشدي. گليرکن بير هونرلي زنگينه توش گلميش. هونر اؤيرنمک اوچون او زنگينه نؤکر اولموش. او هونرچي زنگين چوخ آجيماسيز بير آدام ايميش، او نؤکر ايگيدي بير صانديغا ساليب آجليقدان اؤلدورموشدو. ائوينده قالان اورتانجي بالاسي دا هونر اؤيرنمک ايسته‌ييب، او دا آغا قارداشي‌نين گئتديگي يول ايله گئديب، هونرچي زنگينه نؤکر اولموش. هونرچي زنگين اونودا آجليقدان اؤلدورموشدو. اوچونجو اوغلو کئچل اوغلان او دا آغا قارداشلاري کيمي اؤز پايينا دوشن کئچيسين کسيب، ياري اتين آتا-آناسينا وئريب، اونلاردان روخصت آليب، چيخيب گئتميشدي. گليرکن، بير سورو قويونا راست گلميش قويون سوروسونون قويونچوسونا سوروشسا، بو قويونلار هونرچي زنگينين ايميش. قويونچو بير قوجا ايميش. او کئچل اوغلاندان:"بالام، هارايا گئديرسن؟"-دئيه سوروشموش. کئچل اوغلان هونر اؤيرنمگه گئديرم"- دئيه جاواب وئرميش. اوندا قوجا دوروب،" بو سؤزونو هئچ کيمه دئمه اؤزون يالان دانيشما"دئيه سؤيله‌ميش. اوندان سونرا بو بالا قوجانين سؤيله‌ديگي دوغرو ايميش دئيه دوشونوب، هونرچي زنگينه گئتميشدي. زنگينين ائوينه قونوب، ائرته‌سي گون گئديرم دئيه حاضيرلاشاندا، هونرچي زنگين کئچل اوغلاندان، "بالام، هارايا گئديرسن؟ يولون آچيق اولسون"، دئيه سورشموش.کئچل اوغلان جاوابيندا، " من اؤزون کيمي اوغلو اولمايانا بالا اولورام" ، دئميش. اوندا هونرچي: "سن منيمله قال،بالا اول، بيزيم آغ قوچو کّس، توي ائديب آشيق ايليگيني اتي ايله اؤزون يئ، من اؤزوم يولچو اولارام"،- دئيه سؤيله‌ميش ده اؤزو يولونا گئتميش. کئچل اوغلان: " تامام آتا، ياخشي اول دئيه ائوده قالير. بو هونرچي زنگينين ائوينده بير قيزي وار ايميش. قيز کئچل اوغلانا: " آغا، سن آشيق ايليگيني اؤزون يئمه، ديوارين باشينا آسيب قوي. اوندا بير آغ تازي گليب، ايليگه آتيلار، اوندا سن بالتاني آليب، تازيني اؤلدور"،- دئيه سؤيله‌ر.. بوندان سونرا کئچل اوغلان آغ قوچو سويوب توي ائديب، قونشولاري چاغيريب، آشيق ايليگي اؤز يئمه‌دي، قيزين دئديگي کيمي ائديب، ديوارين باشينا آسيب قويدو. سؤيلنن کيمي آغ تازي گليب، ايليگه آتيلدي. کئچل اوغلان بالتاني گؤتوروب آتيبدي. آنجاق بالتاسي تازي‌يا دگمه‌ييب، ايت قاچيب قورتولوب گئتميشدي. هونرچي زنگين ائوينه قاييتديقدان سونرا کئچل اوغلانين بئله ايشلرين گؤردوگونو بيليب بتر آجيقلانيب: "بو ايتي آجليقدان اؤلدوروم" دئيه صانديقا سالميشدي. زنگينين قيزي آتاسي يوخکن صانديغين ديبين دئيشيب، يئمک وئريب، کئچلي دؤيدورموشدو. او صاديقدا ياتيب،زنگينين هر تورلو سئحير، هونرين اؤيرنميشدي.بير نئچه گون کئچندن سونرا کئچلين اؤز آتاسي بالالاريني آختارماغا چيخيب هونرچي زنگينه گليب: "بير کئچل دئييلن بالام وار ايدي، اونو گؤردونوز مو؟"، دئيه سوروشار. هونرچي زنگين: "گؤرمه‌ميشم"، دئيه جاواب وئرةر. بونلارين دانيشديغي سؤزلري ائوده صانديقدا ياتان کئچل ائشيتميش. زنگين ائله دئينده کئچل: " آتا، من بوردايام"، دئيه ايچيندن باغيرميش. سسيندن بالاسيني تانييب، زنگينين صانديغيندان چيخاريب آلميش. کئچل ايله آتاسي ائولرينه قاييتميشدي. کئچل اوغلان يولدا آتاسينا: " آتا من قارا قوچ اولوم، بوينوما ايب تاخيب، يئدکله‌ييب بازارا آپاريب سات، بيرجه ايپيني وئرمه"، دئيه سؤيلةر.. بالاسي او يئرده دئديگي کيمي قارا قوچ اولدو دا آتاسي بوينونا ايپ تاخيب، بازاردا ساتيب آخچاسيني آليب، ائوينه قاييدار. ائرته‌سي گون بالاسي اؤز قاليبينا دوشوب گليب، آتاسينا: "آتا من قارا يورغا آت اولوم، مني بازارا آپاريب سات پولومو آل، بيرجه جيلوومو وئرمه"، دئير. بالاسي دئديگي کيمي آت اولوب، آتاسي بازارا آپاريب ساتيب، جيلووو آليب ائوينه قاييدار.ائرته‌سي گون بالاسي کئچل اوغلان داها اؤز قاليبينا دوشوب، ائوينه گليب، آتاسينا: " آتا من بير ميس ايپلي بير ياشيني کئچيميش بير هؤرگوچلو دوه اولوم، سن مني بازار آپاريب سات دا پولومو آل، بيرجه ايپيمي آليب ائوينه قاييت"، دئير. کئچل اوغلان سؤيله‌ديگي کيمي دوه اولوب آتاسي بازاردا ساتيم دئيه يئدکله‌ييب گلرکن قاباغيندان هونرچي زنگين چيخار. او دئير: " منه بو دوه‌ني سات". کئچل آتاسينا: "دوه‌نين باهاسي يوز آلتين"،- دئير. اوندا هونرچي زنگين اونلارين حيله‌سين بيليب، يامان دوشونجه ايله دوه‌ني يوز آلتينا ساتين آلار. ائوينه يئدکله‌ييب گليب قيزيني چاغيريب: " بو دوه‌ني ساخلا"، دئييب ده، اؤزو پيچاق گتيريب دوه‌ني بوغازلاييم دئيه، ائوينه يوگوروب گئدر. قيز آتاسي‌نين يامان نييتيني بيليب، او دا پيچاق آليب چيخميش. آتاسي ائوه گيرن کزده دوه‌نين ايپيني پيچاقلا کسيب بوشلار. هونرچي زنگين بونو گؤروب، قاچان دوه‌ني قووالاميش. کئچل اوغلان اوندا تولکو اولوب قاچميش، هونرچي زنگين تازي اولوب قووالاميش. هونرچي زنگين يئتيشن کزده، کئچل اوغلان اؤردک اولوب اوچموش، زنگين اوندا لاچين اولوب قووموش، بيرآزدان سونرا کئچل اوغلان سئرچه اولوب قاچميش، اوندا زنگين قيرغي اولوب آردينا دوشموش. اوندان سونرا کئچل سئرچه قاليبينا دوشوب اوچوب گليب چيته قونوب اوتورموش. زنگين قيرغي اولوب گليب داياناجاغي سيرادا، کئچل قورخوب يايليق اولوب يئره دوشموش. هونرچي زنگين کيشي اولوب گليب يايليغي گؤتوروم دئميش. کئچل داري اولوب يئره ساچيلميش. هونرچي زنگين تويوق اولوب دنه‌له‌ييم دئينده، کئچل پيشيک اولوب دا، تويوق اولان هونرباز زنگينين بوينون قوپارديب سسيني کسميش. بئله‌جه اونون قيزيني آليب، مورادينا يئتميشدي.
اسکيده بير قوجا، قاري وار ايميش. اونلارين اوچ بالاسي، بئش کئچيسي وار ايميش. بير گون بؤيوک بالاسي باشقا يئرده فايدالي ايش اؤيرنمک ايسته‌ييب، اؤز پايينا دوشن کئچيني کسيب، اتيندن قاري ايله قوجايا بير پارچا بئله وئرمه‌دن چؤنوب گئتميشدي.