من بير آغاجام

بولگه لر سرويسي:هانسي حئکايه‌يه معنا و ظرافت قاتاجاقديم ؟قاصيدي اؤلدوروب مني گؤتوروب داغ، شهر دئمه‌دن گزديرن حرامي‌لردن بيري آرادا بير قيمتيمي بيلير، آغاج رسمينه باخماغين، آغاجا باخماقدان داها خوش اولدوغونو آنلاياجاق قدر اينجه‌ليک گؤستريردي، اما بو آغاجين هانسي حئکايه‌نين پارچاسي اولدوغونو بيلمه‌ديگي اوچون کم حؤوصله اولوردو.

بولگه لر سرويسي:هانسي حئکايه‌يه معنا و ظرافت قاتاجاقديم ؟قاصيدي اؤلدوروب مني گؤتوروب داغ، شهر دئمه‌دن گزديرن حرامي‌لردن بيري آرادا بير قيمتيمي بيلير، آغاج رسمينه باخماغين، آغاجا باخماقدان داها خوش اولدوغونو آنلاياجاق قدر اينجه‌ليک گؤستريردي، اما بو آغاجين هانسي حئکايه‌نين پارچاسي اولدوغونو بيلمه‌ديگي اوچون کم حؤوصله اولوردو. قورخوردوم مني شهر- شهر گزديرديکدن سونرا جيريب آتا. آمما آتمادي. مني، بير ذووق اهلينه بير کوزه شرابا ساتدي. گئجه‌لري بعضا آغلار و شام ايشيغيندا منه باخاردي. بو زاواللي ذووق اهلي ديغلاييب اؤلندن سونرا ماللاريني ساتديلار. مني آلان نقال اوستاد سايه‌سينده ده ايستانبولا قدر گلديم. ايندي چوخ سئوينيرم، بو گئجه بورادا عثمانلي پادشاهي‌نين سيز معجزه ايله، قارتال گؤزلو، گوجلو، ايراده‌لي، ظريف بيلکلي، حسّاس روحلو نقّاشلاري و خطاطلاري آراسيندا اولماقدان فخر ائله‌ييرم و سيز آللاه بير اوستاد نقاشين دووارا آسيلسين – دئيه مني عادي بير کاغاذدا تلم – تله‌سيک رسم ائديب دئينلره اينانمايين.
يالواريرام سيزه.باخين نه يالانلار، نه ايفترالار، نه ده ائله بئله يوروب – يوزمالار! دونن گئجه بوردا دوواردا بير ايت رسمي آسيب و بو ادبسيز ايتين سرگوذشتيني نقل ائدن اوستاد نقاش، بو آرادا ارزروملو (خوجا نصرت) آدلي بيريسي‌نين ماجرالاريني اونا چاشني قاتميشدي! ايندي ارزروملو خوجا نصرت حضرتلريني سئونلر بونو يالنيش آنلاميش. بيز اونا توخونمامشيق. بيز بؤيوک بير واعيظ حضرتلرينه ولدالزنا دئيه بيلريکمي؟ ؟ توبه! هئچ عاغليميزا گلرمي؟ بو نئجه فيتنه‌کارليقدير. بو نه يوزوب يورماقدي! ايندي کي ارزروملو خوصرت، ارزروملو نصرت‌له ده‌ييشيک دوشوبدور؛ سيزه آغاج حئکايه‌سيني و سيواسلي خوجا »چئري ندرت«دن دانيشيم.بو سيواسلي خوجا ندرت گوزه‌ل اوغلانلارين رسملريني لعنتله‌ييردي اوسته‌ليک، قهوه آغاجينين، شيطان آغاجي اولدوغونو سؤيله‌يير و قهوه ايچه‌نين يئري جهنمدي – دئييردي آي سيواسلي!، سن منيم بو هوندور بوداقلاريمين نئجه اييلدييني ياددان چيخارتدينمي؟سيزه دئييم امّا کيمسه‌يه سؤيلمه‌ديينيزه سؤز وئرين. الله قورو ايفترادان قوروسون. بير سحر گؤردوم کي، ماشا‌اللاه ميناره بويلو، اصلان پنجه‌لي دئو کيمي بير آدام ايله يوخاريدا آديني چکدييم بوداغيما ديرمانيب سيخ يارپاقلاريمين آراسيندا گيزلنميش، باغيشلايين… ادبسيزليک اولماسين بير ايشلر گؤرور…. سونرادان، دئوين، شيطان اولدوغونو آنلايم. او ايشيني گؤره- گؤره اونون گؤزه‌ل قولاغيني شفقتله هم اؤپور، همده ايچينه پيچيلدايير:» قهوه حرامدير، قهوه گوناهدير.«دئيه قهوه‌نين زيانلي اولدوغونا اينانماق، گوزه‌ل دينيميزين بويوردوغينا دئييل، شيطانا اينانماقدير.
بيرده سون اولاراق فيرنگ نقاشلاريندان سؤز آچاجاغام کي، اونلارا جان آتان اصل- نجابتسيز وارسا عيبرت گؤتورسون. ايندي بو فيرنگ نقاشلاري، شاهلارين، کشيشلرين، بي‌لرين، حتي خانيملارين اوزلريني ائله نقش ائديرلر کي، او آدامين رسمينه باخيب کوچه ده تانيا بيلرسن. بونلارين آروادلاري ائله‌ده کوچه ده سربست گزير. آرتيق آيريسيني سيز دوشونون. آمّا بودا بس ائله‌مه‌ييب،ايشلري داها ايره‌لي آپاريبلار. دللالليقدا دئييل. ناخيشدا دئييرم.بير بؤيوک اوستاد فيرنگ نقاشايلا باشقا بؤيوک نقش اوستاسي فيرنگ چمنليينده گئدير، اوستاليق و صنعت باره‌ده دانيشيرلارميش. قارشيلارينا بير مئشه چيخير. داها اوستا اولاني، باشقاسينا بئله دئييب :« يئني اصوللارلا رسم چکمک ائله بير باجاريق ايسته‌ييرکي- بو مئشه ده کي آغاجلارين بيريني چکدينمي،رسمه باخان هوسکار بورا گليب،ايسته‌ييرسه او آغاجي باشقالاريندان آييرد ائله تاپار.»من فاغير گؤردويونوز آغاج رسمي بئله بير عاغيلا رسم ائديلمه‌دييم اوچون آللاهيما شوکور ائله‌ييرم.فيرنگ اصوللاريلا رسم ائديلسيديم مني حقيقي آغاج سانان ايستانبولون بوتون ايتلرينين اوستونه ايشمه‌سيندن قورخدوغوما گؤره دئييل. من بير آغاجين اؤزو يوخ ، معناسي اولماق ايسته‌ييرم

منبع :