ديل اجتماعي بير وارليق‌دير

بولگه لر سرويسي":ديل اجتماعي بير وارليق‌دير. انسانلار ديل واسطه‌سي ايله بير- بيرلريني آنلايـير، باشا دوشور. بو باخيمدان ديل، انسيّت واسطه‌سي، تفکر قالبي، هم ده دنياني درک ائتمه آلتي‌دير. باشقا بير سؤزله دئسک، انسانلار ديل واسطه‌سي ايله دوشونور، فکر‌لريني تجسم ائدير و باشقالاري ايله انسيّت‌ده اولور. دئمک، ديل انسان حياتينـين، انسان جمعيّتي‌نين هم معناسي هم ده او وارليغين انعکاسي‌دير.

ديل، جمعيّتين مالي‌دير. جمعيّت يوخدورسا، ديل ده يوخدور. انسان جمعيّتي ايله ديل بيرگه يارانيب، بيرگه انکشاف ائديب و بو گونگو وضيّعته چاتيبدير. انسانلارين حيات طرزي، دنيا گوروشلري يالنـيز ديل واسطه‌سي ايله آيدينلاشا بيلر. دوز دئـييرلر کي، ديل جامعه‌نين گوزگوسودور. ديل ائله بير مثل‌سيز اجتماعي حادثه‌دير کي، انسان جمعيّتي‌نين الده اولونموش علمي‌– مدني تجربه‌لريني محافظه ائد‌ر‌ک، اونلاري ياشاتديرير، انکشاف ائتديرير. ديل واسطه‌سي ايله‌دير کي، کئچميش نسل‌لرين بيليک و تجربه‌لريني اينديکي نسل منيمسه‌ييب، اؤيره‌نير و گله‌جک نسيل‌لره چاتديرا بيليرلر. بئله‌ليکله اجدادلارلا تؤره‌مه‌لر آراسيندا معنوي کؤرپو يارانير.
ديلين کومه‌يي ايله انسانلار علم، تکنيک و باشقا مدني ثروت‌لري الده ائده بيليرلر. ديلين وارليغي ايله، مدنيّت‌لر يارانير. ديلين واسطه‌سي ايله مدنيّت‌لر بوتون بشريّتين مالينا چئويريلير. يئر کوره‌سي‌نين ملّيّت‌لري، مدنيّت‌لري، ديل واسطه‌سي ايله بير ـ بيرلري ايله علاقه ساخلايا بيلرلر. علمي‌کشف‌لر، بديعي صنعت اثرلري، فلسفي، اخلاقي نظريه‌لر و… ديل واسطه‌سي ايله دونيادا ياييلير. بئله حال‌لاردا زامان و مکان‌لا علاقه‌دار اولاراق ديلين يازيلي شکليندن داها گئنيش استفاده اولونور. جمعيّتين علمي- مدني حياتينين انکشافيندا ديل قد‌ر باشليجا رول اوينايان باشقا بير اجتماعي وارليق يوخدور.
هر بير خالقين ديلي اونون، ملي اؤزونه مخصوص‌لوغونون تجسمودور. او خالقين بوتون مدني کئچميشيني محافظه ائدن ان مهم واسطه، ديل‌دير. پروفسور آغاموسي آخوندون فکرينجه: »ديل بير چوخ اجتماعي حادثه لردن فرق‌لَنير. ديل هئچ بير حالدا عموم بشري اولماييب؛ ديل ملي سجيّه داشيييب. ديل بير اونسيّت واسطه‌سي، فکرين افاده واسطه‌سي کيمي‌مختلف خالق‌لارين، ملت‌لرين ديلي کيمي‌موجوددور. هر ديلين اؤزونون سجيّه‌وي خصوصيّت‌لري وار.«
يئر اوزونده، چوخ ملت‌لر، خالق‌لار، قووم‌لار ياشايـير. اونلارين اؤز يوردو، مدنيّتي، عادت –عنعنه‌سي اولدوغو کيمي، اؤز ديللري ده واردير. هر خالقين دوغما ديلي اونون »آنا ديلي« ساييلير. آنا ديلي، او ديل‌دير کي، انسانلار اونونلا ديل آچير، اونونلا دانيشير، اونونلا ياشايير، اونونلا اؤلورلر. بيزيم ده آنا ديليميز، آذربايجان ديلي (آذربايجان تورکجه‌سي)دير. آناميزين بطنينده آناميزين قاني‌ايله، دويغولاري ايله بيرگه دامارلاريميزدا دولاشيب. اونون سئوگي و محبّتي‌نين ايشيغيندا، بيزيم جانيميزدا کؤک ساليب و دوغولارکن دوداق‌لاريميزدا چيچک‌لَنيب، لايلالارلا، نازلامالارلا، بوي آتيب و عؤمروموز اوزونو بئينيميزين، اوره‌ييمزين، ايش‌لريميزين، آرزو و ايستک‌لريميزين ترجماني اولوب. دئمک بئشيک باشيندان – قبر داشيناجان دويغو و دوشونجه‌لريميزين بوتون چالارلاريني قلبيميزين ان درين قات‌لاريندا گيزلنن احتراص‌لاريميزي، هيجان و اضطراب‌لاريميزي تجسم و افاده ائدير. آغي‌لارلا، اوخشامالار بيزي سون منزله تاپشيرير.
آکادئميک ميرزه ابراهيم يازير: »هر خالقين آنا ديلي، اونون ملي وارليغينين، معنوي عالمي‌نين افاده‌سي‌دير. بئله‌ليک‌له هر ديل بير خالقين، ملتين وارليغيني بيلديرن، قورويان ان مهم عامل‌لردن بيري‌دير. «
هر بير خالقين، ملتين آنجاق بير آنا ديلي واردير. همين ديل، او خالقين و ملتين عمومي‌ديلي اولدوغو اوچون، او ديله عموم خالق ديلي دئييرلر. مثال اوچون بيزيم آنا ديلميز، عموم خالق ديليميز آذربايجان تورکجه‌سي‌دير. بو ديل، آذربايجان خالقي‌نين معنوي واري و کيملييي‌دير. عموم خالق ديلي ايکي مهم قولا آيريلير: دانيشيق ديلي و ادبي ديل. ادبي ديل عموم خالق ديلي‌نين ان يوکسک فورماسي‌دير. داها دوغروسو ادبي معيارلارين، اوسلوب‌لارين واسطه‌سي ايله فکرين دقيق، آيدين، سرراست و آنلاشيلان شکيلده افاده اولماسينا ايمکان يارادير.
ادبي ديل، عموم خالق ديلينده، سئچمه، عوض ائتمه، آلينما، ايتيرمه، معيارلاشما عمليّات‌لاري نتيجه‌سينده اوسلوب‌لار سيستمينه دوشور. بو عمليّات‌لار اجتماعي ـ مدني دَييشيک‌لرله سيخ باغلي‌دير. آنجاق هر بير اوسلوب، ديلين ملي خصوصيّت‌لري اساسيندا قورولور، تکميل‌لَشير. آذربايجان تورکجه‌سي انکشاف ائتميش ديل‌لر سيراسيندادير. اونون دا يوکسک کيفيّته مالک اولان ادبي ديلي واردير.
دونيا خالق‌لاري ادبي ديل‌لر واسطه‌سي ايله بير- بيرلري ايله ادبي، مدني، اجتماعي علاقه ساخلايير و فکر مبادله‌سينه گيريشيرلر. بو مبادله‌لرده عالم‌لر، يازيچي‌لار، مطبوعات ايشچي‌لري و معلم‌لرين و… بؤيوک رولو اولور. بو ساحه‌ده هئچ کيم خالق ديلي ايله يازيچي و شاعرلر قد‌ر باغلي اولمور. چونکي بديعي سؤز صنعتي‌نين اساسي سؤز اوسته قورولور. سؤز اونلارين هم افاده آلتي، هم‌ ده اثرلري‌نين جوهري، ماياسيدير. اونلار سؤزه سويوق قانلي مناسبت بسله‌يه بيلميرلر. سؤز شاعر – يازيچي اوچون، ديري و جانلي بير وارليق‌دير. اونلار اوچون سؤز چوخ معنالي، چوخ يؤنلودور. اونلار سؤزو بيلير، دويور، لمس ائدير، سؤزون رنگيني، عطريني، چکي‌سيني سئزه بيليرلر و سؤز ياراديجيليغيندا بو قابليّت‌دن اولدوقجا يئرلي-يئرينده فايدالانماغي باجارا بيليرلر. پروفسور توفيق حاجي‌چوخ گؤز‌ل دئيير: »او (سؤز اوستاسي)، سؤز ماترياليني يونور، جيلالايير، صنعت فاکتينا چئويرير. اونو اوسلوبي داورانيش اوچون چئويک‌لَشديرير، حساس‌لاشديرير. يازيچي – شاعر بو استقامتينده ياراديجيليق فعاليّتي‌ني موافق بديعي ـ اوسلوبي ايشله برابر ان چوخ ادبي ديلين خيرينه يؤنه‌لير… «.
دنيانين بؤيوک يازيچيسي ماکسيم گورکي‌نين افاده‌سي ايله دئسک: »ادبياتين اساس ماتريالي سؤزدور. بيزيم بوتون تأثيرات‌لاريميزي، دويغولاريميزي، فکرلريميزي فورمايا سالان سؤزدور«.
دئمه‌لي: »يازيچي‌نين ان عالي مقصدي سؤزله حياتا کئچير، بديعي اثرين ان يوکسک مطلبي، علوي فکرلري سؤزله افاده اولونور. «
يازيچي‌لار، شاعرلر و هر‌هانسي بير فکر آدامي، قلم صاحبي يوخاريداکي کيفيّت‌لري يييه‌لنمک اوچون اؤز نطق مدنيّتي‌ني انکشاف ائتديرمه‌لي‌دير. بونون اوچون، او ديلي دريندن، هر طرفلي اؤيرنمه‌لي و سؤزون سيرلر خزينه‌سينه يول تاپماليدير. چونکي ديلين داخلي قانونلاريني، اونون سؤز قورولوشو، سؤز بيرلشمه‌لري و جمله قورولوش‌لارينين سجيّه‌لريني اؤيرنيب، منيمسه‌مه‌دن، او ديلين گوز‌ل‌لي‌يينه، افاده‌لي‌لي‌يينه يييه‌لنمک امکان‌سيز‌دير. هر کيم بو کيفيّت‌لري اؤيرنير و اونلاري منيمسه‌ييرسه، او آدام يوکسک نطق مدنيّتينه صاحب اولا بيلير.

منبع :