خبرلرسرويسي:تبريزين علوم پزشکي دانشکده‌سي‌نين محققلري پري بيوتيک ماکاروني دوزلتمکله بؤيوک باغيرساق سرطاني‌نين قاباغين آلماغا تأثيرلي اقداما ال ووردولار. امير اميني غذايي علملر ارشد ايش بيلني مهر آژانسينا دئدي: بيز داوا خاصيّتي اولان يئمه‌لي ماکاروني دوزلتميشيک کي يوکسک فايدالي غذالاردان ساييلير. او اؤلکه‌ميزده غيرمناسب تغذيه‌يه گؤره بؤيوک سرطان مبتلالارين ياشي‌نين آشاغي يئنمه‌سينه اشاره ائله‌مکله آرتيردي: بو ماکاروني‌ني يئمک شخصين ساغلامليغيني آرتيرار و کلون سرطاني‌نين قاباغيني آلار. حقيقتده بو محصولون کؤمگي ايله کلون يا بؤيوک باغيرساق سرطاني‌نين ابتلا احتمالي آزالاجاق. او پرو بيوتيک و پري بيوتيکلرين فرقلرينه اشاره ائله‌ييب دئدي: پروبيوتيکلر، بؤيوک باغيرساغين ديوارلاريندا روشد ائله‌ين ديري ميکرو اورگانيزملرديلر. آما پري بيوتيکلر، پرو بيوتيکلرين غذاسي ساييليرلار. يعني پروبيوتيکلر پري بيوتيکلريدن تغذيه ائله‌ييب اؤز ساغلامليق تأثيرلريني بدنه قويورلار. اميني، پروبيوتيک‌لي يا پري بيوتيک‌لي غذالارين فايدالي اولدوقلارين دئمکله آرتيردي: پري بيوتيک داها آرتيق فايدالي‌ديلار. چونکي بدنين اؤزونده آز سايدا پروبيوتيک وار و اونلاري پري‌بيوتيک ايله تغذيه ائله‌مکله سايلاري آرتار. بو محقق بونا اشاره ائله‌مکله کي بو اختراع ايندي تجاري اولماق عرفه‌سينده‌دير آرتيردي: بو محصولون خارجي و داخلي نمونه‌سي و تايي يوخدور. او تأکيد ائله‌دي: بو ماکاروني اوليه نمونه کيمي توليد اولوب و انبوه توليد اوچون حمايته احتياجي وار.
تبريزين علوم پزشکي دانشکده‌سي‌نين محققلري پري بيوتيک ماکاروني دوزلتمکله بؤيوک باغيرساق سرطاني‌نين قاباغين آلماغا تأثيرلي اقداما ال ووردولار.