بوز قورد

يازين سرين گونلري سونونا ياخين لاشارکن،هاوالار ايستي يه دونوردو. آريق اوجا بوزقورد آجليق و سوسوزلوقدان نه ائده جه گيني بيلمه ييردي. قورو دره، تپه لري آشاندان سونرا بؤيوک چؤله يئتيشدي. چؤلون اورتاسيندا دسته- دسته قوزو گؤردو آمما اونلارين بيرليگيندن قورخاراق اونلارا يوگوره بيلمه دي. حسرتله حئيوانلارا باخاراق اوردان اوزاق لاشدي. گئده رک اؤنونده کيچيک ائو گؤردو بو ياشا گلديگينده بئله ائو گؤرمه ميشدي . ياواش- ياواش ائوه ياخينلاشيب باشين ايچه ري سوخدو پوتا بير کؤپک ائشيگه چيخاراق قوردا ساري هوره - هوره دئدي: نه ايستيرسن؟

بولگه لر سرويسي:يازين سرين گونلري سونونا ياخين لاشارکن،هاوالار ايستي يه دونوردو. آريق اوجا بوزقورد آجليق و سوسوزلوقدان نه ائده جه گيني بيلمه ييردي. قورو دره، تپه لري آشاندان سونرا بؤيوک چؤله يئتيشدي. چؤلون اورتاسيندا دسته- دسته قوزو گؤردو آمما اونلارين بيرليگيندن قورخاراق اونلارا يوگوره بيلمه دي. حسرتله حئيوانلارا باخاراق اوردان اوزاق لاشدي. گئده رک اؤنونده کيچيک ائو گؤردو بو ياشا گلديگينده بئله ائو گؤرمه ميشدي . ياواش- ياواش ائوه ياخينلاشيب باشين ايچه ري سوخدو پوتا بير کؤپک ائشيگه چيخاراق قوردا ساري هوره - هوره دئدي: نه ايستيرسن؟
قورد تعججوبلا سوروشدو :بورا سيزين ائوينيزدي؟کؤپک دئدي : هه ! نه ايستيرسن؟قورد دئدي :من حئيوانلارين ائولرينين اولدوغونو بيلمه ييرديم !کؤپک: بو ائوي صاحابيم منه تيکيب او گونده منيم ائويمه يئمک ده گتيرر. سنين ائوين يوخ مو؟قورد حسرتله کؤپه يه باخيب دئدي: يوخ. منيم قالاجاق هئچ بير يئريم يوخ، گاهدان يئمک تاپا بيلمه ييب آجليغا دؤزه بيلمه رم، ياغيش ياغاندا ائشيکده قاليب ايسلانارام. کؤنلوم ايسته يير سنين ائوين کيمي ائويم اولا. او ندي بوينوندان آسلاميشسان؟ آتام دئيردي: اينسانلاردان سوباي هئچ کيم اؤزونه بير شئي يوکله مه ز،آمما چوخ گؤزل دير هاردان گتيريبسن؟
کؤپک غورورلا باشيني يوخاري توتوب دئدي: بو بويون باغين آدي بويون دوروق (قللاده) دي من صاحابيمين گؤزتچي سي يم. ياني ائويني، وار يوخونو گؤزتده رم. اودا منه ائو و يئمک وئرر. من چوخ آرخايينام، ياشاماق ايچين هئچ سيخينتييا دوشمه ميشم. هر نه ايسته سم واريم. سن ده منيم کيمي بير ياشاماق باشلي يا بيلرسن؛ يالنيز گرک منيم صاحابيمين يانينا گئديب، اوندان ايسته يه سن سنين ده بوينويان بويونباغ باغلايب، اؤز يئرينده ايشله ده. بو ايشي گؤررسن يايين اورتاسيندا هاوانين ايستي سينده چؤلون اوتاسيندا دره تپه لرين آراسيندا يئمک آختارما مجبوريتينده قالمازسان. بوز قورد اؤز آواراليغيني اونوداراق کؤپه يين وضعينه باخيب يئنه سورغولارين باشلادي : سنين يئمک لرين نه اولار؟کؤپک دئدي: سو،چؤرک.بوردا نه ايش لر گؤررسن؟کؤپک: من قوزولارين گؤزتچي سي يم .سحر گون داغلارين داليندان چيخماميش اونلاري ييغيب قارا چمنلي چؤللرين اته يينه(دامنه) آپارارام. گون باتانا کيمين يئييب ياتارلار منده اونلارا گؤزتچي اولارام، گون باتان زامان اونلاري ييغيب ائوه ساري يولا دوشه ريک.گئجه لر آييق ياتارام وحشي حئيوانلار و اوغرو ائوه ضرر يئتيرمه سين، حئيوانلاريميزدان وحشي حئيوانلاريين اؤنونده گؤزتده رم و چوخ ايش لر کي دئمه يه گلمير.
بوزقورد: بو ايش لرين اؤنونده صاحابين يالنيز سنه سو، چؤرک وئرر!؟کؤپک: بئله، سن اؤزون هئچ سو، چؤرگي تاپا بيلرسن !؟بوردا قالماق ايسته سن گونده ليک يئمه گين حاضيردي.بوزقورد: بورا گلمه دن اؤنجه سنين کيمي بير گؤزتچي ايديم ائويم يوخ ايدي آما يئمه گيم دادلي شئي لر ايدي. يالنير صاحابيم مني اوزون ايپ ايله حيط ده کي آغاجا باغلاياردي ،هر زامان حيطده قاليب اونون ائوينه گؤزتچي اولام. بوتون حئيوانلار بيليرديلر نه قدر کؤنلوم ايسته ييردي باغلاردا گزم، داغلاردا يايام،آمما صاحابيمين قورخوسوندان بير ايش گؤره بيلمزديم. بوينوما ساريلميش ايپ قويمازدي آياغيم حيط قاپيسينا چاتا حسرتده ايديم بير گون ايپ بوينومدان آچيلا ...بيرگون ناهاردان سونرا آغاجين کؤلگه سينده اوزانيب، حسرتله حيه طين گوشه سينده بوتاي - اوتايا قاچان سيچانلارا باخيرديم، بيردن بير پيشيک اونلارا يورودو، منده يئريمدن دورارکن تئز پيشيي قاچيرتديم سونرا آغاجا ساري گئديب يئنه اوزانديم. گئجه هامي حئيوانلار ياتاندان سونرا سيچانلاردان نئچه سي يانيما گلديلر، آهاي ....بوزقورد يئنه سن بيزه يارديمجي اولدون. نه کؤنلون ايسته يير دئگينن بيز او ايشي سنه گؤره ريک. اونلاردان ايسته ديم ايتي ديشله رينن ايپيمي قيرسينلار، اونلاردا منه يارديمجي اولدولار... اوردان چيخاندان سونرا چوخ يئرلره گئتديم،باغلاردان قاچديم، داغلاردا ياييلديم، چوخ يولداشلار تاپديم، ايندي ده بوردايام.
کؤپک: بوردا قالاجاقسان؟قورد: يوخ. گئتمه لي يم. صاحابيمي، ائويني، يولداشلاريمي و دادلي يئمکلري بوراخديم، نئجه کي کؤنلوم ايسته يير ياشييام بوردا قالسام يئنه بير اسيرگؤزتچي اولاجاغام.کؤپک، سوسدو داها بير سؤز دئمه دي کونلو قاچيب اويناماقدان ساري برک داريخميشدي آمما اودا بير گؤزتچي ايدي، قاچيب، اويناماق حاققي يوخ ايدي.کؤپک ايلک دفعه آريق قوردو گؤرنده اؤز وضعينه فخر ائله ييردي آما قوردون سؤزلرين ائشيدندن سونرا اؤزوندن کي بير گؤزتچي ايدي آجيغلانيب کؤنلو ايسته ييردي قورد تکين آزاد ياشاسين.آزاد ياشاماق ايچون اول گرک بويون دوروغونو چيخاردا ايدي، هر نه ائيله دي بويون دوروق بوينوندان آچيلا فايداسيز اولدو، بويون دوروغون زنجيري يئرده سورونه - سورونه صاحابينين ائويندن اوزاقلاشيردي، بيردن صاحابينين ائوينين طرفيندن قوشون آچيلدي کؤپک ايختيارسيز يئره دوشدو، صاحابي کؤپه يه ساري گليب عصيان ائليين کؤپه يين جنازه سيني جادادان قيراغا چکدي...

منبع :