بسته‌لنمه‌ميش ماهني

بولگه لر سرويسي: _قيزااا! من نييه فيکير وئرمه‌ميشديم. سنين غريبه سسين وار؛ گئتسن دوبلاژ ايشينه ياخشي آد قازانارسان. بوتون اينستاگرام سننن دانيشار: »شوک شوک! برد پيت‌ي سسلنديرن آدام کيم؟«»اؤلکه‌ميزده ايلک دفعه لئنوناردو ديکاپريونو بير قادين سسلنديردي!…دي دي دي دين«

رقيه‌هاشم‌زاده(خان‌صنم)

بولگه لر سرويسي: _قيزااا! من نييه فيکير وئرمه‌ميشديم. سنين غريبه سسين وار؛ گئتسن دوبلاژ ايشينه ياخشي آد قازانارسان. بوتون اينستاگرام سننن دانيشار: »شوک شوک! برد پيت‌ي سسلنديرن آدام کيم؟«»اؤلکه‌ميزده ايلک دفعه لئنوناردو ديکاپريونو بير قادين سسلنديردي!…دي دي دي دين«
بو سؤزلري دئيرکن جيدديليک‌له، اللريني هاوادا اويناداراق جور به جور پوزلار وئريب، ادالار چيخارديردي.
بيردن بيره اوچو ده پيققيلداييب گولوشدو. آرتيق، اولدوقلاري مکانين رئفلکس شوشه‌لري گوزگويه چئوريلميشدي.
ملک ساعاتينا باخدي. ماسانين اوستوندن آلديغي تورکجه کيتاب‌لاري الينه ييغاراق »اوشاقلار بتر يوبانميشام، دورورسوز يا من گئديم؟«دئدي.
اونسوز دا سئودادان خوشلانديغينا و اونون انرژيک، صميمي و سئويملي اولدوغونا باخماياراق بئلنچي اوتوروم‌لاردان اوقدر ده حظّ آلميردي. بونون نه‌دنيني بير تک اؤزو بيليردي آنجاق لازيمينجا ايداره ائدير، صينيف‌داشلاريني يولا وئريردي.
سئودا، گؤزلريني سوزه-سوزه ياستيدان:
-ياخجي دا ياخجي! سني ده تعريفله‌ديک اؤزونن چيخدين، نه يوبانماسي هله اول آخشامدي. باخ‌ائ! دئييرم، ائوه خبر وئر بو گئجه بيزه گل، خوش کئچراااا.
بونو خاص بير طرزله و چوخلو عيشوه‌يله دئييب، مارالا گؤز ووردو!
سسي دويسا دا، نيسگيل دولو قونور گؤزلري يان ماساداکي ياراشيقلي بي‌لره ديکيلميشدي. اوره‌يينده آرزولار سولور، حسرت‌لر دوغولور، اوميدلر گؤمولوردو.
بيردن ماسانين آلتيندان قيچينا بير شئي توخوندو.
– آخ
– هاردا سومسونور گؤزلرين قيز؟!
مارال چيمخيردي.
ملک اؤزونه گليب: »سئودا جاني چوخ ايستيييرم آما، سحر سکگيزدن آخشاما کيمي درسيم وار. همي ده، چوخ يورقونام؛ ياتماسام ايته دؤنه‌رم واللاه!« دئدي. »اوووف« دئيه ، مارال بيرده سسلندي، سونرا »بيز قاپيلماغا حاضيريق مله‌ييم!« دئييب، اونا بير اؤپوش آتدي.
يئنه دوداقلاريندان پيققيلتي‌لار ديغيرلاندي!
اوچ يئني يولداش اؤز حال‌‌لاريندان ممنون گؤرونوردولر. ملک ساغوللاشيب کافي‌شاپي ترک ائتمک اوچون آياغا قالخدي.
– هر حالدا کرايه قالديغيميز ائو يوني‌يه(University سؤزونون قيسالميشي) ياخيندي. ناواخت ايسته‌سن گل؛ چوخ سئوينه‌ريک.
مارال الينده کي ناپئلئوني شيرني‌سينه بير ديش ووروب ايري گؤزلريني اولدوغوندان داها دا چوخ آچدي. دولو آغيزلا قالين بير »هيم« سسي چيخاريب، باشيني قالديريب ائنديره‌رک سئودانين سؤزلريني تصديق‌له‌دي.
اونلاري اؤپوب »ياخجي، باخاريق« دئدي.
قاپيدان چيخان ملک اؤزونده دئييلدي. خورجونا بنزر چانتاسيني چينينه فيرلاديب گؤيه زيللندي. هاوا قارالسا دا گؤي اهليندن تکم سئيرک چيراق يانديران اولموشدو! بوينوندان آسلانان قولاق‌ليغي‌نين اوج‌لاريني يوخلاييب قولاغينا تاخدي. تلفنوندان سئودييي بير ماهني‌ني سئچدي، دينله‌يه‌رک يولا دوشدو .
اسلش شالواري، اسپورت باشماغي، بارماقلارينداکي آرابير لئنت‌واري قارا اوزوک‌لري و قولاق‌لاري ساللانميش فري سايز چارخانا کؤينه‌يي بير يانا چييين‌لرينه دوشموش ساري شالي و سکگيز نومره‌يله ماشينلانميش ساچلاري چئوره‌ده‌کي هر کسين ديققتيني چکيردي.
چوخدان آليشديغي ترس باخيشلارا اؤنم وئرمير کيمي داورانسا دا اؤزونو اوزايدان گلميش کيمي حيس ائدير، ايچينده قاسيرغا قوپوردو.
آناسي‌نين، آتاسي‌نين، خالاسي‌‌نين، عميسي‌‌نين، ائله‌جه ده بوتون قوهوم‌لاري‌نين آجي سؤزلريني، قيناقلي باخيشلاريني خاطيرلاماغي، يئددي آرخا ياد اينسانلارا يئتميش دفعه حاق قازانديريب اونلاردان گولومسه‌يه‌رک کئچمه‌يينه سبب اولوردو. کيمليييني ايتيرميش کيمي هئچ ياندا يئري يوخ‌ايدي.
ساراي گؤرونوشلو ائو‌لرينين قاپيسيندا داياندي. آچاري قاپييا سالار-سالماز ذهنينده فلاش‌بک وورولدو.
بارلي-باغچالي حيطين قاپيسيندان ايچه‌ري گيردي. قاپيدان بينايا قدر آزي يييرمي متير آرا وارايدي.
بو آرادا حيرصيله قيرميزي شاليني بوينوندان آچيب بير طرفه، مانتويا بنزر اوست گئييميني ده چيخاريب چانتا قاريشيق باشقا طرفه توللادي.
ژرمن سوي‌لو شاباليد رنگلي ايت‌لري شيمشير بيتگي‌لري‌نين آرخاسيندان چيخيب اونا هوروب ميريلداندي.” هه سئباستيين ائله بي سن قالميشدين” دئييب، بينانين ياخينليغينداکي اوزمه حووضونون قيراغيندا چؤمبلدي.
سودا عکس اولونان مله‌يه خئيلک باخدي. اوندان ايره‌نير ياخاسيني قورتارماق ايسته‌ييردي. ائله پارلي پالتارلي اؤزونو سويا ووردو. حووضون اوزونلوغونو نئچه‌ دفعه گئديب قاييتديقدان سونرا چيخيب آرخا قاتدا گونش آلتينا سريلدي. قاماشان گؤزلريني تام آچا‌ بيلميردي. کيرپيک‌لرينده‌کي سو دامجيلاري گونشين شعاع‌لاري آلتيندا آلماس کيمي پاريلدايير ذره-ذره محو اولوردو.
– نه‌دي بو انايين ايشلر؟ گئنه نولوب؟ کيم نه دئييب سنه؟
سوال‌ ائله‌ين ، باياقدان پنجره‌ آرخاسيندان بوتون باش‌وئرن‌لري گؤروب، حيطه ائنن آناسي‌ايدي.
آيدين گؤره بيلسين دئيه گؤزلري‌نين بيريني قييب او بيريني آچدي. ديرسک‌لريني يئره دايايارکن آناسي‌نين اوزونه باخدي.
– ياني سن بيلميرسن؟
بارماق‌لاريني شاققيلدادا-شاققيلدادا: “منيم اليمنن نه گلير آخي قيزيم! آللاه بئله‌ ايستييب” دئدي آناسي.
آجيقلي_آجيقلي آياغا دوردو:
– آي ماما مني بوننان آرتيق ايت ائله‌مه! قيزيم! قيزيم! آللاه بئله ياراديب هه، آما سيز نييه او طرفليک يوخ بو طرفليک ائله‌ديز؟ سيز نييه گؤزله‌مه‌ديز من يئکه‌لم اؤزوم سئچه‌م؟ اصلا نييه هاميدان گيزلتديز؟ مگر دئميرسن آللاهين ايشيدي؟ به آللاهين ايشينه کيم نه دييه بيلردي؟ اون‌سکگيز ايلدي منيم روحومو اسير ائلييبسيز. بسدي! داي يورولموشام. او مالي چوخ گونو قره دده‌مه دييرسن من فيکيرلريمي ائله‌ميشم. زحمت اولماسا، مالينا ضرر ديمه‌سه دئديييم پولو بويون تؤکسون حسابيما. صاباحدان بو ايشين داليسين توتاجام. تصديق‌دن جاوازدان، لازيمدي هاميسين آليب اؤزومو بو فلاکتدن قوتاراجام.
اونون دا ايجازه‌سينه احتياجيم يوخدو. بورا کيمي من حياتا مجبور اولموشام بوردان اويانا حيات منه مجبور اولسون!
اللريني باشي‌نين آلتيندا چارپازلاييب آلا قارانليق اوتاغين تاوانينا ماريتميشدي. آخشام گؤروش‌لريني گؤزدن کئچيرير، ان چوخ دا سئوداني و ياناغيندان آلديغي تاثيري دوشونوردو. هردن دوداغي قيميشير، هردن گؤزلري دولوب داشيردي.
اؤزونو تانييان گوندن حاياتي پارادوکس‌لارلا دولو‌يدو. دوشمان تورپاغيندا آزميش، سيلاح‌سيز عسگر کيمي‌ايدي. نه دورا بيليردي نه قاچا بيليردي. هرياني مينالانميشدي. آناسيلا سون دارتيشمالاريندان ايل‌لر کئچميشدي آما آتاسي هله‌ده آنلاييش گؤسترميردي.
گؤزلري آغيرلادي. بارماقلاري اوجوندا اطرافي سئزه‌رک مطبخه کئچدي. داوا درمانا مخصوص اولان سيييرتمه‌ني ائهمالجا چکدي. الينه گله‌ني، ان چوخ دا يوخو داوالاريني ييغيب اتاغينا قاييتدي. ماسانين اوستوندن قلم کاغيذ گؤتوردو. نسه بير ايکي جومله يازيب قلمي کاغاذين اوستونه بوراخدي. داوالاري اووجونا بوشالديب توالته گيردي.
 آينادا اؤزونه باخدي. تام بير درد توپلوسونو گؤردو. توالتين چيراغي چيرتيلداياراق سؤنوب آني‌دن يانيردي. “سن نييه جان وئريرسن”دئييب، بوش اولوب اولماديغيني يوخلاماق ايسته‌دي آما اووجونو آچا بيلمه‌دي. آينايا ساري قاييتدي.

منبع :