درين بير يارا ايزي
درين بير يارا ايزي
1400/11/10
بولگه لر سرويسي: اونلارين چوخونون دونلاري‌‌نين آلتيندان گئيديکلري قارين‌‌باغيني بير ده بعضيسي‌‌نين اومباني ديک گوسته‌‌رن شورتلاردان گئيديکلري گوزه چارپيردي.
سولماز جمالي
بولگه لر سرويسي: اونلارين چوخونون دونلاري‌‌نين آلتيندان گئيديکلري قارين‌‌باغيني بير ده بعضيسي‌‌نين اومباني ديک گوسته‌‌رن شورتلاردان گئيديکلري گوزه چارپيردي.
باخيشيمي اونلاردان آليب بيرآز دا کالاغايي‌لاري‌نين اوجونو بورونلارينا ساري قالديريب ياشماقلانميش قاري‌لاري، ياشلي‌لاري سوزدوم؛ قادينلارين اوست-باشلارينا تعجبله باخيب ديللري آلتدا اونلاري آجيقلي-آجيقلي سويوردولر.قاققييلتي قوپدو، قيزلار گولوشدولر؛ بير آن بئله ديل بوغازا قويموردولار.
نسرين اوتوراجاغين کوره‌‌کلييينه سويکه‌نيب قارني اسه-اسه قاققيلداييردي. اولدوقجا يئکه قارني ماساني ييرغالايير ماسانين اوستونده‌کي بشقاب قاشيقلار بير-بيرينه دييب جينگيلده‌ييردي. او، اورتادا اوينايانلارين آراسيندا دونونون زيپي قاچميش بير قاديني گوسته‌‌ريب شاققا چکيب گولوردو.
گوزله‌نيلمه‌دن آمانسيزجا عاغلينا شيغييان جوربه‌جور سس‌‌لردن اوزونو ايتيردي.
چونوب دوستلارينا باخدي؛ عئيني زاماندا واهيمه‌دن نفسيني ساخلايا-ساخلايا اليني اوره‌يي‌نين باشينا قويوب قولاقلاريني شکله‌دي:
-اونون اوغلو عياشدي … من پوللييام … سنين آدين کيشي‌لرين آراسيندا گزير، تک آدين يوخ ائله اوزون ده … من اوغلان دوغموشام سن قيز … بئبئله قيزيلي گور کيم ساليبئه، دريسي بير تومنه ديمير.دارتيشمالار داواملي تکرار اولسا دا سسلر فرقلي‌ايدي؛ بعضيسي نيفرتله، بعضيسي قاققيلتي‌لا؛ اونلارين ات توکن هيريلتيلي گولوشلري قولاقلاريندا عکس-صدا وئريردي.
توکو اورپه‌شير، اتي قاباريردي. بيرآز هورکوب اوزونو ييغيشديردي.آنسيزين چونوب يئنه هنده‌ورينده اوتورانلارا باخدي. ايچيندهکي سسلر گئت-گئده يوکسه‌‌ليردي. گيرينج قالميشدي؛ قورخودان ياواش-ياواش آياغا قالخيب چيغيراراق باشيني گوتوروب قاچماق ايسته‌‌ييردي.بير آن » بلکه دوستلاريم مننن ظارافات ائلئييرلر« دئيه ده دوشوندو.
گوزگوده‌کي قادينين حئيران ائديجي گوزلليينه، پاتلئتينه باخدي. ساغ اليني قالديريب بارماقلاري‌لا بو گئجه‌يه اوزل بزتديرميش قيويرجيق ساچلارينا توخوندو، بيرآز ساهمانلاييب بو سفر ياناقلارينا باخدي. ايشاره بارماغي‌لا ياناقلارينا سورتدويو توند چوهرايي اه‌نلييي (رژ گونه) قولاغينا ساري يايدي. دوداغينا سورتدويو قيرميزي بوياني تزه‌له‌ييب بو سفر گوزل انداميندا اوتوران باهالي ياشيل دونونا باخدي؛ ساغ بودونو ديزيندن ده بير قاريش يوخاري آچيق اولان دونوندان سوزدو. بو گئجه دوغرودان دا پاريلداييردي.کيمسه‌نين اوندان باش اولمايان ديش گورونوشونو بيليجيليي ايله آنلايان قادين بونو آچيقجا گورسه‌ديب بوتون آتماجالاري قولاق‌آردينا ووروب گوزلري غروردان ائله پاريلداييردي کي هامي ال-آياغا دوشوب خيردا گوزگولريني گوتوروب اوز-گوزلريني بير داها ساهمانا سالماغا باشلادي‌لار. اونلار سينسي و پاخيل باخيشلاري‌لا بير-بيريني کسيب دوغراييردي‌لار.دال‌با دال اويون هاوالاري سسله‌نيردي؛ اورتادا ايينه آتماغا يئر يوخيدي. قادينلار باشدان آياغا ايشيم-ايشيم ايشيلداييرديلار؛ اورادا ائله بيل قيزيل توکاني آچيلميشدي.قادينلاردان بيري لاپدان آغزيني آچيب قاققيلداياراق گولدو؛ اونون قارا کوتوکلرله دولو ديش اتلريني، عئيبه‌جر گورکه‌ميني گوروب ديکسيندي. ساختا گولوشلري دوداغينا قوناندا چوروک ديشلري پار-پار پاريلدايان قيزيللاري‌لا غريبه پارادوکس ياراديردي؛ آغيز حيصه‌صيني سانکي ايت قاپميشدي.اونلار قاباق‌‌قاباغا اوينايا-اوينايا دانيشيب گولوردولر. ديشاريدان ويترينده‌‌کي مانکن‌‌لره بنزه‌‌سه‌‌لر ده هرساختا گولوشون آرخاسيندا ابدي بير حسدله ياناشي آشاغيلاييجي، فورسلو باخيشلاري نيفرت ساچيردي.آرتيق دورومو آنلاميشدي. قادينلارين سوزلو باخيشلاريندان، لال دوداقلاري‌‌نين آراسيندان سيزان سوزلردن و بئيينلرينده‌کي گيزلين فيکيرلريندن دهشته گليردي. خوشو گلسه ده گلمه‌سه ده ، اينجيسه ده اينجيمه‌سه ده اونلارين اوره‌يي اونون قارشيسيندا ورق-ورق آچيليردي.سارايدا اود يوندوران اوغلان اوشاقلاريني گتيريب زورلا گلينين قوجاغيندا اوتورتدولار. اود-يالوو قيز اوشاقلاري دا سئوينجک آتيليب دوشه‌‌رک گلينه ساري قاچدي‌لار؛ گلينين قوجاغيندا اوتورماق ايسته‌ديکده قاين‌آناسي اونلارين قاباغيني کسيب جوجه سوروسونو کيشله‌ين کيمي کيشله‌دي. سونرا دا قيزاريب بوزاراراق بوغازيني جيرا-جيرا: بو» قيز« دوغماق اوستونده مني چوخ ايينه‌لئييبلر، نه باشوزو آغريديم آخي … الله قويسا دوشر‌لي اولار.-دئدي.سونرا اليني قووزاييب اکديردييي اوزون ديرناقلاري‌‌لا سارايداکي بوتون قادين‌لاري گورسه‌درک »سوبايلاريميزا قيسمت« دئييب گلينه ساري يئريدي. اوردان-بوردان »الله موبارک ائله‌سين« سس‌لري قووزاندي.
هردن بئله شئي‌لر گوروب، ائله سوزلر ائشيديردي کي هفته‌لرله مات معطل قاليردي.
گلينين الينده‌کي سبدي زورلا بارماقلاري‌نين آراسيندان چکيب ايچيندهکي بير ييغين قيزيل گول لچکلريني گويه سووردولار …
ايلک باخيشدا گويدن توکولن کاغيذلاري گوردو. اييليب قارا پارچاينان اورتولموش قبيرين اوستونه دوشموش بوز کاغيذي گوتوردو. گلينين اولوم اعلاميه‌سي‌ايدي؛ اونون شکيلي‌نين يئرينه قيزيل گول عکسي وورولموشدو؛ گوزلري شکيلين و يازي‌لارين آراسيندا گئت-گلده ايدي: آتاسي‌نين عزيز قيزي، قايناتاسي‌نين عزيز گليني، اري‌نين عزيز آروادي، قارداشي‌نين عزيز باجيسي، عميسي‌نين، داييسي‌نين …
اونو دوغان بير قادين وارايدي‌مي گوره‌سن؟! ياخود باجيسي!؟ خالاسي! بيبيسي! يئزنه‌لري‌نين آدي يازيلميشدي و سن اونلارين ساييسيندان نئچه باجيسي اولدوغونو بيليردين. ائولنمه‌ميش باجيسي نئجه؟! اولسايدي دا بيلينميردي، يازيلماميشدي، داها دوغروسو ساييلميردي.
هردن کولک قالخيردي، يئره سپه‌له‌نن گول لچکلريني توپا ايله بير داها گويه سوووروردو. کولک بير داها قالخاندا قبيرلرين اوستونده‌کي قارا پارچالاري دا قاباغينا قاتيب، توز-تورپاق قوپاراراق گوتوروب آپاردي.يان-يانا ياتان ايکي قادينين، آنا-بالانين شکيللريني باش‌داشي‌لاريندا گوردو.قبيرلرين اوزه‌رينده‌کي يازي‌لاردان اونلارين آنا-بالا اولدوقلاري بيلينميردي، آنجاق اونلاري تانييردي.
بير قادين توزا باتميش ايکي قارا پارچاني گتيريب يئنه شکيللري‌نين اوزه‌ريني قاپادي.
هاميميز بئله غريب، دوز عمللي تانينمادان مي اوله‌جکديک؟!موبايليمين صفحه‌سيني يانديريب ساعاتا باخيرام. زامان نفسيني درمه‌دن قوشور يويورور؛ بو گئجه سانکي بيري اونو قووالاييردي دا. اوزو ده منيم اوزگورلوک گئجه‌مده.
بير اوشاق قيغيلداييردي. گوزلري يومولو اللري‌له مشقه‌له‌سيني توتوب آغزيندان چيخاريردي، بيرآز قيغيلداييب آياغينا سورتوب يئنه آغزينا ساليردي. آياقلاريني گويده اويناديب تپيک آتيردي. آناسي سود شيشه‌سيني بيرآز چالخالاييب الينه وئردي.– مشقله‌سي قيزيلداندي ها …گوردون؟فاطيمه‌يه اوتري گوز آتيب يئنه اوشاغا باخديم. اونون دانيشيغي‌نين داواميني ائشيتمه‌ديم. او نه‌سه دئييردي؛ دوداقلاري سورکلي ترپه‌‌نيردي. آرادا باشيمي ترپه‌ديب قولاق آسديغيمي گوسته‌ريرديم، هردن بير گولومسه‌ييب گوزلرينه داليرديم، آنجاق … آنجاق منيم اورادا اولماماغيمي بيلميردي.چونوب فاطيمه‌يه باخديم. او آج‌گوزلوکله اوشاغين مشقله‌سينه باخاراق نه‌لرسه دوشونوب آغزي‌نين سويو آخيردي.يئنه منه ساري اييليب ديشيني آغارتدي: سن ده باخ بلکه گوزوموزون قوردو اولدو.او بيرآز يئرينده چويوب اوره‌‌ک سيخينتيسيندان بئزميش آداملار کيمي دوداقلاريني آرالاييب اوزون-اوزادي پوفولدادي: قوي ائوه يئتيشيم حسن‌ين خيرتده‌ييننن ياپيشاجام، آدي باتميش. ميلتين باش-ال-آياغيننان قير قيزيل ساللانير. اونا چوخ باها باشا گله‌جک. بيزلر الله‌ين گونون گورمه‌ديک … هر نه بورج خرج اولدو … بئله توي‌لاردان سورا من دوز بير هفته مريض اولورام،
منبع :