بولگه لر سرويسي: احمد ييرمي‌دوققوز ياشا دولموشدو؛ اوجا بوي، شووه‌رک، قاشلاري چاتيلميش؛ اوزونده‌ايسه آجي بير تبسم گؤزه چارپيردي. دورومون گرگينليگي، معاشين چتينليگي، گئجه گوندوز آتاسي ايله برابر ايشله‌مک، اونو سارسيتميشدي. آتاسي،‌ دان يئري سؤکولرکن يوخودان دوروب، مئيدانا گئديب، الينه نه گليرسه -سوغان، يئرآلما، پامادور- آليب، هله‌هاوا تام ايشيقلانماميش ساتيش يئرينه گتيرردي. او گلينجه، احمد آراباني سيليب، تميزله‌ييب، ترمينال مئيداني‌نين گون باتان طرفينده يئرلشديرير، آتاسينين يولونو گؤزلردي؛ نه کي آتاسي قيرخ‌ايل‌ليک آليش- وئريشده اوستالاشميشدي، مئيدانا اؤزو گئدردي.

کئچن ايکي ايلده، آتاسي اوره‌ک خسته‌ليگي تاپميشدي؛ بو دا احمدين احوالاتين داهادا پوزموشدو. ائله بونا گؤره ده ايشين آغيرليغي احمدين چيگنينه دوشموشدو. او چوخ گونلر آخشاما قده‌ر ايشلري يالقيزجاسينا قاباغا آپاراردي.يازين سون گونلري ايدي؛‌هاوالار چوخ ايستي کئچيردي، آمما آخشام باشي باهارين حزين – حزين اسن يئلي، اينسانين روحون اوخشاييردي؛ دئمک باهار، هر يئرده باهار ايدي. آنجاق طالعينين آجيليغي، آتاسينين خسته‌ليگي ندني‌له بوگونلر احمدين اوره‌يي داها سيخيليردي.– ايکي کيلو يئرآلما، بير کيلو پامادور…!

‌احمد – هه، بلي، اينديسه….- دئيه‌رک، سانکي آيري عالمه کؤچموشدو، موشتري‌نين سسي اونو سيلکه‌لييب اؤزونه گتيردي. ياشي اؤتموش، الي چليک‌لي بير کيشي اؤنونده دورموشدو. ايسته‌ديکلرين وئرنده گؤز- گؤزه ساتاشديلار. بير آندا احمد بو گؤزلرين اؤزونه چوخ ياخين اولماسيني دويدو.– اؤزودور، آغاي محسني؛ مني مدرسه‌دن ديدرگين سالان موعلليم؛ اينديکي قارا گونلريمين «اسيرليک تانريسي»! اينانا بيلميرم… باخ گؤر ساچلاري نئجه آغارميش!احمد حئيران قالميشدي؛ بو حئيرانليق اونو اوشاقليقدا قويلانان دومانلي گونلره چکيب آپاردي، او آلا قارانليق گونلره. بئينينده آچيلمايان دوگونلر جانلانماغا باشلادي، اوتوز ايله ياخين کؤلگه کيمي‌اونونلا دولانان دوگونلر. او دالغين باخيشلاريلا موشترينين گئديشين ايزله‌ييردي.ييرمي‌ايل بوندان قاباغا قاييدير. بو گونکو کيمي‌ياديمدادير، اوچونجو صينيفده‌ايديم. اينشا درسي اولان ساعاتلار منيم زاواللي گونلريم ايدي.آغاي محسني اوزو ائنلي، بوغلي، اورتا بوي، چوخدا عصبلي بير موعلليم ايدي. کيلاسدا بوتونلوکله فارسي صؤحبت ائلردي. ايکي آياقلارين جوتله‌ميشدي بير باشماغا، گرکدير اؤيرنجيلر کيلاسدا فارسي ديلده دانيشسينلار. اؤيرنجي‌لر‌ايسه ايسته‌ييرديلر فارسي ديلده دانيشيب، يازالار، آمما هئچ بيري باجارميردي. بو آغاي محسني‌ني داها عصبلنديريردي. بونا قارشي‌دا منيم ايچريمده بير نوع ديرنمک، داها دوغروسو دانقازليق حيسي باش قالديريردي، آمما گئتديکجه قورخولو بير نوقطه‌يه چاتيرديم. آخي آغاي محسني دؤنه‌لرله اوشاقلاري چوخ آجيغلي و نيفرتلي بير حالدا وورموشدو…کيلاسا گيررکن اؤيرنجي‌لر بيرليکده آياغا قالخديلار. آغاي محسني‌نين «-بنشينيد!… » امري‌ايله، اونلار سس‌سيز- سميرسيز اوتوردولار. آغاي محسني‌ کيلاسين ائنين بويون آستا -آستا آدديملاياراق، اؤيرنجيلري گؤز آلتي سوزدو؛ سونرا اوزونو اونلارا توتارکن: «-پس امروز درس انشا داريم!» سورغوسونو وئردي. اوشاقلار ايسه گؤز آلتي بير- بيرينين اوزونه باخديلار. قورخو‌هاواسي منيم جانيما جومدو؛ بلکه ده بير حيس ايدي. آغاي محسني‌نين گؤزلرينين ايچينه باخماغا بير ماجال تاپديم، آمما، سانديم اونون گؤزلرينين درينليگينده بوغولورام. نفسيم سينه‌مده توپلانميشدي. هر بير زاد بئينيمده قاريشميشدي؛ سانيرديم دومان ايچينده‌يم. منيمله ياناشي اوتوران عسگرين اوزونه باخديم؛ رنگي تمام پوزولموشدو.سانکي آغاي محسني‌نين قدم وورماسي باشا چاتان دئييلدي. هر آدديم گؤتوردوکده پوتين آياق‌قابي‌سينين شيققيلتيسي قولاقلاريمدا جينگيلده‌ييردي. اوشاقليقدا قاراباسان يوخو تک قورخولو بير حيس اوره‌ييمي‌چولقلاييردي؛ صبريم توکنميشدي. ديليم توپوق وورارکن، تيترک بير سس‌له عسگره: – «من گئتمه‌لي‌يم!». دئديم؛ آمما کيمدير اؤزون بو بحرانلي حالدان قورتارا؟کيلاسدا سس‌سيزليک چؤکموشدو. بيلميرم زنگين چالينماسينا نه قدر قاليردي. آغاي محسني دفتره چاغريلدي؛ ائله گؤرونوردو ائولريندن زنگ آچيبلار. منسه کيتابلاريمي‌گؤتوروب، بير گؤز قيرپيميندا اؤزومو خيياوانين اورتاسيندا گؤردوم. گؤزلريم هئچ بير ياني گؤرموردو؛ جانيمي‌تر باسميشدي؛ ماشينلارين سيگنالي، جماعاتين گونده‌ليک ايشلرينه گل- گئدي،‌هاميسي گؤزومون اؤنونده يوخو کيمي‌نظره گليردي؛ اطرافيما گؤز گزديرديم؛ قورخو ايچيمده يالمالانيردي، دئمک جانيما هوپموشدو؛ هئچ اؤزومده بيلميرديم بو قورخو نئجه دامارلاريمدا گزير؛ اينجاريم کسيلميشدي؛ کيلاسا قاييتماق ايسته‌ييرديم، آمما قيچلاريم قيفيللانميشدي. دولغون بير حالدا ائوه ساري يوللانديم. قاپي‌دا آنامي‌گؤرن کيمي‌هؤنکورتو ايله آغلايارکن، اؤزومو اونون قوجاغينا آتديم. قهردن هيککه‌لنميش بوغازيمين دوگونو ياواش – ياواش آچيليردي. آنامين ايستي قوجاغي، حدسيز محبتي مني سيلکه‌له‌دي. «آنا» قوللارينين آراسيندا توختاقليغي دويدوم. آنام گؤز ياشلاريمي‌سيلرکن: «-نئچه دفه دئميشم، گئت آتانا کؤمگ ائله، اونون الي يالين‌دي، تک‌دي» دئدي…چوخ اوزاقلاردا باسديريلميش دومانلي گونلر، يئني‌دن احمدين کؤنلونه دريندن چؤکموش دويغولاري قايناديردي؛ بوقچا کيمي‌بوکولموش يادداشلاري، واراقلاييردي. او درين فيکره دالميشدي. آزجا سونرا جووانا بير قادين پريشان حالدا:– آي احمد گل! آتام اؤلدو. آي…!احمد باشيني قالديران کيمي‌قارشيسيندا باجيسي زينبي گؤردو. زينب احمددن ايکي ياش کيچيک ايدي. آناسي زينبي دوغاندا، دونياسين دئييشميشدي. زينب احمد اوچون هم آنا و هم باجي اولموشدو.– -نئجه!؟ آتام اؤلدو؟اوره‌يي يئريندن اوزولدو… اسيرليک تانريسي اولان آغاي محسني، آليش- وئريش، اؤيرنجي‌ليک و …‌هاميسي بير-بيرينه قاريشدي. احمدين ايچينده هر بير زاد اوچوردو؛ سانکي ايچ دونياسي شوملاييب قارانليق بير قويويا آخيردي. ايندي احمد «آتا»نين نه اولدوغونو و درين معناسيني دويوردو. خيسين- خيسين آغلاماغا باشلادي؛ ائولرينه دوغرو يوگوردو؛ قوهوم- اقربا‌هاميسي ييغيلميشدي. باجيسي زينب ديرناقلاري‌لا اوزونون دريسيني ديديردي. اونون سولغون چؤهره‌سينده جيزيق سالميش قيرميزي جيزگيلر گؤرونوردو…عائله مسئوليتي احمدين عهده‌سينه دوشدو. گئجه- گوندوز يوخسوللوغا قارشي چاليشيردي. حياتين آمانسيز فيرتينالاري اونو داشدان داشا چيرپيب، تحصيل آلماغي بوتونلوکله ياديندان چيخارتدي. زامان اؤتدوکده آلنينا دوشن جيزگي‌لر درينلشيردي.عسگر تبريز يونيوئرسيته‌سينده، «فني دانشکده»ده «ساختمان» ريشته‌سينده تحصيل آلماغا قبول اولموشدو، آمما ايکينجي ايلدن اونو يونيوئرسيته‌دن عسگرليک اوچون پادگانا گؤندرميشديلر. بونلارا باخماياراق اسکي دوستلاري‌لا اؤز علاقه‌سيني کسمه‌ميشدي. گاهدان ترمينالين گون باتان طرفينده احمده باش ووراردي. بوگون گلنده «بالاجا قارا باليق» حئکايه کيتابيني گتيرميشدي. اوزون احمده دوتوب: «-بو کيتابي اوخوماليسان، گلن هفته گله‌جه‌يم، بو باره‌ده دانيشيغيميز اولاجاق.» دئميشدي. عسگرين بو باش چکمه‌لري ايللر بويو اونا بؤيوک داياق اولموشدو. احمد: -«موطلق اوخويارام، آمما سؤز وئر کي گلن هفته حتمن گله‌سن. ندنسه بو گونلر اوروجلوق آيي کيمي‌هردن بير گؤرسه‌نيرسن.» دئميشدي. عسگر ايسه: -«وضعييت چوخ گرگينلشيب. دوستلارين بير چوخلاري توتولوب، آمما بير ايش قاباغا چيخماسا موطلق گلمه‌لييم.» سؤزلري‌له اونو جاوابلاميشدي.عسگر اوجا بوي، ائنلي کوره‌ک، قالين بوغلي بير گنج‌ايدي. گوزونده‌کي شوشه‌سي ايستکان تکيندن قالين بير گؤزلوکله هميشه اوزو تبسملي گؤرونردي؛ آنجاق بير نئچه آي اؤنجه‌دن داورانيشي چوخ دئييشميشدي. پارلاق گؤزلرينده گيزلي بير ايضطيراب واريدي. بير آز اوتوراندان سونرا، کؤلگه کيمي‌سوزولوب گئديردي. گئتمه‌دن اؤنجه ذه يان- يؤره‌سيني يوخلاييردي. احمدين کيچيک دونياسيندا عسگر تک اينسانلار نه کي بير معنوي قارداش، بلکه گؤزلليک عالمينده ميثيلسيز دوست ايدي. اونلارين وارليغي حياتين دؤزولمز آن‌لاريني معنالانديريردي.احمد کيتابلاري اؤزل بير ماراقلا اوخويوردو. اوخودوقجادا دونيايا باخيشي، حياتا موناسيبتي دئييشير، گونو گوندن درينلشيردي. عسگرين هر گليشينده اونوندا اوره‌يينده نور ساچيليردي.پاييزين ايلک گونلر ايدي. يايين ايستي‌هاواسينين ال آياقي چکيلميشدي. آخشام‌باشي‌لار‌هاوا چوخ سويوق گئچيردي. قالين پالتار گئييلمه‌لي‌ايدي. شافاق ياواش- ياواش قاراليردي. احمد کتيلين اوستونده اوتوروب، دمير حلبي‌ده اود قالاميشدي. گؤزلري قان قيرمزي کؤزلره تيکيلميشدي. درين فيکره دالميشدي. بو آندا عسگر گلدي. او چوخ دالغين نظره گليردي. احمد دوروب يئرين عسگره وئردي. عسگر ايسه اگلشدي.– هه، کيتابي اوخودون؟ نئجه گوردون؟– اوخودوم، لاپ ايکي دفه اوخودوم!– بيز اوخومالي‌ييق؛ موطلق اوخومالي‌ييق. بو گون بيزيم آخساقليغيميز، بئساواد اولماغيميزداندي. «قارا باليق» بيزيم بو گونکو دورومو تمثيل ائدير.عسگر ايناملي ايدي. بو گؤروش اونون سون گؤروشو‌ايدي، آمما بونا باخماياراق اؤزون پوزموردو. ايچريسينده کي قه‌هري گيزلتمه‌گه چاليشيردي. گؤزلرينده حيرت و هيجان آيدين گؤرونوردو. احمد ده عسگرين احوالين دويموشدو. گؤزلري دولموش حالدا اوندان: -«نئجه اولوب کي، بئله پوزغون اولموسان؟» سوالايني سورموشدو.– من سفره گئتمه‌لي‌يم، بلکه بير آيليق. «امين» آدلي بير دوستوموز گاهدان سنه باش ووراجاق. سن اوچون کيتاب دا گتيره‌جک. اونا اينانا بيلرسن. بيرده کي چوخ احتياطلي اولماليسان.ايکي يولداش قول- بويون اولوب، آيريلماق ايسته‌ديلر. عسگر قاييديشي بللي اولمايان بير سفره يوللانيردي. احمد ايسه مغرورجاسينا يولداشيني يولا ساليردي. هر ايکيسي‌نين گؤزلرينين درينليگينده حسرت، کدر، اوتوز ايلليک دوپ- دورو يولداشچيليق قيميلدانيردي.

سون سؤز احمدين دوداغيندان دوشمه‌دن عسگر يولا دوشموشدو…