قالسين خانيم
قالسين خانيم
1400/07/25
بولگه لر سرويسي: بورا کيمي هئچ کيم اوزونو گؤرمه‌ميشدي. هاميدان ياشماق توتاردي. گونونون چوخونو سيره‌لرده کئچيرردي. اؤزو دانيشيردي: »ايندييه جن دعالاريمين هاميسي الله¬يم طرفيندن مستجاب اولوب، زيارتگاهلارين چوخونو زيارت ائيله¬ميشم، آرزولاريما چاتميشام، ايندن بئله اؤلسم ده آرزوم گؤزومده قالماز.« »قالسين خانيم« قونشوموز ايدي.
حسن_عجبشرلي
بولگه لر سرويسي: بورا کيمي هئچ کيم اوزونو گؤرمه‌ميشدي. هاميدان ياشماق توتاردي. گونونون چوخونو سيره‌لرده کئچيرردي. اؤزو دانيشيردي: »ايندييه جن دعالاريمين هاميسي الله¬يم طرفيندن مستجاب اولوب، زيارتگاهلارين چوخونو زيارت ائيله¬ميشم، آرزولاريما چاتميشام، ايندن بئله اؤلسم ده آرزوم گؤزومده قالماز.« »قالسين خانيم« قونشوموز ايدي. اوغلانلاري ائولنيب آيريلميشديلار. قيزلاري ايسه اره گئديب، تکليکده ياشاييردي. گليري آنجاق اري¬نين آيليغي، بيرده دده ماليسي اولان قانا- بادامليقدان گلن عايداتدان باشقا هئچ نه دئييلدي.
هارداسا چرشابا بورونوب، بير گؤزو ايلن باخان خانيملارلا راستلاشسايديم، »قالسين خانيمين« گؤرکمي يادداشيمدا گوجلنردي. اوندا اولان دؤزوم مني حيرته دالديراردي. هئچ ندن گيلئيلنمزدي، هرنه¬يين اولدوغونو اؤزو کيمي ساناردي. يازيب- اوخوماق بيلمزدي. نه اؤگرنميشديسه آغالارين آغزيندان يارارلانيب، اونلاري منيمسه¬ييب اؤز کاراکتريني بوتؤولتميشدي.
اوشاق چاغلاريمدا آنام اليمدن ياپيشيب تئز- تئز ائولرينه دؤنرديک. اينديسه او اوشاقلاريندان اوزولوشوب من ده اؤزومه گؤره کيشي اولموشام. ياشايش قورموشام، ائو- ائشيک اييه¬سي اولموشام. مثلاً بؤيوموشم، هر حالدا من سونرالار باشا دوشدوم قونشوموزون آدي نييه »قالسين« دير. سن دئمه آتا- آناسي¬نين اوشاقلاري دنيايا گؤز آچان کيمي اؤلورموش، او اوزدن بو اوشاغين آديني»قالسين« سئچيرلر، بلکه تانري¬نين خوشونا گليب، اونونلادا ساخلاسين؛ ائله ده اولور.
آدي سيجيل اداره¬سينده »فاطمه« يازيلسا دا، هامي اونو »قالسين« چاغيراردي. قالسين خانيمين حيات-يولداشي معارف اداره¬سي¬نين نامه پايلاياني ايدي. چوخ چتين ياديما گلير »قوربان« عمي¬نين 28 نومره¬لي چرخي وار ايدي، داليسينا خورجون آسلاياردي ايچي دولو اولاردي مکتوب¬لا. اورک خسته¬ليگينه توتولوب واختيندان تئز دونياسيني دئيشدي.
من کوچه¬ميزين باشيندا قوطي اوستونده بيسکويت، راحت¬الحلقوم، چوپلو شيرني ساتارديم، کوره¬چي »مشه محمد«ين اوغلوکولمن¬ده آناسي دوزلتديگي اينديکي ديلده دئسک (يخمک) ساتاردي.
»علي»¬نين آل- وئري مندن چوخ اولاردي، آخي »علي» دولاناردي، »دولانان آياغا داش دگر« دئيبلر آتالار.
ياديما گلن 1358 ايللر ايدي، سعيد جووه، مير رحيم، عبدالحسين، رحيم علي بيرليکده »آيندگان« گونده-ليگيني اوخويوب اؤز فيکيرلريني ايرلي سوروردولر، هردن سؤزه گليب، سسلري اوجاليردي.
او دورده سياسي بحثلرين بازاري چوخ قيزقين ايدي، بيز اوشاقليق دونياميزدا سئير ائدرک اونلار گلجه¬گه فيکيرلشيب پيلان يازيرديلار، آنجاق سن ساناديغيني سانا، گؤر فلک نه سانايير. بير دؤنه ائشيتديگيم سؤزلري ساناديقدا: آل بايراق، گلجک بيزيم دير، اؤلسون آمريکا، وسايره.
آزيندان 10 کيمي سايديم. او گون »قالسين خانيم« کوچه باشيندان سووولوب کئچنده، گؤزو اوغلو »عسگر«ه ساتاشيب، چاغيريب:»بوردا ايت اوتارينجا، او قانا¬يا بير باش چکيب، دوندارما سويونون زاماني دير به¬يم اسد قره اوغلوندان سو آلدين.« دئدي. »کئچ گؤروم کئچي جاني¬نين هاييندادير قصاب پي آختارير.
آي گؤروم ايگيد آرخان يئره گلسين، او قانا، بادامليق بيزيم گلير يئريميزدي، تئز چورک تاپارسان. قوشولدوغون يولداشلارين سنه بير گون آغلار.«
»قالسين خانيم«آغزيندان چيخاني عسگره دئدي. بير کز اونون آجيقلانماغيني »مير رحيمه« گؤردوم ،آرواد گؤزونو يوموب، آغزيني آچيب، سؤز قالمادي دئمه¬سين:»بابا گئدين اؤز خارابازين باشيندا جووقا قورون، گليب خالقين اوشاقلاريني نييه يولدان چيخارديرسيز. بو گون ماهاباد، صاباح تبريز، بيريسي گون تهران هه سيز دئيرسيز بس او دانيشانلار سيزه قوز حالواسي يئديردجکلر، بلکه يوخودا گؤره¬سيز، بيز ايشله¬مه¬سک بونو سيرغا ائله¬ييب قولاغيزا تاخين ديشله¬مييه¬جه¬ييک.«
اوغلو عسگر پول کيمي قيزارميشدي. هئچ نه دييه بيلمه¬ديگيندن آلني¬نين دامارلاري آز قاليردي پارتلاسين. من بيلميرديم شهرلرين آديني نه اوزدن چکير، اونلارا فيکيرلشديکده، اوياندان »دلي زهرا« ني گؤردوم هميشه کي کيمي کيشي پالتاري گييينيب گلير، »قالسين خانيمي« گؤرن ديلي آچيلدي: »قالسين گينه نييه ايت باشي آلميسان آغزيوا؟ نييه گينه دليليگين توتوب، بوراخ گل گئدک منه بير آغيز چاي- چؤرک وئر. سن اوزون بونلاردان سفئه سن، بونلارلا باش- باشا قويورسان، بيليسن بونلارين ائله بو وقتلري¬دي«
»قالسين خانيم« دئيينه- دئيينه قوشولوب «دلي زهرا»يا گئتديلر. گئده-گئده »دلي زهرا»، »قالسين خانيما« عقل قويوردو: «هاردان گليرسن؟ حتماً سيره¬دن يادا مسجددن. آرواد سنين طويله ميخيوي بو ايکي يئره ووروبلار، بسدي دا يورولموسان؟! باخ من سنه نشانا، تکليکدن اوجور يئرلره سيغينديم، ايندي چؤلون قوشو اولموشام، بيابانين داشي. هامي محله ده، کوچه ده مني لاغا قويوب گولر، اما قالسين سنه دوزونو دئيم اونلار نه دانيشديلار يالان چيخدي من اودوزدوم. ايش- ايشدن کئچميشدي. چاره تاپماديم اؤزومو وورديم دليليگه، آخي بو خلقين عاغلي گؤزونده دير.»داها قالان دانيشقلاريندان هئچ نه آنلاشيلمادي، اوزاقلاشديقجا تکجه «دلي زهرا«نين ال- قول اؤلچمکلري، بيرده »قالسين خانيمين« باشي¬نين ترپنمه¬سي آنلاشيليردي.
او ايللر مکتبلر قاپانميشدي. اوشاقلار منه تاي کوچه- باجاني گزيرديلر. دانشگاهلاردا انقلابين فرهنگي شوراسي¬نين نظريني گؤدوردولر. بيزدن ياشليلار دا، بير تهر بکارلاميشديلار.
اونو دييرديم »دلي زهرا« دان اوشاقلار قورخارديلار، آخي تئز -تئز گؤرمزديک. مکتبلر قاپانديقدان کوچه ده گؤرونوب راست گليرديک. بير ساعتدن سونرا »دلي زهرا«، »قالسين خانيم« گيلدن چيخيب اؤز- اؤزونه دانيشا- دانيشا بيزيم کوچه¬ني گئريده قويوب، »حاج حمزه« يولاغينا يؤنلدي. يازيق آرواد قارنين اوتاريردي. ندن بوآرواد دا قادينليق گؤرکمي قالماميشدي. گئيينجگي تام کيشيلر ساياغي، شلوار، باشماق، پئنجک ايدي، اوزوده شالواري¬نين اتکلريني جورابلارينا سالاردي.
آنام اوشاق چاغلاريمدا قورخوداردي، ناهار چاغيلار ائشيگه چيخماغيمين قاباغيني آلسين دييه، «ايندي دلي زهرا کوچه ده دولانير»دييردي.
نه ايسه آزجا ياشلانديق کوچه- باجايا چيخديق، »دلي زهرا«ني اؤزوموز کيمي گؤردوک، هله بلکه ده اؤزوموزدن ده عقللي!!!
منبع :