جامدان گؤرونن چينارلار

بولگه لر سرويسي: بو گون يئددينجي گون‎دور کي بو تختين اوستونده‎يم. سحر آخشاما بو توتغون جامدان گؤيه باخيرام. جامدان گؤرونن چينارلارين يارپاقلاري گوندن – گونه رنگين آتـير, سارالير, ايکيندي چاغلاري کولک اسنده يارپاغلار بوداغدان اوزولوشور, گؤيده هرله‎نير؛ اوزو آشاغي گئد‎ه‎نده منيم گؤزومدن ايتيرلر. گؤيده آرا- سيرا بولودلار گزيشير. هره‎سي بير شئيه بنزه‎يير. بيري خوروزا, بيري تولکويه. آغي‎ وار, بوزو وار. گاه سئيره‎ک‎لشير, گاهدان چيته‎نير، قارالير.

ايسراغا گون سحردن بولودلار ييغيشيب گلديلر. بير- بيرينه قوووشدولار. ائرته‎سي گون, سحر چاغي گون چيخاندا, يارپاقلار ايشيم- ايشيم ايشيلداييردي. تر- تميز! کئشکه بو جام‎لاري ‎دا يويوب تميرله‎يئيدي.
 گون اورتادان سونرا, پرستار گلدي يئنه‎ده قولوما سيروم باغلادي. »حب‎لريوي آتـيسان« دئيه, جاواب آلمادان قيميشيب گئتدي. مندن باشقا بير نفر ده بو اوتاقدا ياتـيب, سحر- آخشاما مورگوله‎يير. گئجه‎لر خورولتوسوندان يوخو گؤزومه گئتمير. دوکتورا دئميشم حب‎ وئريب, آمما او شووغريبي‎ ده آتاندا بيلميرم نييه مني قارا باسير.
او گئجه يوخو گؤردوم کيشي گليب د‎بئهله‎يير. دئيير پولومو وئر. حيرصيم باغيرساغيمي کسيردي. قيشقيرتـيمدان پرستارلار تؤکولوب گلميشديلر. مني آييلتديلار, گؤزومو آشجاق, بيلديم يوخو ايميش. ائله بيل دونياني منه وئرديلر و اکبر آغايا دئييره‎م اوغونوب گئدير. دئيير کيشي ائله‎ده بير ايش اولار؟دوغروداندا بو کيشي‎نين حاققي منيم بويونومدا چوخدو.
کارا گلن آدام‎دي. او اولماسايدي, هئچ منيم دويونوم آچيلمازدي. البته اوشاقليق دوستومدو. نئچه ايل باهم معلليم‌ايديک. سونرا “دانشسراي عالي”‎ده باهم اولدوق, او رياضي اوخودو, من ادبيات.
بئش- اون ايل بوندان قاباق گلدي تهرانا. بازنشسته اولاندان سونرا ‎دا بو بيمارستانين حسابداريسيندا ايشله‎يير. ماشاللاه کئفي چوخ سازدي. کئشکه ائله من‌ده بير آيري رشته اوخويايديم. دئين اولمادي آي بابا ادبيات‌دا اولدو رشته, (فعولن فعولن فعولن فعول).
الغرض, عؤمرو وئرديک بادا. دؤرد ايلدي بازنشسته‎يم. بير پيشيک‎‎ده قاپيمدا ميولداماييب کي گل سن ده بو ايشين قولپوندان ياپيش، بئش قيران پول آل! کيچيک بير شه‎هردي.‌هامي مني تانييير. کيمين قاپي‎سينا گئديم. بابام ،آدام قات- قات ات تؤکور. بو شه‎هرده بيز ده بير گون اؤزوموزه بير آدام ايديق. بو گون ايش باشيندا اولانلارين چوخو منيم شاگيردلريم اولوب، هر ايداره‎‎يه گئديرم گؤروسن بيري ميزين داليندان قالخير، سالام آقاي قديري، بويورون! بويورون ميزين داليندا ايله‎شين!
گئدير الينده چاي آلير گتيرير. من اوتاقدان چيخمايينجا ميزي‎نين دالينا کئچمير. دئييرم منيم هله‎ده سيزه نيسبت شاگيردليک حيسسيم وار. خيياواندان کئچنده سالامدي‎ کي ياغير. سالام آقاي قديري, سالام اوستاد, سالام جناب قديري.
بؤرکومو گؤتوروب قويماغدان آستاري قيراق آلا گئديب, بو گون صاباحدي کي سؤکوله. من بو بورکو کئفين ساز واختي آلميشديم. دؤره بورک‎دي. قاباقلار قيشدان- قيشا قويارديم. آمما بير نئچه ايلدي اوشاقلار دئييرلر آغا سن آللاه هميشه بؤرک قوي. ماشاللاه ائله ياراشير سنه! بيليرم نييه دئييرلر.
 آخي باشيمين توکو تؤکولوب, اوتانيرلار. من ده اوره‎کلرين سينديرميرام. چؤله چيخاندا بؤرک قويورام.
يئريمدن دورا بيلسه‎ايديم, بو جام‎لاري بير سيليب, تميزلرديم. چوخ داريخديرير مني. گومان کي آلتي آيدي تميزلنمه‎ييب. آدين دا قويوبلار خصوصي بيمارستان.
اوشاقلار يامان ياديما دوشوبلر. سهيلا بير لحظه گؤزومون قاباغيندان گئتمير. او گون ملاقاتا گلنده, گؤزومدن قووورغا کيمي ياش النيردي. حؤکمن ياپيشيب کي, آغا وئر گؤروم داشين نه يئکه‎ليگه ايميش. دئييرم قيزيم ماتاه‎دي ساخلييام, آتديق گئتدي دا.
آداخليسي‌دا گلميشدي. آروادا تاپشيرديم داي گلمه‌يه‎لر, بابام يوز آغاج يولدي. دئديم اوشاقلاري آوارا ائله‎مه. من‌ده بئش اون گونه مرخّص اولوب، گله‎جه‎يم. اکبر آغا دا وار. گونده باشيمين اوستونده‎دير, نيگران قالما!گؤز- گؤز ائله‎ديم، ياواشجا پولو وئرديم.
 گؤزلري بؤيودو. بير ته‌هر اوشاقلاري اکيب سوروشدو؛ پولو‌هاردان تاپدين؟ دئديم اکبر آغادان آلميشام. آپار قيزين جئهيزين واجيب‎لرين آل. قالميشينادا آللاه کريمدي. اکبر آغا منه بوردا وام جورله‎ييب. گؤزلري گولدو بئچارانين.
ياخشي اولدو تئز گئتديلر و اکبر آغانين آروادي گلسه‎ايدي, ايش بويويه‎جه‎‎ايدي. اکبر آغا دئيير آقدسين آغزيندا لپه ايسلانماز.
او گوندن کي سهيلانين ائلچي‎سينه هه جاواب وئرديک. فيکير خيال مني گؤتوردو. آرواد دا مني قارالادي کي سن سئوينمه يئرينه نييه قارا تپه‎د‎ن ياس گتيرميسن. نه اولوب؟ نه‌د‎ن ناراحاتسان. اولمويا باجي اوغلووا وئرمک خياليندايدين. دئديم آرواد کئچي جان‌هاييندا, قصّاب پي آختارير. سن نه دانيشيرسان.
 ائوي ييخيلماميش، من جئهيز فيکرينده‎يم.‌هاردان جورلا‎ييب آلاجاييق. دئدي آللاه کريم‎دي. او کي خير- خيرداسي‎دي ائود‎ن جورله‎رم. قالميشينادا قيزيل‎لاريمي ساتـيب آلاريق. من بوندان بئله قيزيلي نئيله‎يير‎م.
او گئجه راحات ياتديم. صاباح سحر آپارديم قيزيل‎لاري ساتديم. گئتديک بازارا. اوچ- دؤرد تيکه شئي آلديق, پول قورتاردي. اويانا قاچ, بويانا قاچ. کيمه آغيز آچيم. کيمين قاپي‎سينا گئديم. آخي‌هامي گيريفتاردي. بانک‎لاردا شاگيردلريمدن وار ايدي.
گئتديم بلکه بير وام جورله‎يه‎لر، دئديلر بير پروانه کسب تاپ گتير، قالميشي بيزيم عهده‎ميزه. بابام منيم کي بار- باققالينان گل- گئديم اولماز, بو آدامي‌هاردان تاپيم. قديم زامان دئييل کي, ايندي بير پونزا قاتـيغي نيسيه‎ وئرميرلر.‌هاندا قالا آداما ضامين اولالار. اصلن منيم بو تاجير جاماعاتدان او قده‎ر‌ده خوشوم گلمز.
 قورساغسيز آدامديلار. ناچارليغدان، جانيمي ييغديم ديشيمه, بيري‎نين يانينا گئتديم، گؤردوم کوهنه پالان سؤکور؛ ايت ايلينده اوغلوما گلديم ايکي نومره ايسته‎ديم وئرمه‎دين.
نه جور اولدو, نه ته‎هر اولدو…., دوردوم آياغا، دوشدوم يولا. آللاه هئچ موسلماني نامرده مؤحتاج ائله‎مه‎سين. گونلر گليب سوووشوردو. اوغلان ائوي ده فيشار گتيريردي کي گليريک گلينيميزي آپاراق. آنجاق لاپ آسيلي قالميشديق. سونرا آللاه طرفي ويردي اکبر آغا گلدي ننه‎سينه باش چکمه‎يه, اونون الي ايله بيزيم دويونوموز آچيلدي.
هرد‎ن مني فيکير خيال گؤتورور. دئييرم, اولمويا بو پول دا گؤرمويه. او گون شوخلوغجا اکبر آغايا دئييره‎م نئجه اولاردي آدامين اوچ بويره‎يي اولايدي. دئيير آي کيشي, ناشوکورلوک ائله‎مه, آللاه بيلن ياخشي‎دي.بو گون يئنه‎ده‌هاوا توتولوب. داريخما باسير مني. کئشگه آياغا دورا بيله‎‎ايديم. بو جاملاري بير سيليب تميزله‎يئيديم.

منبع :