ديکلمه

بولگه لر سرويسي: تورکيه‌ده ائستئتيک توتقونو جميل سنا اونقون بؤيله دئيير:اينسانلارين ان سئودييي شئيلرين چوخ چئشيدلي اولدوغونو هاميميز بيليريک. بعضيلري گزمکدن، بعضيلري باليق توتماقدان،بعضيلري ايسه قومار اويناماقدان خوشلانير. دولاييسييلا دارتيشيلان تئورينين بؤيله بير گؤرونومو وار؛ بيزي هيجانلانديران هر شئيين ايللا دا هونر اولماسي گرکمز؛ آنجاق هر هونر ياپيتي بيزي ياخشي حيسائتديرمهلي. بئله کي، خوشلانماق بير زورونلوقدور؛ آمما بو يئترلي دئييل.

 شهرام گلکار

بولگه لر سرويسي: تورکيه‌ده ائستئتيک توتقونو جميل سنا اونقون بؤيله دئيير:اينسانلارين ان سئودييي شئيلرين چوخ چئشيدلي اولدوغونو هاميميز بيليريک. بعضيلري گزمکدن، بعضيلري باليق توتماقدان،بعضيلري ايسه قومار اويناماقدان خوشلانير. دولاييسييلا دارتيشيلان تئورينين بؤيله بير گؤرونومو وار؛ بيزي هيجانلانديران هر شئيين ايللا دا هونر اولماسي گرکمز؛ آنجاق هر هونر ياپيتي بيزي ياخشي حيسائتديرمهلي. بئله کي، خوشلانماق بير زورونلوقدور؛ آمما بو يئترلي دئييل.
»برنا موران«ين »ادبيات و اللشتري دوشونجه‌لرينده« ادبياتين آنلاتيسيندا (لذت)ين اؤنمي بارهده، گتيريلن يوخاريداکي هؤروتو گؤز اؤنونده بولوندوروب، بير ده »ديکلمه«ني لذت قايناغي اولاراق گلن يوخاريداکي »شئي‌لرين« يئرينه قوياق؛ سونرا دوشونک.»ديکلمه«يه هونر دئيه بيله‌ريک‌مي؟رافيق تاغي حئکايه‌لرينين بيرينينين اورتا يئرلرينده دئيير کي؛»ادبي‌ليک ابدي‌لييين تأميناتچي‌سي‌دير«. بونا داياناراق، ساده‌جه گؤيچک سسله هانسي‌سا بير ياپيتي اؤنجه‌دن بير کز ايکي کز اوخويوب، سونرا مدرنيته سايه‌سينده اؤنجه‌دن حاضير اولان موسيقي‌لردن بيريني فوندا وئريب، ال قاتيب هؤروتون جانينا کاراته کاتاسي کيمي باشلانيشيني قورتاريشيني حئسابلاييب اوخويوب بيترمه‌سينين هاراسيندا ادبيات بير ايز اولا بيلر.
ابديّته – اونون تيلسيميني قيرماغي بيلدين‌سه، آسانجا اورداسان. ابديته قوراشديرمقلا، بيجليکله گئتميرلر کي.
هم گؤزل گؤيچک سسه گلديکده ايسه، ياشانتيميزين کئچميش و اينديکي حاليندان بعضي دئنه‌ييملريميز بيزي ان گؤزل سسلرين بئله زامان بلله‌يينده گئنلده گؤزدن دوشوب يئني ذؤوقلرين دويوسونو دبرتمه‌دييينين چوخونلوقدا گؤرگو تانيقي اولماميزي دفعهلرله گؤسترمهييب مي!؟
«ديکلمه» سسلندييي سورجده سو شيريلتيسي کيمي‌دير دئمه‌يه ده ديليم گلمير، چونکي او سيرادا همن سويون يانليش داشلارا توخونوب هم ده دوز آخاريندا آخا بيلمهيهجهييني آز گؤرمهميشيک. هله بونلاري گؤرمزدن گلسکده کؤکوندن هئچ بير شئي اولمايان بو، بو سو شيريلتيسينين اويوشدوران آنليق چيخيشلي ديغاليق آخيشيني ابديلييي آنديرا بيلهجک هانسي ادبياتينا سيغينا بيلمک اولار کي!؟عيني گون سانال پلاتفورموندا پايلاشيلان هانسي‌سا بير ياپيتين همن ديغال سسلنديريجي اينسانلار طرفيندن بوتون دويولاريني ائلئکتيريک سوپورگه‌سي‌نين تام عکسينه بيردن بوغاز بورولاريندان ديشاري تولازلاديقلاريني آز گؤرمه‌ميشيک. هانسي ادبي اولاي بؤيله‌سينه اورتايا گله بيلر آخي! ديغاللاري کيچيمسه‌ميرم؛ چوخلو ياپيتلار ذاتن نئچه ديغالين ايچينده ده اورتايا گله بيلير، آنجاق ايشدن آزاجيق باشي چيخانلار چوخ گؤزل بيليرلر کي، بو آزاجيق ديغاللارين فونوندا گئنلده چکمه‌سي قولاي اولمايان قان ترلي چاليشمالارين بيلگي و دوشونجه آکسانلي بيلينجلي چتين گونلر آيلار لاپ بئله ايللر دايانير.اولوب کي، گوجلو شاعيرلردن بعضيسي اؤز شعرلريني يا باشقا گوجلو يازارلارين ياپيتلاريني اوخودوقلاري اولوب، اؤرنه‌يين فروغ فرخزاد، احمد شاملو، سهراب سپهري، احمد عاريف، ابراهيم صدري، شهريار و باشقالاري. باخماياراق کي سايديقلاريمين هاميسينين ائدگيسي آلتيندا اولدوغوم اولوب، آنجاق بو سسلنديرمه‌لري بئله هونر جؤهري ايله ديرلنديرمک دوغرو دئييل سانيرام.ادبياتين حياتا گتيردييي اينسانلاردان يا دا ادبياتي حياتا گتيرن اينسانلاردان، اونون يا اونلارين ياراتديغي دونيادان خبرسيز اولان اينسانلار الينده خريطه اولسا دا لازيملي يئره وارامازلار.
***
موعاصير حئکايه‌لر استروکتورجا(ياپتيريم‌جا، قورولوش‌جا) مؤلليفدن آسيلي اولمادان فورمالاشير. بو قورولوش بعضن مؤلليفي کنارا ايته‌له‌يير ده. (رافيق تاغي)
آرتيق بللي‌دي کي اللشتيري اساس قورولوش اوزه‌رينده قورولور؛ بورادا منيم داها چوخ اوزه‌رينده دايانديغيم نؤقطه رافيق تاغي‌نين ايکينجي جومله‌سي‌دير: »بو قورولوش بعضن مؤلليفي کنارا ايته‌له‌يير«. اصلينده باشيندان بري قراعت اوچون اويقولاماغا چاليشديم مانيفئست اساس گوجونو دئمک اولار بو جومله‌دن آلير. قراعتي ‌ يا ديکلمه‌ني هونر کيمي وار سايماغيميز اوچون اونون هارداسا مؤلليفي يا دا اويقولاييجيني ديشلاييب، اؤزونون نه‌سه آرتيرا بيلمه‌سي ا‌وچون اورتادا نه‌سه اولمالي‌دير؛ ايندي بورادا اورتادا دئديييميز شئي يوخسا ياخود هر هانسي سببدن يارانميرسا، دئمک کي هم ذهني هم ده پراکتيک جهتجه قاباغا قويولاسي بير شئي ده يوخدور. گؤزل سسله ياپيتي سسلنديرمک قراعتين اؤزودور، بونون کناريندا نه‌سه اولارسا ‘اوسته گل’ يا علاوه ساييلار. آکسي حالدا قراعت يا سسلنديرمه اوخولاني يا دا اوخونولموشو ايچي‌بوش توفنگه دؤندرمکدن باشقا بير شئي اولا بيله‌مز.دئسپوتلار مدنيّته ميلچک کيمي قونار. »رافيق تاغي«
نه گؤزل دئييب اؤلمز رافيق! نه‌دنسه بونون آکسيني دوشونمک اولمور. قورخولو زامانلاردا ادبياتين »اَ«يني بيلمه‌ييب دوشونمه‌ينلر، ايندي اونون بوتؤو دؤردبوجاغيني قامارلاييبلار؛ همن چاغ جانلا-باشلا اورتاليقدا قيلينج-قلم اوينادانلارا ديرک يا دا دولايلي شکيلده دئييرلر؛ يئرين قيراغينا گلسه‌نيز قيچينيزي قيراريق.»ايش بوراسيندادير کي، منيم صولح دؤورونده قازانديغيم شؤهرت موحاريبه دؤورونده لوزوم‌سوز اولا بيلر. موحاريبه‌ده‌کي شؤهرت ده صولح دؤورونده گرک‌سيزله‌شير.« رافيق تاغي
شؤهرت اساسن هاردا لازيم گلير: دونيا سني، يا سن دونياني آلداداندا. اينساندا آلداتماق مرامي يوخدورسا، شؤهرت اونا معناسيز گؤرونه‌جک. رافق تاغي
…شؤهرتين زيروه‌سيندن ييخيلان نظري جهتجه سالامات قالمامالي‌دير. بو، هوندورلوکدن ييخيلماغين عيني‌دير. شؤهرت‌دن ييخيلانين اؤلومو قاچيلمازدير… رافيق تاغي
باشقا آنلامدا، دئسپوتلار مدنيتي ديريني بيلديکلريندن قامارلامازلار؛ صيرف قوللانسينلار دئيه اوزه‌رينه چؤکرلر. اونلار اوچون مدنيّت ان ديرلي، واختيندا دا بير قوش زيليغي قدر اولا اولمايادير. فقط زامانين طلبي، مين کره موردار شکيلده قووولسالار دا مينين‌جي کره آنلام‌سيز بيچيمده تکجه‌نه سس تونو ايله ويززز ائديب اوستونه قونماقدان ياناديرلار.
***
آردي وار

منبع :