بتر آدام اولدون

بولگه لر سرويسي: کيريييب قاليب دونندن يا ناواختدان. اوزو قويلو نئجه دوشوب، دوشوب. “آي قدرته مئيدان اوخوردون!” همن چيراغ يانير باشي اوسته. چيراغ کي واختي گؤرستمز. “قولو قاليب آلتيندا قورويوب. بيرقولاي ترپَدير الين، شالوارين اووجلور. ياش دئييل. بيلينه بيلينمه‌يه، نم دي. “

فرانک فريد
سون بولوم

“آچيلين اوستومدن، گلمه‌يين اوستومه  نه ايستيرسيز جانيمدان؟ گلمه‌يين اوستومه.” دئيير اوره‌گينده. “خفه‌لنين ”
“بلبل کيمي‌دانيشاندا خفه‌لنئيدين با.” “سعيدي قينادين تئز ديله گلدي؟” “ائشيکده نفس ايستي يئردن چيخار، ايستي  ! ” بيردن ايستي باسير بيله‌سين.“قرارين واختين ترسه دئديم.”
“يئرين کي دوز دئدين! ” “گونون کي دوز دئدين! دا نه قالدي؟”
“بيه گلمه‌ديلر بوگون” بَ بيلديلر توتول ” “بيلللر، حتماً بيلللر… کاش بيلميش ”… عسگرين باغيرما سسي فيکرين کسير. چتين‌ليک‌له دؤنه بيلير آرخاسي اوسته. کوره‌گي گؤينور، زوو چکير. جاني چيخير…
منيژ باشي‌نين اوستونده. الين آلنينا چکير يا گؤزلرينه. ننه‌سي اؤزون دؤيور. منيژين گؤزو اونون قانچيل آياق‌لارينا دوشنده، هوشدان گئدير…
“جلسه بيزده. ائولي آداما شک ائله‌مزلر،” سؤزون منيژ‌‌ه دئمير؛ اورگينده دئيير. بو سؤزو يولداش‌لار‌هاميسي دئيردي. اوغلونون ونقّه ونقي گلير. منيژ اوشاغي ساکيتلدنمير. جلسه اوتاغينا دا دولور سس. چيخير، “آبيريم گئتدي، بير ايش گؤر، منيژ” دئيير.
“گؤر کيم آبيريدان دانيشير!”“آبيري ساخلادين اؤزووه؟”“هووَ به هووَ ديينده آبريوا فيکيرلشئيدين.”
“سانجي‌دي، نئينيم؟” دئيير منيژ. اوشاغين ونقّه ونقي قاليب قولاغيندا. او ونقيلتي اؤزوندن چيخير بو يول. آياق‌لارين باغلاييبلار تختين آشاغاسينا. کابلين ويژيلتيسي اوّل‌هاواني يارير، سونرا آياق‌لاري‌نين دريسين… ويژّا ويژ…
دده‌سي شوو الينده، حيطده داليسيجا قاچير. بو دا حووضون باشينا دولانير. چله‌سر اوستوندن آتيلير. شووُ هردن‌هاوايا چالير. کوشولتوسو قولاغين اسديرير. “گئده، دئمه‌ديم آدام اول؟” بيري يانينا دَيير، بيري کورَگينه. آغريدان اوره‌گي کئچير. ننه‌سي پيلّه‌لردن اؤزونون حيطه آتير. “کيشي، دا بسدي! آدام اولار.”
“والّله آدام اوللام.” دده‌سينه دئيير.“بتر آدام اولدون.” “آدام لوُوا وئرن!”دده‌سي يورقان‌‌دؤشکده خيريلتييا دوشوب. يوخودا خيريلدير، آييقليقدا دا. “اؤلمک راحات دئييل،‌هاااا، جاني چيخدي جان وئرينجه؛ جاني دوداغيندان چيخينجا.”“اونون اؤز جاني دوداغيندان چيخ  سنين دوداغي اؤزگه‌لر جاني.” “تقي اوجا بوي ي ي. بيغلي؛ شهين چاديرالي  قارا قاش‌گ…؛ عسگر بيغلي، عينک‌لي ي ي ي” “ديلين آچيلدي؟”
“ديليوي پيشيک يييب؟ باياقدان وير وير سسين کسيلميردي، کلاسي گؤتورموشدون باشيواااااا ايکي کلم درسيوي ده دئ. گؤر نئچه يول‌دي، چاغيريرام، باشارمي …” خانيم اوزون چئويرنده، اونو يامسيلير. شاييردلار گولور. خانيم معليم ده بخاري‌نين آياغين اوجالدير، بونو چؤنمبتمه اوتورتدورور بخاري‌نين ديبينده. دئيير، “ايندي آدام اولاسان!” پؤرتوب، قيزيشيردي. جانينا اود دوشوردو…
برقي اوجاق سربازي تختين سيم‌لرين قيزديريب… ويرنيخير. ترپنمک اولمور. قو‌ل‌لاري دا تختين اوستونه کيرکيپ باغلي. چيغيرير، “يانديم، يان ”
“هن؟ ايستي کئچير کورَييوه؟” باش سوروجونون سسي گلير. “دئديم داااا، بولار ديل آدامي‌دئييللر… بيز بولاري آدام ائله‌ريق.”
يانيب تؤکولور. کورَگيندن قالخان اود، سوموک‌لرينه کيمي‌گؤينه‌دير؛ ايليک‌لرين قاينادير.
“قرار يئري…” قرار يئري، قاينار سو تؤکور باشينا. “گلمييئيديلر، آماندي. گلميي” عسگرين باغيرتي‌سي قولاغيندا اوولدور. شهينين چيغيرتيسي دا. “ميه خانيم‌لاري دا بورا گتيررلر؟” يوخ اولا بيلمز. قولاق‌لاري دا خوليالانير…
الي اختيارسيزجاسينا گئدير آلت‌پالتاري‌نين کئش يئرينه. “اوّل گون اونو چيخارتدون دا،” اؤز اؤزونه دئيير. “دووارين‌هانسي چاتداغينا قويدون؟ ياخجي کي تاپماديلار باشدان آياغامي‌آختاراندا.” اونون کاغاذين سويمادان، ياري بؤلوب، قويموشدو آلت‌پالتاري‌نين کئش يئرينه، تيکميشدي. سونرا دا چيخارديب، کاغا‌ذين چئينه‌ييب اوتموشدو، اؤزون ده قويموشدو دووار چاتداغينا. “آمما‌هايانا؟” اؤزون سورويوب چکير تخته ساري. بير آدديم يول، بير عالمه دؤنور. “سوروننده نئجه آغيرلاشير آدام.” تختدن ياپيشير اؤزونون آغير لئشين قالخيزير سالير تخت اوسته. آياغي‌نين تولوغو پارتلايير يئره سورتولدوکده. سويو، قاني تؤکولور اوتاغين تکينه. کورَگي‌نين ده دريسي سويولوب بلکه، زوققلتوسو بئله کئچير جاني‌نين ايچينه.
” نئجه ازبر اولموشدو ديلينده نسيمي؟” “دريسين سويدولار‌هااااا!”
“زولفون گؤره‌لي، گؤزون نيگاراااااااا، منصور اولارام کي داااااار ائدرسن.”
“سنين نوبه‌ندي! گوله يا دار؟”
“دار دار ائله‌دين کي ايندي يئرين بوجور دار اولدو!”…منيژ آوازاميش باخير بونا. ننه‌سي پؤرتوب. دده‌سي‌نين اؤلوسو باخير اوزونه -بونو گؤزله‌يرک. اوغلون گؤرمور. “يازيق اوشاق! آخي نييه ائولندين گئده؟” او دا او آواراگورلوقدا بير آروادلا؟ ننه‌سي دئييردي او سفر توتولاندا نئجه ماتيکلنيب چيخاردي. ائوده تاپيلمازدي. “سيلّه ايله اوز قيزاردير.” دئميشدي بو دا، جاوابيندا.
قيرخيق اوزونده سيلّه نئجه يئر سالميشدي، سالميشدي. آينا يوخ ايدي گؤرسون. شاراخ سسي اوزونده ايدي، او گوندن بري. ايلک دانيشديران وورموشدو، ايلک دانيشماديغيندا. بارماق يئرلري هله ده گؤينور. الين وورور. قوزا قوزا ساققالي ائله بيل پامبيق ‌دير‌ ياپيشيب يارا اوستونه.
“کاش اونو گؤرستمه‌سينلر ننه‌سينه، منيژه، قوهوم قارداشينا.” قاروولچونون آياق سس‌لري اوزاقدان دؤيور باشينا، گوپون کيمي. “گليب آپاراجاقلار اظهارنامه‌وي امضالاياسان.” دونن هوشدان گئتدي قالدي بوگونه. ايکي کيشي کئچدي قول‌لاري‌نين آلتينا، سورويه سورويه گتيريب آتديلار بو قازاماتا بيله‌سين. “قوي باري امضان اولماسين، يازيوين آياغيندا.”
ساققالين بوراخير، الين چکير دووار چاتداق‌لارينا. عينگين ايلک گون آلميشديلار. چوخ ايستردي دووارين يازي‌لارين اوخوسون. بارماق‌لارين سورتردي قازي‌لارا، کورلار يازي‌لاري سورتن کيمي. “بوراخ بونلاري،‌هارا قويدون اونو؟” “تئز اول!”
“تئز اول، تاپ!”بارماغين چکير دووارين چاتداق يئرلرينه. قاتي ‌دير‌ دووار. ايکي الين ده دولانديرير دوواردا. تلسمک، خورا کيمي‌دوشوب جانينا، فيکرين جايديرير.“تئز اول، ايندي گلللر.”
بيردن تيغه‌نين دندن اوزو دَيير بارماق‌لارينا. بارماغين بير ده چکير. “هن، اؤزو دي! ”
سئوينير. ديرناغي لا چکير چيخاردير.
سيميت کيمي‌سويوق ‌دير‌، تيغه. “ايندي قيزيشار.” دئيير. بونو اوجادان دئيير. تيغه‌ني دوداغينا ياخينلاديب، “ايندي جانين قيزيشار.” دئيير. دندن الينه باش‌بارماغين چکير. او الي ايتي ‌دير‌ آنجاق؛ دونيانين هر کسَريندن داها ايتي…...

منبع :