بولگه لر سرويسي:يوخسول کندلي سحر تئزدن کوتان سورمگه گئديردي، سحر يئمگيني يئمه‌ديگي اوچون اؤزو ايله بير پارچا چؤرک آپارميشدي. تارلايا چاتاندا تورباسيني ائنديريب بير يئره قويدو. چؤرگي ده اونون يانينا قويوب دسماللا اوزريني اؤرتدو. بير آز کوتان سوردو. آت يورولوب، کندلي ده آجاندا کوتاني دايانديردي. راحات اوتلاسين دئيه حئيواني دا آچيب بوراخدي. يئمک يئسين دئيه ده باياق تورباسيني قويدوغو يئره گئتدي. آنجاق دسمالي قالديراندا گؤردو کي، چؤرک يوخدو. بير خئيلي آختاردي. دسمالي سيلکله‌دي، آما چؤرگي تاپمادي. " غريبه دير!" دئدي اؤز اؤزونه. "اطرافدا دا هئچ کيمي گؤرمه‌ديم، آما کيمسه گليب چؤرگي گؤتوروب يقين" دئيه دوشوندو.بو ايشي گؤرن بالاجا شئيطان ايدي. چؤرگي آليب بير آغاجين آلتيندا اوتوردو، کندلي‌نين عصبي‌لشيب و بونون آديني آنيب نئجه تحقير ائده‌جگيني گؤزله‌ييردي. کندلي بيراز دوشوندوکدن سونرا: "نه ائدک؟.. آجيندان اؤلمه‌يه‌جم کي؟ گؤتوره‌نين احتيياجي اولماسا گؤتورمزدي. نوش اولسون" - دئدي. سونرا قويونون باشينا گئديب سو ايچدي. بيراز ايستيراحت ائتدي. حئيوانيني يئنه کوتانا قوشوب تورپاغي شوملاماغا باشلادي. بالاجا شئيطان کندليني گوناها سالا بيلمه‌ديگي اوچون تعجوبلنميشدي. اولانلاري بؤيوک شئيطانا دانيشماغا گئتدي. کندلي‌نين چؤرگي نئجه اوغورلاديغيني، کندلي‌نين تحقير ائتمه‌لي اولدوغو حالدا "نوش اولسون" دئمگيني دانيشدي. بؤيوک شئيطان ايسه بونا چوخ عصبي‌لشدي. "کندليني آلدادا بيلمه‌ميشسنسه سهو سنده‌دير. دئمه‌لي ايشي باجارمادين. کندليلرين هاميسي بئله‌ديرسه، اوندا بيز نه ائدريک؟ يووخ.. بو ايشي بئله قويا بيلمه‌ريک. ايندي او کندلي‌نين يانينا گئت و چؤرگين آجيغيني چيخ. اگر اوچ ايل ايچينده او کندليني يولدان چيخارا بيلمه‌سن، سني اوخونموش سويا سالاجام، دئدي. بالاجا شئيطان قورخوب تئز يئر کوره‌سينه ائندي. سهويني نئجه دوزلده‌جگيني دوشونمگه باشلادي. چوخ دوشوندو، سونرا بئله بير شئي تاپدي: ياخشي اينسان رولونا گيريب، يوخسول کندلي‌نين يانينا ايشچي کيمي گلدي. کندلييه قوراقليق کئچن يايلاردا بوغداني باتاقليغا اکمک لازيم اولدوغونو بيلديردي.کندلي ده ايشچي‌نين دئديگيني ائله‌دي، بوغداني باتاقليغا اکدي. همين ياي بوتون کندليلرين اکيني گونشده قوورولدوغو حالدا، اونون بوغداسي گوُر، اوزون و سيخ باشلي اولدو. کندلي بير سونراکي اکينه کيمي بوغداني بول بول ايستيفاده ائتدي. يئنه بوغدا آرتدي. او بيريسي ياي ايشچي کندلييه بوغداني داغا اکمه‌سي لازيم اولدوغونو سؤيله‌دي. کندلي ده اونون دئديگيني ائتدي. همين ايل ياي ياغيشلي کئچدي. بوتون کندلي‌نين اکيني قورودو، بوغدا وئرمه‌دي. بيزيم کندلي ايسه ياخشي بوغدا گؤتوردو. الينه خئيلي بوغدا کئچدي. کندلي بو قدر بوغداني نه ائده‌جگيني دوشونمگه باشلادي. ايشچي کندلييه شراب دوزلتمگيني سؤيله‌دي. کندلي ده بوغدالاردان شراب حاضيرلاييب، هم اؤزو ايچدي، هم ده باشقالارينا ايچيرتدي. او واخت بالاجا شئيطان بؤيوک شئيطانين يانينا گئديب: "چؤرگين آجيغيني چيخارتديم" دئيه بيلديردي. ب ونلاري ائشيدن بؤيوک شئيطان اؤز گؤزلرييله گؤرمک اوچون کندلي‌نين يانينا گئتدي. کندلي‌نين ائوينه چاتاندا بئله بير منظريله قارشيلاشدي: کندلي بعضي وارليلاري شراب ايچمگه دعوت ائتديگي اوچون ائوينه چاغيرميشدي. کندلي‌نين حيات يولداشي شرابي قدحلره بوشالديب، قوناقلارا تکليف ائديردي. او واخت قادين ستولا دييب، شرابي يئره تؤکدو. کندلي ده بونا عصبي‌لشيب يولداشيني تحقير ائتدي و: "لعنت سنه، کور شئيطان". بو تؤکدوگون ياخانتي دئييل. بئله دگرلي بير شئيي نئجه تؤکرسن، آي باجاريقسيز قادين. بالاجا شئيطان بؤيوگونه باخيب، گولومسه‌دي. " گؤردون؟ آرتيق تحقير ائتمکدن، سؤيمکدن چکينمير". سونرا کندلي اؤزو شراب پايلاماغا باشلادي. همين واخت يوخسول بير کندلي ايشدن قاييديردي. اونلارا گلدي. هاميني سالاملاييب بير طرفده اوتوردو. اونلارين شراب ايچديگيني گؤروب، بونون دا اورگي شراب ايسته‌دي. اوزون واخت بير يئرده اوتوروب، اودقونا-اودقونا قالدي، آما ائو صاحيبي اونا شراب تکليف ائتمه‌دي. ائو صاحيبي اؤز-اؤزونه: اينسان سيزين هامينيزا نئجه شراب چاتديرسين دئييب ميزيلداندي. بو دا بؤيوک شئيطانين چوخ خوشونا گلدي. بالاجا شئيطان اؤزوندن راضي حالدا: هله دايان گؤر نه‌لر اولاجاق". ائو صاحيبي و وارلي کندليلر بير آز ايچندن سونرا بير بيريلرييله صؤحبت ائتمگه، بيربيريلريني تعريفله‌مگه و خوش سؤزلر دئمگه باشلاديلار. بؤيوک شئيطان اونلاري اوزون بير مودت ايزله‌دي، قولاق آسدي. بو وضعيتدن هئچ خوشو گلمه‌ميشدي: "اونلار بيربيريلريني آلداتماغا، يالتاقلانماغا داوام ائديرلر." دئدي. بالاجا شئيطان: "هله گؤزله. باخ گؤر نه‌لر اولاجاق. بير بوکال دا ايچسينلر سن باخ. ايندي تولکو کيمي بير بيريلرينه قويروق ساللاييرلار، بيربيريلريني آلداديرلار. بيرازدان هاميسي آزغين جاناوارلارا چئوريله‌جکلر." بويوردو. کندليلر بير قدح داها ايچديلر. دانيشيقلاري بيراز کوبودلاشدي، سسلري يوکسلدي. گؤزل سؤزلر يوخ اولوب، بير بيريلرينه عصبي‌لشيب، تحقير ائديب حتّي سؤيوش سؤيمگه باشلاديلار. آخيردا دعاوا ياراندي. بير-بيريلري ايله دالاشيب اوز-گؤزلريني قان ايچينده قويدولار. بو واخت ائو صاحيبي ده دعاوايا قاريشدي. اونو دا دؤيدولر. بؤيوک شئيطانين بو دا چوخ خوشونا گلدي. "ياخشيدي، ياخشيدي" - دئدي. بالاجا شئيطان ايسه: "هله گؤزل، گؤر داها نه‌لر اولاجاق" دئدي اونا. هله اوچونجو قدحي ايچسينلر گؤر نه حالدا اولاجاقلار. ايندي جاناوار کيمي وحشي اولدولار، سونرا دونوزا بنزيه‌جکلر." قوناقلار اوچونجو قدحي دا ايچيب، لاپ اؤزلريني ايتيرديلر. نه دئديکلريني بيلميرديلر آرتيق، بير-بيريلرينه قولاق آسمادان قيشقيريب باغيرماغا باشلاديلار. ائو صاحيبي ده ديگرلريني يولا سالاندا باشي اوسته سويا ييخيلدي. اوستو تميز پالچيق اولدو. ييخيلديغي يئردن قالخدي. دونوز کيمي سسلر چيخارديردي. بو حال بؤيوک شئيطاني داها دا سئوينديردي. "ه… ياخشي ايش باجاردين آفرين سنه. چؤرگين آجيغيني ياخشي چيخارتميسان. آما بير دانيش گؤروم، نئجه ائله‌دين، بو شرابي؟ هر حالدا اولجه تولکو قاني قاتدين. بونا گؤره کندليلر اونو ايچنده حيله‌گرليک ائتديلر يالتاقلانديلار. سونرا جاناوار قاني قاتدين. بونا گؤره ده جاناوار کيمي وحشي‌لشديلر. سونرا دا دونوز قاني قاتدين، يقين کي. بو سببدن دونوزا بنزه‌ديلر. خئير، دئيه جاواب وئردي بالاجا شئيطان. هئچ ائله ائتمه‌ديم. منيم ائتديگيم تک شئي اونون داها چوخ بوغدا بئجرمگيني تأمين ائتمک اولدو. بو حئيوانلارين قانلاري اونسوزدا اينسانلاردا وار. لاکين بو احتيياجلارينا چاتاجاق قدر چؤرک اولاندا مئيدانا چيخمير. بو کندلي اوللر بالاجا چؤرک پارچاسيني بئله آتمازدي. آما چؤرگي چوخالديقجا نئجه اَگله‌نيم دئيه دوشوندو. من ده اونا شراب ايچه‌رک اَگلنه‌بيله‌جگيني دئديم. کندلي آللاهين نئعمتيندن اَگلنمک اوچون شراب حاضيرلاماغا باشلاياندا دامارلارينداکي تولکو، جاناوار و دونوز قاني اؤزونو بوروزه وئرمگه باشلادي. داها سونرا بير قدح شراب ايچنده هميشه بئله حئيوانلاشاجاق.بؤيوک شئيطان بالاجا شئيطانا تعريفلر ياغديردي. چؤرک جزاسيني باغيشلادي و اونو اؤزونون ان ياخين کؤمکچيسي اعئلان ائتدي.
يوخسول کندلي سحر تئزدن کوتان سورمگه گئديردي، سحر يئمگيني يئمه‌ديگي اوچون اؤزو ايله بير پارچا چؤرک آپارميشدي.