آت‌لار اؤلومدن اول بير ويرد اوخويارلار
1398/05/27
بولگه لر سرويسي: بير گؤزه‌ل طبيعتلي دياردا بير مهريبان و ساده قلبلي قورد ياشاييرميش. گونلرين بيرينده تولکو جاناوارين يوواسينا ياخينلاشيب، ياخينليقدا کؤک بير قويونون سورودن آرالانيب تنها اوتلاديغيني خبر وئرير، بو اومودلا کي قوردون آرتيغيندان اونادا بير قارين يئمک يئتيشه. قورد تئز- تله‌سيک قويونو اوولاماق اوچون يوواسيندان چؤله چيخير. گؤزو قويونا ساتاشير، قويونون پوسقوسوندا ياتير؛ بيردن قويونا يوگوره‌رک، اونو سوپورله‌ييب يئره چيرپير؛ قارنيني يئرتماق ايسته‌ينده قويونون گؤزلري دولور؛ قوردا دئيير:
– اي بؤيوک اقتدارلي قورد! سندن بير ايسته‌ييم وار، اودا بودورکي بيزيم سورونون رسمي- روسومو وار؛ بئله کي قويونو قورد يئمزدن اول، قوردون قارشيسيندا قويون اوينامالي‌دي. ايجازه بويور اويناييم، سونرا نوشوجانليقلا مني مئيل بويورارسان.
قورد قبول ائدير. قويون اويانا سوزور، بويانا سوزور. بيردن قاچاراق، اؤزونو سورويه يئتيرير. قورد سورو ايت‌لريني اوردا گؤروب، گئري اوتورور. تولکو ايسه قوردا آجيغلي باخاراق دئيير:– داها بوندان کئچدي، گل گئده‌ک، ياخينليقدا بير قاري ياشايير، اونون يئملي بير کئچيسي وار، اونو اوولاگينان. آنجاق داها اونون رقصينه آلدانما‌هااا!قورد قارينين دامخاسينا ياخينلاشير. ايش بئله گتيريرکي قارينين کئچيسي ائوين هنده‌ورينده اوتلاييردي. قورد فورصتي الدن وئرمه‌ييب، کئچيني سوپورله‌ييب، اؤلدورمک ايسته‌ينده، کئچي‌نين گؤزلري دولور؛ دئييرکي:– منيم طؤوله‌ده اکيز بالام واردي، بيرينين آدي بئچي او بيريسي‌ده مئچي‌دير. ايجازه وئر اونلارلا وداعلاشيم؛ سونرا گليم خيدمتينه، نئجه سئوسن اوزانيم راحات مني يئگينن.
قورد قبول ائدير، کئچي طؤوله‌يه گئدير. لاکين گئري دؤنمه‌يير. انتظاردا قالماغين معناسيز اولدوغونو آنلايان قورد ناراحت گئري دؤنور. تولکو ايسه قوردون بو حرکتلريندن لاپ تنگه گلير؛ اوره‌يينده اونا قارشي نيفرت ائدير؛ امما چاره‌سي يوخئيدي، گره‌ک قوردا تابع اولوردو تا آج قالميردي.
تولکو ناراحات- ناراحات دولانيردي کي گؤرور بير قوزو کندين قيراغيندا اوتلايير، اما ايت‌لردن احتياط ائديب، اونا ياخينلاشا بيلمير. تئز قوردون يانينا گليب، ادبله باش ائنديريب، عرض ائدير:
– اي بؤيوک و تميز اورکلي جاناوار! بير قوزو تاپميشام، اگر مرحمت قيليب منه‌ده رحم ائتسن، خواهيش ائديرم داها اونلارا اينانما.قورد غضبله قوزويا هوجوم چکير؛ اونو گؤتوروب کنددن آرالانير. قوزونو يئمک ايسته‌ينده قوزو دئيير:– دوغرودور، منيم اتيم يوموشاقدير، اما هله امليک قوزو اولدوغومدان اتيم شيت‌دير؛ قوي گئديم دوز گتيريم سونرا اتيمي‌دوزلاييب، نوش جان ائت.قورد يئنه اينانير. قوزو کنده قاييدير و گئري دؤنمه‌يير. تولکو داها تنگه گليب، جاناواردان بو ايشلرين آجيغيني چيخماغا قرار وئرير. جاناوارا بير قورخولو يوخو گؤرور. بو دفعه اونون يانينا گئديب داها آرتيق ادبله و حؤرمتله اونا اوز توتوب دئيير:
– من بيليرم کي سنين نئجه تميز قلبين وار و عاليجنابسان. عيبي يوخدور، تانري‌هامييا اوره‌يي قده‌ر وئرير. سنين بو ياخشيليقلاريني گؤره‌ن تانري سنه ياخشي بير روزي نصيب ائله‌ييب. قوزودان، کئچي‌دن، قويوندان سنه نه چاتار کي. بو ياخينلاردا ياخشي بير هئيکللي ارکک آت هؤروکله‌ييبلر. يوخسا قوزو سنين احتياجيني‌هاردان اؤده‌يه‌جکدير؟!
جاناوار تولکونون بويونو اوخشاماسينا و شيرين سؤزلرينه اينانيب، آتين اوونا چيخماق قرارينا گلير. آت هؤروکلو اولدوغوندان قاچماغي عاغلينا بئله گتيرنمير. چاره‌ني تدبيرده بيلير. قورد ايسه آتين باغلي اولدوغونو گؤروب تالاشا دوشمه‌يه‌رک، اونا ياواش- ياواش ياخينلاشير. آتا باشينا گلن احوالاتي دانيشير و هئچ بير خواهيشي قبول ائتمه‌يه‌جه‌ييني سؤيله‌يير. آت قوردا دئيير:
– اي بؤيوک و آدلي- سانلي قورد! منيم کي قاچماغا ايمکانيم يوخدور! اونلار منيم کيمي‌باغلي دئييلديلر، اونا گؤره قاچماغا نايل اولدولار. من کي سنين الينده‌يم، منيم‌ده بير خواهيشيم وار. مگر من بير قوزوجاق ده‌يه‌ريم يوخدور؟ بيرده کي من نه قويونام، نه ده قوزو کي سؤز وئريب آلتيندان چيخام. منيم نجابتيم وار؛ سؤزوم سؤزدور.
جاناوار آتين دئديکلريني عاغيلا باتان گؤروب، دئيير:– ايسته‌يين نه‌دير تئز دئنن!
آت دئيير:– بيزيم بابالاردان قالان بير رسم- رسوموموز وار کي آت‌لار اؤلومدن اول بير ويرد وار اونو اون دفعه اوخويارلار.
جاناوار دئيير:– او نه ويرد دير کي گره‌ک اوخوياسان؟
آت دئيير:– اونو سنه دئيه بيلمه‌رم. يعني دئيه بيلرم، امما گره‌ک قولاغينا دئيم کي تولکو ائشيتمه‌سين.
قورد آتا ياخينلاشير. آت قوردا دئيير:– کئچ منيم آرخاما، قويروغومو قالدير، قولاغيني سؤيکه داليما؛ اؤزون ائشيده‌جکسن!
قوردا ماراقلي گلن بو عجيب- غريب مسئله، اونو آتين دئدييني سيناماغا وادار ائدير. آتين آرخاسينا کئچيب، قويروغونو قالديريب، قولاغيني اونون دالينا سؤيکه‌يير. بير نئچه دال با دالا آتدان اوجا سسله چيخان يئلي ائشيديب، غيض‌له اونو سوپورله‌مک ايسته‌يير؛ ائله بو آن آت آرخا قيچلاريلا برک و سارسيديجي سونجوقلا قوردو يئره سرير. قورد يئردن قالخماق ايسته‌ينده گؤرور قارني پارتلاييب، باغارسيقلاري اؤزوندن چوخ آراليدا يئره سريليب. يئريندن قالخا بيلمه‌ييب، ييخيلديغي يئرده قالير.
جاناوارا کين بسله‌ين تولکو چليگينه سؤيکه‌نه‌رک، اونا ياخينلاشير و باغارسيقلاريندان ياواش- ياواش يئمه‌يه باشلايير . جاناوار دئيير:
– تولکو دايي، گل اتيمدن يئه، داي آجي باغارسيقيمدان سنه نه چيخار؟!
تولکو دئيير:– سني بير قوزو دا آلدادير، سن‌ده منه کلک گلمک ايسته‌ييرسن؟ عکسينه باغارسيقين چوخدا دادلي‌دير.
بير آز زامان اؤتور، قورد هئي‌دن دوشور و جان اوسته گلير. وضعيتي گؤره‌ن تولکو، قوردون باشينين اوسته گليب، چليگيني قالديريب مؤحکم اونون باشينا چيرپير و دئيير:
– گئتدين گؤردون قويون، يئه قالسين اوندان بويون. نئيله‌ييرسن اويون- مويون؟ طويا گليبسن مگر؟بير چليکده قوردا ويريب دئيير:– گئتدين گؤردون کئچي، يئه قالسين قورو قيچي. نئيله‌ييرسن بئچي – مئچي؟ دايه‌ليگه گليبسن مگر؟
يئنه بير ضربه‌ده قوردا ويريب دئيير:– گئتدين گؤردون قوزو، يئه قالماسين ايزي. نئيله‌ييرسن دوزو- موزو؟ قوناغليغا گليبسن مگر؟
يئنه بير ضربه ويريب دئيير:– گئتدين گؤردون آت، يئه يانيندا يات. نئيله‌ييرسن کاغيذ- بارات؟
جاناوارين جاني چيخير و تولکونون يئمي‌اولور.
منبع :