منيم شيرين ديليم

بولگه لر سرويسي:ديشيمين آغريسي ايپيمي قيرميشدي ، ايپيمي گؤتوروب اؤزومو ديش دؤکتورونه يئتيرديم ! پيلله لري ايکي بير چيخديغيما خاطير اوره ييم آغزيمدا چيرپينيردي ، دينجيمي آليب - آلماميش سيرا منه يئتيشدي : اوف اوفففففففففففف ! بونو دولدورماق اولماز هاااااا حاجي آغا ! بو چورويوب گئديب ايشينين داليسيجا ، حاجي آغا ! اجازه وئريرسن چکيب آتيم اويانا ؟

نه حاجيسي آغا دؤکتور ؟ ايچه ريم دردليدير يوخدور چاراسي / گون به گون درينه دوشور ياراسي / نه قاليب ساچيمين بير تک قاراسي / نه ده کي آغزيسمدا ديش ساخلاميشام ! ... منيم نئچه ياشيم وار کي منه حاجي دئييرسن ؟ بو آغاران ساچلار ، تؤکولن ديشلر درددندير آغا دؤکتور ... درددندير !به به ! شعرده دئييرسن ! شاعر ديشي چکمک منه افتخاردير !شاعره نئيله سن افتخاردير ! دريسين سويماق ، اوره يين سينديرماق ، سانسور ائتمک ، آسانسور ائتمک ، حربه - زوربا گلمک ... بير قالميشدي ديشين چکمک ده افتخار اولا ، اونو دا سن چک !
دؤکتور ايينه ني ديشيمين ديبينه سانجينجا قولاغيمين ديبي اود توتدو ، ياواش - ياواش آغزيم کئحه لميشدي ، آغا دؤکتور کربه تين الينده منه دوغرو گلديکده ، کربه تين قورخوسو اوره ييمي بير داها چيرپينديردي ! ايستر - ايسته مز اليم ايله اوره ييمين باشين سيخاراق دؤکتوردن بير آنليق مهلت ايسته ديم . تردن جيم - جيلاق سو اولموشدوم !شاعر قارداش ! من سنين ديشيني چکنمرم ! نيههههههههههه ؟سنين اوره يين دؤيونور ؛ قلب دؤکتورونه گئتمه ليسن ، نه بيليم " اکو " ائتسين ، ناوارين گؤتورسون گؤرسون نه ييدير ؟ بيز آغا خانيم دؤکتوروک ...
من اؤلوم هن ؟ دوز بيزيم کيمي ... سيز ده آغا خانيم دؤکتورسونوزمو ؟دؤکتور دئييليک ! بيز آغا خانيم ديشلريميز چورويوب !آهان ! منيم خانيميم قلب دؤکتورودور ! آرخاداکي اوتاق دا اونون مطبيدير ، خانيم منشي يه منيم آديمي وئرسن نوبه سيز ايچري گؤندرر ! گئت سني گؤرسون ، ساغلام اولسان من ده ديشيني چکرم يوخسا کربه تين آلتيندا جانين چيخار ، ورثه ن ياپيشار منيم ياخامدان !
بير اليم آغزيمدا بير اليم ده قلبيمده خانيم دؤکتورون مطبينه گئتديم ، هؤووشنه دن اوره ييم داها هيزلي چيرپينيردي ! خانيم دؤکتور قلبيمدن " اکو " آليب دئدي :»شوکر اولسون کي قلبين ساليمدير ، بو چيرپينتيسي دا استرسدندير ! اونا گؤره " پرونول " يازيرام کي هر سحر بيرين آتارسان ! «اللرين آغريماسين خانيم دؤکتور ؟ گوناهيم نه اولور ؟ناقابل 100 مين !تومن يوخسا قيران ؟100مين تومن آغا ! نه قيراني ؟ ايندي قيران زامانيدير ؟بيمه ايله يوخسا آزاد ؟ايندي هانسي دؤکتور بيمه ايله باخير کي من ده ايکينجيسي اولام ؟ هن ؟  من ده او بيري دؤکتورلر کيمي آزاد باخارام آما داوا يازسام دفترچه يه يازارام
بو سؤزلري ائشيتجک بوينومون دامارلاري توتدو ، درديم بير ايدي ، اولدو ايکي ! حيرصيمي خانيم دؤکتورون باشينا تؤکوب دئديم :» خسته خانالاردا 7 مين تومنه اکو ائديرلر داااااا ، بير آز انصافين اولسون ! منيم 100 مين تومنيم هاردايدي ؟«100مين تومنين يوخدورسا گئت اؤلداااااااااا ! نيه ياشاييرسان ؟من نيه اؤلورم ؟ اؤز ارين اؤلسون يتيم قالاسان انشاللاه !آخيرده خانيم دؤکتور 100 مين تومني آليب دئدي :»سانيرام سنين بويون ديسکين وارکي دامارلاري بئله زول  زول اولوب  ، ديشيني چکديرمه دن اؤنجه ، آدرسين بو کاغيذدا يازديغيم بئل دؤکتورونه گئتمه ليسن ، هادير اول بوينون دوزلمه ميش ديشيني چکديررسن هااااااااااا ، آماندير ، يوخسا بوينون قيريلار يازيق اولارسان ! «داواني خانيم دؤکتور دئين داواخانادان آلاندان سونرا ، او آدرسين وئردييي بئل دؤکتورونون مطبينه گئتديم ، بئل دؤکتورو ده باخيب باخماميش ، اؤزو تانيتديرديغيMRIمرکزينه گؤندردي مني !
منشي بئل دؤکتورونون نسخه سين گؤرونجه ، نوبه يه دايانمادان منيMRI ولماغا يوللاييب صاباحيسي گون جاوابين دا آلديم ! دؤکتور جاوابي گؤروب دئدي :»شوکر اولسون کي بئلين ساليمدير آنجاق بو يازديغيم ياغي آدرسين يازديغيم داواخانادان آليب ، هر گئجه بويون  بوغازينا ياخارسان کي يوموشالسين ! ياغي باشقا داواخانادان آلما هااااااااااا ، من يازان ياغين يئرينه " قويروق ياغي " وئرسه لر گوناهي اؤزونده دير ! «ياغدان بويون - بوغازيما چکندن سونرا ديشيمي چکديره بيلرم يا يووووووووووخ ؟ گؤر بو ديش آغريسي مني هاردان هارا چکدي هاااااااااا ؟ مني ندن بير- بيرينيزه پاس وئريرسينيز ؟ درديم وار دئيين داااااا ...واي واي واي ! سنين قاريشيغين وار سانکي ! اعصاب شوخلوق گؤتورمز هااااا ! اعصاب دؤکتورونه گئتمک هر زاددان واجيبدير باااااا ، بيز ده پيس ايش گؤرموروک کي سني باش بيلن دؤکتوره گؤنده ريريک ! آدرس ده لازيم دئييل ، دووار بير قونشوموز اعصاب دؤکتورودور ، ايلين آلتي آيين اميرکه ده اولار ، آلتي آيين بوردا ! گئتدين يانينا منيم سلاميمي يئتير بيله سينه .
بئل دؤکتورو دوز دئييردي ، بو گونلر منيم اعصابلاريم خراب ايدي ، هر زادا دا تئز حيرصله نيرديم ، آدام اؤزو بيلمز کي نه ييدير ؟ اعصاب دؤکتورو ده بئل دؤکتورونون مطب قونشوسو اولدوغونا خاطير ، چوخ معطل اولماييب اونون دا يانينا گئتديم ، او دا منيمله بير آز دردله شندن سونرا سؤز تاپانماييب قولاقلاريما چيراغ سالدي ، سونرا تاسفله  دئدي :»سن " سي تي اسکن " اولماليسان ، دزگاهلارينين مدرن اولدوغونا گؤره ، من دئين کلينيگه گئتسن داها ياخشي اولار ! جاوابين آل گؤرک ايشين هارا چاتير ؟ «سي تي اسکن جوابي گلينجه بير هفته چکدي ، چوخ استرسلي حالدا بير داها اعصاب دؤکتورونون يانينا گئتديم . دؤکتور جوابي اوخويونجا الين باشينا چکيب دئدي :» اوغلان سنين بئينين عفونت ائديب ! سن نه لر  چکيبسن کي بئينين بو گونه قاليب ؟ «واللاه سيگاردان سونرا بير زاد ياديما گلمير .داها نه لر ؟ دوزون دئسن ايشيم يوخدور ! اوغلان آللاهدان قورخ دوزون دئ ! تک سيگار ايله اولماز !
واي دده ! دئسم حسرت چکميشم ، درد چکميشم ، آه چکميشم ، قبولوندور يا يوخ ؟يوخ ! سانکي سنين ميرتينين باشي ياريمدير ! دئ نه لر چکديييني دئ اوتانما !زوکام اولاندا بورنومو ، باشماق گئينده دابانيمي ، هردن ده چييينلريمي دئسم قبول ائدرسن ؟باخ بير ، چوخ مشکوک وورورسان آغا ! آخير دفعه کي فضاني دولانيبسان نه واخت ايدي ؟فضاني آغا دؤکتور ؟ خخخخخخخخخ من بئش ايلدير تبريزدن ائشيه چيخماميشام ، سن هارداسان بورداسان ؟ نه فضاسي ؟سن معتادسان قارداش !
منه ده يوخ کي ... مرفين تستي وئرمه سن داوالاريني يازا بيلمرم ! مرفين تستينه گئتمک داها غصه لي ايدي ، آدام نه قدر اؤزونه گوونسه ده ، بئلنچي يئرلره گئدنده آز قالير قورخودان شالوارا متولد اولسون ! تستين جاوابي گلينجه زور ايله اؤزومو ساخلاشديريب شالوارا متولد اولماديم ! شوکر اولسون کي معتاد دئييلديم . منفي جاوابي سئوينه رک دؤکتورومه گؤستريب دئديم :»بويور آغا دؤکتور ! بو دا منفي جاواب ! سني يانامياسان آغا دؤکتور ! آز قاليردي قورخودان شالوارا متولد اولام ! خخخخخ«نمنه ؟ سنين بؤيرکلرين دوز ايشله مير اونا گؤره ! تئز گئت بؤيرک دؤکتورونه ! اينديدن هر زادا شالوارا متولد اولسان ايشين ياشدير !
اؤنجه يازديغيم داوالاري آشاغي قاتدا اولان داواخانادان آل  سونرا آدرسين يازديغيم بؤيرک دؤکتورونه گئتمه يي اونوتما !داوالاريمي آلاندان سونرا بؤيرک دؤکتوروندن ده وقت آلديم ، قيشين گونونده او قدر او دؤکتوره بو دؤکتوره يول دؤيموشدوم کي هم يورقون ايديم هم ده شاختادان زوکام اولموشدوم ! بير طرفدن ده چکديييم ديش آغريسي رنگيمي سارالديب سولدورموشدو ! بؤيرک دؤکتورو رنگيمه باخيب معاينه ائتمه ميش دئدي :»سنين رنگين اؤزونده دئييل ! يا سنين جييرلرين يئييليب قورتولوب يا دا کي بؤيرکلرينده داش وار ! اونا گؤره سني " سونوگرافي " يه يازيرام تا دردين بيلينسين ! اؤزو ده گرک من دئين يئرده سونوگرافي اولاسان ، من او بيري يئرلرين ايشينه اطمينانيم يوخدور ! »سونوگرافي اولوب ، جوابي گلينجه او قدر يارپيز چايي ايچديم کي سويوق ده يمه م ده دوزلدي ، داها رنگيم اؤزومده ايدي  سونوگرافي نين جوابي اليمده خانيم دؤکتورون يانيندايديم خانيم دؤکتور سونوگرافي يه باخيب دئدي :«شوکر اولسون کي نه داشين وار نه ده جييرلرين يئييليب يوخسا هر هانکيسي اولسايدي ،ايشين چتين اولاردي ، اؤزلليکله جييرلرين ده ييشيلمه سي يالنير " شيراز " شهرينده مومکوندور ! بير يئرينده آجي - آغرين اولماسا گئديب ديشلريني چکديره بيلرسن !يوخ خانيم دؤکتور ! بير يئريم آغريمير آما سونوگرافي يه آج قارنيما گئدندن معده مين اوجو گؤينور کي او دا ياواش ياواش دوزه لر !معده نين اوجو گؤينور ؟هن دا ... نئجه ؟ قيچين کي آغريمير ؟يووووووو اولماسا سني اورتوپد دؤکتورونه گؤندريم ...
اورتوپد نه دير خانيم دؤکتور ؟سينيق دؤکتورو داااا ! اؤزو ده تازا مدرکين آليب ، صاباح يوخ بيريسي گون مطبي افتتاح اولاجاق ، گئت قيچلاريني اونا گؤستر بلکي ايلک مريضي سن اولاسان ، اؤزگه دئييل اؤز نيشانليمدير !معده گؤينه ييندن نه ربطي وار سينيقچيليغا خانيم دؤکتور ؟ ايکي آيدير ديش سانجيسيندان اؤلورم باااااااا ! دئديم گئت اورتوپد يانينا سن ده دئ " باش اوسته ! " يوخسا يازارام شيرازدا جييرلريني ده ييشرلر هاااااا ، اوندا سنه چوخا باخار !کاش ديليم شيشيب معده مين گؤينه ييندن سؤز آچمايايديم ! خانيم دؤکتور ائله باشيما چيغيردي کي آز قالدي قابيرغالاريم باتسين ، بو سويوقدا هاردان قابيرغا دؤکتورو تاپا بيلرديم ؟
ائله اونا گؤره قبول ائديب ايکي گوندن سونرا بير قوطي شيرني باغلاتديريب خانيم دؤکتورون نيشانليسينين مطبينه گئتديم . مطب آپارتومانين 17 . نجي قاتيندايدي ! آسانسورا مينيب 17 . نجي قاتين دويمه سين باسديم !آخي سينيقچي دا 17 .
نجي قاتدا توکان آچار ؟ بلکي آسانسور يولدا خاراب اولدو ، بيرينين قيچي سينسا ، پيلله لردن نجور اوسته چيخا بيلر ؟ اؤز  اؤزومه بونلاري فيکيرله شيرديم کي 11 . نجي قاتدا آسانسور نعره چکيب داياندي ! هر نه قدر دويمه لري اللشديرديم آسانسور يئريندن ترپشمه دي  آسانسورون قاپيسينا بير - ايکي تپيک چکندن سونرا شانسيم گتيريب قاپيلاري آچيلدي  سينيقچي دؤکتورون مطبينه 6 قات پيلله چيخمالي ايديم ، تابلولاري اوخويوب مطبي تاپديم آما هله مطب افتتاح اولماييب ايچين آغارديرديلار ! گچ چکن اوستا مني گؤروب چاغيردي :امرين اولسون قارداش ؟اوستا ! واللا منيم ديشيمين قلبي چيرپينديقجا مورفين تستينده بوينومون دامارلاري اعصاب شالواريما متولد اولوردو ، سونوگرافي يه گئدندن معده مين اوجو گؤينوردو کي اونا گؤره گلديم آغا دؤکتورون يانينا قيچيمي گچه سالسين !هئچ اؤزون بيلدين نه دئدين ؟يووووووو ! نئجه ؟هئئئئئئچ ! آغارتما ايشي بير آز يوياندي اونا گؤره مطب صاباح افتتاح اولاجاق ، اگر تله سيرسن " قاسيم " بير گچ قابي گچ قاتسين اؤزوم قيچيني گچه ساليم ! يووووو اوستا ! آماندير هااا !
قيچيم گچده اولسا او بيري دؤکتورلره باش چکنمرم شرمنده چيليک اولار ! ياخشي دا اؤزون بيلرسن ، يوز مين تومن ويزيت پولون اولار ، زحمت اولماسا يوز ميني وئر قاسيم سالسين صانديغا !!!واي دده ! شوخلوق ائديرسن حتمن ! خخخخخخ ! باغيشلايين موزاحيم اولدوم !اوستا » اوغلان نه موزاحيمي ؟ مطبين قاپيسيندان گيرجک يوز مين ترله مه ليسن !«دئييب اوستومه گلدي ! من ده باغلاتديغيم شيرني ني يئره آتيب قاچديم ! آپارتوماندان چيخاندان سونرا خانيم دؤکتوره زنگ ووروب جرياني تعريفله ييب بيله سيندن گيلئيلنديم ! خانيم دؤکتور ده حيرصله ايله اوستدن گلنليک ائديب دئدي :» سن گؤرموردون مطبين ايچينده فهله بنا ايشلير ؟ نيه ايچه ري گئديردين ؟ تئز اول يوز مين تومن تؤک نيشانليمين حسابينا يوخسا سني يوللارام شيرازدا جييرلريني آغزيندان چيخاردارلار هااااااا !«
خانيم دؤکتور ! سنين باشينا نيشانلين دولانسين ! آخي منيم معده مين اوجو گؤينوردو ، سن گؤندردين دا مني سينيق دؤکتورونه ! من سينيق دؤکتورون نئيليرديم آخي ؟ معده م هله ده دوزلمه ييب باااااا !ياخشي - ياخشي ! چاره يوخدور ، داها سنکي بير بئله يالوار - ياخارا دوشوبسن سنين معده گؤينه يينه ياخشي دؤکتور سوراغلاشميشام ! گئتسن اونون يانينا حلاللاشاريق !آدرسي آلماق زوروندا قاليب ، خانيم دؤکتور دئين مطبه گئتديم . معده دؤکتورونون مريضلرينين چوخو خانيم ايدي ، اونلارين حالي مندن ده پيس ايدي چونکو هاميسينين قارني شيشميشدي !
مريضلرين حالينا باخديقجا اؤزومه اومودوار اولوردوم ، سيرا منه يئتيشيب ايچري گئتديم . خانيم دؤکتور سلاميمين جوابين زور ايله وئريب ، تعجبله دئدي :» امرين اولسون آغا ! مريض هاني ؟«من ده اونون سؤزونه هويوخوب بير ساغا بير سولا باخاندان سونرا اليمي معده مين اوستونه قويوب دئديم :» مريض منم داااااا خانيم دؤکتور ! منه ياراشمير ؟ «وااااااااااا ! نئچه آييندير سنين ؟
نئچه آيليغيمدان خبريم يوخدور آما اجازه ن ايله تقريبن 39 ياشيم وار !سيرتيلما کيشي ! بير يئره گئدنده بيل هارا گئديرسن سونرا گئت ! ايچري گلنده تابلوداکي يازيني اوخومادين مي ؟ سنين ماما يانيندا نه ايشين وار  ؟ هن ؟ من قابله دؤکتورويم ! باشا دوشدون ؟هن دا ، باشا دوشمه ين آياغا دوشر خانيم دؤکتور ! من معده دؤکتوروندن نوبه آلميشديم ! ايکي آيدير دؤکتورلري دولانيب يئئيب ايچمکدن ده دوشموشم واللا ! اونا گؤره گؤزلريم ده ياخشي سئچمير يوخسا تابلولاري اوخوياراق بورا گلميشم ، باغيشلايين دا ، يانليش گلميشم سانکي ! ائله ده معده دن قاباق گئت گؤز دؤکتورونه ، قاليب ايش آچار يازيقسان !
عيبي يوخ ! گؤز دؤکتورو تانيانيبن اولورسا آدرسين وئر گئديم اونون يانينا !سانکي خانيم دؤکتورون ده آللاهيندان ايدي کي او تانيان دؤکتورون يانينا گئدم ! تئز آدرسين يازيب مني يولا سالدي . بير آز آختاراندان سونرا مطبي تاپيب نوبه آلديم . ياريم ساعاتدان سونرا سيرا منه چاتدي ، دؤکتور گؤزلريمي تست ائدندن سونرا دئدي : « سنين گؤزلرين ساليمدير . بيلميرم خانيم دؤکتور سني ندن منيم يانيما گؤندريب !؟ » من ده ديشيمين ماجراسين آغا دؤکتوره تعريفله يندن سونرا دئديم :»گؤزلريمده ايراد اولماسا گئديم ديشيمي چکديريم ؟
ايکي آيدان آرتيقدير ديشيمين آغريسي آمانيمي قيريب ! سانکي آغزيم يارادير ؟«من " ر " حرفين " ي " تلفظ ائتديييمه خاطر ، " يارا " کلمه سين " يايا " تلفظ ائديرديم کي دؤکتور باش تاپماييب دئدي :» سانکي آغزين نمنه دير ؟«يايا يايا يوخ يارا- آغا دؤکتور ! واللا منيم ديليم شيرين اولدوغونا گؤره " ر " حرفين دئينمرم ، ائله منظوروم سن دئين کلمه دير ! يوخ بابا ! هاني دئ گؤروم : " رحيم " !يحيم !واي دده ! دئ : " مرسي " !
ميسي !به کيشي سنين ساققالين آغاريب اوتانميرسان بو ياشدا " ر " حرفينه " ي " دئييرسن !؟اؤز اليمده دئييل کي آغا دؤکتور ! دئديم دااا ديليم شيريندير ! هئچ سن منيم کيمي ديلي شيرين گؤرموشدووووووون ؟ يووووووووووووووووو ! دوزون آختارسان گؤرمه ميشديم ، سنين ديلين دونيادا تکدير ! مندن ائشيتسن بو ماجرانين داليسين توتما ، بوردان چيخيب تئز گئت ديشيني چکدير ! سنين بو شيرين ديلينه حيفيم گلير ، قورخورام ديلينين شيرينلي يينه گؤره ديليني کسه لر ! بوردا معطل اولما قارداشيمسان !- گؤزلريم اوسته ! اجازه ن ايله ...گوله - گوله ! شيرين ديليندن مواظب اول !
گؤزلريم اوسته ! هله ليک !

منبع :