اولوم قاليم حقي
اولوم قاليم حقي
1400/08/23
بولگه لر سرويسي: اوشاقلارين ايلک اوخولدا اوخودوقلاري ديل، اؤز آنا ديللري اولماليدير، اوندان سونرا هر نئچه ديل اؤگرنسه‌لر اونلارا آنا ديلي تَمَلينه دايالي اولان ايکينجي ديل ساييلير.
بولگه لر سرويسي: اوشاقلارين ايلک اوخولدا اوخودوقلاري ديل، اؤز آنا ديللري اولماليدير، اوندان سونرا هر نئچه ديل اؤگرنسه‌لر اونلارا آنا ديلي تَمَلينه دايالي اولان ايکينجي ديل ساييلير.
ديلي اولمايان کيمسه‌نين دوشونجه‌سي اولماز، دوشونجه‌سي اولمايانين ايسه ديلي اولماز. اؤز ديليني اؤگرَنَن انسان، کيمليگينه وارار، حقيقتي قاورايار (ادراک ائيلر). ديليني دوغرو- دوزگون اؤگرنمه‌ين بيريسي‌نين دوشونجه دايره‌سي دار، ذهني باشاريقسيز اولار.
ديل جانلي بير وارليقدير. منطقي اولاراق، ديل و وارليق بيري بيريندن آيريلمايان ايکي اولقو (فنومن)ديرلر. انسانين کيمليک يوغرولوشو، اونون اِگيتيمينده گيزليدير. عمومي اِگيتيم و گله‌جکده ايش و ياشامدا اوغورلو اولماق ايسه، آنا ديله باغليدير. اوشاقلارين ايلک اوخولدا اوخودوقلاري ديل اؤز آنا ديللري اولماليدير، اوندان سونرا هر نئچه ديل اؤگرنسه‌لر، اونلارا آنا ديلي تَملينه دايالي اولان ايکينجي ديل ساييلير.
اوشاق، اؤزونو آنا ديلي ايله تانيييپ، کيمليگينه ساري ايلک آدديملاريني گؤتورر. يئنيجه دوغان کؤرپه، آنا ديلييله کيمليک و کولتور اييه‌سي اولار. سونرا همين ديل ايله، ايلک سوسيال (اجتماعي) قورال‌لاري اؤگر‌نيپ، باشقالاري ايله ايلَتيشيم (ارتباط) قورار. بو باخيمدان، آنا ديلي اوشاق ايچون باشليجا رول اويناماقدادير و بيرئيين (فَردين) هر يؤنده گليشمه‌سي، مطلق آناديلي‌نين اؤگرنمه‌سينه باغليدير.
اؤز آنا ديليني دوغرو- دوزگون اؤگر‌نَن اوشاق، منطقي اولاراق، اؤزونو داها ياخشي تانيييپ، تانيدا بيلر. بير توپلومون ديلي، او توپلومداکي انسانلارين بيري بيريله باغلانيپ، ايلَتيشيم قورماق ايچون آراج، و اورتاق دگرلرين تمَليدير. بيز يا دا توپلوموموز، آنا ديليميزي اؤنمسمه‌ديکجه، سوسيال (اجتماعي) ايليشکيلرده داها چوخ چتينليک‌لر چکه‌جَگيک. آنجاق کيمليگيميزي آنا ديليميزين اساسيندا يوغرولدارساق، بير چوخ سورونلاريميز اورتادان قالديريلاجاق.
دنيانين بوتون ائگيتيم اوزمان‌لاري (متخصصلري) بو نکته‌يه وورغولاييرلار کي، اوشاقلار اؤز آنا ديلينده دوشونوپ، اؤز فکرلري و دويغولاريني بو ديلده داها ياخشي افاده ائده بيليرلر.
آنا ديلينده ائگيتيم آلماق، هر شيئدن اؤنجه بير انسانليق حقّيدير، عيني زماندا ايسه، بير ملّت يا دا بير قومون اولوم- قاليم حقّيدير. آدليم ديلبيليمچي، هارکورت، “ديل، بير ملّتين گوزگوسودور” دئميشدير، بو اوزدن ده هر ملّتين، آنلاميني يالنيزجا اؤز ديلينده تاپا بيلديگي اؤزونه اؤزل کولتورو و ياپيسي (ساختاري) واردير.
منبع :