بيزيم ائو

بولگه لر سرويسي: »بيزيم ائو« حکايه‌سي 1358جي ايلين ايکينجي آييندا »يارمحمد« يايين ائوي واسيطه‌سيله چاپ اولان علي‌اشرف درويشيانين «آبشوران«‌ آدلي کتابيندان چئوريليب.

 بيرنجي بولوم

علي‌اشرف درويشيان

چئويرن: احد فرهمندي (اوياق)

 »بيزيم ائو« کتابين ايلک حکايه‌سي‌. ترجمه اولونان کتاب 1395-جي ايل تبريزده »آذرتوران« يايين ائوينده »آشورا« آدي ايله چاپ اولوب. همين اثر 2020ميلادي ايلينده، باکي دا پرويز جبرائيل رئداکته‌سي ايله موجرو نشرياتيندا چاپ اولوب. اوماريم کتابين ترجمه ائتديگيم باشقا حکايه‌لريني ده سيرا ايله سايين اوخوجولارا تقديم ائدم.
احد فرهمندي
***
آشورا?1 قوجا کؤپکلرين اؤلن يئري ايدي. قازـ اؤرده‌يين سئويشمه يئري ايدي. يوخونو خالقا حارام ائد‌ن دجل پيشيکلرين اويلاغي ايدي.
آشورا بيزيم اويون اويناماق يئريميز ايدي.
يازين ايلک گونلري يا دا پاييزين سون گونلري قارا بولودلار گؤي اوزونو اؤرتوب، قارالداندا آتام اوتاقدا اينيلتي‌لي بير سسله:
آي الله، غضبيني بيزدن اوزاق ائت! دئيَردي.
اما الله آتامين سؤزونه قولاق وئرمزدي. سئل گلردي. چاي قيزاردي. کؤپوکلنردي. يويوب، آپاراردي. تاختا کؤرپولري گؤتوروب، گئدردي. شَهَرين يوخاريسيندا داش‌ـ کرپيجله تيکيلن ائولره گوجو چاتمازدي. آنجاق باجارديقجا آجيغيني بيزدن آچاردي.
ديوارلاري سئرچه‌لرين يووالاري ايله بيرگه داغيداردي. سئل اوتاغيميزين ايچينه کيمي گيرردي. چاغيريلماميش قوناقلارا بنزيردي. ائوين بورـ بوجاغينا، صانديقخاناسينا دا بويلانيب، آتامين دعا کيتابلاريني ايسلاداردي. آتام دئيَردي:
آشورا دؤولت مأموردو بوتون بورـ بوجاغا باشيني اوزالدير.
سئل اؤزو ايله هر زاد گتيرردي.آرديجا اؤزلري گلن ائششکلرين پالانيني دا.
آشورانين ايچريسينده اولان سو يوللاريني بوشالاردي. زيبيللري آشورايا تؤکرديلر، شَهَرين يوخاريسيندان آشاغي، آخيب‌ـ آخيب يوکونو بيزيم ائوين قاپيسينا کيمي گتيرردي، سونرا اونلارين هاميسيني بئليميزه يوکلردي.
بؤيوک ديرکلري، آغاج کؤتويو، سامان هابئله هندورده اولان کندلرين بوغدالاريني دا گتيرردي. اينک، قويون، کئچي بيرده آغلاماق گتيرردي. باغيرتي گتيرردي. باليق شکيللري اوزَرينده اولان قوتولار دا گتيرردي. گؤزل قادينلارين شکيلي اوزرينده اولان قابلاري دا. بير دؤنه ده ايچين‌ده ونگيلده‌ين کؤرپه بير اوشاغي کؤهنه بئشيک ايله گتيردي.
سئل کسيلندن سونرا، آشورا کئچميشلره تاي باغيشلايان و رحيملي اولاردي. يئنه ده کور «شفي» گونشين ساچاقلاري آلتيندا شئح ديوارلارين ديبينده اوتوروب دمير نئي ايله آشوراني کوردو هاوالارلا دولدوراردي.
کور شفي هميشه آشورانين قيراغيندا ايدي. گؤزلري اويوق ايدي.
آنام دئيردي:
اوشاقليقدا دينج دورمازدي، بير گون قارقارلارين اَتنه‌سيني گؤتورمک اوچون آغاجا چيخميشميش، قارقارلار اونو قومارلاييب، گؤزلريني اويموشلار.
اما کور شفي قيزيلجادان کور اولموشدور.
سئل کسيلندن سونرا، چايين قيراغينا ييغيلان قارا قوملاري ائشله‌ييب، پول تاپارديق، قاشيق، سينيق باتري تاپارديق. بير دؤنه، سئل، گؤزلوک دوکانيني شَهَرين اورتاسيندان گؤتوروب گتيرميشدي. او زامان بير نئجه قوندارما گؤز تاپديق.
بير گون، اوزرينده گؤزل بير قادينين شکيلي اولان ايچکي شوشه‌سي تاپديق. آتام هر زامان اونا باخاردي، گيزليجه آناما گؤز آلتي باخاراق، او ائشيتمه‌يه‌جک بير سسله:
اي! دونيا نه گؤزل شئيلر وار، دئيَردي.
سونرا شوشَني اييله‌ييب: اَه- اَه پوف! ليجيمينه لعنت! دئييب، شوشَني قيراغا آتاردي، اما باشقا گونلر يئنه ده بو ايشيني تکرارلاياردي.
قومون ايچينده اولان جام قيريقلاري ال-آياغيميزي کسردي. آشورانين قيراغينا تؤکولن تولانبار کوللريندن ياراميزين اوستونه سَپرديک.
آشوراني قيراقلاريندان پيرتلايان بولاقلارين سويوندان ايچرديک. ايستي کول‌لرين قيراغينا گئديب، کولو ائشه‌له‌يرديک، اودون قيرميزيليغيني هابئله يانان رئزينلرين خوش بويالي ياشيل‌ليغينا باخارديق.
آياقلاريميزي دره‌ـ دره ائوه گئديب، چؤرک اوغورلاديق، سونرا آناميز ياخالاماسين دئيه، شالواريميزين ليفه‌سينده گيزلدرديک. اوتاقدان ائشييه چيخاندا، بير زاد گؤتورمه‌ميشيک دورومونو آنلاتماق اوچون اللريميزي ترپه‌ديب، قوللاريميزي توولاييرديق. اما چؤره‌يين دوشمه‌مه‌يي اوچون بد‌نيميزي ترپتمزديک. آنا گؤرسَيدي بودلاريميزي ديرناقدان کئچيرديب، گؤيرده‌جکدي. اينله‌ييب، باشين ديوارا ووراردي. اوتاغين بير بوجاغيندا بوزوشوب اوتوراردي. ديزلريني قوجاقلاياردي. اؤزونو ييرغالاياراق اوخشاماغا باشلاردي:
ديوارلار ديبينده اؤزونه آغلا! يازيقلار اولسون سنه. مني اره وئره‌نين گؤرونا سيچيم. آي الله بالالاريمين ياسيندا اوخشاديب، آغلات مني.
دؤشلريندن ياپيشيب، گؤيه ساري باغيراردي:
قيامته کيمي سودوم حالالينيز اولماسين.
بئله بير دوروملاردا اکبرين بورنونون دريسي تير چکيب، آغلامسيناراق دئيردي:
نه اولاردي آناني سئوينديرمه‌يه گؤره آدام تئزـ تئز چؤرک يئمه‌سين.
من دئيرديم:
آخي اولماز، اوندا اؤلريک!
اکبر: لاپ ياخشي، آنانين اليندن راحاتلاشاريق دا!آنا بيزي قاش‌ـ قاباقلي، مظلوم‌ـ مظلوم ديوارين ديبينه سيخيلميش گؤر‌نده اورَيي يانيب، آغلاياـ آغلايا: بالا آخي نييه مني اينجيديرسينيز؟ گئجه او کؤپک اوغلونا نه جاواب وئره‌جه‌يم دئيَردي.
کؤپک اوغلو، آتاميز ايدي. بيز ده آنام ايله بيرگه آغلارديق. هر زامان کوچه‌ميزين اوشاقلارينين بيري اؤلسَيدي، آنا نئچه گونه کيمي بيزه قارقيش ائتمزدي. اوسته‌ليک بيزي اؤپردي ده، باغرينا باسيب، بويوموزا اوخشاييب قوربان کسردي.
اوزونو گؤيه ساري توتوب دئيردي:
بالالاريم، جان‌ـ جيرلريم! قادانيز منه گلسين.
اما بيز چؤرک قابيندان ايلک تيکه‌ني گؤتوروب‌ـ گؤتورمزدن، قارقيشلاري باشلاناردي.
کؤمورلوکدن يومورتا اوغورلاييب، تولانبارين ايستي کوللرينين آلتيندا قويلايارديق. هردن ده يومورتا کوللرين آلتيندا پارتلاييب، کول گؤزلريميز ايله بوغازيميزا دولاردي. اليميزه چوغوندور دا دوشسَيدي کوللرين آلتيندا قويلاييب، آلا چيي گؤتوروب قاپان‌ـ قاپان سالارديق.
آشورا آياق‌يولولارينين قوخوسو ايله بيزي باغرينا باساردي. کرپيجلي ائولره سو داشييان دمير لوله‌لرين اوستونده اويان‌ـ بويانا قاچيب، مرجلشرديک.
داشيم اووجوندا?» اويونو اويانارديق. سومسوک ايتلرله سيغيناجاقسيز پيشيکلره داشدان ائو تيکرديک. کور شفي‌نين يانيندا اوتوروب، چالديغي هاوالارا قولاق آسارديق.
گئجه توزـ تورپاقلي اوست‌ـ باشيميزلا، قاني سوز‌ن چاتلاق‌ـ چاتلاق اولموش قانچير اللريميز ايله سس‌سيزليک بوروموش ائويميزه دؤنرديک. ايکي کؤنوللو اولاراق نفت چيراغي‌نين ديبينده چؤمبه‌ليب، اوتوران آناميزا سلام وئررديک. چؤرک قازانينا باش چکيب، چکمه‌مَييندن ساري اورَييميز تؤکولردي. او، بيزيم اللريميزي گؤردوکده مهريبان اما آغلامسيناراق دئيردي:
يازيق اولدوق، بوتون پوللاريميزي سيزين چاتلاق الينيزين وازئليني‌نه وئرملي‌ييک، قزوين فهله‌لري اولوبسوز، سحردن آخشاما کيمي ايشله‌ييرسيز، آخشام دا هئچ زاديز يوخدور.
سئل اوتاقلاريميزين ديوارلارينا جيزيق سالاردي. آتام کئچن ايل يا دا نئجه ايل اؤنجه سئلين نه‌قدر گوجلو گلمه‌سيني بيلديرردي. سئلين ايزي ديوار اوزه‌رينده قالاردي. آتام ديواري گؤستريب دئيردي:
بو دا بيزيم ديوار ايل سايلاريميز.
سئل گلردي. آشورا داشاردي. سو فوواره کيمي آياق‌يولوندان فيشقيريردي. حَيَطي دولدولاردي. قويونو دولدوراردي. چوروموش آغاجلار، سامانلاري، شَهَرين يوخاريسيندا اوتورانلارين سارسيميش گوللريني اللرينين اوستونه آليب بيزه تقديم ائدردي. يالنيز سلام وئرمه‌يه ديلي اولمازدي.کيليمي ييغيشديرارديق. شالوارلاريميز چيرمانارديق. شالوارلاريميزين آراسي ايسلانيب، سس وئرردي. چادراسيني بئلينه باغلايان آناميز آغ آياقلاري ايله سويون ايچينده تيرـ تير اسيب، تئزـ تئز صلوات چئويره‌رک، دئيردي:
ايندي دونياني سو آپارار. نوح قاسيرغاسيدي. ائويميز ييخيلدي. يازيق اولدوق. آي الله قاپيندا گوناهکار ايتم. بو بالالاريما رحمين گلسين.اوزونو گؤيه ساري توتوب: ايت کيمي هورردي. سونرا، آي الله قاپيندا اوزوم قارادي! دئيردي. آردي وار

منبع :