بولگه لر سرويسي: بير جوان کعبه‌ده دال به دال بو دوعاني ائديردي:»ائي دوغرولارين کؤمگي اولان آللاه، ائي حرامدان اوزاق اولانلارين کؤمگي اولان آللاه، سنه حمد و ثنا ائديرم«. بو حال هامي‌نين ديقّتيني جلب ائلر. بيري ياخينلاشيب دئيَر: »نييه فقط بو دوعاني ائليرسن؟ آيري دوعا باشارميسان؟« او باشلار تعريفله‌مگه:يئددي-سککيز ايل بوندان قاباق يئنه کعبه‌ده اولدوغوم گون، قيزيللا دولو بير توربا تاپديم. اوندا مين قيزيل سيکّه واريدي. ايچيمدن بير سس »بو قيزيللارلا بئله ائدرسن، بو ايشلري گؤررسن« دئييردي. اؤز-اؤزومه»يوخ بو منيم دئييل آيريسي‌نين ماليدير، حرام اولار« دئديم.بو آندا بير نفر»بئله بير توربا تاپان وارمي« دئيه باغيريردي. چاغيرديم اونو. »نئجه بير توربايدي؟ ايچينده نه واريدي؟« دئيه سوروشدوم. توربانين علامتلريني و ايچينده مين قيزيل اولدوغونو دئدي. »اوندا بس آل» دئييب تورباني وئرديم. آدام تورباني آچيب ايچيندن منه اوتوز قيزيل وئردي. بازارا گئتديم. تميز اوزلو بير جوان اسيري تعريفله‌يه-تعريفله‌يه ساتيرديلار. جوانين تميزليگي ديقّتيمي چکدي. يانلارينا گئتديم «بو کؤله اوچون نه ايستيرسيز دئدي« اوتوز قيزيل دئديلر. آدامدان آلديغيم اوتوز قيزيلي وئريب جواني آلديم. بير ايکي ايل کئچدي. جوان چوخ چاليشقان و چوخ ادبلي ايدي. اونو آلديغيما چوخ راضي ايديم. بير گون اونونلا گئدرکن قاباقدان ايکي اوچ نفر گليردي. جوان منه دئدي:»آغام ! من مراکش اميري‌نين اوغلويام. بو گلنلر بابامين آداملاريديلار. مني تاپديلار. سندن مني آلماق ايسته‌يه‌جکلر. سن ياخشي بير آدامسان. اونلارا اوتوز ميندن آشاغي‌يا ساتما«.اونلار يانيما گلدي. »بو اسيري بيزه ساتيرسانمي؟«دئديلر. جواب وئرديم: »ساتيرام«.»آلتميش قيزيل وئرک«دئديلر. »اولماز«دئديم. »ياخشي! آما سن بونو اوتوز قيزيلا آلمادين مي؟ بيز سنه ايکي قاتيني وئريريک« دئديلر. »ائله ايسه گئدين بازاردان آلين« دئديم. آرتيرا آرتيرا ايرمي مين قيزيلا چيخارتديلار. »اوتوز ميندن آشاغي وئرمه‌رم« دئديم. چاره‌سيز قاليب قبول ائله‌ديلر. قيزيللاري وئريب جواني آليب گئتديلر. من او اوتوز مين قيزيللا ايش يئرلري آچديم، تيجارت ائله‌ديم داها چوخ وارلانديم.بير گون دوستلاريم منه »چوخ وارلي بير عاييله‌نين ياخشي بير قيزي وار، آتاسي تازا رحمته گئديب. سني اونونلا ائولنديرک« دئديلر. من‌ده »اولور«دئديم. کبين کسيلدي. دوه يوکلري جاهازلاري گتيردي. جهاز آراسيندا بير توربا ديقّتيمي جلب ائله‌دي. قيزا »بو نه‌دير؟« دئديم. »ايچينده 970 قيزيل وار، بابام کعبه‌ده بونو ايتيرميش، اونو تاپان جوانا اوتوزونو وئرميش قالانيني‌دا منه هديه ائله‌ميش« دئدي.دئمک او تاپديغيم قيزيللار منيم ريزقيم ايدي، وئرمه‌سه‌ايديم حرام يوللا گلردي. ايندي حلال يولدان يئنه منه گلدي.منه کؤمک ائديب حراملاردان قورويان، نئجه نعمتلر احسان ائدن ربّيمه حمد ائديرم«.
بولگه لر سرويسي: بير جوان کعبه‌ده دال به دال بو دوعاني ائديردي:»ائي دوغرولارين کؤمگي اولان آللاه، ائي حرامدان اوزاق اولانلارين کؤمگي اولان آللاه، سنه حمد و ثنا ائديرم«.