بولگه لر سرويسي:تارچي چارگاهين برداشتين سسلنديرير. تارين تئللرينه گوجلي ده‌ين ميضراب مؤحتشم بير ايفاني ائشيتمه‌يي موشدولوقلايير. خواننده بير ميصراع غزلدن اوخوماميش و يا حتي بيرنفس برداشتي مايه‌يه طرف آپارماميش اؤزلرين چوخ موسيقي‌شناس بيلن تاماشاچيلار آلقيشا باشلاييب و بوتون موسيقي فضاسين کورلاييرلار.!! بو پيس رفتار بير چارگاه موغامي، منصوريه‌ده بيته‌نه قدر آزي اوتوز دفعه تکرار اولور. نه کي خواننده‌نين ظريف ايفا آنلاري، بلکه سولو چالان ارکستر عوضولري، هاردا او تاماشاچي‌نين اوره‌يينجه چالير، چپيک سسي ده شيروانيه ياغان، يئکه دنه‌لي دولو سسي کيمي، موسيقي هاواسين بورويور. هرکس کي باشقا تاماشاچيلاردان اؤزون چوخ بيلميش سانير، هاميدان اول چپيک چاليب، سورو قوچي کيمي باشقالاريني دا داليسيجا گئتمه‌يه وادار ائدير!. ائله کي هرکس چپيک چالماقي واجب بيليب، دئيير بس اونون آلقيشين گؤرمه‌سه‌لر، او ظريف آنلاري دوشونمه‌ين، ساوادسيز، سويه‌سيز گؤرونه‌جک.!!! موغام موسابقه‌لرينين کيمسه ده فيلمي وار، يا مسابقه زماني جانلي تاماشا ائدنلر، بيليرلرکي تاماشاچيلارين يئرسيز آلقيشي او گؤزلليکده ايفالارين باشينا نه‌لر گتيردي. ائله کي هئچ زامان لکه‌سيز بير موسيقي او مسابقه‌لردن يازيليب يادداشتدا قالمادي. اگرکي سکوتدا ايفا اولسايدي، شوبهه‌سيز قيزيل لنته يازمالي گؤزل موسيقي‌لر ياراناردي.چوخ تاسف کي بو پيس عادت آذربايجان جمهوريسينده جانلي تئاتر و موسيقي سالون‌لاريندا گئت گئده انکشافدا و ياييلمادادير!!. اونلاردان کورکورانه تقليد اساسيندادا، بيزلري متاثير ائديب و ائدير. آزيندان بيزيم کيمي تلويزيون تاماشاچيلاري تئاترين سناريوسونون ياريسيندان چوخون، باشا دوشموروک. بيرطرفدن چپيک سسيندن، ديگر طرفدن روس و فرنگي ديللرده ايشله‌نن لوغتلردن. اودورکي کميک صحنه‌لرده گولنلرين گولوشونه ده، بيرجور حئيرتله گولوروک!! موسيقي سالونلاريندادا اشاره اولان اوقات يارانير. عاليم قاسيم اوفون تهران اجراسيندا تالار وحدتده عين رفتارين شاهدي اولدوق. نئچه يول قصد ائله‌ديم اوجادان قيشقيرام کي: بيز عاليمي ائشيتمه‌يه گلميشيک، اؤز اليميزين سسين ائشيتمه‌يه يوخ! چکينديم. قورخدوم کي بيرنفر آغير سؤز دئير، بير آز دا اوقاتيم کورلانار.ياديما کؤهنه بير خاطيره دوشدو. رحمتليک دکتر هوشنگ کاووسي ياخشي آد قويموشدو. فيلمفارسي. بو بيزيم تزه جاوان دؤروموزده، اوشاقليق چاغلاريميزدا، حتتا اوندان قاباق ايران استحصالي کيمي تانينان فيلملرين آديدي. دونيا سينماسي خصوصيله هيندوستان سينماسينين ناشي بير کوپي‌سينه بنزر فيلملر کي، نه فيلم ايدي، نه ده فارسي. او سببدنده فيلمفارسي آدين هله ده داشيير. او فيلمفارسي‌لرده ايکي صحنه‌ده تاماشاچيلار چپيک چالارکن فردين کيمي فيلمين قهرمانين تشويق ائدرديلر. بير اوندا کي نئچه قولدور کؤتک آلتدا ازيشديرن کسين، ايمداد هارايين ائشيدن فيلمين قهرماني، کؤمک اوچون توللاناردي. بيرده همن فردين و يا ايرج ين اوخودوغو موسيقيني دوداق ووراکن، تحرير(چه چه) يئرينه چاتاردي. سؤزسوز کي بو داورانيش عوام و عادي تاماشيچي‌لارين ايدي. اينجه صنعت اهلي، عالي تحصيللي و ضيالي جمعيتدن بو رفتار باش وئرمزدي.ايندي جانلي تئاتر يا موسيقي ايفاسين يئرسيز آلقيشلاري ايله زايل ائدن تاماشاچيلاري گؤرنده، اؤزومو فيلمفاسي سينماسيندا حيسس ائديرم.بو پيس عادتي ايکي جور تفسير ائتمک اولار: بيرينجي بئله کي تاماشاچي اؤز تشويقي ايله، قديردانليقين خواننده‌يه يا چالقيچيا بيلديرمک ايسته‌يير. من موطلق بو تفسيري دوز بيلميرم. تماشاچي موسيقيني ائشيدمک اوچون سالونا گلير، نه کي اؤزو آلقيشلاري ايله ايفاچي دونونا گيره. ايکينجيسي ده بئله کي، تاماشاچي او فيلمفارسي تاماشاچيسي سويه‌ده‌دير و يئرسيز آلقيشلا، بير مؤحتشم ايفاني مجراسيندان چاشديريب و بير ايلنجه‌يه تبديل ائدير. اگر بير عاليم، بير آغ ساققال، موسيقي عوضينه، ده‌يرلي بير موضوع حاققيندا تاماشاچيلارا دانيشسا، بيز نه حاقلا اونون سؤزون ديقه ده بير يول کسيب چپيک چالماليييق؟ بو ايش بير جور اهانت دئييلمي؟ چوخ اولوب کي سياسي دانيشيقلاردا،داواملي آلقيش يا صلوات ايله دانيشانين صؤحبتينه مانع اولوب، اونو سوسماغا وادار ائديبلر!! البته آيديندير کي پوپ، جاز و بو ساياق ريتميک موسيقي‌لر کي تاماشاچيلار هيجانلا، ايفاچيلارا قوشولوب، اوخويوب، اويناييب و شن اوقات کئچيريرلر، صؤحبتيميزدن کناردي. غرب اؤلکه‌لرينين ملايم و يا سمفونيک موسيقي‌سين گؤرنده، آدام نئچه قات حظ آلير. مجليسه حاکم اولان سکوت ايفاچيني بوتون خلاقيتي ايله نادر و تکرار اولونماز بير ايفايه قادر ائدير. تاماشاچيلاردا ايفانين سونوندا، يوکسک مدني بير رفتالا، اوزون موددت آلقيشلا، تشککورلرين بيلديريب و بعضن گول چلنگيده تقديم ائديرلر. کئچن اوقات هامي اوچون گؤزل بير حيات آنلاري ياشاماق اولور. 15 -16 ايل قاباق سهو ائله‌مه‌سم صداي‌سخن يا بونا بنزر بير تخصصي موسيقي مجلله‌سينده بير مصاحبه اوخودوم. 1356نجي ايل شيرازدا حافظين مزاري اوسته کچيريلن جشن هونرده اوستاد شجريانين گؤزل بير ايفاسيندان صوحبت گئديردي. ايفاني موکممل سکوتدا دينله‌ين تاماشاچيلار، سوندا 35 ديقه ال چاليب، صنعتچي‌لري آلقيشلاميشديلار!. بيز بونو دوشونملي‌يي
تارچي چارگاهين برداشتين سسلنديرير.