بولگه لر سرويسي: »اولوب بيزه پنير- چؤرح. سحر اؤونه‌سي، آخشام اوستو، شب‌چره واختي… باخيسان تيرياکيسي اولورسان، باخميسان، بئينين قره‌لير. آدام بولمور باشينا نه داش سالسين!« اؤز- اؤزويله دانيشا- دانيشا، ساعاتا باخيب کنتروللاري مبل دسته‌سيندن ساللانميش، قابدان گؤتوروب، موبلون اوزه‌رينه يايلاندي يانجاقلاري موبلون چوخورلاشميش دؤشکينه باتدي.شانسا باخ! جماعت آنتاليا دا، کوش آداسيندا اؤزونو گونشه وئريب، بدنيني برنزه ائلير، بيز ده بير دست ايستقلال موبلو آلماغا، اندر خم يک کوچه‌ايم! موبلدان قالخيب، ياتاق اوتاغينا گئديب، قولتوغوندا بالينج، ميزيلدانا- ميزيلدانا گئري دؤنوب، بالينجي موبلون چوخور يئرينه قويوب، بارماغيني بالينجا ساري توشلاييب سسيني اوجالتدي:»قايقي خواهم ساخت دور خواهم شد از اين خاک غريب…« سسيني کسيب تومودو. دييه‌سن هانسي تئاتر صحنه‌سينين اويونچوسو ايدي. گئنه باشلادي اؤز- اؤزويله دانيشماغا: » آآااا…بَه خاک نييه؟ هاردا گؤروبسن قايغي تورپاغا سالسينلار. مين دفه بو شعري اوخوموشام، اينديه‌جن هئش بَه‌خود اولماميشديم هااا… کيم نه بيلير! من اوخوياندا سويو تورپاغينان دَييشه‌رم، دور خواهم شد از اين آبِ غريب… يووو… بو دا اولمادي!« بالينج اوستونده أيله‌شيب، أيلشمه‌ميش جَلد يئريندن قالخيب ياتاق اوتاغينا گئتدي. ألينده بير کيتاب گئري دؤندو. گوشه‌سي قاتلانميش بير واراغي آچدي: »باخ بورا، دئيرم ها بير شئيي جور گلميردي… هوش باش دا قالميب کي! هله پيس پيس سپهري‌يه ايراد توتورام. هه ايندي اولدو باااا…«بم سس ايله باشلادي دکلمه ائله‌ماغا: قايقي خواهم ساخت خواهم انداخت به آب دور خواهم شد از اين خاک غريب… دور بايد شد دور مرد آن شهر اساطير نداشت زن آن شهر به سرشاري يک خوشه‌ي انگور نبود… همچنان خواهم خواند… همچنان خواهم راند سوسدو. ساعاتا باخيب، کيتابي قارشي موبل اوسته آتيب، أليني کيتابا ساري اوزالديب، دئدي: هارا خواهم راند!…اوتو يئرينده، بئش خبرينه باخ، آللاهيوا شوکر ائله!اومودسوز حالدا چوخور اوسته قويموش باليش اوسته أيله‌شيب، کنتروللاري ميز اوستوندن گؤتوردو. يوخاري مرتبه‌دن تاپ با تاپ سسي قالخدي.گئنه بو جووَللاغي يوخودان آييلدي. اولمادي کي بير آخشام ايشدن گليب، دينج اوتوروب، خبرلره باخيب، چاييميزي ايچَخ هاااا…!آياقلاريني ميز اوسته، فينجان- نعلبکي‌نين کنارينا اوزاتدي. باش بارماغي نعلبکي ايچينده‌کي کئيکه توخوندو کئيک ميزه ماييل اولوب، ياريسي ميز اوسته ياريسي ايسه نعلبکي‌ده قالدي. سايمادي. يخچالين موتورو ايشه دوشدو.»آدام قالير هانسي سسه قولاق وئرسين؟ تيريلتييا، تاپپيلتييا…باشيميزا خئير بو اُپن آشپازخانالاريميزنان!« چؤنوب ترسه- ترسه آشپازخانادا يخچالا باخدي. يخچال ديل قانسايدي، گونده نئچه دفعه اونا گؤز آغارداريب، سسيوي کس دئيردي زهله‌سي گئديردي اونون تيريلتي سسيندن. گاهدان گئجه ياريسي سسي باشينا دوشوب يوخوسون قاچيرديردي. گؤزو تي‌وي ده، پئشه‌کار تايپيست‌لر کيمي بارماقلاريني کنتروللارين دويمه‌لري اوسته اويناتدي بي‌بي‌سي کاناليندا أل ساخلادي.»بو دا بويونوموزون بئش خبري! آمما بو بي‌بي‌سي ده لاپ چئرچيل‌ايميش هاااا… بئش! خبرلري دئمه‌يه ائله ساعات سئچيب کي، ميلّت ايشدن گليب، چوُرتون ووروب، کئفي قايماق دادي وئرنده، چئرچيل بي‌بي‌سي، بئش خبريني باشليري.«خبر دئين‌نلرين آدلاريني ائو آدامي کيمي أزبرله‌ميشدي. بويون ناجيه گلميشدي خبر استوديوسونا. قيزين بورنونو سيخسايدين جاني چيخاردي. دوزدن، يالاندان دالبادال ساپا دوزدويو خبرلره باخماياراق، اونون دوم- دورو، شفاف سسيندن خوشلاناردي.ناسا نام مسافران بي‌بازگشت مريخ را اعلام کرد!ناجيه‌نين سسي ذهنينه دوم- دورو سو چيله‌دي. يوخودان آييلميش کيمي اولدو. ائله آياقلاريني ميزدن چکيب، آياغا قالخدي کي گويا گونلر ايدي بئله بير خبري گؤزلويوردو. چاي فينجاندان نعلبکي‌يه سيچرادي. کئيک ايسلاندي. تي‌وي‌نين سسيني قالديريب،کئچيب قارشيسيندا دايانيب، ديققت ايله قولاق وئردي.نام دو ايراني در بين اين اسامي مشاهده مي‌شود. ستاره خورشيدي و…اؤز آديني ناجيه‌نين ديليندن ائشيدنده، بير آن قولاقلاري باتدي. آديندان علاوه هئچ نه ائشيتمه‌دي. نه يخچالين موتور سسي بئينينه جيزيق چکدي، نه ده قونشو اوشاغينين يوخاريدان گلن تاپپيلتي سسيني ائشيتدي. آز قالدي قاناد چيخارديب، اوچسون. اطرافيندا هئچ کيمسه يوخ‌ايدي سئوينجکدن اونو چکيب باغرينا باسسين. اوتاقدا اويان بويانا قاچدي. قوللارين آچيب اوشاق کيمي آتيليب دوشدو. تي‌وي ميزينين اوستونده، تاختادان يونولموش خوشبخت بودا تنديسي گوله گوله اونا باخيردي. بوداني گؤتوروب، باغرينا باسدي. سونرا اوزبه اوزونده توتوب، اونا دانيشدي: واللاه اوچاجام؟ بولمورم سئوينجکدن نئجه ائليييم!آنتاليا، مانتالييا قوي گئتسين ايشينه. هامينين گؤزونه آغ سالاجام. آااااااااااااي… اينانيسان؟من مريخه گئده‌جه‌يم!بودا، بو آن ديله گليب اونون سؤزونه جواب وئرسه ايدي بئله، ائشيتمزدي. تنديس اووجونون ايچينده، دورمادان آتيليب، دوشدو.اوچاجام. واللاه اوچاجام… دئييرم آلـلاه نييه مني قوش ياراتمييب آخي!؟بوداني توتوب اؤپدو. بير يوخايکي يوخ،…باشيووا دولانيم ناسا… کيم دييه‌ردي بير بئله آدام ايچينده مني سئچه‌جخلر؟ديشلري خوشبخت بودا کيمي ائشيکده قالميشدي. بو آن اؤزونو خوشبخت بودادان يوز قات آرتيق خوشبخت حيس ائديردي. کئچيب، چوخور اوسته‌قويموش بالينج اوسته أيلشدي. کئيکين ايسلانميش يئريندن بير ديش ووردو. به‌به! بئله ده دادلي کئيک اولار!بير قورتوم چاي ايچدي. چاي ايليق اولسا دا، دونيانين أن دادلي، عطيرلي چاييني ايچديييني حيس ائتدي: »به‌به! « بودا تنديسيني ميز اوسته قويوب، اونونلا دانيشماغا باشلادي:مشهور اولدوم، مشهور! نه اولسون مثلن؟! گئده‌ر گلمز سفر اولسا دا اولسون دااا! بلکه مريخده يئر اوزوندن چوخ ياشاديم! کيم نه بولور!… والـلاه هاليوودا گئتسه‌يديم بئله مشهور اولمازديم مشهور اولدوم، وااااي… ايندي دونيانين لاپ بئله مشهور روزنامه‌لرينده آديمي يازاجاخلارسئوينجَحدن اؤله‌جه‌يم… هامينين گؤزو چيخاجاخ! قوي پاخيل‌ليخلاريننان پارتلاسينلار! ايللاه دا نسرين‌نن ناهيد… خوشبخت بودا، بوينوندا ايري دَنه تسبئح، ديش‌لرين آغارتميش، گؤلوردو. بودانين آغارتميش ديشلري اونو اضطرابا سالدي. لاپ ائله اينديدن اؤزونو بو بؤيوک سفره حاضيرلامالي ايدي. سويوخ قانلي اولمالييام. شوخلوخ دئيي کي اوول نه ائيله‌مه‌لييم؟هههه! نيشان بارماغيني بودا تنديسينه ساري توتوب، »بولدوم« دئدي. بوداني گؤتوروب، تئلفون ميزينين اوستونه قويودو»گؤر ايندي نئجه قافيلگير ائلييرم بيله‌لريني. اوول نسريني سورا دا ناهيدي…«تئلفون دفتريني آچيب واراقلادي. هيجانلا بير بير نومره‌لرين اوستونه باسدي. »مشغولدي«دئييب، دسته‌ييي خوشبخت بودانين قولاغينا توتدو. ناجيه هله ده تي‌وي‌ده خبرلرين آرديني دئييردي. داعش‌نين هجوموندان دانيشيردي. داعش گئنه ده بير خبرنيگارين باشيني کسميشدي. بودايا گؤز ووروب دئدي: مريخه گئتسم بو اؤلوم ايتيمساواش، باريش خبرلريندن جانيم قورتولاجاخ.بودانين سسي چيخمادي. او ايسه گئنه ده دفتري واراقلادي. ناهيدين قلبي ضعيفدي. اونا گرح ياواش ياواش دئييم. آلـلاه ائله‌مه‌ميش پاخيلليخدان بيردن قلبي دايانار! تئلفونون دويمه‌لرينه باسدي. آاااا. ناهيد ده کي مشغولدي! بير داها دسته‌يي بودانين قولاغينا توتدو:ايکيسي ده آدامي دماغ‌سوخته ائله‌ماخ اوستاسي‌ديلار والـلاه! بودانين پالتاريندان ائشيکدده قالميش طبيل کيمي توخ قارنينا گؤزو ساتاشدي. نظرينه گلدي، چوخ يئمکدن بوداني قارين باسيب، اونا گؤره آغزي آچيلمير دانيشسين.ائشيديبلر. يقين منه گؤره دانيشيرلار. يوخسا ايکيسينين ده تئلفونو بير يئرده مشغول اولماز کي! گؤر ايندي نه‌لر دئييرلر! بوداني تئلفون کناريندا بوراخيب، اؤزو مبل اوسته أيلشيب، قوللارين ايکي سمته آچيب گؤزلرين يومدو. ناجيه‌نين نه دئدييني باشا دوشموردو بوتون فيکري قالميشدي بؤيوک سفرده. صاباحدان مصاحيبه‌لر باشلاناجاق، تئلفون دائم ديرررا ديررر چالاجاق… نئجه اولدو آد يازديردين بو سَفره؟ نه واخت آد يازديردين؟ بيردن بيره دوروخدو. گؤزلرين آچيب شوبهه‌لي حالدا بودا تنديسيندن سوروشدو:دوردان من نه واخت بو سَفره آد يازديرميشام؟ هاردا آد يازديرميشام؟بودانين دانيشماق قصدي يوخ ايدي. گوله- گوله اونا باخيردي. ناجيه شيرين شيرين خبر دئييردي. بير آن ناجيه‌نين سسي قولاغينا دولدو.خلاصه‌ي خبرها: ناسا نام مسافران بي‌برگشت مريخ را اعلام کرد.گئنه جَلد يئريندن سيچراييب، آياق اوسته ناجيه‌نين نه دئديغينه ديققت ايله قولاق آسدي.نام دو ايراني در بين اين اسامي مشاهده مي‌شود، ستاره خون‌شيري و… يووووو! لعنته گلميش خون‌شيري ده هاردان چيخدي! دئييب، موبل اوستوندن بالينجي گؤتوروب تي‌وي‌يه ساري آتدي.ديزلري قاتلانيب، موبلون چوخور يئرينه دوشدو. بودا، تئلفون کناريندا ديش‌لرين آغارتميش، اونا باخيردي.…
بولگه لر سرويسي: »اولوب بيزه پنير- چؤرح. سحر اؤونه‌سي، آخشام اوستو، شب‌چره واختي… باخيسان تيرياکيسي اولورسان، باخميسان، بئينين قره‌لير. آدام بولمور باشينا نه داش سالسين!«