– بهروز، نه تئز يوخون آپاردي؟!

– مهرداد سحر ائرکن عمله گئده‌جه‌يم  بيلميرسن مگر؟!

– نئيه، بيليرم، يوخوم آپارمايير، داريخديم، سني اوياتديم. قيچلاريم گجين آلتيندا يامان قاشينير ياتا بيلميرم. – فيکريني باشقا بير شئي‌له مشغول ائت! دئييرسن گتيريم بير آز کيتاب اوخويوم – دئيه ـ بهروز آشاغي ائنيب، چيراغي يانديردي. بهروز کيتابدان بيرنئچه صفحه اوخودوقدا، مهردادين خورولتوسو اوتاغا ياييلدي. بهروز اهمال چراغي سؤندوروب يئنه تختينه اوزاندي. آخ! نئجه شيرين – شيرين يوخو گؤروردوم! خسته‌خانادان مرخص اولوب ائوه قاييتميشديم. آنام نئجه ده مني باغرينا باسميشدي! بس نه دن آنام قاپ –قارا يايليق اؤرتوب، آجي –آجي دا گؤزياشي تؤکوردو؟! آغلاماغي سئوينجيندن اولابليردي آنجاق قارا يايليغي؟!

– شوکوراولسون هله کي،‌هاميميز ساغ – سالاماتيق، قارا فيکيرلري بوراخ! ـ دئيه ـ گؤزلريني قاپادي. بهروز سحر تئزدن يوخودان قالخيب، ايلک اؤنجه مهرداد ال ـ اوزونو يوماق ايچون اونا سو گتيريب. سونرا گئديب ال – اوزونو يويوب مهردادين يانينا قاييتدي:

– هئچ داريخما بئليمين عملي چوخ چکمييه‌جک. ائله بو ساعات قاييدارام – دئييب ـ پرستارلا اوتاقدان باييرا چيخدي.هله سحردن بير آز کئچميش مهرداد تکليکدن بئزيشدي. بير آز راديوسونو قوردالادي؛ داها سونرا ورزش گونده‌ليک‌لريني واراقلاماقلا باشيني قاتدي. نهايت اوزونو بهروزون تختينه طرف چئويريب گؤزونو بهروزون تختي‌نين باشيندا اولان پنجره‌يه زيلله‌دي. او، پنجره دن باييري گؤره بيلمسه ده، پنجره‌دن اوتاغا دولان گونشين شفق‌لريله خياله دالدي:

»يقين يئنه آغ – آبباغ بولودلار، گؤم ـ گوي صاف‌هاوادا قاتارلانيب، آستاـ آستا گون باتان طرفه آخيب گئديرلر، سهندين باشي‌نين شيريق قاري يقين دونندن بري، يئنه بير آزجادا ايشگه‌له‌ييبدير. دوغرودان بس نه‌دن بوگون گلين آپارميرلار؟« آخي هرگون ماشينلار بوق چالارکن، بهروز بزه‌کلي چيچکلره بورونموش ماشينلارين گلين آپارماسيني پنجره‌دن سئير ائده‌رک، گؤردوکلريني بيرجه – بيرجه مهردادا وصف ائده‌ردي.

مهرداد خسته‌خانايا گلن گوندن بئله، تختيندن آشاغي دوشه بيلمه‌سه ده، آنجاق هر دؤنه پنجره‌يه طرف باخديقجا بهروزون هفته‌لرله اونا شيرين – شيرين وصف ائتديگي بوتون منظره‌لر بير به بير گليب خياليندا جانلانيردي، ايندي او، پنجره‌يه طرف باخارکن – »کاش کي منيم ده تختيم پنجره قاباغيندا اولايدي« – دئييب، دريندن بير کؤکس اؤتوردو. »گؤره‌ن نه دن بهروز اؤز يئريني من‌له عوض ائتمگه راضي اولمايير؟ من دؤنه – دؤنه اوندان بونو ايسته‌سم ده او، هردفعه بير عنوانلا يئريني منه وئرمکدن بويون قاچيرير. کاش کي باهارين چاتماسيني اؤز گؤزلريمله پنجره‌دن گؤره بيلئيديم.‌هاچانادک اونون مينتيني چکه‌جه‌يم کي پنجره‌دن گؤردوکلريني منه دانيشسين«…

بو آن قاپي آچيليب، پرستارلار برانکاردلا بهروزي گتيريب، تختينين اوستونه اوزاتديلار. او، آغزيندا اکسيژن ماسکاسي، قولوندا سوروم، ساپ – ساري صفتيله، بايقين حالدا آرخاسي اوسته دوشوب قالميشدي، بير آن مهردادين اونا اوره‌يي ياندي: کاش کي آياق اوسته دورا بيليب، اونون باشي اوستونه گئده بيلئيديم – دئيه ـ بير آه چکدي. بهروزون اللريني تخته باغلاميشديلار. او آغير –آغير نفس آليردي.‌هاندان –هانا بير آن گؤزلرينين قاپاغيني بير آز آچاراق، مهردادين اوزونه گولومسه‌دي.بير آزدان بهروزون بدني تيتره‌مه‌يه باشلادي. بيردن اکسيژن ماسکاسي اوزوندن آيريلدي او، ال – آياق چالارکن بير ضعيف سسله: – مهرداد زنگ ائله… – دئيه ـ سيزلادي.

مهرداد تئز اليني زنگه طرف اوزاتدي. بو آن بير قوشون نغمه‌سي پنجره‌دن اوتاغا دولدي. پارکدا سيرايا دوزولموش قلمه آغاجلاري، جور به جور اويونجاقلاري اولان اوشاقلار باغچاسي‌هاميسي بير به بير گليب مهردادين گؤزو اؤنونده جانلاندي. او اؤز– اؤزونه »يوخ من پنجره قاباغينا گئدم گره‌ک« ـ دئيه ـ الي زنگين دويمه‌سيندن اوزولدي. »بس اونون دانشگاهي! بس اونون آناسي، آداخليسي؟!« او بونلاري دوشوندوکده يئنه ده اؤز –اؤزونه: »بوراخ! بو فيکيرلرين زاماني دئييل، بو فيکيرلري وئلله!« ـ دئييب، ـ پتوسونو باشينا چکدي… نه قاپي‌لارين شاققاشاق چيرپيلماسي، نه ده دوکتورلرين، پرستارلارين‌هاي – کوي سسي، مهردادي بو يالان يوخوسوندان آييلدا بيلمه‌دي. بهروزون جسديني، پالتارلاريني اوتاقدان آپارمايينجا، مهرداد مطلق باشيني پتونون آلتيندان چيخارمادي.

گئجه‌ني مهرداد سئوينجک سحر ائديب هله دان يئري سؤکولمه‌ميش زنگين دويمه‌سيني باسيب، پرستاردان تختيني عوض ائتمه‌يي ايسته‌دي. پرستارلار اونو گتيريب پنجره قاباغيندا بهروزون تختينه سالديلار. ايندي او بوسبوتون منظره‌لري اؤز گؤزلريله سئير ائده‌جه‌يينه اينانيب هيجان کئچيريردي. پرستار اوتاقدان چيخماق‌هامان او تئز ديرسکلريني يئره وئريب بدنيني بير آز يئردن اوزوب، بوينونو اوزالديب پنجره‌دن باييرا باخدي. بيرآن گؤزلرينه اينانا بيلمه‌ييب گؤزلريني اللري‌له اووشودوروب يئني‌دن ائشيگه باخارکن  پنجره‌نين قاباغيندا اوجا بير صاف دوواردان باشقا هئچ نه گؤزه گؤرونمه‌ييردي….