ايلک اوتانماغيما سبب اوشاقليقدا ياماقلي پالتارلاريمدي
1398/07/01
بولگه لر سرويسي: منيم ايلک اوتانماغيما سبب، باشقا شئي ده اولسا، ياديمدا قالان اوشاقليقدا جيريق يا ياماقلي پالتارلار گئيمگيم اولوب. بلکه سيزده بونو تجروبه ائله‌ييبسيز.
آنجاق بيردفعه، لاپ قت تزه يا نه بيليم تر تزه پالتاري گيمکدنده اوتانميشام. 1348 نجي ايلين پاييزينين سويوق آخشامي‌آتام مني خومارلي‌يا يوللاماق ايسته‌دي.
“قوناغيميز گلير.گئدرسن موظفرين دوکانينا ايکي کيلو دويو آلارسان دئيه‌رسن نيسيه وئرر. يازار منيم حسابيما.”
اوزي چرچي اولا اولا هئچ واقت دويو آليب دوکانا گتيرمزدي. آخي آلان اولمازدي. باهالي همده خان خاواني يمگي ساييلاردي. ايله او زامانلاردان قاليب دا،او بايرام دويو بو بايرام دويو!!. عادي رعيت جاماعاتي آنجاق نوروز بايراميندا بير ياغلي قازماقلي پلو بيشيررديلر. نئجه ده دادلي اولاردي ! دوغروسو ايندي حتي او صدر دويوسونه يئرآلماداندا قازماق قويوللار، تورشي، الوان سالادلار، زيتون و….يانينا دوزوللر، آنجاق او دويونون دادين وئرميرکي وئرمير.
مطلبدن اوزاقلاشمياق. من نيسيه سؤزون ائشيدنده بيرآز اوتانديم، آمما چاره يوخيدي. گئتمگ ايسته‌ديم. آتام دئدي: تلسمه! سنه تزه آرخاليق (کت) آلميشام.هاوادا سويوقدي. اونو گئي گئت. چوخ سئوينديم. آتام صانديقدان آرخاليقي گتيرينجه صبريم داشدي. قهوه‌اي رنگده گؤزل بير آرخاليقيدي. اينديکي ساتيجيلار يا درزيلر موشتريه گئيديرن کيمي‌الينده ساخلادي منده گئيديم. درحال قاش قاباغيم ساللاندي. منيم اينيمه چوخ يئکه ايدي. اعتيراض ائله‌ديم. آتام دئدي: آي بالا سن نئچه ايل بو آرخاليقي گئيه‌جکسن. شالوار دگيل کي ايلده بيرين ايکي ايلده بيرين يئرتاسان. اودورکي آرخاليقي بيرآز!!! يکه آلارلارکي اوشاق يئکه‌ليب بوي چکنده اينينه کيچيک اولماسين. کؤنولومده قبول ائده بيلمه‌ديم، آنجاق اوتانديم آرتيق اعتراضا داوام ائدم. او سيرتيق اوزدي اوشاقلاردان دگيلديم.
آرخاليقي گئيديم، دويونو تؤکمک اوچونده بير توربا وئرديلر، قويدوم جيبينه، يوللانديم. آرخاليق مني ائله بوروموشدي کي گويا آتامينکي‌دي. من ده موقتي قاپيا چيخماغا گئيميشم. کندين آراليقيندان قيوراق قاچديم کي يولداشلار اونون نه قدر يئکه اولماسين آنلاماسينلار. شوردره ده فيکيرلشديم: خومارلي اوشاقلاري عمومن دجل، ساتاشقان، يئتنه يئتيب، يئتميه‌نه بير داش آتانديلار. بو يئکه آرخاليقي اينيمده گؤرسه‌لر ائله مني لاغا قوياجاقلار کي سحردن گرک مدرسه‌يه گئتمگي‌ده اونودام.
درحال آرخاليقي سويوندوم. آستاري اوسته يومورولاديم، يولون اوستونده بير نار کولونون ديبينه قويوب، شاخلاري چکديم اوستونه گؤروکمه‌سين. قاچا قاچا خومارليا گئتديم. گون باتان چاغي موظفرين دوکانينا چاتديم.
تاپشيريلان کيمي‌ايسته‌ييمي‌سؤيله‌ديم. موظفر بيرجور معنالي دوکاندا اوتوران کيشيلري سئير ائده‌رکن اوزلرينه باخيب دويونو چکمه‌يه باشلادي. او باخيش مني چوخ اينجيتدي. نيسيه سؤزوندن آرتيقراق آجيغيم گلدي. سونرالار او باخيشين تايين بير معتادا پول اوزادان تکبرلي بير کيشينين گؤزونده گؤردوم. قاييداندان سورا ائله کي ماجراني سؤيله‌ديم، آجيقلانديلار کي بلکه کيمسه اونو کولدان تاپيب اوغورلاسايدي. جانيني‌هاردا قوياردين.؟! تکي بير باجيم گولمه‌يين باشقالاردان گيزله ديب منه ساري باخدي. ائله آنلاديم کي دئيير ياخشي ائله‌ميسن! منده سنين يئرينه اولسايديم ائله ائدرديم !.
ايللر اؤتدي، منده آتا اولدوم. آتام کيمي‌کاسيب بير آتا.
اوشاقلاريما پالتار آلاندا هئچ زامان نئچه سايز بؤيوگون آلماديم، آمما اونلارين خصوصي مارکا يا برند ايسته‌گيني‌ده يئرينه يئتيره بيلمه‌ديم. اودورکي او مارکالارا اوخشار اوجوز قيمتلي بير شئي آلارديم. گئندن باخاندا بعضيلر او پالتارين اصيل مارکايا بدل اولماغين بيلمزديلر. اوشاقلار سئوينردي. منسه کاسيبليقدان بير اوتانسايديم، خالقي آلداتماقا جهد ائتمکدن اون اوتانارديم. آخي بو نه حياتدي، نييه گرک جماعاتي آلداتماقلا اوشاغيني سئوينديره‌سن. !!
اوشاقلاريم عمومن ،اورتانجيل اولاديم ايسه خصوصن اوره‌گي تونوکليکده، دويغوسالليقدا اؤزومه اوخشاييب. اؤزي کيمي‌ده بيردسته سئومه‌لي دوستلاري ايله کاسيبلارا خدمت ائتمکدن لذت آليرلار. ايلده بير ايکي يول عائيله‌لريندن خواهيش ائدللر کي اؤزلرينين ،قونشولارين يا هربير تانيشين کؤهنه پالتارلارين توپلاييب وئرسينلر اونلارا، آپاريب محتاجلارا پايلاسينلار.
منيم اصيل اوتانماغيمدا او چاغلار اولار.آخي قيزيم تاکيد ائدر کي:
پالتارلارين ييرتيغي ياماغي اولماسين. بيز ائله پالتاري احتياجي اولانلارا وئرمکدن چوخ اوتانيريق !!
قاليرام ناچار. نه او قدر کئفي سازيق کي کؤهنه پالتاريمز بير يازيغا وئرمه‌لي اولا، نه ده او بئناوالار قدر محتاجيق کي دئيه‌م : بالا بيزه ده ائله کؤهنه پالتارگيمک ياراشير. ال چک بيزدن لوطفن. کاش بونو دئيه بيلسه‌يديم.!
اگر دئيه بيلسه‌يديم، آردينجا اؤلکه‌ميزه گمي‌گمي‌خاريجدن گلن تاناکورا آدلي پالتارلار حاقدا او قدر دستان قوشارديم تا ثبوت ائليه‌م کي خالقيميزينفاييزي ائيله دونيانين کؤهنه‌لرين گئييللر!! بو فرقيله کي کيمسه اونلارا باغيشلامير. پول وئريب آليللار. اونلاريندا مخصوص تاجيرلري وارکي پوللارينين سايي حسابي يوخدئ. هرچند ائله بو دوغرودي فقط فاييز بير آز شيشيرديلير.
آمما خالقي آلداتماقدان چتين، آدام اؤز بالاسيني آلداتماقدير. من بونا جهد ائتمه‌رم. هئچ دوغروسو آلداناندا دئييللر!!
حيات يولداشيملا برابر کؤهنه پالتارلاري تؤکوب سئچمه‌يه باشلاريق. هردن او چوخ اوزولوب جاندان دوشموش بير پالتاري دا سياهيه قاتماق ايسته‌ينده منيم چپ چپ باخيشيمنان چکينر قايتاريب يئرينه قويار. آخي هله اؤزوموز گئيه بيله‌ريک!! بعضن ده ائله بير قيمتلي پالتاري گؤتوروب قاتار وئرمه‌لي‌لره کي حئيران قالارام.
بيلمه‌رم بياقکي باخيشين عوضين آچير يا دوغرودان باغيشلامالي پالتاردي من باشا دوشمورم.!
قوي مني خسيسين بيري حساب ائله‌مه‌سين دئيه من ده اصلا اعتيراض ائله‌مرم !!
آزدان چوخدان اؤزوموزدن قونوم قونشودان توپلاديقيميزي وئره‌ريک اوشاقلار آپارار.
اوشاقلار او کؤهنه پالتارلاري گؤتوروب گئدنده تشککور ائده‌للر. اوندا هم اوره‌ييم آغرييار، همده حدسيز اوتانارام. !!دئيه‌سن عؤمور بويي اوتانماغا يارانميشام من.!!
منبع :