– يوخ. ائله‌دي. من بيليرم. سئوميرسن. -جميله‌نين آغزيندان کسيک-کسيک چيخان سس پارچالاريني حزين بير اينيلتي بير-بيرينه گوجله ياپيشديردي.

ياتاقدا قورجوخا-قورجوخا قالميشديلار. نفسلري آز قالا بير-بيرينه قاريشيردي. سامير باشا دوشدو کي، صحبت بو دفعه‌‌ ده اوزاناجاق. آمما نسه ده اولسا دئمه‌لييدي:

– من. . . سئويرم -دئدي، آمما بو، اينانديريجي چيخديمي؟!

جميله اونون سسينده‌کي آچيق-آشکار ترددودو قولاق‌آردينا ووردو و آرتيق هجوما باشقا موستويدن کئچدي:

– کيمي؟ -جميله قاندوندوران فاجعه‌‌وي بير پيچيلتي‌ايلا سوروشدو.

– سني. . . اؤزومو. . .

– اؤزونو -هه! مني ايسه. . . سئوميرسن. سئوميرسن. . . سئوميرسن. . . سئوميرسن. . . سئو. . .

سامير دريندن بير »آه« چکدي. سئويملي عومور-گون يولداشيني يئنه ده عادي حقيقته -اونو چوخ، لاپ چوخ، دنيالار قدر سئوديينه اينانديرماق لازيم گله‌جکدي. بو، آرتيق مشقته دؤنوردو. هر دفعه‌‌ يئنيدن، هر دفعه‌‌ يئنيدن! جميله‌نين اؤزو لاپ چوخ عذاب چکيردي، صاباح تئزدن گئجه‌کي صحبت اوچون اوزولوردو، گنج گلينلر کيمي‌اوتانيب قيزاريردي، گؤزونو اوندان قاچيرديقجا قاچيريردي. بس سامير؟ سامير اوزولموردومو؟ سامير ده عيناً اونون قدر اوزولوردو. چيخيش يولو، ائله بيل، يوخ ايدي.

بئله‌ليکله، سامير دريندن بير »آه« چکيب هميشه‌کي دليللريني (اونون عالمينده بو دليللر چوخ اينانديريجي ايدي) صبر و حوصله ايله آرتيق نئچه‌نجي گئجه اورتايا قويماغا باشلادي:

– بيليرسن، منيم بالام، سن و من آخي بير بوتؤوون ايچينده‌ييک. من ايکيميزي بير يئرده سئويرم، سني و اؤزومو، باشا دوشورسن بونو؟!

– باشا دوشمورم. باشا دوشمک ايسته‌ميرم. سن، سنسن، من ده منم. بيز بير-بيريميزين ايچينده دئييليک. باخ، بونو من باشا دوشورم.

– واللاه و بيلاه کي، يوخ. يوخ، يوخ و بير ده يوخ. . . تکجه بيز بير-بيريميزين ايچينده دئييليک. دنيادا نه وارسا،‌هاميسي بير-بيري‌نين ايچينده‌دي. بير بوتؤودو. آنلا بونو نهايت. آنلاسان او زامان ايناناجاقسان، منيم سني سئومه‌مه‌ييم امکانسيزدير.

سامير بونلاري دئييب غفلتاً ايچينده غريبه بير يورغونلوق حس ائله‌دي. اصلينده بو، بير يونگوللوک اولمالييدي، آمما يورغونلوق اولدو. عمللي-باشلي يورغونلوق. اونا گؤره بو يورغونلوق غريبه ايدي کي، آغير بير ايشله مشغول اولماميشدي، يوک داشيماميشدي، ايدمان زاليندا اؤزونه »ال« قاتماميشدي. يورغونلوغون فيزيکي اساسي يوخ ايدي. ساده‌جه، حس ائله‌دي کي، بيردن سوستالدي. بوتون داخلي تاريمسيزليغا بوروندو، عضله‌‌لري بوشالدي. وجودونون ايچينده اعضالاريني آيري-آيريليقدا حس ائله‌دي. حس ائله‌دي کي، اوره‌يي سيخيلماغا باشلادي. نفسي آغيرلاشدي،‌هاواسي چاتمادي.

– اوره‌ييم سيخيلدي. . . -دئييب بو اوزوجو صحبتي بورادا کسمک، نهايت، يوخويا گئتمک ايسته‌دي. صاباح تئزدن دوراسي‌ايدي. »قادين اولماغا نه وار کي. . . ايش آدلي بير آنلاييشلاري يوخدو. ايشلسه‌لر ده، ايشله‌مه‌سه‌لر ده، فرق ائله‌مز، ايش آنلاييشلاري يوخدو. «

سامير ياتاقدا او بيري بؤيرو اوستونه چئوريلدي. اينديجه دوشوندويونو، يعني، قادينلارين ايش آنلاييشلاري‌نين اولماماسي فيکريني ديلينه گتيرمک ايسته‌دي و گتيردي، آمما اونو سؤزلره چئويرمه‌دي، ائله‌جه، او فيکير خفيف تبسومه دؤنوب دوداقلارينا قوندو. دوداقلارينداکي او تبسومله ده يوخويا گئتدي.

جميله آرخاسيني اونا چئويرن ارينه نيفرتله (اما بو نيفرت او قدر بؤيوک ايدي کي، اؤز ايچينه ساده بير سئوگي سئليني ده ييغا بيلميشدي) باخيب او دا هيکّه ايله آرخاسيني ساميره چئويردي. »کيشيلره نه وار کي. هر شئيي زارافاتا چؤندره بيليرلر. آمما داريخما، سامير معلم، بو صحبتيميز بورادا بيتمه‌دي، هئچ بيتمه‌دي. «

سامير يوخو گؤروردو. يوخودا هر شئي بير-بيرينه قاريشميشدي. . . رنگلر، چالارلار. . . اؤزونه‌مخصوصلوقلار لازيمسيز تفروعات کيمي‌ايتيب اريميشدي. گؤيله يئر، داغلا دنيز، آغاجلا چاي، انسانلار -قادينلار، کيشيلر، بالاجا اوشاقلار، کؤرپه‌لر، قوجالار، قاريلار، ائولر، بينالار، يوللار، تارلالار، مئشه‌لر، بولاقلار، ايتلر، پيشيکلر، آتلار، قويونلار، اؤکوزلر جاميشلار. . . هر شئي بير-بيري‌نين ايچينده ايدي، هر شئي سانکي بيرنفسه دئييلميش محتشم بير سؤزه چئوريلميشدي. بو سؤز اولدن وار ايدي، اولين ده اولينده وار ايدي، ساده‌جه، اونو گؤرمک، دويماق، هنيرتيسيني، ائشيتمک‌هامي‌يا هر زامان قسمت اولموردو. او سؤز آنلاشيلمازدان تدريجاً آنلاشيلانا چئوريلن موسيقي کيمي‌دوغولوردو. او وار ايدي، اونو هئچ کيم ائشيتميردي.

سامير غريبلي يوخونو حيات کيمي‌ياشاييردي. اونون ايندييه قدر گؤزلري سانکي قاپالي ايدي، ايندي-ايندي گؤرمه‌يه باشلاميشدي و گؤردوکلريني اؤزوندن باشقا دا کيمسه گؤسترمک ايسته‌ييردي. »باخ، دقتله باخ، بودور سنه دئمک ايسته‌ديکلريم، گؤرورسن او بوتؤو يوخ دئييل، وار. سن بونو گؤرورسن؟ بس دئييردين سئوميرم سني؟! ايندي ايناندين؟!«

يوخودا گؤردوکلري اول گؤردوکلريندن چوخ فرقلي ايدي. اما فرق نده ايدي -بونو درک ائده بيلميردي. بونو سؤزه گتيرمک، سؤيله‌مک آسان دئييلدي. بلکه هئچ ممکن دئييلدي.‌هارداسا بئيني‌نين درينليينده او حس ائديردي کي، ايندي گؤردوکلري‌نين رنگي يوخدور. رنگ آنجاق بيردن چوخ اولان ندسه موجود اولا بيلر. ايکينجي اولماسا رنگلر مختلفلشمز، باشقا اولان نَيينسه اوستونو اؤرته بيلمز. يوخودا دا ايکينجي يوخ ايدي، هر شئي بيرين، واحدين ايچينده ايدي. ايکينجيسيز دنيا وارميش. وارميش. اولمايا بيلمزدي. اما بونا اينانانلار يوخدو.

جميله ده يوخو گؤروردو. او، يوخوسوندا گؤروردو کي، عؤمور-گون يولداشي سامير فضادا فيرلانا-فيرلانا اوندان اوزاقلاشير، ايکيلشير، حتي اوچلشير، دؤردلشير. . . »بو قدر سامير منيم نَييمه گرکدير؟! منه بيري بسدير. بونلارين آخي بيري منيم ساميريمدير، او بيريلر منيمکي دئييل.‌هانسيدي او؟!‌هانسيدي منيم ساميريم؟! مني سئون، مني دنيالار قدر سئون ساميريم‌هانسيدير؟« بو سواللارين آراسيندا جميله عمللي-باشلي چاشيب قالميشدي.

يوخولار ائله اونا گؤره يوخودور کي، سحريسي گون اونودولماغا محکومدولار. گئجه گلدي و يئنه ده همن »سئويرم-سئوميرم« صحبتي ياتاقدا باشلاماديمي، باشلادي.

اوجسوز-بوجاقسيز فضادا ايسه بير-بيري‌نين ايچينده ان مختلف ماهيتلر اوچور، بيرلشير، آيريلير، يئنه بيرلشير، بير محتشم واحد عمله گتيريرديلر. البته‌‌ کي، ساميرلرين‌هاميسي بو اوچان واحدين ايچينده ايديلر. بيريندن باشقا. بو سامير اؤز ائوينين مطبخينده اوتوروب سحر يئمه‌ييني يئييردي و جميله‌نين دمله‌ديي چايي گؤزله‌يه-گؤزله‌يه گئجه گؤردويو يوخوني جدي-جهدله يادينا سالماغا چاليشيردي.