آذربايجان حئكايه سي بولگه لر سرويسي:آشاغييا ائنديکجه يونگولشيردي، بلکه ده هاوا کاپسولونون گئتـ گتده هاواسي آزاليردي. اؤيرديجي اللريني اونون کورهيينه قويوب، آستاـ آستا آشاغييا ساري يؤنلديردي. گاهدان دا باش بارماغي‌ايله، اشاره بارماغينين اوجلاريني بيرـ بيرينه ياپيشديريب اونون گؤزونون اؤنونه توتوردو، اودا هر نه ياخشيدير دئيه، همن ايشي گؤروب اونا جاواب وئريردي. آخي دئميشديلر آشاغييا ائنديکجه گؤودن آغيرلاشاجاق؟ شاشقين حالدايدي. بلکه ده يونگولشمم مرجانلارين ايشي؟ اؤزـ اؤزونه دوشوندو. قورخو دولدو جانينا. اولمايا منفيليک، کيفيرليييمي بوتؤولوکله اؤزونه آليب، مني ده دومـ دورو ائيله‌سين؟ اوندا ياني ائشييه چيخماقدا، سودا هر نه گؤرونن کيمي، ايچريمده‌کيلرين هاميسيني هامي گؤره‌جک مي؟ واي ده ده! اوندا هئچ نه‌يي گيزلده بيلمزدي. هله نه ياخشي اري ده گلميشدي! بير آز اورکلندي. يئنه هنده‌ورينه باخدي. باليقلاري گؤردوکده داها دا اوره‌يي ساکينلشدي. اونلارين ايچي گؤرسنميردي. هاميسي يولـ يولايدي. بلکه ده بيردن يولـ يول اولسون. اوندا زولاق پوران چاغيرارديلار اونو. جانينا اوشوتمه گلدي. هله نه ياخشي سو ايستيايدي.هر نه‌دن چتين آغزينداکي هاوا وئريبـ آلان دستگاه‌ايدي. دستگاه دا دئينده آغيز آغريييردي، الينين ياريسينا قدر اولاردي. ديشلرايله ساخلاماليدي اونو. سووا گيرمه‌دن اؤنجه بير آز ايشلتمه‌ييني اؤيرنميشدي. اوندا هئچ فيکيرلشمه‌ميشدي نئچه نفر بوندان اول اونو آغيزلارينا قويوب نفس آليب وئرميشديلر. بير آز چيمچشدي. سويون اوستونه چيخماخدا اونو آغزيندان چيخارتدي. اؤزونه گلمه‌ميش اؤيرديجي بيلمه‌دن اونو اوزو آشاغييا چئويريب تزه‌دن درينلييه آپارماق ايسته‌دي. چؤننده سو قومپاسيله دولدو آغزينا. شور سو بوغازيني آجيشديردي. يوبانمادان اييرندييي دستگاهي تزه‌دن آغزينا قويوب نفس آليب وئرمه‌يه باشلادي.زولاق باليقلاري گؤرنده، هم سئوينميشدي هم ده دؤيونموشدو. تکجه دومويو زولاق شوشه‌دن ائشييه باخماقايدي، هردن بير ده قاپيدان نئچه آتديم او اله گئديب اوغلونو گؤرمک. چوخ وعده يولـ يول گئينديررديلر، آخي چوخ ياراشاردي، ائله تزه‌ليکده ده بير يولـ يول کؤينک آلميشدي. اوغلونا ساري يؤنلدي. تئز يئتيشسين دئيه ال آياق چالدي. اؤيردن ال ترپتمکله، اونون اليندن ياپيشماقلا اونو ساکينلشديريب اشاره بارماغيني بير يانا توتدو، او همن طرفه باخدي. او قدر خيردا باليغي بير يئرده گؤرمه‌يينه اينانا بيلميردي.دوزلو سو بوغازيني يئنه يانديريردي. نفس چکمه‌يي چتين اولموشدو. اليني دوز ساخلاييب او ال بو اله ترپتدي، کيمسه گؤرمه‌دي. هر طرفده اليني ترپتسه‌ده هئچ جاواب آلمادي. بالا ـ بالا اؤلومونو گؤزونون قاباغيندا گؤروردو، بيردن بيريني گؤروب ياپيشيب اؤزونه ساري چکدي. او باخديقدا اليني يئنه همن جور ترپديب، باش بارماغيلا اوستو گؤرستدي. بير آزدان سويون اوزونده‌يدي.آغزيندا کي دستگاهي چيخاريب، آرا قيرمادان نفس آليب وئردي. سويون اوزونده اوزانيب گؤزلرين گؤيون ماوي درينلييينه تيکدي. اولمايا اوردا دا هاوا آليب وئرمه دستگاهي لازم اولسون؟!
بولگه لر سرويسي:آشاغييا ائنديکجه يونگولشيردي، بلکه ده هاوا کاپسولونون گئتـ گتده هاواسي آزاليردي.