هؤرومچک کيشي
هؤرومچک کيشي
1401/02/25
بولگه لر سرويسي: - آتا، من اوچون يئللنجک آسيرسان؟
سحر خياوي
بولگه لر سرويسي: - آتا، من اوچون يئللنجک آسيرسان؟
کيشي سکسه‌نيب، لاپبادان ايکينجي قات اجاره ائولرينين ايوانينا باخدي. اؤزونو ايتيردي. اللري اسيب، بير يوماق ايپ اليندن دوشدو. باخيشيني بير آن آلتي ياشلي قيزيندان قاچيريب، قابارلي الي‌نين دالي ايله گؤزلرينده گيله‌لنميش ياشي سيلدي. قَهَر بوغازيني کَسيردي. بير شکيل اؤزونو توپارلاييب يئني‌دن يوخاري باخدي:
– ه….هه، سنه يئللنجک آسيرديم بانو چيچه‌ييم! نه تئز يوخودان اويانميسان بير ده‌نم؟!
قيزين ساريشين، يومشاجيق ساچلاري سحر يئلينده، آغ اوزونده اويناقلاييردي. ماوي گؤزلري گؤيو، گؤزلرينده کي قيغيلجيملار ايسه اولدوزلاري ياريشا چاغيريردي. اوشاق بير پارچا ياشام ايدي.
کيشي سانکي بيرينجي دفعه گؤره‌ن کيمي قيزين اوزونه دونوخموشدو. او نه‌دن ايندييه کيمي تانريدان بخش اولان بو گؤزل- گؤيچک، ساغلام وارليغي گؤرمه‌ميشدي؟! يوخسا اوندان اعتناسيز کئچميشدي؟!
دوغرو کي، او ياشامين سَرت اوزوندن بئزميشدي؛ چير- چينقيللاردا يئريمک آياقلاريني يارالاييب، اونو طاقتدن سالميشدي. ايشسيزليک، پولسوزلوق، ائو صاحيبي‌نين شماتتلي سؤزلري، آرواد- اوشاق شرمنده‌ليگي …..! بير جيليز گؤوده‌ده داها نه قده‌ر طاقت اولار کي؟!
نه واخت ايدي سينيرلاري پوزولموشدو. گئجه‌لر فيکيردن، غصه‌دن ياتا بيلميردي. پولسوزلوقدان عصب دوختورونا دا گئده بيلميردي. چوخ فيکيرلشيب اؤزونو خلاص ائتمک ايسته‌ييردي. بونا گؤره ده ايپ حاضيرليغي گؤرموشدو. بو گون عائيله‌سي آييلماميشدان قاباق اؤزونو گيلانار آغاجيندان آساجاقدي؛ بير کره‌ليک ياشامين همي- غمين‌دن قورتاراجاقدي؛ آمما قيزي‌نين گؤرونوشو اَل- قولونو سوستالتميشدي.
– من آخماق هئچ مندن سونرا عائله‌مين باشينا نه گله‌جه‌يينه فيکيرلشمه‌ميشم؟! بو کؤرپه مندن سونرا نئجه اولاجاقمي؟!
او يازيق قاديني مگر سئوگي دولو اوره‌کله کنددن قاچيرماديم مي؟! اونو خوشبخت ائتمه‌يه سؤز وئرمه‌ديم مي؟! کيشي ده بو قدر آلاخ- بولاخ، ايراده‌سيز اولار؟! من هله گنجم، قوللاريمين شير کيمي گوجو وار. شوکورلر اولسون، عائله‌مين چوره‌ييني داشدان بئله چيخارا بيله‌رم.
اؤزونده يئني بير گوج حيس ائديب، قيزينا يئللنجک آسدي. سونرا ايسه اونلا باش- باشا قويسون دئيه، بئلينده کي قالين کئش قاييشي آچدي. او قاييشي، آغير داش‌لار، کرپيج‌لر، يوک‌لر بئليني سَرپمه‌سين دئيه، ايش واختي بئلينه باغلاييردي.
کئش قاييشي دا او بيري آغاجا دويونله‌ييب، ايکي اللي ياپيشيب، قيزينا ساري هوووو…. هووووو دئيه يئللندي.
قيز دؤرد گؤز آتاسي‌نين اويونبازليغينا حئيرتله باخيردي. بالاجا اللريني آغزينا توتوب، نارين- نارين گولوردو. دهليزين قاپيسيني آچيب: -»آنا…. آنا…. گَل باخ، آتام »هورومچک کيشي« اولوب…. آتام»هورومچک کيشي«اولوب…«چيغيريردي. کيشي يئلله‌نرکن اوره‌کله‌نيب: – »آتان کيچيجيک گولوشلرينه قوربان چيچه‌ييم!«دئييردي. بلکه ياريم ساعات دلي‌بازليغي داوام ائتدي. اؤزونو ده گولمک توتموشدو.
سونرا آشاغي ائندي:
– من تزه چؤره‌ک آلماغا گئديرم. آنانا دئه سماوري يانديرسين. قالانينا دا آللاه کريم‌دير.
اليني آغزينا آپاريب قيزينا ساري شيپ- شيرين بير اؤپوجوک گؤندردي.
قيز آتاسي‌نين »آللاه نئجه کريم‌دير« دئديگيني دوشونمه‌دي، آمما کيچيک آدديملارلا، سئوينجک، آناسيني اوياتماق اوچون ائوه ساري قاچدي…
يول اوزونو گؤزونده دونيا سانکي تزه‌لنميشدي. قارانليق اوره‌ييندن کؤچوب اومود گونشي کؤکسونده پارلاييردي. داغي داغ اوستونه قويماغا قادير اولدوغونو سانيردي.
ايندي ده هردن او سحرده کي آخماق‌يانا تصميمي يادينا دوشنده، اؤزونو دانلايير، هم ده دليجه اويونبازليغيني خاطيرلايارکن گولومسه‌يير. او دوشونوب: حيات بير صاف يول دئييل، چالا- چوخورو، ائنيش- يوخوشو دانيلمازدير، آمما ياشام او قده‌ر گوزلدير کي، ياشاماغا و ياشاتماغا ده‌ير. بيزلر يارانميشيق‌سا، هر نمنه‌نين رغمينه، تانري، آناطبيعت بيزيم وارليغيميزي ايسته‌ييب، بو وارليغي زده‌لمک بؤيوک سوچ‌دور. هر موشکوله اؤلومدن باشقا چاره وار. يالنيز اؤلوم چاره‌سيزدير.
منبع :