ايچ ـ ايچه تزه تزه دونيالاردا دولانماقدان يورولمازدي. ايندي هردن فيکيرله‌شير، هردن بيرده داريخير. آستا ايشله‌ينده ايسته‌يير چيخسين ائشييه. تزه دونيالاري دولانماق مه‌يه‌ر بوندان سورعتلي اولا بيلر مي؟ اؤزـ اؤزونه دئيير. داها بونا کؤهنه‌ليردي اونلاردا. بير آز دؤزور، داها حؤوصله‌سي چکمير. تاققا ـ تاق گئتدييي يوللاري قاييدير. چوخ کئچمز بير تاق‌ايله اؤزوم ده او يئرلره گئديب گزه بيلرم، دئييب، کؤکس اؤتوردو. مجازي دونياسيندان ائشييه چيخيب ـ چيخماميش گئرچک دونياسي‌ايله اوزـ اوزه گلير. نئچه ياريمچيق ايش ده‌يير گؤزونه،  ايکي دونياسيني‌دا قاتيب قاريشديريب، ايش ايچينده ايش گؤرور، سيلان ذهني بس ده‌ييردي، سيلان ايش ـ گوج ده بير ياندان تاپيلميشدي. بير ايشي قورتارماميش او بيري ايشي باشلامازدي، ايندي‌لر حؤوصله‌سي توتمور، يا ياديندان چيخير، بيلمير؛ بلکه ده ايکي دونياني ياريمچيق گزمه‌سينه گؤره‌ هر نه‌يي ياريمچيق قويوردو.

اوره‌يي تزه‌دن توتولور، هنده‌ورينده هر نه وار دا، يوخ دا،‌هامي‌واردي دا، يوخدي دا. تزه‌ليک ده نه اورا گئده بيلير، نه بوردا قالا بيلير. بلکه ده اوچونجو دونيا گليب ايکيسيني بيرلشديره بيلئيدي. بس‌هامي‌نئجه ايکي دونياسيني دا راحاتچيليق‌لا دولانديريردي؟ نه جور ائيله‌يه بيلردي؟ سؤزلر، شکيل‌لر، آدام‌لار، هر زاد مجازي دونيادا بير جور گؤرسنيردي، گئرچک دونيادا بير آيري جور، هره‌سي فرقلي دوروم‌دايدي، گاهدان دا بيربيرينين ترسينه، کيمسه‌ني‌هانسي دونياسيله دوشونمه‌ليدي، بيلميردي داها. مه‌يه‌ر اؤزونو بيليردي؟

بلکه ده مجازي دونيا ايچرسي‌ايدي، گئرچک دونيا ائشيکي، يا دا عکسينه؟ بيلميردي. ذهن ده کي بوجور بير زادلاري آييرد ائيله‌يه بيلمزايدي. هر حالدا بير جور، ايکي جورلوق داريخديرير بونو. وايبرين جورولتوسونو داريخماسينين ايچيندن ائشيدير. سؤز دانيشماغا چاغيريرلار. بترده سؤز دانيشانيدي. 

او گون بير يئرده ايسته‌ديلر دانيشسين، يئکه سؤزلردن باشلادي، ايکي کلمه دئدي، داليسين گتيرنمه‌دي. بلکه ده وايبرده اولسون. اوندا يازاردي سؤز يازماغا گؤزله‌ييريک. ائله بيل دونن‌ايدي، مکتبين بيرينجي گونونده آناسي اونون توکلريني دم اسب ائله‌ميشدي؛ بتر اوتانيرميش، دئييرميش بس لوت دي! بوتوو يولو بويون ـ بوغازيني اللري‌ايله اؤرتموشدو. صينيف‌ده ده معلمين نه‌لر دئديييني بيلمه‌ميشدي. بير اللري اولموشدو، بيرده بويون ـ بوغازي. دئکولته گلين دونونو نه جور گييه‌جاغ‌ايدي؟ لاپ آزي اون ـ اون بئش دانا ال ايسته‌ييردي بويون ـ بوغازيني، سينه ـ باجاسيني اؤرتماغا. گولومسه‌دي، ايکي نسيل کئچير او گوندن آي کيو، ايندي بير تاق‌ايله هر نه ده‌ييشيلير، اؤز اؤزونه دوشوندو.

مجازي دونيادا دا هر ايشين گؤره بيليردي، دانيشيق، گؤروش، دوستلوق، آل ـ وئر، يازي ـ پوزو، … داها قوهوم قارداشيني دا چوخ اوردا گؤروردو. يئنه حؤوصله‌دن چيخدي. بير تاق‌ايله مجازي دونياسينا قاييتدي. بلکه ده سؤز دانيشما اوردا اولدو. دوغرودان دا بيلمه‌دي سؤز دانيشما‌هانسي دونيادا اولاجاق؟ هر يئرده اولسادا، ايسته‌ييردي بيلسين، يالنيز سؤزلر ائشيديله‌جک يوخسا سسلرده؟ ائله سؤز دئيير کي، دانيشيق‌دا مه‌يه‌ر سس‌لر ائشيديلميشدي، قالا يازماق‌دا؟گؤره‌سن تکجه لايک يييه‌جک يا کامنت ده قويولاجاق؟ بو کي سؤز دانيشاني، يازاني ده‌ييردي، اؤزونو آف‌لاين گؤستريب، ساکيت‌جه‌سينه سؤزلره باخاجاغيدي.