علي قهرمان قاشلاريني ييغدي: »قادام او سالامين جاوابينا گلسين، بير راديوموز اولسايدي…« ميرزه باغير چيلتيک چالا-چالا زيندانين حيطينه چيخيب، سو شيرلرينين قيراغيندا دايانيب، کئشيک‌لرين ده‌ييشيلمه‌سيني گؤزله‌دي. ميرزه باغير سياست عرصه‌سينين‌هانسي سمته مئيل گؤسترديييني پاسيبان‌لارين سالام آليش- وئريشي ايله اؤلچردي. ميرزه باغيرا گؤره پاسيبان‌لار اونون سالاميني اوجادان آلان گون‌لر سياست عرصه‌سي شرق قدرتينه ساري، سلام جوابي ائشيتمک يئرينه يامان يوُووز ائشيدن گونلر ايسه، سياست عرصه‌سي غرب قدرتينه مئيل گؤستررميش. ميرزه باغير أل- اوز يوماميش، گؤزونو قاپي‌يا زيلله‌ميش، کئشيک پاسيبانيني گودوردو. ائله او آن قاپي آچيليب، پاسيبان باديمجاني زيندانين حيطينه گيردي. هله هئش زاد اولماميش، پاسيبانين اوز- گؤزوندن قضب ياغيردي. پاسيبان قضب‌لي باخيشيني اونا تيکنده، ايشين ياش اولدوغونو باشا دوشدو. پاسيبانين گؤزوندن ايتيلمه‌لييدي. اؤزونو گؤرمه‌مزلييه ويريب، سلام وئرمه‌ميش، حيطده يئري‌ين زينداني‌لارين آراسينا سوزولوب، يئريمه‌يه باشلادي. آمما پاسيبان ‌اونو قره‌له‌ميشدي. آجيقلي باخيش ايله اونو دولانديريردي. پاسيبانين سرت باخيشي ميرزه‌نين کوره‌ييني ده‌ليردي دييه‌سن. اونون باخيشيندان قاچماق اوچون تووا دوشدو، يئريمک يئرينه حيطده قاچماغا باشلادي. بير ايکي دؤروه قاچماميشدي کي قيچي بورخولدو. أييلدي قيچيني اووشدورسون، قضادان ائله او آن بير طيّاره زيندان حيطي‌نين اوستوندن اووولتويلا اوچدو. پاسيبان زينداني‌لاري قيراغا ايته‌له‌ييب، قفيلدن ميرزه باغيري سيلله- تپيک آلتيندا سالادي. »کؤپک‌اوغلو وطن‌سيز، اوروس نؤکري، خائين دئمقرات ، دئيرسن بَه گؤزوم کوردي؟ گؤرومورم؟ ايشين اورا چاتيب کي يئردن داش گؤتوروسن، آرتش‌ين طيّاره‌سيني داشا باغليياسان؟« ميرزه باشا دوشدو کي يالتاقلار راپورتوتو پاسيبان باديمجاني‌يه وئريبلر. گون يوخ ايدي نومايش‌لرينده پاسيبانلاري يانسيلاييب، زينداني‌لاري گولدورمه‌سين. آمما ايسته‌ميردي ايش اوزانسين، أل- اوزونو يوماق ماهاناسي ايله دينمز- دانيشماز سو شيرلرينه ساري گئتدي. زيندانين سو شيرلري هئچ زاما باغلانمازدي، بولاق سويو کيمي‌گئجه- گوندوز چالاسره آخاردي؛ ميرزه أليني سويا اوزالتماميشدي کي، يئنه پاسيبان تپيک‌لريني اونون جانينا دؤشه‌دي. »قانماز گئده، بولموسن شيري ائله آشمازلار؟!« ميرزه باغير هئچ زاد اولماميش کيمي‌سوروشدو: »سرکار آژدان، سيز بويورون بو آچيق شيرلري نئجه آچارلار، من ده ائله‌سي آچيم داااا« »ائشک اوغلو ائشک، ايشين اورا چاتيب کي دؤولت مأموروننان حساب سوروشوسان!؟« پاسيبانين أل چکن گونو يوخ ايدي. گؤرونوشه گؤره بويون جين آتينا مينميش، يئنمک قصدي ده يوخ ايدي. ميرزه باغير اؤزلويونده دوشوندو: »من قاراقاباخلي قابانلاري گؤلدورورم، بو آژداني جين آتيندان يئنديرمه‌يه نه وار کي!« قفيلدن چيلتيک چاليب، پاسيبانين قاباغيندا بئليني بورجودا بورجودا اوخودو: »آژدان آژدان آژدان! …سن منه دئيرسن يامان- من سنه دئيرم مامان!… سن منه دئيرسن يامان- من سنه دئيرم مامان!« پاسيبان باديمجاني‌نين نريليتيسينه ايچريده‌کي زينداني‌لار حيطه تؤکولدولر. »قيرجانما گئده… قيرجانما قيريشمال!…قيرجانما دئمقرات تؤره‌مه‌سي!« زينداني‌لار اورتايا گيريب، ميرزه باغيري پاسيبانين تپيک‌لرينين آلتيندان قورتارديلار. قاسيم‌آقا قازاق قاش- گؤزو ايله ميرزه باغيرا گؤزدن ايتيلمه‌ييني اشاره ائتدي. ميرزه اطرافا گؤز دولانديريب، قورتولوش يولو آختاردي. گؤزو موستراحا ساتاشاندا، قورتولوش يولونو تاپديغينا گؤره سئوينجک موستراحلارين بيرينه تپيليب، قاپيني باغلادي. آمما پاسيبانين أل چکن گونو يوخ ايدي، قضب ايله موستراحا ساري گئديب، قاپيني تپيک آلتينا سالدي. »بئيار کؤپک‌اوغلو، بئقئيرت دئمقرات، بولموسن موستراحدا ائله‌سي اوتومازلار؟« ميرزه باغير قاپيني ياريمچيليق آچيب، دئدي: »سرکار آژدان، سيز بويورون نئچه اوتورماغي منه گؤرسه‌دين من ده سيز بويروردوغوز کيمي‌اوتوروم.« پاسيبان قاپييا هجوم گتيرنده ميرزه باغير در حال قاپيني باغلادي. پاسيبانين حيرصي هله ده سويوماميشدي، يئنه قاپيني تپيک‌لرکن دئدي: »گئده کؤپک‌اوغلو ائله‌سي اوتورماغين بس دئييل، بو سس‌لر ندي چيخارديسان؟« ميرزه باغير ياشاييشينين هر آنيندا تياتر صحنه‌سينده اولدوغونو حيس ائديردي، پاسيبانين قره قورخو گلمه‌سيندن اوزونه توز قوندورمادي، يئنه قاپيني ياريمچيلق آچيب دئدي: »سرکار آژدان، مه‌ير خبريز يوخدو شاهنشاهين آرتشي دئمقراتلاري خلع سيلاح ائله‌ينده توفح‌لريني سويدولار، توپخانالاريني آلماديلار!…« زينداني‌لارين گولمک سسي گؤيه قالخدي. پاسيبان باديمجاني وار گوجويله قاپييا بير تپيک ياتيرديب، زندانيلاري يامانلايا يامانلايا اوزاقلاشيب، ميرزه‌نين تياتر صحنه‌سيندن ائشييه چيخدي. ميرزه باغير مستراح قاپيسيني آچيب، اوغرو پيشيک کيمي‌ساغ- سولونا باخاندان سونرا ائشييه چيخيب، قاسيم‌آقا قازاغا دئدي: »آتمسفر گؤيلووه دوشموشدو، بويور بو دا بويونون آتمسفري، ايندي سن دئنه گؤروم، بويون گونش شرقدن چيخيب، يوخسا قربدن؟«