دَرين ليك لر
دَرين ليك لر
1397/04/17
بولگه لرسرويسي: بيرينجي دفعه كي تصميم توتدو اينتَحار ائده، قيرخ نئچه ايل بوندان اؤنجه ايدي. سونرادا باشي ائله قاريشدي كي داها هئچواخت اينتحارا فيكيرلشمه دي. او چاغلار اينتحاري نين سببي هر نه اولدوسا، بير شئي اونو حياتا باغلادي.
او دا قوشباز اولدوغو ايدي. اونسوز قوشلاري ديدرگين قاليب، هره سي بير يانا داغيلاجاق ايدي. اوره ييندن گلمه دي اونلاري اؤز سايه سيندن محروم ائده. آما بو دفعه دوروم فرق ائديردي و قوشبازليقيي ترکيتميشدي. ياخشي كي فيكيرله شيردي داها هئچ بيرسايه سي قالماميشدي كي بيري نين باشينا كؤلگه سالسين.
آيليق بير معاشي وار ايدي كي او اولايدي يا اولمايايدي عائيله سينه يئتيره جك ايدي و اولماماسي نين ياخشي ليقي او ايدي كي بير چؤره ك يئيه ن عائيله دن آزاليردي.
يئني دن اينتحار ائتمه سبب لري ده چوخ ايدي.
اؤنجه ايسته ميردي بوندان دا آرتيق قوجالا، سونرا بو كي آرزولاري نين هئچ بيرينه كي پول لا اونلارا يئتيرمك اولايدي يئتيرمه ميشدي.
بير ده بو كي دونيا قاتيشميشدي و هر ياندان اؤلوم خبري ايدي كي گليردي و قان تؤكمك اينسانلارين عادتي اولموشدور.
بير سيرا آداملار بو دوشونجه ده ايدلر كي بير اينتحار جيليققاسي باغلاييب اونو پاتلاتماقلا كوچه بازارداكي جماعتي قانا بله ييب جنّتين اورتاسيندا اونا يئر وئره جكلر و دونيانين هر يئريندن بولبول لرين چح چح سسي قولاغا چاتاجاقدير. بو نودا اونوتماماق كي اونون اينتحار قراري بير تَهَرلر، اؤنجه كي اينتحاري نين سبب لرينه باغلي ايدي. اودا ” شهلا “يا اولان سئوگيسي ايدي .
او واختلار اون يئددي ياشي وارايدي و بيرگون خبري اولدي كي شهلا اَره گئديببدي و او دا دلي ساساق باشيني قاپ – باجايا چيرپيپ آز قاليردي هئچ – هئچي نن اؤزونو اؤلدوره كي بيرده – بيرده قوشلاريندان بيري چيگنينه قوناركن اونلارين فيكرينه دالدي.
اونسوز كيمسه قوشلارا صاحاب چيخيب دن – سو وئرمه يه جك ايدي و دوشوندو كي اينتحاري سونرايا بوراخيب بير يول تاپا كي هم قوشلار راحاتلييالار، ه مده آسان بير اؤلوم سئچه كي چوخ عذاب چكمه يه. تا كي ياشاييشين آخاري و اونون چتين ليك لري و لذت لري، اينتحار ائتمه دوشونجه سيني بوسبوتون ياديندان چيخارتدي .
دوزدور كي ياشلانميشدي آما هئچ زامان گوناهلار باتلاغينا دوشمه ميشدي.
كيتاب اهلي ايدي آما حساب اهلي دئييلدي و جيب لري نين چينه داني هممه شه بوش ايدي و بو بابت دن ده اذيت چكيردي.
آما يئني دن اوندا قورلانان ايننحار قيغيلجيم لاري يئنه شهلانان باشلاميشدي.
شهلاني كي ايندي اورتا ياشلي بير دول قادين ايدي يئنه سئويردي و اوزاقدان – اوزاغا اوندان خبر توتوردي. ائشيتميشدي كي بير نفر شهلايا ائلچي دوروب، او دا بلي دئميشدي.
بو دا كي عيالوار ايدي و آز قالا نوه لري ائوله نيرديلر. بير ايش اَليندن گلميردي و شهلا يئنه يابانجي لار اَلينه دوشوردي.
اودور كي فلسفي فيكيرلره دالدي و باشارديقجا اينزي وايا جومدو. آما تا ايستيردي بير دينج يئر تاپيپ راحاتلايا آروادي نين باش – قولاغي تاپليپ اونو كوببالاركن جومدوغو دونيادان آييريردي.
بو سفر آما ايش جيددي ايدي و ايستيردي بير تَهَر ياخاسيني قورتارا.
اينتحار اوچون گئتدي بير هوتئلين حوووضونا و لاپ درين ليك لري سئچيب بو فيكري نن كي اؤلولر قوجالمازلار، اؤزونو آتدي سويا.
اوزمك باشارماديقي اوچون آز قاليردي بوغولا كي او بو بيله سيني نجات وئرديلر و گئجه ني اوتوردو باشدان گئچن لري كاغاذ اوستونه گتيره كي آروداي يئتيريب يامان – يوغوز دئيه ركن دفتر قلمي ني باشينا چيرپدي.
نييه كي چيراغين ايشيغي اونون يوخوسونو قاتيب آييلديردي. او دا بير سؤزه باخيم اوشاق كيمي، دينمه دن باشيني آشاغي ساليب گيردي ياتاغينا و صوبحه جان بو فيكيرده ايدي كي كاش بير اينتحار جليققاسي گئييب گئده ردي اوجا بير داغين باشينا و بير وولقان كيمي پاتلاييب آلوولاناردي .
منبع :