بولگه لر سرويسي:حيات يولداشي بير فنجان چاي گتيريب قهوه رنگلي راش آغاجيندان دوزَلميش دؤرد کيشيليک ماسانين اوستونه قويدو. راميز عادتن حامامدان چيخاندان سونرا بو پنجره قارشيسيندا اولان ماسانين آرخاسيندا اوتوروب بير فنجان چاي ايچيب قزئت اوخوياردي. باهاردا کئفينين ساز واختيندا گليب راميزين يانيندا اوتوروب کامفا توخوياراق اونونلا کئچميش گونلردن دانيشاردي؛ آنجاق بو سون واختلار نه ?? ياشينا آياق باسميش راميز قزئت اوخويوردو، نه ده کي باهارين کامفا توخوماق يادينا دوشوردو. حامامين قاپيسي آچيلدي. راميز بوغلارين آراسيندان چيخاراق باهار توخويان کامفاسيني گئييب دستماليني باشينا آتيب پنجره‌نين قارشيسينا گليب ساچلاريني قورولاياراق، بير آز ائشيگه باخدي؛ سونرا اوزونو باهارا چئويردي: – گؤره‌سن بو لعنته گلميش قار نه واخت قورتاراجاق؟ دؤرد گوندور بير باشا ياغير. اوره‌گيميز پارتلادي بو دووارلارين آراسيندا. سونرا ماسايا ساري دؤنوب يوموشاق سسله تکجه اؤزو ائشيده بيلن کيمي: بو کوله‌گين ده لاپ جيني توتوب، اؤزونو اورا ـ بورا چيرپير. زحلم گئتميش بو قيش بيته‌سي دئييل سانکي! باهار مطبخدن سسلندي:– آ کيشي، قاردا قورتاراجاق! اؤزو بيلن ياخشيدي. نه ايشينه‌دي؟ چاييني سويوتما!راميز ماسانين آرخاسيندا اوتوروب چاييني ايچه‌رک باخيشلاريني پنجره‌نين او تايينا ساليب اؤزلريني يئره توللايان قار دنه‌لريني گؤزدن کئچيرتدي. کوچه‌ده خيياواندا بير نفر تاپيلميردي. سکي¹ ده کي آغاجلارين اوستونه بير آزدا ياغيرسا کسينليکله بئش آلتيسي سيناجاق دئيه دوشونوردو. بيردن بيره يئنه او دهشت دولو قارلي گئجه يادينا دوشدو. ال آياغي تيتره‌مه‌گه باشلادي. بو آندا يئنه باهار سسلندي: – راميز سنه تورشولو آش بيشيريرم؛ بو هاوادا لاپ ياپيشاجاق.– هه باهار ياپيشاجاق،(بير داها لاپ ياواشجاسينا) ياپيشاجاق.– بير ماهني آچسانا راميز! اوره‌گيم سيخيلدي. سن ده کي بو نئچه گونده هئچ دانيشيب گولمورسن. بو قار ياغماسايدي اوشاقلارا زنگ آچارديم گلرديلر، داريخمادان چيخارديق. اوشاق دئديکده راميزين اوره‌گينده بير آتوم بومباسي پارتلادي؛ سانکي پنجره‌دن آسيلميش ايسلاق گؤزلريندن ايکي داملا ياش ياناقلارينا سوزدو، آما باهار گؤرمه‌سين دئيه تئز ياناقلاريني سيليب: -هه باهار، دؤز بير ماهني آچيم سن اوچون قاداسي!- دئييب جئب تئلفونوندان بير ماهني آچدي. “قار ياغير نارين،نارين اوزو گولور داغلارين…” سونرا سيقار قوتوسوندان بير گيله سيقار چيخاريب ماسا اوزه‌رينده کي چاخماغي‌ايلا آليشديريب يئنه‌ده پنجره‌يه زيللندي… گئجه ياريني کئچميشدي بيردن ـ بيره فاجعه باشلاندي. توپ تفنگ سسي قورخولو شوون سسينه قاريشدي. هامي يوخودان ديک آتيلدي. آتاسي اليني آتيب دوواردان آسيلميش کلاشينکفونو گؤتوردو. آناسي دا راميزله ـ لاله‌ني باغرينا باسدي. ايسماييل پنجره‌دن ائشيگه باخدي. تانک‌لار قارشيلاريندا اولان هر بير شئيي ازيب کئچيرديلر. آردينجا عسگرلر ائولره گيريب قارشيلارينا چيخان هر بير جانليني گولـله‌يه باغلاييرديلار. فاطمايا ساري دؤنوب: – اوشاقلاري گؤتور کنددن ائشيگه چيخ، يوخسا هاميميز بورادا هلاک اولاريق! – دئيه دال قاپيني گؤستردي. – بس سن؟– کيشيليکدن اوزاقدير بو حئيوانلارين قارشيسيندان قاچماق. منيم فيکريمده اولما، اوشاقلاري گؤتور کنددن چيخ! – (فاطما آغلاياراق)اؤزوندن موغايات اول! – گئدين،گئدين!فاطما لاله‌ني قوجاغينا آليب راميزين ده اليندن ياپيشيب دال قاپيدان ائشيگه چيخدي. قار ديزه چيخميشدي. يازيقلار ماجال تاپيب پالتاردا گئيه بيلمه‌ميشديلر. چتينليکله ائولرينين داليندا اولان تپه‌ني يوخاري چيخيب دؤنوب کنده باخديلار. سويوق ائولردن ساواش آلولاري گؤيه قالخميشدي. بيريسي آنام واي باغيريردي، بيريسي بالام واي؛ آنجاق هر بير گوللـه آچيلماميشدان اؤنجه «ياشاسين آذربايجان!» سسي گؤيلرين يئددينجي قاتينا اوجاليردي. راميز ائيواندا گيزله‌نيب دوشمانا گوللـه آچان آتاسيندان گؤزلريني چکه بيلمه‌ييردي. آناسي اليندن ياپيشيب:گلين بالاريم! دئيه راميزي چکيب آرخاسينجا آپاردي. او سويوق گئجه ده صاباحا کيمي قارلي مئشه‌ده يول گئتديلر، آنجاق سسلر قولاقلاريندان چکيلميردي. گونشين ايلک شوعالاري يئر اوزونو ايسينديرن زامان، اؤلوم آياغينا گلميش فاطما نه تهر اولورسا اؤزونو قونشو کنده يئتيريب، ائولرين بيرينين حيطينه گيردي. راميز سورونه‌رک آرخاسينجا گلميشدي، آنجاق لاله‌نين سسي چيخميردي. ائوين قاپيسينا يئتيشمه‌دن فاطما آياقلارينين اختيارين الدن وئريب آشدي. گؤوده‌سي قاپييا توخوندو. (تاراق) تاختا قاپي آچيلدي. پال- پالتارلاري قيروولي بير قادين ييخيلدي قاپينين آغزيندا و بير قيز قوجاغيندان دوشدو اوتاغا. ائو يييه‌لري قورخودان ديک آتيلميشديلار. اونلاري گؤرجک ال آياقلاري تيتره‌مه‌گه باشلادي. کربلايي رحمان اؤزونو ايره‌لي وئريب قيز اوشاغيني قوجاغينا آلدي. اليني اوز گؤزونه چکيب، اللريني سيخدي. سونرا قولاغين اوره‌گينين باشينا قويدو. گؤزلريندن ياش سوزولدو. – سويوقدان دونوبدور!- دئييب، اوزونو آييله‌سينه چئويريب: – نه يه باخيرسيز؟ اونلاري گتيرين ايچه‌ري! – دئيه، راميزله آناسينا ايشاره ائله‌دي… بوتون اولايلار بير فيليم کيمي گؤزلرينين اؤنوندن کئچن راميز، باهارين – راميز ـ راميز! گؤر نه گؤزه‌ل گون چيخيب! سسي‌ايله اؤزونه گلدي. بارماغلارينين آراسيندا فيلتئره يئتيشيب سؤنن سيقارينين آغريسيني هئچ بيلمه‌ميشدي. فيلتئري ماسانين اوزه‌رينه آتيب پنجره‌يه ساري يئرييه‌رک: بورودون کفنه قاراباغيمي آتام هاردا قالدي بيلدين‌مي اي قار؟! چئوريلدي قولچاغا باجيم الينده آنام هاردا قالدي بيلدين‌مي اي قار؟! پنجره‌دن ائشيگه باخيب اليني شوشه‌يه چکدي:– هه گؤزه‌ل گون چيخيب. باهار زنگ ائله اوشاقلار گلسين! بو قار يئنيدن باشلارسا من صاباحا چيخا بيلمه‌رم.
حيات يولداشي بير فنجان چاي گتيريب قهوه رنگلي راش آغاجيندان دوزَلميش دؤرد کيشيليک ماسانين اوستونه قويدو.