غريبه ديلداماقلي گونلريميز واريدي

بولگه لر سرويسي:اليمده‌کي سله‌ني قويدوم يئره، تاپشيرديم باجيم گؤز اولسون، اوشاغي آنامدان آلديم، پيش- پيش دئييب آتيب توتدوم بلکه کسسين باغيرتيسيني.

ايکينجي بولوم

سوسن نواده‌رضي

يازان: احمد عسگرپور

بولگه لر سرويسي:اليمده‌کي سله‌ني قويدوم يئره، تاپشيرديم باجيم گؤز اولسون، اوشاغي آنامدان آلديم، پيش- پيش دئييب آتيب توتدوم بلکه کسسين باغيرتيسيني.
 مامانيم تاکسيني يوللانديريب اوستباشيني سهمانلاييب اوشاغي مندن آلاراق: ‌”دوش قنوودان اوشاغين امزيييني وئر”- دئدي منه!
من يازيق، من کولباش، من دوواري آلچاق، به من نيه؟!… بؤيوک باجيم، هم خانيم خاصا، هم ده چينچاواد ايدي، هم ده مامانيمين عزيزگيرامي ايلکيسي ايدي؛ قيزخاتين ايدي، قيزخاتين. من لُوتويدوم، اوغلان خويلويدوم، ايرگنمک زاد دا بيلمزديم.
 توپوغوما کيمي گيرديم قَنوون ليغلي- پَسابلي سويونا، سونبئشيييميز اولان توتو تَبررييي‌نين امزيييني چيخارداندا گؤردوم بيدانا کاغاذ ايکي تومن‌ليق ايليشيب قاليب ايکي داشين آراسيندا (ياني آللاه بئله آللاهدي هاااا!).
– مامااااان، بيدانا ايکي تومننيخ تاپديم بوردان!- دئديم.-اؤتور اونو، امزييي گؤتو، چيخ گئداخ! يوبانميشيخ”- دئدي آنام.“پَه! سن اؤلميه‌سن! به‌يم ائششک تَپيح‌لييب بئينيمي؟ سفئي‌يم مه‌يه ايکي تومني اؤتورم؟! (او زامان ايکي تومن چوخ- چوخ بؤيوک پول ايدي بير اوشاغا).
 آلتدان توپوغوما کيمين، اوستدن ديرسه‌ييمه‌جان ليغا بولانميشام، امزييي چيخاردام، بو دا جايزه‌م!”- دئديم اوره‌ييمد‌ه. دَوه گؤردوم قيغين گؤرمه‌ديم دئييب، ايکي تومني بورگه‌له‌ييب سوخدوم ناسقي جورابيمين کئشينه.
خولاصه نه باش آغريسي وئريم، آنام گيل دوزه‌ل‌لَنديلر يولا، من ده آتيلديم دربند آغزينداکي مشه‌مختارين باققال توکانينا، آفتافاسيني آلديم، گئتديم ارخ قيراغينا. مشه مختار باغيردي:-گليم آخيديم؟
-يوووو ترپشمه يئريندن، جوجه‌لرين داغيلار بيردن!- دئديم بيله‌سينه ديل- دوداق آراسيندا.
 آخي بونون دا سوروشماسي وار؟!
البته راضي دا دئييلديم گليب سو آخيدا گلسه‌يدي فيريلداغينان کاغاذ پولومو اليمدن چيخارداردي. تولونون بيريسي ايدي. دئيرديلر آروادي ايلده بيريني دوغار. سوروشاندا “نئينيرسن بير بئله اوشاغي؟”، دئيرميش “منه بير زحمتي يوخدو کي، آغيرليغين يئر چکير روزوسون آللاه وئرير!”خولاصه، آفتافاني اَيديم هم امزييه،‌ هم پولا  هم ده اللريمه سو آخيتديم، پولو سوخدوم سله‌ده‌کي بوخچانين آلتينا، يئيينله‌ديم قان تر ايچينده قوشولام آنام گيله.
بوروق- بوروق دار- اوزون دربندي ها گئت کي قورتولاجاق!… اليم بيله‌کدن، قولوم کوره‌کدن آز قاليردي قيريليب، دوشه يانيما. ايستي بير ياندان، کيفير ليغ اييسي بير ياندان، اَيين باشيم پير-پينتي، ساچلاريم دار با داغينيق… هئچ قوناق گئدن آداما بنزه‌ميرديم آرتيق! آغاجا ديرماشماغا دا نه اشتياقيم، نه ده اينجاريم قالميشدي.
 بالاجا باجيما گيجيييم گلدي، گول دسته‌سي کيمي، راحت- آسوده يايالانميشدي مامانيمين قوجاغينا، ائله بيل شاه عابباسين قيزي‌دير تخت-ي روان ايچينده گئدير… هله سيرتيق- سيرتيق ديش‌لريني آغارديب منه اَدي‌باجي دا ائليردي هردن! حياسيزين بيري حياسيز!بؤيوک باجيم دا کييييي… دئيه‌سن ايندي چيخيب فاب قوتوسوندان! باشدا گئيينيب آياقدا قيفيل‌لانيب، دئيه‌سن اينديجه وليعهد گليب آليب آپاراجاق بيله‌سيني شاه ساراييندا فرح ديبانين قوللوغوندا ايکي آياغيني بير باشماغا سوخاجاق کي حؤکمن تئز اولون بو قيزي آلين منه! ميغاووادي دئيه‌سن، قيز کي قيز! خانيم خاصا! خاتين قيز!هاندان- گئجدن گليب چاتديق بؤيوک مامانيم گيله.
 دَيقه‌باشي دوروب قاپي‌يا گلمه‌سين دئيه، قاپينين آراسينا بير داش قويموشدو، اؤرتولو قالسين. من، حقدن حوقدن دوشموش، اليمده‌کي سله‌ني قاپينين يانينداکي سککي‌يه قويوب بير دينجيمي آلديم. سله‌نين دسته‌سي ده اليمي ائله کسميشدي، اووجومون ايچي آلوو وئريردي.
هاي‌-کويوموزو ائشيديب، ائوده‌کي‌لر چيخديلار قارشيميزا. خالام‌گيل ده اوردايديلار. مامانيمين زن‌عميسي‌ ده اوشاق‌لاريني گؤتوروب گلميشدي. سلام صلواتلاشيب، کئف احوال ائلمک سسيميز سانيرام يئددي‌ قونشو او يانليغاجان گئديردي. ساکي ييغيشميشديق روب چکمکده بؤيوک مامانيما ال يئتيرک.من دؤزدوم هاممي گيرسين ايچري. او قدر آدام، او قدر هاي- کوي واريدي کي، بيرينين اکسيک اولماسي هئچ گؤزه گلميردي. پولو سله‌دن چيخارديب سوخدوم جورابيما گينه. باشيمي اوزالديب قاپينين چاتداغيندان خالوغلومو چاغيرديم، گلدي:
-“ياخينا گلمه! ياخينا گلمه!” دئديم.
ذاتا دئمه‌سه‌يديم ده، ايت ايييندن منه ياخينلاشماق اولموردو! ماجراني بيرخيردا تعريفله‌ديم بيله‌سينه، و البته کي، ‌پولا راجع هئچ بير سؤز دئمه‌ديم، سَر وئريب سير وئرمه‌رم، هارانين پخمه‌سي‌يم؟!
-قَنووا دوشموشم، سن سله‌ني آپار ائوه من گئديم گيريم حووضا.- دئديم بيله‌سينه. او دا جوذاملي‌دان قاچيرميش کيمي، سله‌ني گؤتوروب توو دابانا قووت، آستا قاچان نامرددي، قاچدي يانيمدان.
او گئتدي، من دهليزدن سوزولوب، حيه‌طه گيرديم. سويونوب پالتارلاريمي قويدوم حووضون قيراغينداکي يئکه پوسته آغاجي‌نين ديبينه. بير شيرجه ووروب جومدوم حووضا.
 ديشيم ديشيمه ده‌يدي، سو هله قيزيشماميشدي بيلينه- بيلينمه‌يه ايليقلانماقدايدي.
“آخئئئئئئئئئئئئي، دينجه‌لديم!”هله امللي- باشلي جانيم ايسلانماميشدي، بير هاندا گؤردوم اوشاق‌لارين هره‌سي بير کؤينک بير تونوکه اَيين‌لرينده، اوز قويوبلار حووضا طرف! (آللاه شيطانا لعنت ائله‌سين، ايت اليندن سوموک گميرماق اولمور!) بؤيوک مامانيم دا الينده بير يوغون يون آغاجيني توولايا- توولايا، قوپالاقلاريني گؤتوروب کي:
-قيچيز سينسين! حلال ائلمرم دوشسز سووا!…دونن آخشام حووضو يووب دولدورتموشام، بامادورلاري تؤکوپ يوواجييوق اوردا! سويو باتيرمايين،قويون ايشدن قورتولاق سورا… کؤپه‌يشاقلاري سووا گيرسز دؤيه‌جام بيله‌زي!

منبع :