آذربايجان ناغيللاري بولگه لر سرويسي: ... قادين قيشيردي (بلکه ده من بئله گومان ائتميشديم) : دئديم دا! سنه احتياجيم يوخدو. مه‌يه من ائلييه بيلمه‌رم بو ايشي تک‌باشيما گؤره‌م؟ تله‌سيرديم، آما ماراقدان، آدديملاريم سارسيلدي. قادين، اوتوز قارلي فصيلي گؤرندن داها چوخ گنج ايدي. بوندان داها تئز يئني چاديرا ايله ده‌ييشه بيله‌جه‌يي کؤهنه چاديراسيني، فرنگي قونداغين اوستونه چکميشدي. سورتولموش پالچيقلي و دابانلي باشماقلاريني، جَمده‌ک کيمي يئرده سوروتله‌ييردي. کيشي اونا ساري آتيليب، اوز-اوزه‌سينده داياندي. أليني قالديردي و سانکي يئني‌جه بير مؤوضوعنو آنلاييبدير دئيه يان يؤوره‌سينه باخدي. مندن سونرا بير-ايکي نفر يولدان کئچن ده وار ايدي. يقين بيزيم اولماغيميزين قراريني ده‌ييشمه‌يه يئترلي اولدوغو اوچون، أليني ياواشجا قادينين چييين‌لرينه کيمي آشاغي ائنديريب، علاجسيزليق‌لا دئدي: - آبيريميزي آپارما آرواد! گل گئده‌ک ائوه! نه زامانا کيمي بو هاي-کويو سالاجاقسان؟ کيشي ايکي ألين بارماقلارينين سايي‌سيندان، قاديندان داها ياشلي گؤرونوردو. آريق و ضعيف ايدي، آغ‌قارا فيرچا کيمي ساققال و قاراشين. کوت شالواري چيرکلي دئييلدي، آما کؤهنه نييه. أليني قادينين چييين‌لريندن آشاغي زويدوروب، قادينين أليني توتوب اؤزونه ساري چکدي و بو دفعه داها مولاييم، کلمه‌لري ديشلرينين آراسينداکي دئشيکلردن ائشييه گؤندردي: بوگون هميشه‌دن داها چوخ يورقونام. بوندان آرتيق اينجيتمه مني! قادينين صوفتي سويوقدان قيزارميشدي و کيشينين بو سؤزوندن داها چوخ قيزاردي. زويموش چاديرانين بوجاغيني يئني‌دن و نئچه‌نجي دفعه اولاراق قونداغين اوزه‌رينه چکيب، اوجا سسله دئدي:اينجيتمه؟ اوشاغي دوکتورا آپارماق اينجيتمکدي؟ سنه ده دئيرلر آتا؟ اوشاغيميزين تبي وار او زامان سن ده دئييرسن قاييديم ائوه؟ کيشي تيرياکي‌لره اوخشاييردي. اولدن ده چيلغين گؤرونوردو و ايندي، داها سينيرلي اولموشدو. فقط دئيه بيلدي: - لااله‌الاا..، آللاه اؤزون کؤمه‌ي اول! سنه قوربان اولوم بو نه جور امتحاندي سيناقدي؟ کيشينين ظاليملييي مني حيرصلنديرميشدي. اوشاقلاريم مدرسه‌لرينين اؤنونده مني گؤزله‌ييرديلر و گئتمه‌ييم گرکلي ايدي آما گئتمه‌ديم. بير آن، اوشاقلاريمين بيريني قيرخ درجه تب ايچينده قونداقدا تصور ائتديم. قادين چاره‌سيزليکدن نئچه نفرليک قاوقادا اولان تکجه قادينا اوز توتوب دئدي: خانيم! سيز دئيين من بو کيشينين أليندن نه ائديم؟ اوشاغيم خسته‌دي، قويمور آپارام دوکتورا. ياواش سوروشدوم:تيرياکي‌دي؟قادين ديسکينيب دالا چکيلدي:- يوخ خانيم! بو سؤزلر نه‌دي دئييرسن. اخلاقي پيسدي. ايشينده جدي‌دي. قورخورام بو ايشي‌نن اوشاغيمي گودازا وئره.کيشي حؤوصله‌سيز جاواب وئرمه‌يه مجبور قالدي: اوشاق نه‌دي آرواد! بيزي بو قاوقانين أله سالينميشي ائله‌مه. بو نئچه ايلده، مين دفعه منه زجر وئريبسن، بَسيم دئييل؟ نه دئديييني باش تاپميرديم آما اوزلولويوندن جانا گلميشديم. قادين، چاديرانين آلتيندا اوشاقجاسينا کؤرپه ايله دانيشيب قوربان کسيردي. کيشي شالواريني يوخاري چکيب، قاييشيني برکيتدي. أليني جئبينه آپاريب بوزولموش بير دسمالي چيخارتدي، اوزونون تريني سيليب سونرا سانکي دقيق بير قاضي يانيندا دايانيب اعتراف ائدير دئيه، اوتانجاقليق‌لا پيچيلدادي: بير گئجه اوشاغيميزين تبي وار ايدي ... ايشدن يئني‌جه ائوه گلميشديم ... يورقونويدوم ... مسئله‌ني جدي توتماديم ... نئچه ايل بوندان اووليندي ... اوشاغيميزي أليميزده ايتير ... منيم باشي سويوقلوغوم ... ايندي من قالميشام و بو خسته قادين ... سؤزلري ناغيلا بنزه‌ييردي و من آلدانمايا اونون گؤزياشي ايله ايسلانميش گؤزلريندن داها چوخ ايستي-سويوق چکميش ايديم. قادين سؤزو ايله منده اولان لاپ آز شوبهه‌ني ده آرادان آپاردي: خانيم گؤروسن! آتا محبتي ايچينده اؤلوب. من خسته‌يم يوخسا بو گوناهسيز بالاجا اوشاق؟ قادينا ساري گئتديم، ائله مؤحکم به‌له‌کده‌کي اوشاغي باغرينا باسميشدي اوشاغين بوغولماسيندان قورخدوم. تب ائله‌ميش اوشاغين اوزونو آچماق اوچون أليمي اوزاتديم. قادين هورکويوب قورخاراق دالا چکيلدي. آياغي خيياوان قيراغينداکي جدولين قيرناسينا ده‌ييب سو کانالينا دوشدو. قورخودان دامارلاريمدا قانيم دوندو. زورنان اونا ساري گئتديم. قونداق بيرآز اويانا دوشموشدو. قادين آجيلي بير ناله ائتدي، گؤزلري گيزلي بير يالواريشي گؤستريردي. قونداغين باشيني آچديم، اوشاق هئي دئييردي: آنا! انا! قولچاغين باشي قوپموشدو، ساريشين ساچلاري آرخين قيراغينداکي چاميرلي سويا باتميشدي، آما ألده تيکيلميش تيکيشلري اولان گؤزل رنگلي پالتاري هله ده يئني و تر-تميز گؤرونوردو. اولا بيلسين بو نئچه گونون ايچينده تيکيلميشدير. قادين اوشاغينين نئچه مينينجي اؤلومونو گؤرمکله گؤزياشلاريني اوزونه آخيتدي.
قادين قيشيردي (بلکه ده من بئله گومان ائتميشديم) : دئديم دا! سنه احتياجيم يوخدو. مه‌يه من ائلييه بيلمه‌رم بو ايشي تک‌باشيما گؤره‌م؟