“و آ آ… امي‎ي‌ر… اوغلان بير دايان گؤروم نه‎جوردي آخي…”- دئيه‎، قاپي‎يا چيخدي. ائشيکده, ماغازايا ساري گلن کيشي آتيليب اويناياراق قاچان اوغلاني ايزله‎يره‎ک تعجوب‎دن دوداغلاريني گولونج بير شکيل‎ده بوزموشدو. بايرام قاباغي ايدي. بازار چوخ تونلوک ايدي. بير آندا اوشاق گؤزدن ايتدي. آمما آرواد اوشاغين آردينجا يولا دوشدوکده, ماغازاچي اوغلان قاپي‎نين آغزيندان سسلدي: آي خانيم! کاپشئن‌ين پولون وئرمه‎دين… آي خانيم…! اوشاغين قاچماسيني تعجوب‎له ايزله‎ين کيشي بيردن- بيره اؤزونه گلدي:”هه؟! کاپشئن. نه کاپشئني؟!” اوغلان- “عنابي- نخودي کاپشئني آليب پولونو وئرمه‎ميش گئدير”- دئيه، ايشاره ايله آروادي گؤستردي. کيشي درحال گؤتورولوب, آروادي حاقلادي: – آي باجي… آي باجي‌هارا گئديرسن بس؟ آلديغين جينسين پولون وئر آخي, پي‎ي‎ي!! – نه‎ خبريندير قارداش، من قاشميرام کي, قوي گؤروم اوشاق نئجه اولدو- دئيه، آرواد يئني‎دن يولا دوشدو. کيشي‎نين سسي اوجالدي: – دايان بير گؤروم آ اَ… اوشاق! اوشاغا نه اولاجاق، پولو وئر هر يئره گئديرسن گئت‎دآ, سنين قاباغيوي کسن وار؟ آرواد تله‎سيک کيفين آچيب الي اسه- اسه پولو ساناييب، کيشي‎يه ساري اوزالتدي:-“گل آل! بودا سنين پولون.” کيشي”-ياخشي… بس‌هاني قالميشي؟”- دئيه، اليني آروادا ساري آچدي. آرواد تعجوب‎له سوروشدو: – اون بئش مين تومن دئييل مه‎يه؟ – هه اون بئش مين‎دي. – بس‎داي نه ايستيرسن؟ ايکي مين‎نين ده اوغلان اؤزو چيخيب. کيشي‎نين گؤزلري قييلدي: – بورا باخ گؤروم، مني ساريميسان, يوخسا عاغلين آزيبدي؟ اونو گؤر هئچ اون بئش مينه تيکرلر!؟ هله پيس- پيس دئييرسن قاشميرام کي!! آروادين دوداغي اسدي: – من قاچان آدام دئييلم, گؤزلريوي سيل، آدامووي تاني! دئييرم اوغلان او يئددي‎مين دئييب, ايکي مي‎نين‎ده چيخيب, دئييرسن يوخ , او او، بو دا من- دئيه، آرواد قاييديب, يئيين آديم‎لارلا ماغازايا ساري گئتدي. کيشي اونون دالينجا ماغازايا گيردي:”- سن‌هانسي کاپشئني وئريبسن بونا؟ – دئيه, اوغلاندان سوروشدو.– او عنابي- نخودي کاپشئني. – نئچه دييبسن؟ – اون يئددي مين دئديم, ايکي مينين‎ده اونا چيخديم. کيشي توپ کيمي آچيلدي: – آي سنين او بوينون سينسين. اووليندنده بللي‎ ايدي سندن آليش وئريشچي چيخماياجاق. گئده به‎سن کورسان؟ آخي او شوقريبي اوخو دآ آ… دئيه‎. آروادا ساري يؤنلدي: مني باغيشلا باجيم, سن دئين اولسون, ايکي ميني‎ده تخفيف، چيخارت اون مين‎ده وئر قورتار! بو آندا اوغلان ديللندي: _ آغا وآللاه قيمتيني اون يئددي مين تومن يازميشدين. کيشي لاپ جين‎لندي: – سن داي دانيشما. دانيشما دئديم. اون يئددي مين تون يازميشدي. هله پيس- پيس‎ده ديپلوم آلير. هئي، آي او سنه درس وئره‎نين آتاسينا لعنت گلسين… آرواد توموب قالميشدي. نهايت –”يوخ، قارداش منيم او قده‌ر پولوم يوخدور. کاپشئنيوي گنيررم- دئيه, ماغازادان چيخدي. کيشي ده آروادين داليسينجا ائشيگه چيخاراق: – بس ياخشي، اون مين‎ وئر کاپشئني قايتار، پولووو آل! آرواد بير قده‌ر دوروخسوندو. سونرا دئدي: – دئديم کي, منيم او قده‌ر پولوم يوخدور آغا. بو آندا اوغلان يويوروب، کيفي آروادين اليندن قاپاراق: – بس بو کيف قالسين گئت کاپشئني گتير! کيشي غيظيله اوغلانا باخدي: -لا الاهه الا اللاه. گئده به سن نييه بئله گيژسن؟ آخي او کيف نه يه ده‌ير؟‎ او اؤزو دئيير پولوم يوخدو, سن کيفي گيروو ساخلاييرسان؟!- دئيه، حيرصيله کيفي اوغلانين تايندن چکيب، آلدي. آروادين دوداغلاري اسدي، آمما آغزينداکي سؤزونو يئدي. تکجه بير باخيشلا کيشي‎نين آغزيني باغلادي. يولا دوشدو. کيشي‎ايسه کيف الينده, اونون داليسينجا يول‎لاندي. آرواد بازارين ايچينده, بو تيمچه‎دن او تيمچه‎يه, او د‌ؤنومدن بو دؤنومه هئي گيرير- چيخير… آمما اوشاغدان ايز- اثر يوخدور. سانکي بير دامجي سو اولوب، يئره باتميشدي. گئتديکجه اونون نيگرانليغي, هيجاني آرتير, سورعتي چوخالير، يئريشي قاچيشا چئوريليردي. ماغازاچي‌ کيشي‎ده نفسي چيين‎لريندن چيخا- چيخا، آروادين داليسينجا لهله‎ييردي. ماغازاچي‎لارين چوخو و ‎بازاردان کئچن‎لرده, آغيزلاري آچيلي دايانيب، تعجوب‎له اونلاري سوزوردولر. هاچاندان –‌هاچانا اوشاق »آينا – شام‎دان« ماغازاسينين گوزگولرينده اؤزونه باخا- باخا تاپيلدي. او, بؤيوک گوزگولرده، اينينه گئيديگي ياراشيقلي کاپشئني‌نين تاماشاسيندان فرح‎لنيردي. اوغلانجيق قاباق- قاباغا قويولموش گوزگولرده, اؤزونو نه بير نه ايکي، بلکه اون لارجا گؤردوکدن داها آرتيق ماراقلانيب, هيجانلانيردي. آرواد اوشاغي گؤرجک جيگر دولوسو بير نفس آلير, ديزه چؤکوب, “- امير… بالا بويووا قوربان اولوم! به سن بورادا نه گزيرسن؟- دئيه، اونو باغرينا باسدي. کيشي ايسه تووشه‎يه‎رک اونلارين باشي‎نين اوستونده دايانيب، کاپشئني آلماغا تله‎سيردي. آرواد اوشاغي ماغازادان چيخارتدي؛ سايخاش بير يئره آپاريب قولاغينا نه‎سه پيچيلدادي. سونرا اليني کا‎پشئنين دويمه‌سينه اوزالتدي. اوشاق دوداغلارين ييغيب، قيسدي. توواراق اؤزونو دالييا چکدي. ايکي الي ايله کاپشئنين ياخاسيندان ياپيشيب، قولاقلادي. آرواد بير داها اوشاغين بويون اوخشادي: – امير بالا بويوا قوربان بو کاپشئن ‎ اينووه خيردادي. بونو وئر, گئده‎ک آيري‎سين آلاق!‌ها, آ بالام‎سان- دئيه‎, آستا- آستا کاپشئنين دويمه‎لريني آچيب, زيپيني آشاغا چکن کيمي اوشاق آغلاماغا باشلادي. آرواد, کاپشئني اوشاغين اينيندن چيخارتماغا چاليشيردي‎سا, اوشاق‎دا عناد‎ کارليق‎لا, اؤزونو آناسي‎نين اليندن قورتارماغا جان آتيردي. ‎کيشي آتجاق حوصله دن چيخدي: “-دي بابام قورتار دآ آ …!”- دئيه،  ال آتيب کاپشئنين اته‌ييندن ياپيشيب, چئويردي، کؤبودلوقلا سيييريب اونو اوشاغين باشيندان چيخارماغا چاليشدي. آمما کاپشئنين اوزو آستار اولسادا, دويمه‎لري باغلي‎ اولدوغونا گوره, کيشي اوغلانجيغي بير آز اؤز داليسيجا سوروندورندن سونرا، کاپشئني اونون اينيندن چيخاريب، يولا دوشدو. آرواد دلي‎جه‎سينه بير آز يول کيشي‎نين داليسيجا قاچدي. کيشي بير پول بوکومونو جيبيندن چيخاريب آروادا ساري آتدي. پول يئره سپه‎لندي. آروادين ديشلري قيجيردي: – تووو سنين او نجابتيوه… آي ‎ي‎ي نا کيشي- دئيه، قه‎هر بوغازيني بيچه- بيچه, اييليب يئردن پول‎لاري دوشورمه‎يه باشلادي. آرواد اوغلانجيغين بيله‌ييندن ياپيشيب بازار اوزونو سورويوردو. اوغلانجيق‎دا آياق‎لاريني يئره دؤيه- دؤيه قيشقير- باغير سالاراق ديرنيردي. آروادين صبري داي توکندي: – يئتيم قالاسان دئييرم, اينووه کيچيک‎دي. ننه‎سيز قالاسان دئييرم اينووه کيچيک‎دي- دئيه, آرواد دلي‎جه‎سينه اوشاغي شاپالاغين آغزينا وئردي. بير نئچه نفر قاچيب اوشاغي آروادين اليندن آلديلار. ياشلي بير قادين آروادين قولوندان توتوب, اونو آغزي بازارا آچيلان مچيدين حيه‎طينه چکير, بير سکي‎نين اوستونده اوتوردارکن: -قيزيم! آدام آجيياندا اؤزونو ساخلار. نه‎خبريندير؟ او طيفيل اوشاغي اؤلدوروسن آخي؟! باشقا بير قادين‎دا, اوشاغي آناسي‎نين يانينا گتيردي. آروادا بير آز سو ايچيريب, اوشاغيندا اوز- گؤزونو يويوب اوووتدولار. قيشين سون گونلري‎نين ايليق گونشي اينجارسيزجا توتغون بولوت‎لاري سويونوب، چيخيردي. آرواد ائله‌جه اوتوردوغو سکي‎ده توموب قالميشدي. اونون گؤزلري, مچيدين حيه‌طينده‎کي حوووضون اورتاسينداکي سو لوله سيندن داشلانان سويا تيکيلميشدي. اوشاق قوزو تکين آناسي‎نين يانيندا دايانميشدي. پؤرتوب، قيزارميش گؤزلريني آناسينا زيلله‎ميشدي. آرواد گؤزونون آلتي‎ ايله اوشاغين يازيق گؤرکميني سوزدو. بير آنداجا بوتون وارليغي قه‌هه‌ره چئوريليب بوغازينا ييغيلدي. بيردن ال آتيب، اوشاغي اؤزونه ساري چکدي؛ بوتون وارليغي ايله باغرينا باسدي. بوغازينا ييغيلان قه‎هه‎ر گؤزلريندن آخماغا باشلادي.