قارا چادرالي قادين
قارا چادرالي قادين
1400/08/30
بولگه لر سرويسي: محله‌ميزده گزيب دولانان قارا چادرالي قاديني چوخداندي گؤرمز اولموشام. کرونادان قاباق هاچان ائشييه چيخسايديم محله‌نين بير طرفينده اونو گؤررديم. يا قنوو قيراغيندا اياقلاريني قنووا ساللاييب اوتورار، يا زيبيل قابيني ائشه‌له‌ير، يا تليس چيگنينده، بو ياندان او يانا سوووشدوغونو اوزاقدان گؤررديم، آنجاق هر حاليندا اولسايدي، اؤز-اؤزونه فارسجا ماهني ميزيلداناردي، ميزيلتي دا يوخ، ميزيلتيدان بيرآز اوجا سسله اوخوياردي. چوخو دا هايده‌نين “مستي‌ام درد منو ديگه دوا نميکنه” ماهنيسي.
نيگار خياوي
بولگه لر سرويسي: محله‌ميزده گزيب دولانان قارا چادرالي قاديني چوخداندي گؤرمز اولموشام. کرونادان قاباق هاچان ائشييه چيخسايديم محله‌نين بير طرفينده اونو گؤررديم. يا قنوو قيراغيندا اياقلاريني قنووا ساللاييب اوتورار، يا زيبيل قابيني ائشه‌له‌ير، يا تليس چيگنينده، بو ياندان او يانا سوووشدوغونو اوزاقدان گؤررديم، آنجاق هر حاليندا اولسايدي، اؤز-اؤزونه فارسجا ماهني ميزيلداناردي، ميزيلتي دا يوخ، ميزيلتيدان بيرآز اوجا سسله اوخوياردي. چوخو دا هايده‌نين “مستي‌ام درد منو ديگه دوا نميکنه” ماهنيسي.
تانيشليغيميزين باعثي دا اونون ميزيلدانماسي ايدي. من ده اونون کيمي محله‌ده گزيب دولانارام، آنجاق اونون کيمي قارا چادرا اؤرتمه‌م باشيما، هله هردن اوزومه ساليب خوش رنگلي مانتو، شال، روسري زاد دا گئييب اؤرترم؛ قيرميزي، ساري، ياشيل، بنؤوش، نارينجي…
بير گون دولانيرکن حزين هنگلي بير قادين سسي قولاغيما دَيدي، او يان بو يانا باخديم، زيبيل قابي ايچينه قارا دونبالميش بير باسن گؤردوم. باسنين، قارا چادرا اؤرتموش بير قادين اولدوغو بللي ايدي. قادينين زيبيل قابينا دونبالماسي مني چاشديرمادي، شهرين همشه گؤردويوم منظره‌سيدي بو. مني چاشديران اونون زيبيل قابينين ايچينه ماهني اوخوماسي ايدي: “مستي‌ام دردي منو ديگه داوا نَميکوني. قم با من زادي شودي مني راها نَميکوني مني راها نَميکوني… .” اؤز-اؤزومه: هنرين وارسا، سسيوي آت باشيوا سن ده اونون کيمي اوخو گؤرک! دئديم. آرزو ائتسم ده من او جسارتين صاحبي دئييلديم.
دوروب گؤزله‌ديم. هردن بير، ائشه‌لدييي زيبيللرين ايچيندن نايلون شئي-شويلر، قاردون، باشماق تايي، دمير-دومور قيريغي زادي سئچيب آتيردي تليسينه. نهايت آختاريشي بيتدي و بدنينين زيبيل قابي ايچينه ساللانميش قورشاقدان يوخاري حيصه‌سيله زيبيل قابيندان چيخدي، “بتر اوخيسان!” دئديم. اؤزونو او آرادا تک سانيرميش کيمي دؤنوب او يان بو يانا باخيب گؤردو مني، قايغيسيز ايفاده ايله “قمگينم!” دئيه جاوابلاماسي مني ديکسينديردي. قادينين بونجا دورولوغوندان ديکسينديم. آغليمدان کئچن “آلا سفئه” سؤزونه اوتانديم. وئردييي جاوابيلا مني چتين دوروما سالميشدي. منه باخ کي، “بتر اوخيسان!” دئمکله اونو لاغا قويماغا باشلاميشديم. گؤستردييي دورولوق قارشيسيندا اؤزومو ايتيرميش کيمي اولدوم، آنجاق اونون تانيشليق، ايسينيشمک آختارديغيني دا تئز آنلاييب ال اياغيمي ييغيشديرديم. زيبيلچي دوستوم درين يالقيزليغيندان قاچماغا گئدجک يئر آختاريردي. بيلميرم نه‌دن اونون دا منيم کيمي مهربانليق گؤرمه‌ميشي اولدوغونو تئز باشا دوشدوم. اونا ائله بئله راست گله جاواب وئرمک ناشيليق اولابيلردي، بونو دا تئز باشا دوشدوم. دورولوغونو زده‌لمه‌يه‌جک بير جاواب تاپمالييديم، هم چکينجه‌لي هم گولومسر بير ايفاده‌يله: “نييه قمگينسن” دئديم، “بو گؤزلليکده اوخورسان کي!” بيردن اوزونه سئوينج دولدي: “سن ده بو گؤزلليکده قيرميزي شال ساليبسان کي باشيوا!” دئدي. “قابيلي يوخدي”، دئديم، “والله يانيمدا آيري روسريم اولسئيدي، بوني آچيب وئررديم سنه”ني دئيه-دئيه، او يئکه‌ليکده يالاني اوزونه-اوزونه دانيشديغيما ايچيمدن قيزيشديم. بللي ايدي، سؤزوم خوشونا گئتمه‌ميشدي. اوزونه سَپيلميش سئوينج توزو بيردن گلدييي کيمي ائله‌جه ده بيردن چکيلدي: “تک قالميشام!”، دئدي. او شکيلده قايغيسيز دانيشماغا باشلاديغي گئنه اؤز حالينا دؤندويونو گؤستريردي. بو اؤلچوده قايتاقسيز قايغيسيز دانيشماسي قيسقانديريردي آدامي. اَر-آروادليق، بوشانما فيلان مسله‌سي اولدوغونو آنلاديم. آچيق دانيشماسي منه ده يول آچيردي: اوشاق-موشاق زاد يوخدي به؟
-آلدي آپاردي دا به!
-وئرميه‌يدون داي.
-داييم دئدي، وئر آپارسين!
-ايندي کيمنن قاليسان؟“داييم ساخلير.” بوندان آرتيق سورغو سووالا چکمک ايچيمدن گلمه‌دي. هم ده سونراکي گونلره دانيشماغا سؤزوموز اولمالي ايدي. سونراکي گونلرده ده آرابير گؤروشوردوک. بعضن سلاملاشيب ال قووزاييب سوووشوردوم، بعضن اؤزومو گؤرمه‌مزلييه ووروب سوووشوردوم، بعضن اياق اوستو دؤرد-بئش کلمه دانيشيب ساغ اوللاشيرديق. اوزون دانيشماق ايستميردي هئچواخت. سؤزو آغزيندا بيتمه‌ميش، اياغي گئتمک ايستيردي.
ايلک تانيشليغيميزدا تليسي گوج بيللاه قارا چادراسينين آلتينا يئرلشديرديييني گؤردويومده دئييرديم بلکه اوتانديغيندان تليسيني مندن گيزلَمک ايستير، سونراکي گونلرده تليسي چيينينه آلديغيني گؤرنده، اوتانج چکمه دردي اولماديغيندان آرخايين اولدوم. بيلديم، ايشيني آرخايينليقلا گؤرور، اوتانما فيلان يوخ ايدي آرادا. من ده اونون آرخايينليغي بابتيندن آرخايين اولدوم. دئمک، زيبيل توپلاماغي احتياج اوزوندن دئييلميش، داييسينين مالي دورومو ياخشي ايميش. کوچه‌لرده دولانا-دولانا باشقا زيبيل توپلايانلاري گؤروب زيبيل توپلاما هوسينه دوشوب، اؤزونه ايش ائله‌ميشدي. يا دا اولابيلسين نئجه‌سه بير ايش گؤرموش اولسون دئيه، زيبيل توپلاييردي. -زيبيللري ييغيب نئينيسن؟
-آپاريرام او ياندا، لاااپ او ياندا بوشالديرام او بيريسي زيبيل قابيلارينا.
قادينين بو ايشيني او بيري زيبيل توپلايانلارين بعضيسي گؤروب بيلميشديلر. بونا گؤره ده اونو ايزله‌ييب، گئنده دوروب توپلاديغي زيبيللرين هارايا بوشالتديغيني گودوردولر.
دئييردي: بيلميرم نييه آتدي گئتدي؟ بونو مخاطبيندن سورموردو، هئچ اؤزوندن ده سورموردو، بو سورونو ائله بئله لوغالاييردي، ديلينين اوستونده اويناييردي سانکي بو سورويلا، سانکي جاواب بولاجاغيندان دا واز کئچميشدي. بعضن منه: سنونکي ده سني آتيب، قيرميزي شاللي؟ دئييردي. نئجه جاواب وئره‌جه‌ييمي بيلميرديم. هئچ اوزونه اينجينمه‌سيني ايسته‌ميرديم: “کيشيدي داي، آتاندا آتير”، دئييرديم. دانيشاندا همشه او يان بو يانا باخيردي، هئچواخت گؤزومه باخميردي.
-آخي بيليسن من نجورام؟
-نجورسان؟
-من… زادام… زاد… آزادام… آزاد!
نه دئمک ايسته‌ديييني باشا دوشموردوم. هم ده باشا دوشوب دوشمه‌ديييمين نه اهميتي واردي کي. چوخداندي گؤرمز اولموشام قارا چادرالي دوستومو. بيلميرم کرونايا يولوخوب، يوخسا ائشييه چيخماغا داييسي‌گيل اجازه وئرمير. کرونايا يولوخوبسا، بيمارستانا گؤتوروبلر يوخسا ائوده کئچيره‌جک دورومدامي؟ يوخسا کرونا آغ جييريني آغارديب دا گؤتوروب بيريوللوق اؤزويله آپارميشدير شاه‌گؤلونون قارا چادرالي قادينيني؟ بير يوللوق آزاد اولوب يوخسا؟
سوروشماغا، دانيشيب دردلشمه‌يه چوخ سؤزلريم واريدي اونونلا، آنجاق من اونون کيمي قايغيسيز، قايتاقسيز دانيشماغا جسارتيم يوخيدي، داها چوخ شئيلر بيلمک ده ايسته‌ميرديم حاققيندا، ائله دورولوقلا وار اولماسي منه يئتيردي.
منبع :