بولگه لر سرويسي:بير باهار گونو، بير چيچکلي آغاجين آلتـيندا، لاله پارکـيندا، بير کيشي کي اليني کوتونون سول قولتوغونون جيبينه قويموشدور، نيمکتين اوستونده، بير کيشي ايله کي نظره گليردي تازا بازنيشسته اولوب دانـيشـيردي: – دوز بويورورسوز، اقتصادي سيخينتيلار هميشه باعث اولوب آدام بعضي شئيلري زندگانليقدا حذف ائلهسين. آدام ائلهيه بيلمز ات، چورک و ياغ آلمايا، آمما ائلهيه بيلر مثلن کيتابي اؤز برنامهسيندن حذف ائلهيه. آدام خؤرهک يـئمهسه اؤلر، آمما اگر کيتاب اوخوماسا، اونا هئچ بير شئي اولماز، تازا مومکوندور ترقّيده ائلهيه، خلاصه لازيم اولمايان شئيلرين حذفي آداما ضرر وورماز.منيم بئش قـيزيم وار. دورد اوغلان هاواسينا دونـيايا گليبلر. بئش‌ايل بوندان قاباق، اوّلکي قـيزيمي گرهگ اره وئرهيديم. آمما جهيز آلماغا پولوم يوخ ايدي. نه پس‌اندازيم واريدي، نه ساتماق اوچون بير درده ديهن شئي. وام آلماغادا امکانـيم يوخ ايدي. بير گون بو پارکدا اوتورموشدوم روزنامه اوخويوردوم. گؤردوم بير مناقصه آگهيسينده يازيبلار: «بؤيرهک آلـيريق».اؤزومله فيکيرلشديم کي، دونـيادا چوخلاري بير بؤيرهکله زندگانلـيق ائديرلر. نييه بو آللاه وئرگيسي سرمايهدن استفاده ائلهمهييم.بؤيرهکلريمين بيريني ساتديم، اولکي قـيزيمي ار ائوينه گؤندرديم. بير ايلدن سونرا ايکينجي قـيزيم ارليک اولموشدور. يـئنه هامان پولسوزلوق‌ايدي و هامان چتينليکلر. منيم آبيريم واريدي، ائلهيه بيلمز‌ايديم ايکينجي قـيزيمي جهيزسيز ار ائوينه گؤندهرم. يـئنه بير گون بو نيمکتين اوستونده اوتوردوم و بدنين آيري يـئرلرينه فيکيرلشديم. البته او يـئرلرهکي جوت ايدي. مثلن گؤزلريمه. اؤزومله دئديم ايکي گؤزو نئيلهييرم. مگر گؤرمهلي شئيده وار؟ نييه بو قات- قاريشـيق دونـيانـي ايکي برابر گؤروم و ايکي برابر عذاب چکيم. هر نه روزنامهلرين آگهيسينه باخديم، گؤردوم گؤز آلان يوخدور. اؤزوم بير آگهي وئرديم، روزنامهلرين بيرينده چاپ ائلهديلر. بير گوندن سونرا مشتري تاپيلدي، ايکينجي قـيزيم‌دا اره گئتدي. ايندي گؤزلريمين بيري شوشهدندير. بير ايلدن سونرا اوچونجو قـيزيمين نووبتي ايدي. هامي قاپيلار اوزومه باغلي‌ايدي. بيلميرديم نئيلهيم. آز قالـيردي باغريم چارتلايا. قولاقلاريما فيکيرلشديم. دئديم اونلارين بيرين ساتارام، آمما کيم قولاق آلاجاق‌ايدي؟ چوخ مايوس پارکدا اوتورموشدوم، روزنامهني ورقلهييرديم، گؤردوم آگهي صحيفهسينده يازيبلار: »بدنين هر يـئرين آلـيريق« ائلهبيل دونـيانـي منه وئرميشديلر. تلفون ووردوم سوروشوردم قولاقدا آلـيرسيز؟دئديلر: بير نفر اونلارين موسسهسينه مراجعه ائلهييب، دئيير کي، قولاقلارينـين بيرين بير داوادا الدن وئريب، ايندي ائلهيه بيلمير قولاقسيز کيتاب اوخويا. سوروشدوم قولاغـين نه ربطي وار کيتاب اوخوماغا؟ دئديلر: مشتري قولاغـي بوندان اؤتورو ايستهيير کي عينکينين دستهسين قويا اونون اوستونه. تئز معامله باشا چاتدي. اوچونجو قـيزيم دا ار ائوينه گئتدي. ايندي توکلريمي اوزاتميشام، تؤکموشم باشـيمين اويان- بويانـينا، بيلينمير بير قولاغـيم يوخدور.بير ايلدن سونرا دؤردونجو قـيزيمين نؤوبتي‌ايدي. اوميديمي لاپ الدن وئرميشيديم. آمما دوز هامان وقت هامان موسسهدن منله تماس توتدولار کي، فوري بير سول اله احتياجلاري وار. سئوينجک اولدوم. داهي سوروشماديم نه اوچون ايستهييرلر. تئز گئتديم بيماريستانا، سول اليمي وئرديم، اونون پولو ايله دؤردونجو قـيزي دا اره وئرديم. ياخچي ال ايدي. بير بارماغـي سينميشدي، آمما ياخچي ايشلهييردي. او تاريخدن بويانا اوزويومو ساغ اليمين بارماغـينا تاخميشام و ايندي مشتري منيم اليمله نه ايشلر گؤرور- آللاه بيلير.بير ايلدن سونرا گره‌ک آخير قـيزيمي اره وئرهيديم. يـئنه هامان پولسوزلوق ايدي و هامان گرفتارچيلـيق. گلديم بوردا بو گؤلون قـيراغـيندا اوتوردوم و بدنيمين آيري يـئرلرينه فيکيرلشديم. آياغـي ساتماق اولماز ايدي. ماشـين آيناسيز و قاپيسيز يولا گئده بيلر، آمما تکرسيز يوخ. بورنومو‌دا اولمازدي ساتام، اوندا قيافهمي الدن وئرهرديم. ديليمي ده آلميرديلار، دئييرديلر چوخ ايتيدير. بير ديله احتياجلاري وار ايدي کي، يالاندان تعريف ائلهسين.بيلميرسيز نه مکافات ايله آخير قيزيمي اره وئرديم. او گئتدي ائو- ائشيگينين باشـينا.آمما ايندي من اؤزوم ائودن آوارا اولموشام. آرواديم مني ائوه يول وئرمير و دئيير من داهي نه اوميدله سن ايله ياشايـيم؟!!
بولگه لر سرويسي:بير باهار گونو، بير چيچکلي آغاجين آلتـيندا، لاله پارکـيندا، بير کيشي کي اليني کوتونون سول قولتوغونون جيبينه قويموشدور، نيمکتين اوستونده، بير کيشي ايله کي نظره گليردي تازا بازنيشسته اولوب دانـيشـيردي: