ياغيش دامجي‌لاري شوشه‌نين اوستونه ياغير
1397/12/13
بولگه لر سرويسي: ياغيش، شيديرغي ياغير. نودان‌لارين کؤپوکلنميش سويو، دؤشه‌مه‌نين چالا-چوخورونا دولور. دؤشه‌مه‌نين لاخلاميش کرپيج‌لري، يولدان کئچن‌لرين آياغي آلتيندا شاپپيلدادير.
آرخين سويو خيابانين اورتاسينا يول آچيبب. آرخين ايچينده‌کي زير- زيبيلي اؤزويله سوروب، خيابانين اورتاسينا آپارير.
قادين خيابانين قيراغيندا دايانيب، اؤتوب، کئچن تاکسي‌لره گئده‌جه‌يي آدرسي دئيير. شوتوين ماشين‌لار، خيابانين کيرلي سويونو اونون ياغيشدان ايسلانميش پالتارلارينا سيچرادير. ياش باشماق‌لاري، آياق‌لارينا آغيرليق ائدير.
نئچه آدديم ايره‌لي‌له‌يير. هردن بير گئري دؤنوب آرخايا باخير. گاهدان دا اَييليب، يئريه- يئريه، کناريندان سوووشان ماشين‌لارا گئده‌جه‌يي آدرسي دئيير.
وار گوجويله، آغ رنگلي بير پيکانا باغيرير: »مين تومن باغمئشه« پيکان اوندان اؤتوشوب بيرآز آرالي‌دا دايانير. شوفر، دالي دنده ايله قادينا ساري قاييدير. قادين آرخا قاپيني آچيب ايله‌شير.
ايسلاق پالتارلاري جانيني اوشودور. سيسله‌نيب بوغلانان گؤزلويونو، گؤزوندن آييرمادان يايليغي ايله سيلمک ايسترکن، گؤزو، شوفرين کؤينه‌يينه ساتاشير. ايسلاق وجودو، تپه‌دن ديرناغا گيزيلده‌يير. ماشينين ترلميش شوشه‌سيندن ائشييه باخير.
هئچ نه گؤرونمور. بير دفعه ده گؤزآلتي شوفرين کؤينه‌يينه باخير. اونون آت‌قويروغو ساچ‌لاريني گؤرونجه، جانينين گيزيلتيسي تيتره‌ييشه دؤنور.
ياواشجا قاپييا ساري سويروشور. پالتارينين يئنگي سي‌ايله شوشه‌ني سيليب، قاپينين قيفيلينا باخير. ندنسه غيرعادي بير شئي آختارير. شوفر آينادان قاديني سوزرک، بؤيرونده‌کي شوشه‌ني آشاغي ائنديرير.
ماشينين شوشه‌سيلن‌لري دايانمادان حرکتده، بير ساغا، بير سولا؛ گئديرلر، قاييديرلار. شوفرين ساري کؤينه‌يي تيکان کيمي‌قادينين گؤزونه باتير. او ايلدن بري ساري کؤينکلي بير کيشي گؤزونه دَيمه‌ييب.
آتاسي، توکان‌لا ائوين آراسينداکي کيچيک قاپيدان ائوه گيرر-گيرمز، بير ده قاييديب »ياريم ساعاتا گليرم. بير تيکه ناهار يئييم گليم. شولوخلوق ائله‌مه‌هااااا… چوخ دا هله-هوله يئمه،هاوا ايستي‌دي، ناخوشلارسان«
قادينين گؤزلريني شوشه‌سيلنين حرکتي‌ايله دولانديرير.
»کاشکي اليمي‌اوزالديب اونلاري دايانديرا بيلسه‌يديم…«،دئيه دوشونور.
شوفر، آينادا قادينا باخاراق، داشبوردداکي کاست‌لري اللشديرير. قادين ايسه اؤزونو گؤرمه‌مزلييه وورور. ماشينين ضبط صوتوندان موسيقي سسي قالخير.
»گؤزلرين آلدي مني
کمنده سالدي مني
گئتمه، گئتمه آي گؤزل يار
گئتمه، گئتمه…«
ياغيش دامجي‌لاري شوشه‌نين اوستونه ياغيب، گيرده- گيرده ايز بوراخير. ايزلر يوخا چيخديقجا، گيرده دامجي‌لار سو کيمي‌آشاغي سوزدوکجه، آيري دامجي‌لار گئنه ده شوشه‌نين اوستونه دوشور.
ايزلرين هر بيريسي بير گيردابدي دئيه‌سن، قاديني اوشاقليق خاطيره‌لرينين ايچينه چکير.»سا سا سا ساري کؤينک گئيميشدي!«
آتاسي تَر کؤينکلي آرا قاپيدان توکانا گيرميشدي. او ايسه الي ايله کوچه‌ني گؤستريب، بير باشا تؤوشهيه- تؤوشهيه باغيرميشدي:
»ساري کؤينک گئيميشدي… سا… سا… ساري…«
آتاسي آياق‌يالين کوچه‌يه قاچميشدي.
»بوغوردو مني… بوغوردو…«، دئيه-دئيه، آناسي‌نين قوجاغينا جومموشدو. قولاق‌لارينا سيرغا ائتدييي گيله‌نارلار ازيليب، سويو گؤز ياش‌لارينا قاريشميشدي. .
»سا ساااا ساري کؤينک… بوغوردو… اليني ديشله‌ديم… قيشقيرديم«
»باغيشلايين خانيم! اتوبانا دؤنمه‌لييم. خيابان‌لاري سو آليب. کئچمک ممکن دئيي«
»اتوباندان گئتمه‌يين«، دئمک ايسته‌يينجه، شوفر آرتيق اتوباندايدي. اتوبان چوخ ساکت گؤرونور. شوشه‌سيلن‌لر دورمادان گئدير، قاييدير… گئدير، قاييدير
ناهار اوستو هر يئر ساکت ايدي. گونش، توکانين شوشه‌سي بويونجا ايچري اوزانميشدي. او ايسه هؤروکلو ساچ‌لارلا، پيشخانين آرخاسيندا لاواشاني آغزيندا شاپپيلدادا- شاپپيلدادا، قولاق‌لارينا گيله‌نار سيرغالايير.
اوچ جوان اوغلان بيردن-بيره توکانا گيريشديلر. ندنسه آغزي‌نين دادي قاچيب، لاواشا الينده قورويوب قالدي.
»بيزه اوچ کانادا وئر!«، ساري کؤينکلي دئميشدي.
هميشه سويودوجونون قاپيسيني آچارکن، قاپييا باغلانميش قاپاق‌آچان سويودوجونون قاپيسينا توخونوب جينگيلده‌يردي. بو جينگيلتي، اونون يامان خوشونا گلردي. سويودوجونو آچيب، بير کانادا گؤتورر-گؤتورمز، آرخاسينداکي کؤلگه‌ني حسّ ائتميشدي.
ماشين ترمز ائله‌ييب داياندي. اوره‌يي گوپ‌ها‌گوپ قولاق‌لاريندا سسلندي. شوفرين کؤينه‌يينه دئييل، آينايا باخدي.
«ائله‌بيل پنچر اولدو!»، شوفر آينادا اونا باخاراق دئييب، قاپيني آچيب، يئره ائندي.
ياغيش شوشه‌نين اوستونده دم توتوب، سسي قاريشيب، موسيقي سسينه.
«بو گون من گؤروشه تله‌سيرم
ياغما ياغيش، ياغما ياغيش…»
اوتوباندان تکه-توک سوووشان ماشين‌لار، اووولدايا-اوولدايا اوزاقلاشيرلار. قادينسا خوفلانيب. بيلمير نه ائتسين.
شوفر ماشينين قاباق تکرلرينه باخير. سول تکري يوخلاييب، آرخايا، قادين اوتوران طرفه دؤنور. قادين‌ايسه کيرييب، آياقلاريني بئله ترپده بيلمير.
الينده کانادا گئري دؤننده، آرخاسينداکي کؤلگه، اليني اونون آغزينا باسيب قوجاقلاميشدي. او ايسه ال-آياق چاليب چابالاميشدي.
چيغيرماق ايسته‌ميشدي. ساري کؤينکلي آدام قورشاغيني آچماغا چاليشميشدي. قيزين گؤزلري کلّه‌سينه چيخميشدي. الينده‌کي کاناداني اونا تولازلاميشدي.
کانادا شوشه‌سي شاققيلتييلا توکانين اورتاسيندا سينميشدي. وار گوجو ايله اوغلانين اليني ديشله‌ميشدي… قيشقيرميشدي…
شوفر، قادينين اوتوردوغو طرفه ياخينلاشاندا، قادين قاپييا سيغيشيب، دسته‌يي برک-برک توتدو. هؤله‌سک قاپيني قيفيللادي. بدني بوز کسميشدي.
شوفر، نئچه دفعه آياغيني تکره چيرپيب، دئيينه-دئيينه ماشينين آرخاسينا کئچيب، صانديغي آچدي. زاپاس تکري چيخارديب، قادينين اوتوردوغو قاپينين کناريندا يئره آتدي.
قادين، باشيني اوتوراجاغا سؤيکه‌ييب گؤزلريني يومدو. ماشينين شوشه‌سيلن‌لري دايانمادان گئديب، قاييديرديلار. شوفرين ساري کؤينه‌يي جيم- جيلاق ، ايسلانميشدي.
منبع :