کيتابخانا

بولگه لر سرويسي: (بو اؤيکونو مجد جنابلارينا تقديم ائديرم.)

سعيد فيوضات

 بولگه لر سرويسي: (بو اؤيکونو مجد جنابلارينا تقديم ائديرم.)
– بو نه آبيرسيزليق‌دير؟ بو نييه بئله ايشلري گؤرور؟ اونا بونا زنگ ووروب آغلاماق نه‌دير؟ بو بيزيم آبريميزي تؤکور.
– فکر ائديرم بو چوخ اوخويوب، چوخ تخيل ائله‌ييب، يازماقدان بو گونه دوشوب.
– کاش چوخ اوخومايايدي، کاش چوخ يازمايايدي. آغريم اونون يازديقلارينا. کاشکا بير نورمال آدام اولايدي.
خانيميملا قارداشيمين بو دانيشيغيني ائشيدندن سونرا دونوخدوم. آلتيني اوخويان چاغيمدا اردبيلين عموم کيتابخاناسينا گئديب گلديييم ياديما دوشدو:
– بو کيتابي سنه وئره بيلمهريک.
– آخي نييه؟
– بير باخ اؤزونه، بير ده باخ بو کيتابا. کيتاب‌ سندن يئکه‌دير آخي!
– يئکه ده اولسا ايستيرم بو کيتابي اوخويام.
او بيريسي دئدي: »هله بو کيتابي گؤتور گؤر زورون چاتير؟«
باشقاسي دئدي: »هله دئنن گؤرک بو کيتابي نه جوره ائوه آپاراجاقسان! وانت توتاجاقسان؟«
بوتون کيتابخانا دا ايشله‌ينلر باشلاديلار گولمه‌يه. بيردن رئيسين اوتاغي‌نين قاپيسي آچيلدي. بير اوجا بويلو، گؤي گؤزلو و ساري رنگينده قالين بوغو ايلا ساققالي اولان کيشي ائشيگه چيخدي. ساققاليني چنه‌سينده قيرخميشدي، آما خط باشيسي‌لا بوغونو قاتميشدي بير- بيرينه. اونون ساققالي تولستوي‌لا داستايوسکونون رومانلاريني ياديما سالدي. عينا ويکتور هوگونون اوغلونا اوخشاييردي. او کيشي قاپيني آچيب سالونا کئچينجک هامي سوسدو.
کيشي دئدي: »نه خبردي آغالار؟«.
کيتاب‌ وئرن ويزويزي، قيويرما ساچلي کيتابخانا مامورو دئدي:»آقاي رئيس بو اوغلان اؤزوندن چوخ بؤيوک کيتاب‌ ايسته‌يير. قورخوروق بو کيتابي ائوه آپارا بيلمه‌ييب يولدا ساليب خاراب ائلهيه. اؤزو ده کي خزانه‌ده بو کيتابدان بير دنه واريميز.«
رئيس بير کيتابا بير منه باخيب دئدي: » آغا تشريف گتيرين منيم اوتاغيما «
بو سؤز ياغ کيمين جانيما ياييلدي. گئتديم رئيسين اوتاغينا. رئيس او ويزويزي ساچلي مامورا دئدي: »جناب سيز ده او کيتابي گتيرين قويون منيم ميزيمين اوستونه.«
کيتاب گلندن سونرا، رئيس بير کيتابا، بير ده منه باخيب دئدي:» سيز بو کيتابين هاميسيني اوخوياجاقسيز؟«
– بعلي
– نئچه‌ني اوخويورسوز؟
– يئدديني
– سوروشا بيله‌رم کي بوندان قاباق هانسي کيتاب‌لاري اوخويوبسوز؟
– ژول وئرنين کيتابلارينا وورغونام. داستايوسکي، بير ده تولستويون يازيلارينا دا. داها دوغروسو بئش کيتابي چوخ- چوخ ايستيرم. گوگل‌ين ايکي کيتابي، ياني: سروانين قيزي و تاراس بولباني، آنتوان چيخوفون اثرلري خصوصا: دوئل‌ي و ويکتور هوگونون نوتوردام دولا پاريسي، بير ده لئميزرابيني. هل البت بو فرانسه آدلاريني آتام منه اؤيره‌ديب.«
– بو کيتابي ائوه آپارا بيلرسن؟
– بعلي. من تکواندودا چاليشيرام، ياخشي گوجوم وار.
رئيس سيييرمه‌ني آچيب بير آز آغ کاغاذ منه وئريب دئدي:
– بير شرطله بو کيتابي وئريرم سنه. کيتابي اوخويوب اؤز نظريني بو کاغاذلارا يازاجاقسان. بير آي سنه واخت وئريرم.»
بيردن خانيميما دئديم: »کيتابي گؤتوروب گلديم ائوه«
– هانسي کيتابي؟
– عبدالعظيم رضايي يازان کيتابي دئييرم. ايرانين اون ايکي مين ايلليک تاريخي.
– يوز دؤنه او کيتابين ناغيلين منه دئييبسن! من ده سندن سوروشموشام کي ايلک تاريخي دؤوره هله داش چاتلاسا، يئددي مين ايلدير، به بو اون مين ايل هاردان چيخيب؟
ياخشي، ايندي گرک نئيله‌يم؟ گئنه ده گرک دونوخا گئدم، هه؟ حتما سيز ده منيم دونوخا گئتمه‌ييمي گودورسوز. يوخسا او فلش بک دئديييميز تکنيکي نه تهر يئرينه قوياجاغام؟ بيليرسيز نه وار؟ منيم آغزيمين دادي ده‌ييشيليب. قاباقلار من ده چوخلاري کيمي بو تکنيکه دادانقي اولموشدوم، آما داها بو جوره تکنيک مئکنيک منه قانيقليق وئرمير. بابام جاني! بيليرسيز نه وار؟ بئله من سيزه دئييم، ايندينين ايندي‌سينده ده(ياني چاغداش زماندا دا)، هرکيم اؤزوندن قاباقکي آد چيخاردان يازيچيلارين تئکنيکي يا نه بيليم يول يورداني ايلا يازسا، هامي دئيه‌جک احسن، عشق اولسون، کافکا نه تؤکوب بو ايسه ييغيشديريب. ياني بئله بير يازيچي‌نين کيتابين قيمتي اون تومن بير قيران اولوب و او بير قيران دا اينانديرماسي اولاجاق. نئيله‌ييم به؟ هله قوي خانيميم دانيشسين گؤرک نه دئيه‌جک؟
– بيليرسن نه وار؟ سنين بو دونوخا گئتمه‌ييندن يامان ايشلر چيخير.
– پئنديرين آرتيق قويما، دونوخا زادا گئتمه‌يه‌جهيم. اؤلمک اؤلمک‌دير خيريلداماق نه‌دير؟
خانيميم باشلاييب تئلفوندا بئله دئدي:
– گئجه گوندوز ايشي بو اولموشدو کي او کيتابي اوخويوب و نظريني يازا. آتاسي سحرلر ساعات دؤردده دوروب سيزه گؤره کي سياستدن اؤترو زندايدايديز محکمه بيناسينا گئديردي کي نوبت آليب قاضي ايلا دانيشسين. آخي محکمه ساعات يئددي‌دن ايشه باشلاييردي. بو دا ائله اوندا يوخودان دوروب باشلاييردي کيتابي اوخويوب يازماغا. آناسي دئييردي: نه قدر درس اوخويورسان! ايکي هفته‌دن سونرا کيتابي اوخويوب يازيلاريني حاضيرلادي. اوندان الي دولو گئتدي کيتابخانايا…
او ويز ويزي ساچلي کارمندين ميزينين بؤيروندن بوروخ وئريب دوز رئيسين اوتاغينا گئتمه‌يه باشلاديم. ساچي ويزويزي کارمند قيشقيردي:»هارا؟«
آتام دئدي:»سحر ساعات دؤرددن ماشينيمي پارک ائله‌ميشم محکمه‌نين قاباغيندا. ياخشي کي ماشيندا پيک‌نيک گازيم وار ايدي، يوخسا دونارديم. بير ده گؤردوم بير جوان اوغلان سويوقدان ديلي توتولوب. اونو سوخدولار منيم ماشينيما. پيک نيک الووونو گؤرن کيمي اليني سوخدو الووون ايچينه. ائله بيل الي قيزيشميردي. دئديم کي آي بالا اليندن گؤزتله، بير آز قيراقدا توت. الين يانير، آما اؤزون بيلميرسن. سيره‌نين ايلکي من ايديم. ساعات يئديده مني چاغيرديلار. ماشيندان دوشوب ديک قاضي‌نين اوتاغينا ساري گئتديم. قاپينين گودوکچوسو آرخادان قيشقيردي: »هارا؟« دئديم کي »گئديرم قاضي‌نين يانينا. به گؤرمورسن بو سيلياندا سحر ساعات دؤرد‌دن سيره‌ده‌يم؟» دئدي: بو گون قاضي يوخدور، آما ساوجي وار. دئديم کي »ياخشي قوي اونو گؤروم.« قاباغا دوشوب گئتدي کي مثلا مدعي العموم‌دان اجازه آلا. من ده آرخاسيجا گئديب ائله او قاپيني آچينجا کئچديم ايچه‌ري. مدعي العموم او گودوکچويه دئدي: »بو کيمدي؟« گودوکچو بير سؤز دئيه بيلمه‌دي. دئديم: »بو يازيق گودوکچونو قيناما! اونون آرخاسينا دوشموشدوم. قاپيني آچينجاق سوخولدوم اوتاغا.« دئدي: »ياخشي، سؤزونو دئنن.« دئديم: »نييه منيم اون بئش ياشيندا اوغلوما زيندان کسيبسيز؟« دئدي: »گوناهي وار.« دئديم: »گوناهي نه‌دير؟« دئدي: »گوناهيني راپورتلاردا يازيبلار. گومان آزريم مدرسه‌سينين قاباغيندا کومونيستلره باغلي اولان قازئتلر ساتيرميش.« دئديم: »ائله بو؟!« دئدي: »يوخ. کاسئت ده ساتيرميش. بير ده کي اؤزو اعتراف ائله‌ييب.« دئديم: »قاي مدعي‌العموم منه مدرک وئرين. راپورت نه دي؟ ايسته‌سن من ده نه‌قدر ايسته‌سن سنه گؤره راپورت گتيريم.« دئدي: »به اؤز اعترافي نه؟ دئيير من اکثريت فداييسييم. هله سنين اوغلونون فيکري اوتايدا‌دير.«  آردي وار

منبع :