مدرسهنين حيطي طلبه‌لرين آياق ايزلريله بزنميشدي.هاي-کوي سالان گنج يئني يئتمه‌لر زنگين سسي ايله سينيفلره دوغرو هجوم آپارديلار. اونونجي سينيفين طلبه‌لري حيطده قالمالي اولدولار. اونلارين ايدمان ساعاتي ايدي. حيطده اولوب و ايدمان اويرتمنيني گؤزله‌مه‌لي ايديلر. *** ائلدار معلم مدرسهنين ايدمان اويرتمنيدير. پئشه‌سيني جانلا- باشلا سئون بير معلم، طلبه‌لرين قاييغيسيني چکن بير انسان. هر زامان يئني بير فيکير و ايدئايلا طلبه‌لري مشغول ائديب و ايدمان ساعاتلاري بدن تربيه‌سيندن علاوه طلبه‌لرينين روح و دوشونجه انکشافينادا زمين ياراداري. اونلارلا ياخين مناسبتده اولوب، دوستلوق ائدردي. بير سؤزله اونلارين معنوي آتاسي ايدي. بوش واختلاريني مدرسه محيطينده اولاردي. سوباي اولدوغو اوچون چوخ واختيني مدرسه‌ده کئچيرردي. اوزاق کندلردن گلن کاسيب طلبه‌لردن ايکي- اوچونو حمايه‌سينه گؤتوروب اونلارين عالي تحصيل آلمالاريني و اونوئرستده اوخومالاريني تامين ائدردي. هئچ کيمه بللي دئييلدي کي نييه ائوليليک حياتي قورماييب و عؤمرونون بو واختينا قدر سوباي قاليب؟ معلم يولداشلاري ائوليليک حياتيندان صحبت آچاندا دئيردي: “منيم نه‌ييمه لازيم. ائله من بو اوشاقلاري بويودوب، باشا چاتديرسام، بسيمدير”. بئله‌ليکله دوغروداندا اونون حمايه‌سيله اوخويوب حکيم، مهندس، معلم و دولت آدامي‌اولان نئچه طلبه‌سي واردي کي، اوغول کيمي‌اونو سئويرديلر. ياي تعطيلاتي زاماني‌هاميدان چوخ اونون قوناغي گلردي. ائله واخت اولاردي کي ائوينده يئر اولماديغيندان مدرسهنين حيطينده بويوک اردو آلاچيغيني برپا ائديب، اورادا گئجه‌لرديلر. کند اهلي ده بونلارا قوشولوب بايرام کيمي‌گئجه‌ني- سحر ائدرديلر. دونن مدرسه تعطيل اولان زامان قار ياغماغا باشلادي.هاوا آيازيميشدي. دئمه‌لي بو قار شدتلي ياغيب هر طرفي بورويوب، طلبه‌لرين ايدمان ساعاتيني هدر ائده‌جکدي. بيردن- بيره آغلينا بير فيکير گلدي. آنبارا کئچيب اردو آلاچيغي‌نين ديرکلريندن دؤرد- بئشيني گؤتورب، سالونا چيخاندا رستم داييني گؤردو. رستم دايي مدرسهنين قوروقچوسو ايدي. اونو چاغيريب يانينا اونا کمک ائتمه‌سيني خاهيش ائتدي. ديرکلري اونا وئريب يئنيدن آنبارا قاييتدي. بو دؤنه الينده بيردنه کلافلانميش ايپ و دؤرد دنه بالاجا ديرک واردي.اونلار فوتبال ميدانچاسينا گلديلر. بالاجا ديرگين بيريني يئره سانجيب، ايپين اوجونو رستم دايي ساخلاييب او اوزون بير فاصله آرالانيب دارتلي ايپله فاصله‌ني تعيين ائديب ايکينجي بالا ديرگي يئره سانجدي. تکرار اوچونجو و دؤردونجو بالاجا ديرکلري ده اون متر آرالي او ايکي بالاجا ديرکلرله ياناشي سانجديلار. بويوک ديرکلريده ياخين فاصله‌لرله ائله سانجديلارکي هر ايکي بالاجا ديرکلري آييردي. ياني ايکي بالاجا ديرک ساغدا و او بيريسي ايکي بالاجا ديرک بويوک ديرکلرين سولوندا قالدي. رستم داييدان منتدارليق ائديب ساغوللاشديلار. *** ايدمانلاري اولان طلبه‌لر حيطده دولاشيرديلار. کيمي‌کيميسيني قار توپويلا ووروردو. کيميسي آياغينين ايزيني قارين اوستونده سير ائديردي. بيريسي ده قار اوستونده نقش ساليردي. زنگين وورلماسيندان ايکيجه دقيقه کئچمه‌ميش ائلدار معلم الينده دؤرد دنه کمر ايدمان حلقه‌سي و بير ده بوکولموش برزنت سالوندان حيطه چيخدي.هاميني توپلاييب، دئدي:»دوستلار، بوگون هر طرف قار اولماسينا باخماياراق، سيزي بير ماراقلي ياريش گؤزله‌يير. ايکي دسته‌يه بولونون. هر دسته بير نفر نماينده سئچسين. ياريشين قايداسيني ميدانچادا ايضاح ائده‌جم. آرخامجا« …معلم و طلبه‌لر گليب ميدانچايا چاتديلار. معلم الينده‌کي حلقه‌لرين بيريني بالاجا ديرکين محيطينده قارين اوستونه ائله قويدوکي بالاجا ديرک، حلقه‌نين مرکزينده يئرلشدي. فاصله آلاراق کناردان گئديب او بيري اوچ حلقه‌لريده عئيني حالدا بالاجا ديرکلرده يئرلشديردي. برزئنت پارچاني ايکي طلبه‌نين کمگي‌ايله بويوک ديرکلردن آسدي. بئله‌ليکله بالاجا ديرکلر آيريلديلار. معلم ياريشين قايداسيني آچيقلادي:دوستلار، ايکي دسته‌نين نماينده‌لري بيري ساغ و او بيريسي سول بالاجا ديرکدن باشلاييب اوزبه اوزونده‌کي اولان بالاجا ديرگه گئتمه‌ليدير. ايکي ديرکلرين فاصله‌سي برابردير. قايتماق و دؤنوب دالي باخماق اولماز. ايکي ديرگين آراسيندا سيزين ايزينيز قالير و هر کيم او ايکي ديرگين فاصيله‌سيني دوز و تئز گئدرسه او دسته غاليبدي. ايندي بئش دقيقه فرصتينيز وار. مصلحتله‌شين. مصلحتله‌شمه زاماني قورتاردي. ساغ دسته‌نين نماينده‌سي اورخان و سول دسته‌نين نماينده‌سي اوختاي ايره‌لي گليب معلمين يانيندا دوردولار. معلم اونلاري بالاجا ديرگين يانيندا دورمالاريني ايسته‌ييب، دئدي:»حلقه‌نين ايچينده ائله دورماليسينيز کي، بالاجا ديرک آياقلارينيزين آراسيندا اولمالي، و من فيت چالان کيمي‌عادي يئريشله اوزبه‌اوزده اولان حلقه‌نين ايچينده‌کي بالاجا ديرگه طرف آدديملاماليسينيز. هرکيم او فاصيله‌ني دوز و تئز گئدرسه غاليبدير«. اورخان و اوختاي يئرلريني توتدولار. فيت چاليندي. اوشاقلارين آلقيش صدالاري آلتيندا ياريش باشلاندي. معليم ساعاتين کورنومتري ايله واختي اولچوردو. اوختاي اوچ ثانيه تئز چاتدي و اوندان علاوه فاصله‌نيده دوز قطع ائتميشدي. اورخان اوچ ثانيه گئجيکمه‌سينه باخماياراق فاصله‌نيده دوز گئده بيلمه‌ميشدي. اورتادا ايري- اويري آياق ايزلري قويموشدو. بئله‌ليکله سول دسته ياريشي قازانديلار. معلم اورخاني ايره‌لي چاغيريب سوروشدو: »دوستلارا ايضاح ائله گؤرک نه باش وئردي.« اورخان دئدي:»من حرکته باشلارکن آياغيمين آلتينا باخيب چاليشيرديم کي فاصله‌ني دوز قطع ائديم. تاسف کي آلينمادي«. سونرا اوختايي چاغيريب و اوندان ايسته‌دي کي ايضاح ائتسين. اوختاي دئدي: »من اصلا آياغيمين آلتينا باخميرديم. دوردوغوم يئردن حرکته باشلاياندا يالنيز و يالنيز اوزبه‌اوزده‌کي بالاجا ديرگه باخاراق حرکت ائتديم. و آليندي«. معلم اونلارين ايکيسيله ده ال وئريب و اوزونو طلبه‌لره توتوب سؤزه باشلادي: “اوشاقلار بو گونکو ياريش بيزه بير حقيقتي آچيقلادي. اودا بودور کي هر بير انسان بير هدف توتمالي و او هدفه دوغرو حرکت ائتمه‌ليدير. اگر بيز بو يولدا فيکريميزي خيرداليقلارا يايينديريب و گونده‌ليک چتينليکلرله مشغول اولساق، دئمه‌لي هدفيميزدن ده يايينمالي اولاجاييق. و اولابيلسين لازيم اولان زاماندا هدفميزه چاتماياق. بوتون گؤردوکلريمز ايشلرده ياخشي نتيجه وئرمه‌سين. يوخ اگر بيز حرکت ائتدييمز زامان هر بير گؤردويوموز ايش زاماني هدفي اونوتماييب و هدفه دوغرو حرکت ائتسک، زحمتميز هدر گئتمه‌ييب و بيزي هدفيميزه چاتديراجاق….
بولگه لر سرويسي:دونن گئجه‌دن ياغان قار هر يئري آغارتميشدي.