دده قورقود ائپوسو پست مدرنيست رومان دوشونجه‌سينده

بولگه لر سرويسي:لاکن بو موتيوده بيزه بير جهت داها ماراقلي گلير. بئيرک اوغوزا دوشمن بايبورد قالاسيندا دوستاق اولسا دا، قالانين بيي‌نين قيزي بئله حساب ائدير کي، بئيرک گليب اونو حالالليقلا، يعني دده-بابا قايداسي ايله، آغساققاللارين ائلچيليي ايله آلا بيلر. يعني اوغوزا دوشمن قالانين بيي قيزي هانسيسا مناسبتلر زمينينده بئيره‌يه وئره بيلر. ک.عبدولله بو گيزلي دئتالي روماندا بئيره‌يين بايبورد قالاسي ايله گيزلي علاقه‌لرينه قدر انکشاف ائتديرميشدير.

يگانه اسماعيلووا

 کؤچورن: ائليار پولاد

بولگه لر سرويسي:لاکن بو موتيوده بيزه بير جهت داها ماراقلي گلير. بئيرک اوغوزا دوشمن بايبورد قالاسيندا دوستاق اولسا دا، قالانين بيي‌نين قيزي بئله حساب ائدير کي، بئيرک گليب اونو حالالليقلا، يعني دده-بابا قايداسي ايله، آغساققاللارين ائلچيليي ايله آلا بيلر. يعني اوغوزا دوشمن قالانين بيي قيزي هانسيسا مناسبتلر زمينينده بئيره‌يه وئره بيلر. ک.عبدولله بو گيزلي دئتالي روماندا بئيره‌يين بايبورد قالاسي ايله گيزلي علاقه‌لرينه قدر انکشاف ائتديرميشدير.
داستاندا »بکيل اوغلو ايمرانين بويو«ندا اووداکي بوتون بي‌لر بکيلين هنريني تصديق ائتسه‌لر ده، سالور قازان بکيلين هنريني انکار ائده‌رک، اونو آچيقدان-آچيغا تحقير ائدير. بکيل اونا دئيير: »ايگيدلر ايچينده بيزي بدنام ائديب، قوشقونوموزادک پالچيغا باتيردين« . اوودا يارالانميش بکيلين ائوينه دوشمن هوجوم ائدرکن بکيل‌له اوغلو آراسينداکي صحبت زاماني اوغولون دئديي: »قازان کيمدير؟ من اونون اليني اؤپمه‌ميشم« . سؤزلري ده بؤيوک کونفليکتدن خبر وئرير. سالور قازان بي‌لربيي ايدي. بکيلين اوغلو ايمران اونون اليني اؤپمه‌ميشديسه، دئمک، اونا اطاعت آندي ايچمه‌ميشدي.
بئله دئتاللار-»گيزلي اشاره‌لر« داستاندا چوخدور و ک.عبدولله‌نين اؤز علمي و بديعي ياراديجيليغينداکي يئني يوزوم کونسئپسيياسي داستانداکي محض بئله اشاره‌لرين آچيمينا اساسلانير. البته، دئمک اولماز کي، رومانين بوتون سوژئتي داستاندان گلن اشاره‌لرين دوزوموندن عبارتدير. اگر بئله دوشونسک، بو حالدا ک.عبدولله‌نين يازيچي استعداديني، بديعي‌لشديرمک قابليتيني، پوئتيک تخيل و فانتازيياسيني انکار ائتميش اولاريق. بو جهتدن رومان، اصلينده، داستاندان گلن گيزلي اشاره‌لرله يازيچي تخيلونون قوووشماسيندان يارانميش اوريژينال متن حادثه‌سي‌دير.
»ياريمچيق اليازما« روماني اوريژينال کومپوزيسييايا مالکدير. بورادا متنين اوچو بديعي، بيري علمي اولماقلا دؤرد افاده پلاني وار:
– بيرينجيسي، رومانين تحکيه‌چي قورقود دا داخل اولماقلا، اوغوزلاردان بحث ائدن اساس سوژئت پلاني؛
– ايکينجيسي، تحکيه‌چي قورقودون بيرينجي سوژئت پلانينداکي بوتون حادثه‌لره مستقل مناسبتيني افاده ائدن و متن‌ده معترضه ايچريسينده وئريلميش پلان؛– اوچونجوسو، روماندا زامانين سينکرونلاشديريلماسي (پارالل‌لشديريلمه‌سي) پرينسيپينه اساسلانماقلا شاه اسماعيل ختايي‌دن بحث ائدن سوژئت پلاني؛
– دؤردونجوسو، روماندا مؤلفين -ک.عبدولله‌نين بيرباشا اشتراکيني تامين ائدن و متن‌ده آيريجا شريفت(فونت) دوزومو ايله وئريلميش علمي شرح پلاني.
بيرينجي سوييه رومانداکي بوتون متن المنتلريني بيرلشديرن اساس خطدير. دده قورقود اؤزو ده بو خطين ايچريسينده بير اوبرازدير. لاکن دده قورقودون اساس سوژئت ايچريسينده بير اؤزل، بوتون سوژئتين ايچريسينده آوتونوم مکاني تشکيل ائدن تحکيه قاتي دا وار. بونلار دده قورقودون گرگين سوژئت حادثه لري ايچريسينده ديلينه گتيرمه‌ييب اوره‌يينده دوشوندوکلريندن عبارتدير. پوئتيک باخيمدان بونو داخلي مونولوق آدلانديرماق دوغرو اولار. ک.عبدولله قورقودون داخلي مونولوقونو اولدن آخيرادک فرقلي پلان سوييه‌سينده ساخلاميشدير. حتّي بو پلاني اساس سوژئت پلانيندان فرقلنديرمک اوچون اونو معترضه‌ده وئرميشدير. نمونه‌يه دقت ائدک.
اساس سوژئت پلاني:باييندير خان خاتونلارا اوزونو توتدو:– قيزلار، سيزه کيمدن دئيه‌ليم، هارادان سؤيله‌يه‌ليم، ترابزون مليي‌ندن سؤز آچاليم. ائلچيسي گلدي. بيزيم قانتورالي وار يا؟! اوندان شکايتچي ايميش. اوزون قضيه‌دير… آما مليک ترابزونون ايپه‌يي‌نين، بافتاسي‌نين سئچيب-سئچيب عنتيقيني، گؤز‌ليني گؤندرميش، ايندي صحبتيميزي ائده‌ليم، بيتيره‌ليم، سونرا قيلباش سيزي گؤتورر، گئدين، باخين، سئچين، هپسي سيزين اولسون. نه دئرسينيز؟– ساغ اول، خان بابا. مالين-دولتين توکنمه‌سين.
– ساغ اولاسان، خانلار خاني. سنين تايين-برابرين قالين اوغوز بير يانا، توم فاني دنيادا يوخدور، بيليرميسن؟ -باني‌چيچک دئدي«
آردي ايله قورقودون داخلي مونولوق پلاني:
(من دخي بو سؤزو اونوتماديم: »سنين تايين-برابرين فاني دنيادا يوخدور«. فاني دنيا ها. خاتوندا سؤزه باخ) .
قورقودون داخلي مونولوق پلاني آوتونوم مکان اولسا دا، اساس سوژئت پلاني‌نين ايچينده‌دير. بو باخيمدان، شاه اسماعيل ختايي‌دن بحث ائدن پلان تام مستقلدير. اساس سوژئته قفيلدن داخل اولور و اونونلا هئچ بير سوژئت-حادثه علاقه‌سي يوخدور. بو سوژئتين قيسا مضمونو اوندان عبارتدير کي، شاه اسماعيل، له‌له حسين واسطه‌سي ايله اؤزونه خيزر آديندا بير اوخشار (»دووينيک«) تاپديرير. خيزري او قدر مشق ائتديريرلر کي، او، بوتون دانيشيغي و داورانيشلاري اعتباريله ده شاه اسماعيلين اوخشارينا چئوريلير. شاه اسماعيل چالديران دؤيوشونده مغلوب اولاندا ياشاماغي معناسيز سايير. خيزري اؤز يئرينه قويوب بيردفعه‌ليک يوخ اولور.
روماندا تصوير اولونموش بو حادثه‌نين تاريخي شاه اسماعيل‌لا هئچ بير علاقه‌سي يوخدور. تاريخي منبعلر بو حادثه‌يه داير هئچ بير اشاره وئرميرلر. بو سببدن تنقيدچيلر ک. آردي وار

منبع :