باشماق تيکن بؤجه‌يي‌نين ماجراس

بولگه لر سرويسي: بير ياي گونو ايدي. هر گونه تاي، گونش خانيم دونياني ايشيق‌لانديران زامان، باشماق‌تيکن گؤزلريني اوغا- اوغا يوخودان اوياندي. يئري‌نين ايچينده گرنَشيردي، گؤردو چوخ سوسوز‌دور

زينت- تدين

بولگه لر سرويسي: بير ياي گونو ايدي. هر گونه تاي، گونش خانيم دونياني ايشيق‌لانديران زامان، باشماق‌تيکن گؤزلريني اوغا- اوغا يوخودان اوياندي. يئري‌نين ايچينده گرنَشيردي، گؤردو چوخ سوسوز‌دور. بو يان- او يانا باخدي، گؤردو سو يوخ‌دور. دوردو، قاناد چاليب اوچدو، گئتسين سو تاپيب ايچسين. اوچدو… اوچدو… يئتيشدي مئشه‌ده هميشه‌کي آغاجا. قوندو آغاجين بير بوداغينا. يام- ياشيل ياپراق‌لارين اوستونده اوتوران شئح دامجي‌لاريندان ايچدي، سوسوزلوغو قويدو. بيردن شئح مونجوق‌لاري‌نين بيري‌نين اوزه‌رينده گؤزو بير باشماق تيکنه ساتاشدي. هؤوله‌سک سلام وئردي:
-س… سل…سلام! من هئچ سيزي گؤرمه‌ديم، باغيشلايين!
اما هئچ بير جواب آلمادي. فيکره دالدي. اؤز- اؤزونه دئدي، بو کيم دير؟ نيه بس جوابيمي وئرمه‌دي؟! بير داها اوزونو باشماق تيکنه توتوب، دئدي:
– من سوسوزلاياندا گليب بو آغاجين ياپراق‌لاريندا اوتوران شئح‌ داملا‌لاريندان ايچيرم.‌ سيز ده سوسوزلاميسيز؟
يئنه هئچ بير جواب آلا بيلمه‌دي. »بو نئجه بير بؤجک‌دير؟!” –دئيه، کئچدي اوره‌يندن.
باخيب، گولدو بؤجه‌يه، بؤجک ده گولدو. “گل آرخاداش اولاق!”- دئدي، بؤجک ده “گل آرخاداش اولاق!”- دئدي. اليني اوزالتدي بؤجه‌يه، بؤجک ده اليني اوزالتدي. آما الي شئح داملاسينا ده‌يينجه، شئح داملاسي دا بؤجک ده يوخ اولدو.
باخدي گؤردو همن باشماق‌تيکن آيري شئح مونجوغوندا اوتوروب. گؤز تيکميشدي شکيله. بو هر اَدا چيخارديردي، او دا چيخارديردي. بيردن باشا دوشدو اؤز شکيلي‌دير دوشوب شئح اوستونه! آخي باشماق تيکن هئچ اؤزونو گؤرمه‌ميشدي. باشماق تيکن سئوينه- سئوينه دئدي:
-نه گؤزلَم آي آللاه! به! به! گؤزلره باخ، قاپ- قارا شَوه کيمي!، اوزه باخ، آي کيمي پاريلدايير! بورون دئمه، فينديق‌دير سانکي. دوداق دئمه، غونچادير دئيه‌سن…
باشماق تيکن بوي- بوخونونا باخيب، اؤزونو اوخشاييردي. ائله اؤزونو تعريف‌لرکن، بيردن گؤزو ساتاشدي قانادلارينا. ال- قولو سويودو. اومودسوزلاندي، گؤزلري دولدو، ايچيني چکيب، آغلادي. يئردن-گؤي‌دن شيکايت ائله‌مه‌يه باشلادي. او ايندييه‌دک قانادلاريني هئچ گؤرمه‌ميشدي؛ بير قانادي‌نين اوستونده اوچ دانا گؤزل قارا خال وار ايدي. قارا خال‌لار، قيرميزي ايپک قانادي‌نين اوستونده چوخ گؤزل گؤرونوردو. آما او بيري قاناديندا هئچ خال يوخ ايدي.
چوخ اوزولدو، قاش‌قاباغيني ساللادي. او حال‌دا گؤزل بير کپنک آخسايا- آخسايا، گليب باشماق تيکن‌ين ياخينيندا، قيسسا بير بوداغين اوستونه قوندو. باشماق تيکن باخدي گؤردو کپنه‌يين قانادي بير دانادير. تعجوب ايله اونا باخيب، بير سؤز سوروشماق ايستيردي. هله صحبته باشلامادان، گؤردولر بير چکيرتگه، حؤوصله‌سيز و دارغين، همن آغاجين آلتيندا دولاشير، اؤز- اؤزونه دئيير “من هئچ ايش اليمدن گلمير!”. اوچو دانيشيب، دردلشديلر. هره اؤز درديني دئدي. اورک‌لري غصه‌لي اوچ بؤجک يولداش اولدولار.
اونلار قرارا گلديلر او يئردن گئديب، باشقا يئرده ياشاسينلار. ائله بير يئرده کي، هئچ کس اونلاري گؤرمه‌سين. آخي اونلار اؤز- اؤزلريندن، اولدوقلاريندان اوتانيرديلار.
يولا دوشدولر. گئتديلر… گئتديلر… يئنه گئتديلر. هاوا بالا- بالا قاراليردي، بير چؤله يئتيشديلر. بيردن کپنک خانيمين رادارا بنزر اوزون بوينوزلاري بير سيچان بالانين آغلاماق سسيني ائشيتدي. گئديب اونا ياخين‌لاشديلار.کپنک سيچان بالادان سوروشدو:
-سيچان بالا نييه آغليرسان؟
سيچان بالا دئدي:
-آنامي ايتيرميشم. او مني يئل قووانا مينديرميشدي. ايپيني ده آغاجا باغلاميشدي. بيردن يئل اسدي، او قدر يئل قوواني او ال- بو اله آتدي کي، ايپين دويونو آچيلدي. يئل مني ده، يئل قوواني دا آغاج‌دان آييريب، سرعت ايله اوردان اوزاق‌لاتدي. ايندي بو قارانليق‌دا آنام هاردادير؟ مني نئجه تاپاجاق آخي؟!
چکيرتگه دئدي:
-آغلاما سيچان بالا! بير آز يات، آنان گليب، سني تاپار. من ده سؤز وئريرم آنان کيمي سنه لايلا چالام؛
“لاي‌لاي ائويم، ائشيييم،
قيزيل‌دان سون بئشييييم،
لاي‌لاي دئديم ياتاسان،
شيرين يوخو تاپاسان،
شيرين يوخو ايچينده
قيزيل گوله باتاسان!
سيچان بالا يوخلادي. باشماق تيکين اونون باشي اوستونده اوتوروب اوندان گؤز اولدو. چکيرتگه بيله‌سينه لايلا چالدي. کپنک ده بوينوزلاريني ديک توتدو بلکه سيچان خانيمين سسيني ائشيتسين. سيچان بالا سحره‌دک آناسيني يوخودا گؤردو.
سحره ياخين، کپنک خانم بير يانيقلي سس ائشيتدي. سس دئييردي:
“سيچان بالام هارداسان؟
بوران‌داسان، قارداسان؟!
سسين قولاغيمدادير،
گؤرمه‌ييم کي دارداسان!
هاردان گزيم من سني؟!
آختاريرسان سن مني؟!
دئنن آي بالام نئجه
گزيم سن‌سيز گولشني؟!
سن گئده‌لي بيليرسن،
نه گئجه‌م وار نه گوندوز.
آخير سني تاپارام
داريخما ناز بالام، دؤز!”
بيردن کپنک خانم سسه گلدي:
-سيچان خانيم! سيچان خانيم! گل بو يانا.
سيچان خانيم سسه ساري دؤنوب، گئدنده، گؤردو اوردا گؤزل- گؤيچک قارا خاللي قيرميزي بير شئي ترپَشير. دئدي بس قيرميزي بير گول‌دور. ياخينلاشيب گؤردو باشماق تيکن‌دير. کناريندا دا سيچان بالا ياتيب، يوخو ايچينده‌دير. سئوينجک بالاسيني قوجاقلادي. سونرا ياواش سس ايله باشماق تيکنه دئدي:
-واااي… سيزين نه گؤزل رنگيز وار! اوزاق‌دان سيزي گؤزل بير قيرميزي گوله بنزه‌تديم. ايندي گؤرورم طبيعت سيزي نئجه ده گؤزل بوياييب!
سيچان بالا اونلارين سؤز- صحبت سس‌لرينه يوخودان آييلدي. آناسيني گؤروب دونيالار قدر سئويندي. سيچان بالا آناسينا تعريف‌لدي:
-آنا، کپنک بوينوزلاري ايله مني تاپدي، چکيرتگه منه لايلا چاليب ياتيرتدي، باشماق تيکن ده سحره کيمي باش اوجومدا اوتوروب، مني تومارلادي.
بالا سيچان مهريبان بؤجک‌لري چوخ سئودييييني سؤيله‌دي. سيچان خانيم بالاسيني باغرينا باسيب، اوچ يولداش‌دان چوخلو تشککور ائله‌دي . سونرا دئدي:
-سيز کيمسيز، هارا گئديرسيز؟
بؤجک‌لر دئديلر:
-بيز گئديريک ائله يئره کي، هئچ کيم بيزي گؤرمه‌سين. بيزيميزين قانادي تايکئشيک دير، بيريميزين بير قانادي يوخ‌دور، بيريميز ده هئچ ايشه يارامير…
سيچان خانيم دئدي:
-سئويملي مهريبان بؤجک‌لر، بئله دئمه‌يين طبيعت‌‌ده هر وارليغين معناسي وار. منيم بير بؤيوک ائويم وار. هاميميزا اوردا يئر وار ياشاماغا. گلين گئدک هاميميز بيرليکده منيم ائويمده ياشاياق و هميشه بيري- بيريميزه يارديمچي و آرخاداش اولاق.
هاميسي قبول ائله‌ديلر و گئديب سيچان خانيمين ائوينده سئوينجلي ياشاديلار.

منبع :