دُنـيا گوزلـي
دُنـيا گوزلـي
1400/11/24
بولگه لر سرويسي: بيري وار ايدي، بيري يوْخ ايدي، محمّد آدلي بير کاسيب کيشي وار ايدي. گئدردي چوللردن تيکان قيراردي، داليندا بازارا آپاريپ، بئش شاهي‌يا وئرردي. بئش شاهيني دا وئريپ چورک آلاردي. چوْخ چتينلکله عائله‌سيني دوْلانديراردي. کيشي دُنيادان بِـزميشدي.
کوچوردو: شبنم_توحيدي
بولگه لر سرويسي: بيري وار ايدي، بيري يوْخ ايدي، محمّد آدلي بير کاسيب کيشي وار ايدي. گئدردي چوللردن تيکان قيراردي، داليندا بازارا آپاريپ، بئش شاهي‌يا وئرردي. بئش شاهيني دا وئريپ چورک آلاردي. چوْخ چتينلکله عائله‌سيني دوْلانديراردي. کيشي دُنيادان بِـزميشدي.
بير گون يئنه تيکان قيرميشدي، بازارا آپاريردي. آرادا بَرک يوْرولوپ، دئدي:– آي الهي، تيکان شَله‌سي منيم بئليمي يارا ائيله‌ييپ. من نئيله‌ييم؟ بير اولوم ده يوْخدو، اولوم، جانيم قورتارسين.
کيشي اوزانيپ، شَلهسينين يانيندا يوخويا گئتدي. بو زمان بير قوش گليپ، اوْنون شَله‌‌سينده يومورتدادي. يومورتا چوْخ گوزل ايدي. کيشي يومورتاني پادشاه اوْغلونا گوستريپ، دئدي:– بو گوزل يومورتاني ساتيرام.
شاهزاده يومورتاني آليپ باخدي، گوردو بو لَـعل‌دي، هيچ قيمتي يوْخدور.
کيشي ائله بيلدي کي، شاهزاده ظارافات ائيله‌يير، دئدي:– دورد يوز تومندن آشاغي وئرمرم.
شاهزاده دورد يوز تومن وئريپ، يومورتاني آلدي، دئدي:– بويله يومورتا الينه دوشنده، گتيريپ منه وئررسن.
هر گون قوش گليپ اوْنون شَلهسينين اوستونده يومورتلاييردي، اوْ دا آپاريپ پادشاهين اوْغلونا دورد يوز تومنه ساتيردي. گئت- گئده کيشي وارلاندي، بويوک آدام اولدو. اوْ، بوتون دنيا بازارلارينا گئديپ، آل‌وئر ائيله‌ييردي. بير گون قوش گليپ اوْنون شَله‌‌سينده يومورتلاياندا کيشي، قوشو توتوپ ائوينه آپاردي. کيشي سَفره چيخماق فکرينه دوشدو. خانيميسينا دئدي:
– خانيم، قوشون يومورتالاريني گونده آپاريپ، شاهزاده‌يه ساتارسان، هر يومورتايا دورد يوز تومن وئره‌جک.
محمّد کيشي سَفره چيخدي. هر گون قوشون يومورتاسيني شاهزاده‌يه، خانيم آپاريردي.
بير گون، ايکي گون، آخيردا احمد کيشي‌نين خانيمي، شاهزاده‌يه وورولدو. بير گون اورگيني آچيپ، اوْنا سويله‌دي:– شاهزاده، سنه وورولموشام، گرک منله ائولنه‌سن!
شاهزاده دئدي:– قوشو کسرسن، اورگيني، بويرکلريني يئييم، سوْنرا سنينله ائولَنرم.
خانيم راضي اوْلدو. ائوه گئديپ قوشون باشيني کسدي، پلوْوو دَمـه قوْيوپ، گئتدي شاهزاده‌ني چاغيرماغا. اوشاقلاري قازانين آغزيني آچيپ، اورگيني و بويرکلريني يئديلر. بلي، خانيم شاهزاده‌ني گتيردي. پلوْوو چکيپ، سُفره‌يه دوزدو. شاهزاده يئمَـگه باشلاياندا باخدي کي، قوشون اورگي، بويرکلري يوْخدور! سوْروشدو، اوشاقلار دئديلر:– بيز يئديک!
شاهزاده آياغا قالخيپ، دئدي:– اوشاقلاري اولدوررسن، قارينلاريندان قوشون اورگيني، بويرکلريني چيخاردارسان، يييرم، سوْنرا سنينله ائولنرم.
محمّد کيشي‌نين، خانيمي راضي اولدو. سوز وئردي کي، گئجه ياتاندا اوشاقلاري اولدورسون. اوشاقلار بونو ائشيتديلر. گئجه دوشن کيمي قاچيپ، باشقا بير پادشاهين اولکه‌سينه گئتديلر.
بونلار بير قبرستانليقدا ياتماق ايسته‌ديلر. بويوک اوْغلان »احمد« قارداشي »همّت«-ي بورادا قوْيدو. شهره چورک آلماغا گئتدي. گوردو آداملار بير يئره توْپلاشيپلار. بو دا گئتدي، گوردو شهرين پادشاهي اولوپ، اوْنون ايچون دولت قوشو اوچورورلار. دولت قوشو کيمين باشينا قوْنسا، اوْنو پادشاه قوْياجاقلار.
دولت قوشونو بوراخديلار. قوش گئديپ دوره ووردو، آشاغي ائنيپ احمد-ين باشينا قوْندو. احمد اوْغلاني دويوپ، قوْودولار. قوشو بير ده اوچوردولار. قوش يئنه گليپ، احمد-ين باشينا قوْندو. آخيردا اوْنو بير داما ساليپ، قاپيني باغلاديلار.
قوشو گينه اوچوردولار. قوش باجادان گيريپ، دامدا احمد-ين باشينا قوْندو. سوْروشدولار، گوردولر بو اوْغلان اوزوده پادشاه اوْلماق ايسته‌مير. گتيريپ اوْنو پادشاه قوْيدولار. پادشاه اوْلاندان سوْنرا، قارداشي تمام ياديندان چيخدي. اوْ، قبرستانليقدا قالان قارداشي، احمد-ي گوزلدي، اوْ گليپ چيخمادي. علاجسيز قاليپ، يوْلا دوشدو. اوچ گون يوْل گئدندن سوْنرا، گليپ شهره چيخدي. شهرين بازارينا گئتدي. بازاردا اوْلانلار هامي داغيليپ، گئتدي. بو تک قالدي. بونو بير تاجر گوردو. تاجر گوردو بو، غريب آدامدي، ائوينه قوْناق آپاردي. اوْغلان باشينا گلني تاجره دانيشدي. تاجر اوْنو اوْغوللوغا گوتوردو.
»همّت« اوْغلانين آياغي تاجره دوشدو. تاجرين قازانجي گونو- گوندن آرتماغا باشلادي. اوْغلانين باشي‌نين آلتيندان هر گئجه بير کيسه قيزيل چيخيردي. اوْغلان قيرخ گئجه‌نين، قيرخ کيسه قيزيليني گوتوردو، تاجردن ده چوْخلو قيزيل آلدي. باشقا بير شهرده بير دُکّان آچدي.
بير گون اوْنا دئديلر، فيلان يئرده بير دُنيا گوزلي وار. اوْ، اوزونون بير طرفيني گوسترير، هر کيم باخسا، يوز تومن وئرير.اوْغلان هر گون گئديپ، دُنيا گوزلي‌نين بير اوزونه باخير، يوز تومن وئريردي.
دُنيا گوزلي معطّل قالير کي، بو نئجه ايشدير، بو کيمدير کي، گونده منه يوز تومن وئرير، يئنه قورتارمير. بير گون اوْغلان يئنه گلدي، يوز تومن وئريپ، قيزين اوزونه باخاندا، قيز اوْنو ائوينه آپاردي. اوْغلان باخدي کي، دوْغرودان دا بو دنيا گوزلي ايميش.
قيز اوْندان سوْروشدو:– بو قدر وار- دولتي هاردان آليرسان؟
اوْغلان دئدي:– بير قوشون اورگيني يئميشم، هر ياتيپ، دوراندا باشيمين آلتيندا بير کيسه قيزيل اولور.
دُنيا گوزلي اوْنا ائيله يئمک وئردي کي، اوْغلان قوشون اورگيني قوسدو. دنيا گوزلي اوْ ساعت اورگي گوتوروپ، اوددو!
دنيا گوزلي هر ياتيپ دوراندا باشي‌نين آلتيندا بير کيسه قيزيل اولوردو.
اوْغلان هيچ تاجرين ائوينه ده گئتمه‌دي، باش گوتوروپ شهردن چيخدي. بير صحرايا چاتيپ، گوردو کي، اوچ درويش، اوچ شيء اوستونده ووروشورلار!
اوْغلان دئدي:– بو نه شيءدي کي، اوستونده دعوا ائيله‌ييرسينيز؟
اوْنا دئديلر:– شَـرّيميزي سن کس، کيم بو خالچانين اوستونده اوْتوروپ، »حضرت سليمان عشقينه« ديييب، هاراني ايسته‌سه، خالچا اوچار، هارا ايسته‌سه اوْنو اوْرا آپارار. فَسي (پَـر) باشينا قوْيوپ، هر کسي قامچي ايله وورسان، نه دئسم، اوْ، اولار. سُفره‌ني ده آچسان، بوتون نعمتلر اوستونده دوزوْلموش اوْلار.
منبع :