»18-جي حئکايه   گؤز…«بسم الله رحمن الرحيم دئمه‌ميش چيرمه‌لنديم کي يازماغا باشلييم. اؤز يانيمدا دئديم »قوي بونو بير يازيم الدن چيخسين سونرا اوتوروم او بيري ايشلريمي‌گؤروم«، باشدان سووما ادبياتيما گؤره اؤزومدن ده حئکايه‌دن ده، حئکايه جلسه‌سيندن ده، موضوعداندا اوتانديم. »جاماعات بئکار دئييل سنين باشدان سووما يازيلاريني اوخوسون  اوتان« دئديم اؤزومه. اوتانديغيمدان آرتيق گؤزون گؤزلرينه بيله باخا بيلمه‌ديم. باشيمي‌آشاغي سالديم. »دوزدو گؤزه گؤره يازماق سو ايچيم کيميدي سنه، اما بوجور حاقسيزليق ائتمک ده دوز ايش دئييل. سنه باخما قلمين گوجلودو، هله هله سنين کيمي‌يازار تاپيلماز، اما آدام گره بيرآز تواضع‌کار اولا، ائله اولمايا کي دووشان ايله توسباغا ماجراسي کيمي‌بيردن گؤزون آچاسان گؤره‌سن توسباغادان دا اودوزوبسان! ايندي کي گؤزه گؤره يازيرسان پس سن ده گؤزلريني قشه آچ ديقتله يازماغا باشلا» دئديم.ائله اوجور ياتديق يئرده اييليب يانيمداکي ليواني گؤتوروب دونن گئجه‌دن ايچينده قالميش سويوق چايدان بير قورت ايچيب، دريندن بير نفس آليب »هه، ايندي اولدو بااا، ايندي يازارام داي« دئييب، صحيفه‌نين باشينا گئتديم. صحيفه‌نين باشيندا يازديغيم »گؤز« کلمه‌سيني بولد ائلييب آشاغي سطيره گلديم.

قالديم بوش صحيفه‌يه باخا باخا، اللريم کيبورد اوسته قيفيللاندي. نه قدر چاليشديم عاغيلما بير زاد گلمه‌دي. گؤزلريم قارالدي. اتاق ائله بيل باشيما دولاندي. »اَه، يئنه فيشاريم دوشدو، آخي بير يوخودان دور، بير گؤزون آچ، بير دور اَل-آياغين يو، باش-گؤزن بير سرين سو ديسين سونرا گل اوتور نه ائليرسن ائله دااا« دئديم. يازماقدان قاچماق اوچون ياخشي بير باهانا تاپميشام کيمي، کامپيوتري تز يانيمداکي صندلين اوستونه بوراخيب آياغا دوردوم. چايدانين آلتين يانديريب توالته گئتديم. اَل-اوزومو يويا يويا دئديم »دوزدو دؤهدور دئييب سينوزيتيمه گؤره سرين سو ايله اَل-اوزومو يومويوم، اما سويو لاب دا بئله سرين ائلييجاغام بلکه بئينيمين گؤزو آچيلسين«. اليمي‌نئچه دفعه سرين سو ايله دولدوروب اوزومه چيرپديم. ياش اللريمي‌ساچلاريما چکيب اوزومه تؤکولن توکلري داليا وئرديم. سونرا گليب کابينتدن بير کيسه‌اي چاي گؤتوروب ليوانين ايچينه آتديم »بونو ايچسم، جانيم قيزيشسا، داي يازارام بااا« دئديم. قيزيشما سؤزونو ديليمه گتيرديکده بيردن ائله بير قيزيشما جانيمي‌آلدي کي دئديم ائله ايندي دي کي حالدان گئديم. تز اوزومو پنجره‌يه چاتديرديم. پنجره‌ني آچينجا سرين‌هاوا اوزومه ياش ساچلاريما ديدي. خوش بير حس ال وئردي. »بئله‌هااا دئديم، ايندي بيليرم نييه يازماغيم گلميردي، آدام گره اول نقشينين حيسسينه گئده با، گؤزلرين آچيب-آچماز دا حئکايه يازماق اولار آخي؟!« ‌پازلين ايتگين تيکه‌سين تاپميش کيمي‌سرخوش-سرخوش باشيمي‌پنجره‌دن ائشيه چيخارديب دريندن بير نفس آلديم. اکسيژن يئرينه دي اکسيد کربن بوغازيمي‌يارا يارا آشاغي گئتدي. رمانتيک حاليم درحال پوزولدو. »من ائله اَره گئتماغيمينان، هم رمانتيزمين هم ده بازارين عيني زاماندا گؤزونو چيخارتميشام دااا، هله اوتانميرام حييسه‌ده گئديرم« دئديم اؤزومه.هرچند فمينيستلر بو ائوليليگه »آغ ائوليليک« يا »ازدواج سفيد« دئييرلر، اما هر دفعه صحبتي اولاندا آنام شيناسنامه‌مين ايکينجي صفحه‌سين آز قالا گؤزومه سوخوب ديير »هاني با؟‌هاردا يازيب؟!« اوزونه جيددي باخيب دئييرم: »دئييرسن بس نييه آغ ائوليليک دئييرلر؟! چونکي آغ خودکارينان يازارلار اوخونماز، ‌اونا گوره! اونو اوخوماق اوچون اينسانين گؤزونده مخصوص اشعه‌لر اولماليدير« اوّل اينانسادا سونرا منيم شوخلوق ائله‌دييمي‌گؤروب داها دا عصبيلشر. »يوخ منيم مخصوص اشعه‌م يوخدو، سن آپار دئ ننم کوردو، قارا خودکارينان دئ يازسينلار ائله« دئيير. الينده اولسا منيم ده فمينيستلرين ده گؤزونو چيخاردار. يولداشيمين و آغ ائوليليگين مزيتلريندن نه قدر تعريفلسم ده، نه مني نه ده يولداشيمي‌گؤرجک گؤزو اولماز.پنجره‌ني باغلييب، اتاغا گئديرم. صحيفه‌ني آچيرام،»18-جي حئکايه، گؤز…«گؤز دئيينجه، قئين آنامين دَلمه گؤزلري ياديما دوشور. دئييرم الله ائلمه‌سين اوشاغيمين گؤزلري اونا چکسين. آنامين گؤزل رنگلي گؤزلري ايله توتوشدورورام اونون گؤزلريني. قديمدن دئييبلر قيزدا اوز، اوزده گؤز. يوخ سن الله، قيزيم اونا چکمه‌سين. اونون قيزيم قيزيم دئماغينا دئييل کي اؤزوم ائشيتميشديم تلفوندا يولداشيما دئييردي »اؤزگه قيزينا خاطير بيزي آتميسان«. اونون بو سؤزونو ائشيدينجه، کنديميزده کي دلي حسن ياديما دوشموشدو. حسني دلي اولدوغو اوچون آپاريب اوزاق بير کنددن ائولنديرميشديلر. خانيمينا دلي اولدوغونو دئمه‌ميشديلر. يازيق قيز گليب وضعيتي ائله گؤرونجه ايختياري اليندن چيخميشدي. آرتيق اَر اوشاق، عاييله‌ني بوراخميشدي.‌هانسي کيشي اوزونه گولسيدي گئجه‌ني اونلاردا کئچيردردي. آتام بير گون »حسن بس خانيمندان گؤز اول جاماعات داليسيجا پيس سؤزلر دئيير« دئميشدي. »آي حاجي، نه ائلياق آخي، ‌من اؤزگه قيزينا خاطير اؤزومو ناراحات ائليه بيلمه‌رم!« دئميشدي. آتام سويو سوزولموش ائوه دونموشدو. قئين آنام اؤزگه قيزي دئيينجه حسن ياديما دوشموشدو. لاب زهلم گئتميشدي آرواددان. »ياخشي ائوليليگيميزي قارا خودکارينان يازديريب سنله گؤز گؤزه اولمورام« دئميشديم اؤز يانيمدا.تلفونو گوتوروب يولداشيما يازيرام»سلام، بو هفته گؤزه گؤره يازاجاييق نه يازيم؟!«»سئوگي حئکايه‌سي ياز، قارا گؤزلره گؤره ياز ياز: کارا کارا گؤزلر اونا بونا باکيور، کيسکانيوروم…« آرديجا »اگر بيلدين بونو کيم اوخويوب؟!« يازميشدي.جواب وئرمه‌دن تلفونو قيراغا قويموشدوم، اؤز اوره‌ييمده »سنين ننه‌ن اوخويوب« دئميشديم.آرتيق عصبيلشمه‌يه باشليرام. بو قدر راحات سانديغيم بير موضوعنون قاباغيندا عاجيزلميشم.‌ سانکي سؤز بولاغيمين گؤزو توتولوب.باغداکي سو بولاغينين گؤزو توتولاندا بير آغاج گؤتوروب، سو گلن يئري دئشرديک. قاباغينداکي چوپلري، اوتلاري قيراغا وئرديکده سو بيردن آخيب گلردي. کوزه‌نين باشيني بولاغين گؤزونه داييب دولدورارديق. بلکه بو گون منه ده ائله بير چوپ لازيمدي،. دييسن بئينيمين گؤزونو ده بولاغين گؤزو کيمي‌زير زيبيل توتوب بو گون. اما هله کيم دئيير گؤزون بولاغي بئييندي؟! ياني‌هامي‌بئيني ايله دونيايا باخير؟! هئچ اينانميرام.بير چوخ آداملار قارينلاري ايله دونيايا باخارلار. اونلارين يئکه قارينلاريندا ايکي گؤز وار، هر زادي اونلار يئمک گؤزونده گؤررلر. داشدان يوموشاق نه اولسا ييرلر. دادين، مزه‌نين اونلارا هئچ فرقي يوخدو. چوخ آداملار دا وار گؤزلرينين بولاغي آغيزلاريدي. ايرمي‌دورد ساعاتا گؤزلري اينسانلارين گئيديکلرينده، يئديکلرينده، ائو ائشيکرينده دير. گؤردوکلريني سؤز ائلييب آخشام قونشولارا دييرلر. بعضيلرينين ده گؤزلري اورکلرينه باغليدير. اونلار تز عاشيق اولارلار،‌هارا باخسالار اوردا عشقدن بير نيشانه گؤررلر. بعضي اينسانلاردا وار دونيا وئجلرينه دئييل. دونيا داغيلسادا اونلار اؤز ايشلرينده‌ديلر ايستر توي اولسون ايستر ياس، ايستر لاب بئله اوچونجو دونيا ساواشي اولسون، بونلارين حاليندا هئچ فرق ائتمز، اونلارين داي گؤزلري‌هارا باغليديرکي بو قدر بِ خيالديلار، بيلميرم!ايندي منيم گؤزلريم‌هانسي گؤزلردندير؟! نه يئييمجيلم نه سوزباز، نه عاشيقم نه ده بِ خيال! اصلينده گؤزلريم بدنيمين‌هاراسينا باغليدير هئچ ده اونملي دئييل، هر‌هانسي گؤزونن يازيرام يازيم، آنجاق بو حئکايه‌ني يازيب قورتارماليام بو گون.»18-جي حئکايه  گؤز…«تلفونوم زنگ چالير، آنامين گؤزل گؤزلري تلفونون صحيفه‌سينه دوشوب… کامپيوترين گالريسيني آچيرام. آنامين شکيليني ووردون بوش قالميش صحيفه‌سينه سانجاقلاييرام. بعضي زادلار يازماغينان اولماز اونلاري آنجاق گؤرمک لازيمدي!