ستارخان ياشار
ستارخان ياشار
1400/10/12
بولگه لر سرويسي: ايچيمده غريبه بير حس واريدي، اورک سيخيتيسي و نيگرانچيليق کيمي بير شئي، بورا گلديگيم زماندان بري او تايدان هيچ خبريم اولماميشدي.
يازان: سامي سردار ملّي
تورکجه‌يه چئويرن: افسون_سلطاني_کلهر
بولگه لر سرويسي: ايچيمده غريبه بير حس واريدي، اورک سيخيتيسي و نيگرانچيليق کيمي بير شئي، بورا گلديگيم زماندان بري او تايدان هيچ خبريم اولماميشدي.
البته کي مندن سونرا بير چوخلاري دا اوردان بورا گلميشديلر، آنجاق اونلارين دا يا دئمه‌گه سؤزلري يوخ ايدي، يا دا سؤزلرينه گوونمک اولموردو. بو مدتده بير چوخ تانيشلارين بو تايا کؤچمه‌لري‌نين خبريني آلميشديم، آمما اونلاري دا تاپا بيلمه‌ميشديم کي، دوزگون خبرلري اونلاردان آلام.
باشيمي قاتماق ايچون اوچ عالِم يعني آخوند خراساني، شيخ مازندراني و ميرزا حسين تهراني‌نين منبرلري‌نين باشيندا اوتوروب قولاق آسارديم. اونلار اوچو ده مندن اؤنجه بورا گلميشديلر و چوخلو کرامت صاحبي ايديلر. آخوند خراساني دوغرودان دا آيدين دوشونجه‌لي و بيلگيلي بير عالِم ايدي. او زمان کي، شيخ فضل‌الله نوري مملکتين اداره ائتمه‌سي ايچون، قوه‌لرين اوچ يئره يعني قانون وئريجيليک، اجرا و محکمه‌يه بؤلونمه‌‌سيني، يئني‌چيليک و دوز يولدان جايماق ساييب، قيزلار ايچون مکتب آچيلماسينا قارشي گليردي، آخوند خراساني بو دوشونجه‌ده ايدي کي، اسلامي مملکتلرين گئري قالميشليغيني آرادان قالديرماق ايچون، يئني علملردن فايدالانيب، ائييتيم و اؤگرتيم مِتدلاري دگيشيلمه‌لي و مکتبلرده يابانجي ديللر اؤرگه‌ديلمه‌ليدير.
گاهدان دا معنوي آتام ثقه‌الاسلام ايله صحبت ائديب، دردلشيرديم. آمما بونلاردان باشقا بير دلخوشلوغوم يوخ ايدي. زمان- زمان دا برزخين گؤره‌ولي‌لري، دوسييام قيامت گونو ايچون حاضرلانسين دييه، مني سورغو- سوالا چکيرديلر. بو دنيا، مادي دنيادان چوخ فرقليدير. بوردا جسمين سو، يئمک و گئييمه احتياجي اولماديغينا گؤره اونلاري قازانماق ايچون چاليشماق گرکمير. آمما بوندان باشقا، بو دنيا حاقدا بيلگي وئرمه‌ييم ياساقلانميشدير.
زمان بئله‌جه گئچيب گئديردي. هامي باشقا بير عالمه گئتمک ايچون گونلري ساييرديلار. آمما من بو فکرده ايديم کي، بو يوز ايل بوردا اولدوغوم سوره‌جده اوتاي‌دا نَلر اولوب و انسانلار و توپلوم نه دورومدادير. گونلري بو شکيلده گئچيريرديم کي، بير گون ايگيد بير جوانلا قارشيلاشديم. بو گنج آدام ندنسه منه چوخ تانيش گليردي. بير آز دانيشديقدان سونرا من اونو تانيماديغيمي آنلاديم آمما اونون منيم حقّيمده چوخ بيلگيسي واريدي. بير- بيريميزله تانيشديق، او آذربايجان کندلري‌نين بيرينده تاريخ معلمي ايدي. اتومبيل چارپيشماسي سونوجوندا بورا گلميشدي. آدي عزيز و چوخ معرفتلي و عقيده صاحبي بير انسان ايدي. بو شخص چوخ قونولاردا بيلگيلي ايدي و اونونلا دانيشماق باشيمي قاتيب حاليمي ياخشيلاشديريردي. عزيز تورک، فارس و انگليس ديللريني چوخ گؤزل بيليردي و منيم ايلگيلنديگيمي گؤردوگونده ياواش- ياواش منه ده يازيب اوخوماغي اؤرگتدي. بير زماندان سونرا هر بير يازيني اوخويا بيليرديم. حاليم چوخ ياخشيلاشميشدي و اورک سيخينتيمي دوز‌لتمه‌گي باشارميشديم. بونو دوشونوردوم کي، مادي دنيادا اولان عدالتسيزليک مني و منه تاي بير چوخ انساني بيلگي و ساواد نعمتيندن محروم ائديب، بو دا بيزلرين، توپلومداکي ايکي اوزلو و شيطان صفت انسانلاري تانييب، اونلارين چيرکين آماجلاريندان خبردار اولماميزدان مانع اولموشدور.
حاليم چوخ ياخشيلاشدي. عزيز بيلگيلي و چاليشقان بير انسان اولدوغونا گؤره بوردا دا چوخ بيلگيلر توپلاميشدي. اونونلا بير چوخ قونودا دانيشيرديق. بيرگون منه بير سؤز سؤيله‌دي و او گوندن بري فکريم تماماً مشغول اولدو. او دئدي کي، بورداکي انسانلارا بعضي شرطلر آلتيندا مادي دنيايا قاييتماق ايذني وئريلير آمما شرطلرين چوخ آغير اولدوغوندان بو سفر هر کسه نصيب اولمور. دوغروسو من بو سفره گئتمه‌گه چوخ هوسلي ايديم و نه ائده بيله‌جه‌گيمه فکرلشيرديم. نهايتده ثقه‌الاسلام- ين يانينا گئديب، بو قونودا اونا سؤز آچديم. او دا خبري دوغرولادي آمما مندن اونو اونوتمامي ايسته‌دي. اونون دئديگينه گؤره گؤره‌‌وليلر هر کسه گئتمک ايذني وئرميرديلر. شرطلر چوخ آغير ايدي و بو سفره گئتمک ايسته‌ين بو قوشوللاردان چيخماماق ايچون سؤز وئرمه‌لي ايدي. اونا گؤره بير چوخلاري شرطلره اويغون اولدوقلارينا رغماً زحمتينه دگمه‌ديگيني سؤيله‌ييب گئتمکدن واز کئچميشديلر. آيريجا منه بو سفرين باشقا سفرلره تاي اولماديغيني وورغولاييب، اوردان قاييداندان سونرا حاليمين پيسلشمه‌سي‌نين و سيخينتيمين چوخالماسينين احتماليني وئريب، مني اوياردي.
اونون اؤيود- نصيحتلرينه رغماً منيم گئتديکجه هوسيم آرتيردي. اوندان منه يارديم ائتمه‌سيني ايسته‌ديم. نهايتده آقا سؤز وئردي، گؤره‌ولي‌لري تانييان عالِملرله دانيشسين. بير نئچه گون گئچديکدن سونرا گئته‌گيمه راضيليق وئرديلر. ايشلر تماميله دوز‌ليردي و من چوخ سئوينجلي ايديم. کريستال پاسپورت آلماغيم بير آز زمان آپاردي. اونون قوللانماسي بير آز چتين اولسا دا، نهايتده اؤرگشديم. بو مدتده عزيز مدام يانيمدا ايدي و منه يارديم ائديردي. او تايين اوضاع- احوالاتيندان منه بيلگيلر وئريب، گوونديگي دوستلاري‌نين بيري‌نين آدرسيني منه تعريف ائتدي. يول- يؤندمي منه اؤرگتميشديلر، قرار بونا ايدي کي، جيسميمين تورپاغا تاپشيريلديغي يئردن مادي دنيايا قدم قويام و يئددي گون سونرا همان مکاندان قاييدام. شرطلر و قوشوللار تماماً منه بيلديريلميشدي.
گئديش گونو گليب چاتدي، سونونجو ايش کريستال پاسپورتو ايشه سالماق ايدي کي، باش گؤره‌ولي واسيطه‌سييله گرچکلشدي . اونونلا برابر منيم باشيم گيجه‌ليب، گؤزلريم قارالدي و يئره دوشدوم. گؤزومو آچديغيمدا اؤزومو بؤيوک بير حيطده گؤردوم. قارانليق ايدي و تکجه آي اطرافا ايشيق ساچيردي. اوردا هيچ کيمسه يوخ ايدي. باشيم هله ده گيجه‌ليردي، بير نئچه دقيقه سونرا اؤزومو تاپديم، اطرافا باخديم؛ کناريمدا بير نئچه قبير داشي گؤرونوردو. ياخينيمداکي قبيرين باش يازيسي قارانليقدان دگيل، توز تورپاقدان و زمان سوره‌جينده‌کي ييپرانمادان دولايي چوخ چتين اوخونوردو:
“بو عاصي بنده ستار، اسلام عالِم‌لري‌نين وئرديکلري حُکملره گؤره، احمدي شريعتين احکامي‌نين اجراسي ايچون، جان، مال و ائولادلاريمدان ک
گئچديم کي، ظالم دولت عادل دولته چئوريلسين و حضرت سيدالمرسلين قانونلاري اسلام اهلينين مسلکي و يول يوندمي اولسون. »ستار«”“مجاهد مسلمان، حاج حسن قاراجا داغي‌نين اوغلو ستار-ين مقبره‌سي کي، آذربايجان ملتي‌نين اشغالچيلار و مشروطه دوشمن‌لري‌نين قارشيسينداکي دايانيش و دير‌نيشلرينه رهبرليک ائديب، سردار ملي آدينا لايق گؤرولموشدور و نهايت بير ع‍ُمر مبارزه و چالشماقدان سونرا 25 آبان 1293 گونش ايلينده فاني دنيايا وداع ائتميشدير…”
منبع :