کيتابخانا

بولگه لر سرويسي: » بو سؤزو دئييبن گولدو. گودوکچو ده گولدو. حيرصيمي يئمه‌ييب دئديم: «نه اعترافي؟ به منيم اوغلومون وکيلي هاردا؟ نه تهر جرات ائليرسيز کي بير اون بئش ياشيندا اوغلاندان اعتراف آلاسيز، اؤزو ده وکيلسيز؟« مدعي‌العموم بو سؤزلري ائشيدرکن گؤزلري کلله‌يه چيخيب دئدي: »نه وکيل؟ ايستيرسن شاه زماني کيمين بير تسخيري وکيل گتيرک کي اوغلونو ايکي قات محکوم ائله‌يه؟« دئديم:»آقاي مدعي‌العموم منه قانون اؤيرتمه. من سنين ياشين قده‌ر رئيس و معاون اولموشام. قانونو بيليرم. تسخيري وکيل يوخسوللارا گؤره‌دير. من اوغلوما وکيل توتا بيله‌رم. مدعي‌العموم بير آز منه باخيب گودوکچويه دئدي کي »بو کيشيني اوتاقدان سال باييرا.« بئناوا گودوکچو قاباغا گلمهدي. آما من پيتيمي آنلاييب اوتاقدان چيخديم. سونرا باشلاديم نامه يازماغا. بونلارين هاميسيني يازديم.

سعيد فيوضات

 بولگه لر سرويسي: » بو سؤزو دئييبن گولدو. گودوکچو ده گولدو. حيرصيمي يئمه‌ييب دئديم: «نه اعترافي؟ به منيم اوغلومون وکيلي هاردا؟ نه تهر جرات ائليرسيز کي بير اون بئش ياشيندا اوغلاندان اعتراف آلاسيز، اؤزو ده وکيلسيز؟« مدعي‌العموم بو سؤزلري ائشيدرکن گؤزلري کلله‌يه چيخيب دئدي: »نه وکيل؟ ايستيرسن شاه زماني کيمين بير تسخيري وکيل گتيرک کي اوغلونو ايکي قات محکوم ائله‌يه؟« دئديم:»آقاي مدعي‌العموم منه قانون اؤيرتمه. من سنين ياشين قده‌ر رئيس و معاون اولموشام. قانونو بيليرم. تسخيري وکيل يوخسوللارا گؤره‌دير. من اوغلوما وکيل توتا بيله‌رم. مدعي‌العموم بير آز منه باخيب گودوکچويه دئدي کي »بو کيشيني اوتاقدان سال باييرا.« بئناوا گودوکچو قاباغا گلمهدي. آما من پيتيمي آنلاييب اوتاقدان چيخديم. سونرا باشلاديم نامه يازماغا. بونلارين هاميسيني يازديم.
قارداشيم تلفوندا دئدي:
– هله او مدعي‌العموم زندانا گليب منه دئدي کي آتان بو قدر يازسا اونو دا گتيريب سنين يانينا سالارام.آتام دئدي:
– من بو سؤزو گؤتوروب يازديم يوخارييا. بير آيدان سونرا او مدعي‌العمومو گؤتوردولر…
او ويزويزي ساچي اولان کارمندين آغزي آچيق قالميشدي. دئدي:»بويورون ايچه‌ري«.
رئيسين اوتاغينين قاپيسيني آچيب کئچديم ايچه‌ري. دئدي: »انشااله گلمه‌ييبسن دئيه‌سن کي کيتابي باشا دوشمه‌ييبسن؟«
دئديم: »يوخ کيتابي اوخويوب نظريمي ده يازميشام. بو دا نظرلريم.«
رئيس يازديغيم کاغاذلاري گؤتوروب دقتله اوخودو. بيلميرم اوتوز يا قيرخ بئش دقيقه سوردو. منه دؤنوب دئدي: »آتان هاردا ايشله‌يير؟«.دئديم: »آموزش پرورشده. همان معارف اداره‌سي اولور«.
رئيس، تلفونو گؤتوروب تلفونچويا دئدي کي آتامين تلفونونو توتوب اونو باغلاسينلار. آتامين سسيني تلفوندا ائشيتديم. رئيس اؤزونو تانيتديريب سونرا دئدي: »سيزه تبريک دئييرم کي بئله بير ائولاد تربيت ائله‌ييبسيز. من اونا چوخ چتين بير کيتاب‌ وئريب و نظر يازماغيني ايستهميشديم. او اؤز ياشيندان چوخ بؤيوک نظرلر يازيب.« …رئيس بو تلفوندان سونرا دوروب مني ايشچيلرين يانينا آپاريب دئدي: »بو بالاجا کيشي هر زامان گلسه کيتاب‌ خزينه‌سينه کئچه بيلر.«
رئيس منه دؤنوب دئدي:– اوغلوم شاهنامه‌ني اوخوموسان؟
– بعلي اوخوموشام، اؤزو ده هاميسيني.
– اونو بيليرسن کي کياني شاهلار چينه ساري قوشون چکيبلر؟– بعلي. فردوسي دئييب: چو خاقان چين از دور بنگريد/ خروش سواران ايران شنيد/ پسند آمد و گفت اينت سپاه/ سواران مرد افکن و رزمخواه. ياني چين خاقاني اوزاقدان باخينجا ايران قوشونونو گؤردو. بيه‌نيب دئدي کي بودور ايران قوشونو. قورخماز آتلي ايگيدلر؟
– ماشاله دئ گؤروم رستمين آخيري نه اولدو؟
– گشتاسپ تزه بير دينه تاپيندي. رستم و بوتون عائله‌سيندن ايسته‌دي کي قديم دينلريني بوراخيب تزه دينه تاپينسينلار، آما رستم قبول ائتمه‌دي. گشتاسپ اسفندياري گؤندردي زابله کي رستمي يولا گتيرسن. اسفنديار رستمه دئدي کي»گلميشم سني الي قولو باغلي گشتاسپين يانينا آپارام.«رستم دئدي: که گفتت برو دست رستم ببند/ نبندد مرا دست چرخ بلند/ که من از گشاد کمان روز کين/ بدوزم همي آسمان بر زمين. »ياني کيم دئدي گئت رستمين اليني باغلا. منيم اليمي اوجا فلک باغلايا بيلمز من او آدامام کي ايسته‌سم، ياي کريشيمله اوخ آتيب گؤيي يئره تيکيرم.« رستم بيرينجي ساواشيندا اسفنديارا اوتوزوب سيغيندي سيمورغا و سيمورغ اونا اؤيرتدي کي نه ائله‌سين. او دا سيمورغ دئدييي کيمين ايکي باشلي اوخ‌لا ووردو اسفنديارين ايکي گؤزونه. رستمين عائله‌سي ياني زواره و فرامرز تؤکولوب اسفنديارين بالالارين اؤلدوردولر. بير دنه بهمن قالديکي اودا گشتاسپين يانيندا ايدي. رستم بونو بيليب دئدي کي: مبادا شود بهمنش تاجدار/ به ياد آورد خون اسفنديار. ياني اولماسين او گون کي بهمن پادشاه اولا و اسفنديارين قاني يادينا دوشه. اسفنديارين اؤلوم خبرين ايشيدن گشتاسپ ديغلاييب اؤلدو و بهمن پادشاه اولدو. بهمن زابلا گئديب هاميني اؤلدوردو. رستم قاچدي قارداشينين يانينا، شغادي دئييرم. اما او رستمه دوزاق قورموشدو. بير قويو قازميشدي. قويونو سونگو و شوشگولله دولدورموشدو. رستم دوشدو او قويويا، اما اؤلرکن ياي کيريشيني چيخارديب شغادي اوخلا آغاجا تيکدي.
– چوخ گؤزل سن بو حادثه‌ده نه گؤرورسن؟
– جناب رئيس، فردوسي اؤزو ده اعتراف ائدير کي فرامرزله زواره و رستم چوخ خدمت ائله‌ييبميشلر ايرانا، اما گشتاسپ زوران گوجن اونلاري ناموسا گير ائله‌ييبميش کي تزه ديني قبول ائله‌سينلر. اولا بيلردي دين و اينام آزادليغي وئره، اما بو ايشين آلاهي بير اوزو ده وار. گشتاسپ اؤز اوغلو اسفندياردان قورخوردو. اونون گوجونو زرير و ارجاسب اولاييندا گؤرموشدو. ديني بهانه ائله‌دي. اسفندياري رستمين اوستونه گؤندردي، چون بيليردي رستم اسفندياري اؤلدوره‌جک، شاه عباس کيمين کي بوتون ائولادلاريني اؤلدوردو. رئيسين آغزي آچيق قالميشدي، دئدي: »اما بو هميشه‌ليک اولماييب.«– منجه اولوب. من ائله قائم‌مقام و اميرکبير و مصدقين اؤلومونو بو افسانه‌ده گؤرورم. مملکته خدمت ائله‌ين اؤلمه‌لي‌دير.رئيس سوسوب باشلادي فيکيرلشمه‌يه…
ائله اوندا آتام ائوه کئچيب، اوستومه گلدي:
– بوندان بويانا تکجه درسي کيتاب‌لاريني اوخوياجاقسان!– نييه آتا؟
– رئيس کيتابخانا زنگ وورموشدو کي سن چوخ کيتاب‌ اوخويورسان. اولمايا ايستيرسن قارداشينين گونونه قالاسان؟خانيميم دئدي: بو بير ايله ياخين کيتابخانايا گئده بيلمه‌يير. ياواش- ياواش آتاسينين اودو سؤنونجک دوروب گئدير کيتابخانايا.
دئديم: – همان ويزويزي ساچلي ايشچينين ميزينين بؤيروندن سوووشوب کئچديم خزانهيه. ويزويزي ساچلي مامور، بو دؤنه ويزويزي ساققال دا قويموشدو. منه دئدي: »هوپ ائششک. هارا؟– ياديندا اولسا رئيس منه ايجازه وئريب کي خزانه‌يه گئدم.«ويزويزي ساچلي مامور، قاه قاها گولوب دئدي:– آي بئناوا، سن گؤردويون آغاجلاري کسديلر.
اوندان تئلفونو گؤتوروب ياواشجا دانيشدي. بير آز سونرا رئسين اوتاغيندان بير آلاهي آدام چيخدي. ساققال قويسا دا من اونو تانيديم، او منيم آنامين قوهومو ايدي. دئديم: » آقاي رئيس هاردا؟«دئدي: »اوندا قاباقکي رئيسين گؤزونون ايشيغي اولان چوخ کيتاب اوخويان اوغلان سنسن هه؟ هانسي کيتابي ايستيرسن؟
– ليستيم بودور.
ليستيمي آليب اوخويوب باشلادي قاه قاها گولمه‌يه. دئدي:– بو کيتابلارين هاميسي ممنوع اولوبلار، يوخسا ايستيرسن قارداشينين يانينا گئده‌سن؟
آرخامي چئويريب کيتابخانادان چيخيب، کيتابخانانين بؤيرونده اولان باغ مليده بير ساعاتدان چوخ اوتوروب گؤز قيرپمادان کيتابخانا بيناسينا باخديم.
خانيميم دئدي: او کي وار آغلايير. او زاماندان سونرا دا اونا، بونا درس وئرير. عوضينده اونلار دا آتالارينين ائو کيتابخاناسيندان کيتاب‌ گتيريرميشلر بونا…
دئديم: او زاماندان چوخ سوووشدو. بيرگون اؤز اوتاغيمدان چيخيب ائودن ائشييه چيخان کيمي آنامين سسيني ائشيتديم. گؤردوم آنام اؤز خانيم قوهوملاريلا دانيشير، قوهوملارينين بيري دئدي:– خبرين يوخودو، او قوهوموز کي کيتابخانادا تزه رئيس اولموشدو، هه، او قيزلارلا اوغلانلارين يئريني آييريب دئميشدي کي بونلار بير يئرده قالسالار ايچيندن بير ايش چيخار. او اؤزو بير قيزا ساتاشاندا توتولوب و اونو رئيس‌ليکدن گؤتوروبلر.«
ديليمه يالنيز بير سؤز گلدي: »آقاي رئيس!«  سون

منبع :