سيزليقدان بوغولورام
1398/10/15
بولگه لر سرويسي: پنجره‌دن سس گلدي. باشيمي‌چؤندرمکده دونوخدوم. آخي پرده‌لري چکميشديم! سحر ائرکن هر نه دن اول اونلاري چکميشديم قيراغا، آمما اوندا هئچ نه گؤرمه‌ميشديم.
ائشيک گؤرسنمير داها. آغ آپپاق، يوخ، بير آز توستولو؛ چنايدي يوخسا چيرکينليک. هر نه اولسايدي دايانميشدي پنجره‌نين داليسيندا، ايچري گيرمک ايسته‌ييردي. تلم تله‌سيک آياغا دوروب، آغزي بورنومو بير ماسکايلا اؤرتدوم.
بوغولتو گليردي منه. دئييرديم پس دونيا آخيرا يئتيشيب داها. اليمدن نه گلردي؟ اؤزومو بير بالاجا يئرده اوجا دووارلار ايچينده حيس ائتديم.
هاواسيزليقدان بوغولورام.هاردا اولدوغومو بيلميرم، تانيرام دا تانيميرام دا. قان اييي دولوب بورنوما. دانته دوزلدن جهنمه بتر اوخشايير. ائله اؤزودي. بوردا منيم ايشيمين آدي نه؟ ياخشي او گون مني ده اؤزو ايله بورالاردا گزديرميشدي، يوخسا نه جور تانيياجاغيديم. او گون هر قاتدا اولانلارين تاوانلاريندان خئيلک دانيشميشدي. منيم‌هانسي ايشيمين تاوانيدير، بوردا اولماغيم؟ گؤرن‌هانسي قاتيندايام؟ آستا ـ آستا ياديما دوشور. هه! يئددينجي ده، سالديرقانلارين قاتيندا. بو حسابينان اون بير قات آشاغي ائنميشم، دؤرد قات ائو، يئددي قات دا بورا. نه ايچون بورالاري منه گؤرستميشدي؟ اولمايا بيزيم ائوين آلتيندا دوزلديب بوراني؟ او گون دئميشدي، بو قاتدا بوتؤو آيريلارين حاققينا ال اوزادانلار يئرلشيبلر؛ بؤيوک قان تؤکن و ظولم ائيله‌ينلر ده بو قاتدا. منيمله اونلارين بير قاتدا اولدوغوندان شاشقينام.
بو قاتدا اولانلارين يئرلري بير ائنلي، درين چايدي. بو چايدا سو يئرينه قان آخير.هامينين باشي ايچري ده قالمالي، بيرينين حاققي يوخ باشيني بير ثانيه‌ده ائشييه چيخارتسين. چيخارتسا ايه‌ر نئچه يئرتيجي، ناغيل‌دا اولان حئيوانلاردان (ياري آت، ياري آدام) اونلارا جان آليجي اوخلار آتارلار.
اوره‌ييم آغرييير. بير گورولتولو سس گلير:
ائله بيليردين هر نه قالاجاق ائله يئرده. مه‌ير ده‌ده‌وين يوخسا اؤزووون مالين‌ايدي يئر اوزو. اليندن گلنه اسيرگمه‌ييبسن. زيبيل‌دن آياق قويانميرام يئره. کارخانالاريزلا آوتوموبيل‌لريزين توستوسوندن نفس دالي قاييدير. سدلرله قويولار طبيعتي لاپ هنجامادان چيخارديب،هابئله آغاجلارين کسيلمه‌سي، داغلارين سؤکولمه‌سي، درياچه‌لرين قوروماسي. ايکي و دؤرد آياقليلارا مه‌ير سن جان وئرميشدين کي جانلارين آلديراسان. ايندي گؤر آدام هر نه ائيله‌سه‌ده اؤزونه ائيلر. اينديسه قان اوددوردوقلارين تک، قان اودماغين گرکليدي.
چوخلاري اونون کيمين بوش يئرينه دانيشيب،هارا ديلي دانيشير؟ زورايله سؤزلرين بير يئره ييغا بيليرم اودا دانته‌نين سايه‌سينده. اوگون بوللوجا دانيشديرميشدي‌هاميسين. ائله بيلير منه قان اوددورماغينان هر نه دوزه‌له‌جک؟ اؤز اؤزومه دئيينيرم.
نفسيم داها چيخميردي. آغزيمي‌آچيب دريندن نفس چکنده، اؤسکورمه‌يه دوشدوم. بيرده پنجره‌دن ائشييه باخديم. چوخ داريخديريجي. ائشييه ده چيخا بيلميرديم. بير آز او حالدا قالديم، آمما کي اوتوروب ياس آيه‌سي اوخوماقلا نه دوزه‌لردي. واختيم دا يوخايدي. اؤزومه گليب بير آز فيکيرلشديم. بيردن چوخدان ائشيتديييم کپه‌نه‌يين قاناد چالماسي ياديما دوشدي. ايه‌رسه او قاناد چالماسي‌ايله بير آيري يئرده فيرتينا قوپارا بيلسئيدي، منيم کي پوفومون گوجو اوندان آز اولا بيلمزايدي. ايشيمي‌اعتبارلي توتماليديم، آيري يئرلرده اولان نئچه يولداشيما زنگ ووردوم، سنين بو ايشلريوين اليندن دئسه‌لر ده اونلارادا پوفله‌سينلر دئديم. پنجره-نين قيراغيني آچديم، اؤنونده دايانيب باشلاديم پوفله‌ماغا. پوفله‌يه‌رک آغاجلارا باخيرديم. چتينليکله گؤرسنيردي. بير آزدان آستا ـ آستا آغاجلارين نازيک بوداقلاري باشلادي ترپنمه‌يه. اوره‌ييم قيزينيب ايشيمه داوام ائتديم. دومان پنجره‌نين اؤنوندن دالي چکيليردي. پنجره‌ني بوتؤو آچيب داها پوفله‌ديم، آغاجلار داها ترپنديلر. بيردن بير زاد دا گلدي فيکريمه، يولداشلاريما يئنه ده زنگ ووردوم. دؤرد قاتي آشاغي ائنيب پوفله‌يه‌رک، آغاجلارين گؤوده‌سيندن ياپيشيب احتياطلا سيلکه‌لمه‌يه باشلاديم.
يئل بتردن اسيردي. گؤزلريمه اينانميرديم. دومان تاماميله دالي اوتوروردو.هاوا ايشيقلانيردي. بيردن آنا بابالاريميزا قيسقانديم، آمما ايشلرينين داوام ائديلمه‌سيني ده ايسته‌ديم. بو دؤنه تانيشلارين‌هاميسينا زنگ ووردوم، اونلارين‌هاميسي دا اؤز تانيشلارينا.
نئجه پس اونلار بؤيوک ايستکلري اولان، داريخديريجي زامانلاريندا، بير يئره ييغيشيب ساز چاليب، اوخويوب، آييني اوينارميشلار، ايسته‌ديکلريني آلمايينجا دا ائولرينه قاييتمازميشلار. ايسته‌ديکلريني آلا بيلمه‌سئيديلر ده بو دردي بيرليکده چکرميشلر. ائله ياخشي اولار چوخدان دا گؤروشمه‌ميشيک، دئديم.
چنايدي يوخسا چيرکينليک گئتميشدي، بلکه ده بيز باشارميشديک بو ايشي، کئشکه ائله گئدئيدي کي داليسينا دا باخانمايايدي. اولمايا بيردن تصادوفي‌هاوا آچيلميشدي. هر حالدا‌هاواني گؤروب اوره‌ييم آچيلدي.
تزه‌دن دؤرد قاتي قيوراق اوسته چيخديم. سئوينجک تلگراما گئديب تزه خبرلري يازماق ايسته‌ديم. ال تلفونوم اليمده دونوخدوم. تلگرامين خبرلري و شکيللري يالنيز دانته‌نين جهنمي، پوف و آغاج سيلکه‌لمه!!!
منبع :